1-3. Mang boch e deer ni ma fith e girdi’ u murung’agen e yam’? Mang e fulweg ni ma pi’ e pi yurba’ i teliw ko pi deer ney?

BOCH e deer eray nib ga’ fan ni ke bokum biyu’ e duw ni ma lemnag e girdi’. Pi deer ney e ba ga’ fan ngodad ni gad gubin ndemtrug ko gad chon mini’ nge gin ni gad be par riy.

² Fa binem e guruy e kad filed riy rogon nra yag e yafas ni manemus ngodad ni bochan fare biyul ni ke pi’ Jesus. Kud filed riy ni ke yiiynag e Bible ba ngiyal’ nra taw ngay ma “dab ku unim’.” (Revelation 21:4) Machane, ngiyal’ ney e ka be yim’ e girdi’. I gaar Solomon ni Pilung: “Piin nib fos e yad manang ni bay ra m’ad.” (Eklesiastes 9:5, BT) Yugu aram rogon ni gad ma guy rogon ni nge n’uw nap’an e yafas rodad machane ku gad ma lemnag ko mang e ra buch rodad u nap’an ni kad m’ad.

³ Nap’an nra yim’ be’ nib t’uf rodad, ma ma kireban’dad. Ma rayog ni ngad fithed ni nge lungudad: ‘Mang e be buch rok? Gur, be gafgow ko amith fa bay u bayang ni be matanagiydad? Rayog ni ngad ayuweged? Ma gur, ku rayog nda guyed bayay?’ Ra barba’ e  teliw ma rogon e fulweg rok ko pi deer ney. Boch e teliw e ma fil ko girdi’ nfaanra ba fel’ e ngongol ku be’ ma ra yan nga tharmiy, ma ra ba kireb e ngongol rok ma ra yan nga fithik’ e nifiy ni yima gafgownagey riy. Ma yu raba’ e teliw e ma yog nra yim’ be’ me yan ko giyow ko kan nge yan i par ngak pi girdien ni kakrom. Maku boch e teliw e ma yog nra yim’ be’ me yan nga ar ni ngan pufthinnag ngemu’ me fas bayay ni ke ngal’ ni yugu ban’en ara yugu be’.

4. Mang e ba taareb ko pi n’en ni ma machibnag e pi yurba’ i teliw u murung’agen e yam’?

⁴ Bay ban’en nib taareb ko machib ko pi yurba’ i teliw nem, ni aram e gad ra yim’ ma ka bay ban’en u fithik’dad ndabi yim’. Ba dake urngin raba’ e teliw, ni tin kakrom nge tin chiney ni ma machibnag ni demtrug rogon ma bay ban’en u fithik’dad ni ma par ni manemus nrayog ni nge guy, me rung’ag, me lemnag ban’en. Machane, uw rogon e re n’em? Ya faanra be maruwel e man’ey rodad ma aram e bay e thamtham nge lem rodad. Ma nap’an ni gad ra yim’ me tal e man’ey rodad ndab ki maruwel. Ere, dabiyog ni ngan thamiy ban’en min lemnag ban’en nfaanra ke tal e man’ey ko maruwel.

5, 6. Mang e be fil e Bible u murung’agen e yam’?

⁵ Manang Jehovah e n’en ni ma buch u nap’an nra yim’ be’, ya Ir e Sunmiy e man’ey. Manang e tin riyul’ u murung’agen e yam’ ma Thin Rok u Bible e be weliy rarogon e yam’. Ba tamilang ni be yog: Nnap’an nra yim’ be’ ma dakuriy ban’en rok ni kab fas. Yam’ e  ba math’ keru’ ko yafas. Piin ni kar m’ad e dabiyog rorad ni ngar guyed ban’en fa rrung’aged ara ra lemnaged ban’en. Dariy ban’en u fithik’dad nra par nib fas u tomuren ni kad m’ad. *

⁶ Tomuren ni yog Solomon ni piin ni yad ba fas e yad manang ni yad ra yim’, me yog ni gaar: “Piin nib yam’ e dariy ban’en ni yad manang.” I tamilangnag fan e re machib nriyul’ nem u nap’an ni yog ni piin ni kar m’ad e dabkiyog ni ngar t’ufeged ara ra fanenikayed be’, ya “dakuriy ban’en ni ngan rin’, ma dariy e tafinay, ma dariy e llowan’, ma dariy e gonop u [low ko yam’].” (Mu beeg e Eklesiastes 9:5, 6, 10.) Ku arrogon e thin ko Psalm 146:4 ni be yog nnap’an nra yim’ be’ ma ‘tin ni i tanomnag e ra mus.’ Girdi’ e ma yim’, ma nap’an nra yim’ be’ ma dakuriy ban’en rok ni ma par nib fas. Yafas rodad e chiney e bod e daramram ko kindal. Nap’an nra math fare daramram, ma ke math ni dakuriy.

7. Uw rogon ni weliy Jesus rarogon e piin ni kar m’ad?

⁷ I yog Jesus Kristus rarogon e piin ni kar m’ad u nap’an ni be weliy murung’agen Lazarus, ni be’ nib fel’ e thin rorow ni ke yim’. I yog ngak pi gachalpen ni gaar: “Fager rodad i Lazarus e ke mol.” Me lemnag pi gachalpen ni be mol Lazarus ni be toffan ya nge gol ko m’ar rok. Machane gathi aram e n’en ni be yog Jesus, ya be yog ni: “Ke aw e fan rok Lazarus.” (Mu beeg e John 11:11-14.) U roy e ke taarebrogonnag Jesus  be’ ni kem’ ngak be’ ni be mol. Gathi bay Lazarus u tharmiy ara fithik’ e nifiy ndabi math biid. Gathi ke yan i guy e pi engel ara girdi’ rok ni kar m’ad kakrom. Maku gathi ke fas ke ngal’ ni yugu be’. Ya ke yim’ ni gowa kari mol nder lik’ay. Ku bay bayay ni taarebrogonnag Jesus be’ ni kem’ ngak be’ ni ke mol. Nap’an ni faseg Jesus fachi pin ni fak Jairus ko yam’ me yog ni “dawori aw e fan rok ya be mol.”​—Luke 8:52, 53.

8. Uw rogon ni kad nanged nde sunmiy Got e girdi’ ni ngaur m’ad?

⁸ Gur, sunumiy Got e girdi’ ni ngaur m’ad? Danga’, ya sunmiyrad ni ngar pared ni manemus u fayleng. Bod ni kad filed faram ko re ke babyor ney ni tay Got fagal nsom’on e girdi’ nga lan ba paradis me pi’ e yafas nib flont ngorow. Baadag Jehovah ni tin nib fel’ e nge yag ngorow. Gur, bay reb e labthir nib t’uf pi fak rok ni baadag ni ngar pilibthirgad ngar m’ad? Ri dariy! Ere, Jehovah e ba t’uf pi fak rok ma baadag ni ngar felfelan’gad u fayleng ni manemus. Be yog e Bible ni gaar: “Ke tay [Jehovah] e manemus nga lanin’rad.” (Eklesiastes 3:11, NW) I sunmiydad Got ni gad baadag ni ngad pared ni manemus. Ere, ke bing e wo’ ngodad bayay ni nge yag ngodad e n’en ni gad baadag.

9. Mang e tay Jehovah chilen ngak Adam ndabi rin’? Mang fan nde mo’maw’ ni ngar folgow ko re motochiyel nem?

⁹ Ere, mang fan ni ma yim’ e girdi’? Ra ngad nanged e fulweg ko re deer ney ma thingar da lemnaged e n’en ni buch ko ngiyal’ ni baaram ni  taareb e pumoon nge taareb e ppin ni yow bay u fayleng. Be yog e Bible ni gaar: “Me gagiyegnag urngin mit e gek’iy nge tugul nib fel’ yaan ma be k’uf nib fel’ wom’engin.” (Genesis 2:9) Machane, me tay Got chilen taab n’en ngorow ndab rrin’ew. Yog Jehovah ngak Adam ni gaar: “Ra um koy wom’engin urngin e gek’iy ni ba’ ko re gi woldug ney, ma ke mus ni fare ke gek’iy ni ma tamilangnag an’uy ko tin nib fel’ nge tin nib kireb e dab mu koy. Thingar dab mu koy wom’engin. Ya rofen ni ga ra kay e ga ra yim’.” (Genesis 2:16, 17) Re motochiyel nem e de mo’maw’ ni ngar folgow riy. Ya boor ken e gek’iy u rom nrayog ni nge kay Adam nge Efa wom’engin. Faan yow ra fol ko re motochiyel nem ma aram e be m’ug ni yow be pining e magar ngak Got ni ir e ke pi’ urngin ban’en ngorow nib muun e yafas nib flont ngay. Ku ra m’ug ni yow be tayfan mat’awun e Chitamangirow nu tharmiy ma yow baadag ni nge gagiyegnagrow.

10, 11. (a) Uw rogon ni togopuluw e gal nsom’on e girdi’ ngak Got? (b) Mang fan nrib kireb nde fol Adam nge Efa?

¹⁰ Machane, rib gel e kireb riy ya fagal nsom’on e girdi’ e ra mel’egew ni ngar togopuluwgow ngak Jehovah. I non Satan ngak Efa u daken ba porchoyog ni gaar: “Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” Me fulweg Efa ni gaar, “Demtrug e re ke gek’iy  ni ba’ ko gi woldug ney ma ra gu wew wom’engin, ma ke mus ni fare ke gek’iy ni bay u lulukngun e re gi woldug ney e dab gu wew wom’engin. I gaar Got e dab gu wew wom’engin e re ke gek’iy nem, ara gu mathgow ngay; ya faan gamow ra rin’, ma gamow ra yim’.”​—Genesis 3:1-3.

¹¹ Me gaar Satan ngak: “Gathi gimew ra yim’. I yog Got e re bugithin nir ya manang ni gimew ra kay mi  gimew bod Got, me tamilangan’mew ngam nangew e n’en nib fel’ nge n’en nib kireb ni bod ir.” (Genesis 3:4, 5) Baadag Satan ni nge lemnag Efa nra fel’ rogon nfaanra kay wom’engin fare ke gek’iy ni kan tay chilen ndab ni kay. Rogon e thin rok Satan e bay mat’awun Efa ni nge turguy rok e n’en nib mat’aw nge n’en nde mat’aw, ma rayog ni nge turguy e n’en ni nge rin’. Ki yog Satan ni ke ban Jehovah ko fare thin ni yog nra yib wenegan nib kireb ni faan yow ra kay wom’engin fare ke gek’iy. Ere, mich e re thin rok Satan nem u wan’ Efa me t’ar boch i wom’engin fare ke gek’iy nge kay me pi’ boch nge kay e pumoon rok. Gathi kar kalgow riy ya yow manang ni kar rin’ew e n’en ni ke yog Got ndab rrin’ew. Nap’an ni kar kew wom’engin fare ke gek’iy ma aram e lem rorow ni ngar togopuluwgow ko fare motochiyel ni ke pi’ Got ngorow nde mo’maw’. Kar darifannagew e Chitamangirow nu tharmiy nge thin rok. Ri dabiyog i n’ag fan e n’en ni kar rin’ew!

12. Mang e ra ayuwegdad ni ngad nanged feni gel e kireban’ ni tay Jehovah u nap’an ni togopuluw Adam nge Efa ngak?

¹² Ra ngan susunnag ma susun nra uw rogon u wan’um ni faan ga ra chuguliy fakam nge ilal ma dabi t’ufegem me chel nge darifannagem? Ba mudugil ni rra kireban’um ngay. Ere, aygum lemnag gelngin e kireban’ ni tay Jehovah u nap’an ni togopuluw Adam nge Efa ngak.

13. Mang e yog Jehovah nra buch rok Adam u nap’an nra yim’? Mang e be yip’ e re thin nem fan?

¹³ Nap’an ni togopuluw Adam nge Efa ma dakuriy rogon ni nge tayrow Jehovah ndab kur m’ow. Ere kar m’ow ni bod rogon ni yog. Da ranow ko giyow ko  kan. Kad nanged e re n’ey ni bochan e n’en ni yog Got ngak Adam u tomuren ni ke pufthinnag ni gaar: “Ni ngongliyem ko but’, ere bay kum ngal’ ni but’ bayay.” (Genesis 3:19) I sunumiy Got Adam ko but’. (Genesis 2:7) Da i moy Adam u bang nib fas u m’on ko ngiyal’ nni sunmiy. Ere, nap’an ni yog Jehovah ngak Adam nra sul ko but’, ma be yip’ fan ni nge sul nge ngal’ ni but’ bayay. Ere, dakuriy e yafas rok ya ke sul ke bod e but’ nni ngongliy riy.

14. Mang fan ni gad ma yim’?

¹⁴ Faan gomanga de denen Adam nge Efa ma ka  yow ba fas e chiney, machane kar m’ow ni bochan e kar togopuluwgow ngak Got. Gad ma yim’ ni bochan e ke af e denen rok Adam ngodad. (Mu beeg e Roma 5:12.) Denen rok Adam e bod ba liliy ni ke af ngodad ndariy be’ nrayog ni nge pilo’ riy. Ma wenegan e denen e yam’. Ma yam’ e toogor rodad. (1 Korinth 15:26) Ri gad be pining e magar ya ke pi’ Jehovah e biyul ni nge chuwegdad rok e re toogor nem!

15. Mang fan nra fel’ lanin’dad ni faan gad ra nang e tin riyul’ u murung’agen e yam’?

¹⁵ N’en be fil e Bible u murung’agen rarogon e piin ni kar m’ad e ra fal’eg lanin’dad. Kad filed ni piin ni kar m’ad e darur gafgowgad ko amith ara kireban’. Dariy rogon ni ngan tamdag ngak e piin ni kar m’ad ya dabiyog ni ngar rin’ed ban’en nib kireb ngodad. Dabiyog ni ngan ayuwegrad maku dabiyog ni ngar ayuweged gadad. Dabiyog ni ngad nonad ngorad maku dabiyog ni ngar nonad ngodad. Boor e tayugang’ ko yurba’ i teliw ni yad ma yog nrayog rorad ni ngar ayuweged e piin ni kar m’ad. Aram fan ni piin ni ke mich e re machib nem u wan’rad e yad ma pi’ e salpiy ngak e pi tayugang’ nem. Machane, gad ra nang e tin riyul’ ma ra ayuwegdad ni nge dabi bannagdad e piin ni yad ma machibnag e pi thin ni googsur nem.

16. Mini’ e be gagiyegnag e machib u boor raba’ e teliw, ma uw rogon ni be gagiyegnag?

¹⁶ Ba puluw e machib ko ba’ rom e teliw ko machib u Bible fa danga’? Ba dake yooren raba’ e teliw e de puluw e machib rorad ko re machib nem. Mang fan?  Ya bochan ni Satan e be gagiyegnag e machib rorad. Ma fanay Satan e pi yurba’ i teliw ni googsur ni ngar micheged ngan’ e girdi’ ni yad ra yim’ ma bay ban’en u fithik’ i dowrad ndabi yim’ ni ma yan i par ko giyow ko kan. Ma fanay Satan e re machib ni googsur ney nge ku boch e machib ni googsur ni nge chafeg e girdi’ nga orel rok Jehovah Got. Uw rogon ni ma rin’ e re n’em?

17. Uw rogon ni kan kirebnag murung’agen Jehovah ko fare machib u murung’agen e gafgow ni manemus u fithik’ e nifiy?

¹⁷ Kad filed faram ni ma machibnag yu raba’ e teliw nfaanra ba kireb be’, ma nap’an nra yim’ me yan nga fithik’ e nifiy ni ngan gafgownag ni manemus. Re machib ney e be kirebnag murung’agen Jehovah ni ir e Got ni ma t’ufegey ma dabi gafgownag e girdi’ ni aram rogon. (Mu beeg e 1 John 4:16.) Ra uw rogon be’ u wan’um nra de fol fak me gechignag ni nge tay pa’ ko nifiy? Ga ra tayfan ma ga adag daken be’ ni aram rogon e ngongol rok? Ri danga’, ya dabisiy ni ga ra lemnag ni ir be’ nib kireb. Machane, baadag Satan ni nge mich u wun’dad ni ma gafgownag Jehovah e girdi’ u fithik’ e nifiy ni manemus!

18. Uw e yib fare machib riy ni ngan liyor ngak e piin ni kar m’ad?

¹⁸ Ku ma fanay Satan yu raba’ e teliw ni ngar machibnaged nnap’an nra yim’ e girdi’ me ngal’ ni kan, ma thingari tay e piin ni kab fas farad mu ur liyorgad ngorad. Rogon e re machib nem e piin ni kar m’ad kar ngal’gad ni kan e rayog ni ngar manged fager rodad ara pi toogor rodad. Boor e girdi’ ni ke mich e re machib ney ni googsur u wan’rad. Yad ma tamdag ngak e piin ni kar m’ad ma yad ma tay farad ma yad  ma liyor ngorad. Re machib ney e ba thil ko machib nu Bible ni be yog ni piin ni kar m’ad e bod ni yad be mol, ma yigoo Jehovah ni En ni Sunmiydad nge En ni Ma Ayuwegdad e ir e bin riyul’ e Got ni ngad liyorgad ngak.​—Revelation 4:11.

19. Mang boch e machib nu Bible ni ku ra tamilang u wan’dad ni faan gad ra nang e tin riyul’ u murung’agen e yam’?

¹⁹ Ga ra nang e tin riyul’ u murung’agen e yam’ ma ra ayuwegem ni nge dabki mich u wan’um e machib ni googsur ko pi yurba’ i teliw. Ku ra ayuwegem ni ngki tamilangan’um u boch e machib nu Bible. Nap’an nra mich u wan’um nder ma yan e piin ni kar m’ad ko giyow ko kan, ma ra riyul’ u wan’um e yafas ni manemus u paradis u fayleng ni kan micheg.

20. Mang deer e gad ra weliy ko bin migid e guruy?

²⁰ Kakrom e fith Job ni be’ nib mat’aw e re deer ni  baaray ni gaar: “Faanra yim’ be’, ma gur ku rayog ni ngki fas bayay?” (Job 14:14, BT) Rayog ni ngan faseg be’ ni ke yim’, fa? N’en ni be fil e Bible u murung’agen e re n’ey e rra fal’eg lanin’uy ni bod ni bay ko bin migid e guruy.