1. Uw e rayog ni ngad filed riy e pi n’en nra buch ko gabul nge langlath?

SANA kam yaliy boch e news u T.V. fa kam rung’ag ko radio ma ga lemnag ko, ‘Mang e ra buch ko re fayleng ney?’ Ma buch boch ban’en nib tomgin ni bay e riya’ riy, ma dariy be’ nrayog ni nge yog e n’en nra buch ko gabul nge langlath. (James 4:14) Machane manang Jehovah e pi n’en ni bay nga m’on. (Isaiah 46:10) Kab kakrom ma i weliy e Bible murung’agen e pi kireb nra buch e ngiyal’ ney, miki weliy e pi n’en nib fel’ nra yib ni dabki n’uw nap’an.

2, 3. Mang deer e fith pi gachalpen Jesus? Uw rogon ni pi’ Jesus e fulweg ko deer rorad?

² I weliy Jesus Kristus murung’agen Gil’ilungun Got nra chuweg e kireb u fayleng nge mang paradis. (Luke 4:43) Baadag e girdi’ ni ngar nanged e ngiyal’ nra yib Gil’ilungun Got. I fith pi gachalpen Jesus ngak ni lungurad: “Mang e pow ko ngiyal’ ni ga bay nge ngiyal’ ni ke chugur nga tomuren e re m’ag ney?” (Matthew 24: 3, NW) Me yog Jesus ngorad ni kemus ni goo Jehovah Got e manang e ngiyal’ nra yib tomuren e re m’ag ney. (Matthew 24:36) Machane i weliy Jesus boch ban’en nra m’ug u fayleng u m’on nra yibnag Gil’ilungun Got e bin riyul’ e gapas ni fan ko girdi’ nu fayleng. Pi n’en ni i weliy Jesus e be buch e ngiyal’ ney!

³ U m’on ni ngad weliyed fapi n’en ni be micheg ni gad bay ko “ngiyal’ ni ke chugur nga tomuren e re m’ag ney,” ma ngad weliyed murung’agen ba mahl ni dabiyog ni nge guy e girdi’ nga owcherad. Ya un mahl u tharmiy, machane wenegan e re mahl nem e bay rogon ko par rodad e chiney.

4, 5. (a) Mang e buch u tharmiy u tomuren ni ke Pilung Jesus? (b) Mang wenegan fare mahl nni tay u tharmiy nrogon ni be yog e Revelation 12:12?

⁴ Kad filed ko fa binem e guruy ni ke mang Jesus Kristus e Pilung ko duw ni 1914. (Mu beeg e Daniel 7:13, 14.) De n’uw nap’an nga tomuren ni mang Pilung u Gil’ilungun Got ma bay ban’en ni rin’. Be gaar e Bible: “Ma aram mi ni mahl u tharmiy! Me cham Mikael [ni reb e ngachal rok Jesus] nge tirok e engel ngak fare dragon [ni ir Satan ni Moonyan’], me cham fare dragon nge tirok e engel ngorad.” * Ke war Satan nge pi moonyan’ rok ko re mahl nem ma aram min tharbograd u tharmiy nga fayleng. I felfelan’ e pi engel ni bochan e kan chuweg Satan nge pi moonyan’ rok u tharmiy. Machane bayi gafgow e girdi’ nu fayleng. Ya be gaar e Bible: “Machane ri bayi gafgow e fayleng nge day! Ya ke yib fare Moonyan’ ngomed ni kari damumuw, ya manang  ndaki n’uw nap’an ni nge par.”​—Revelation 12:7, 9, 12.

⁵ Am lemnag ko mang e buch ko fare mahl nni tay u tharmiy. Bochan ni kari damumuw Satan ma ra gafgownag e girdi’ u fayleng. Ere, rayog ni ngam guy ni gadad be par u ba ngiyal’ nib gel e gafgow riy. Machane bayi m’ay e gafgow ya “dabki n’uw nap’an ni nge par” Satan. Mus ngak Satan ma manang nib ngoch nap’an ni nge par. Ma yog e Bible e “tin tomren e rran” ko ngiyal’ ney. (2 Timothy 3:1) Ri gad ba felfelan’ ya dab ki n’uw nap’an me chuweg Got Moonyan’ u fayleng! Ere, ngad weliyed boch ban’en ni be yog e Bible nra buch ko ngiyal’ ney. Pi n’ey e ma micheg ni gad bay ko tin tomuren e rran ma dabki n’uw nap’an ma ra pi’ Gil’ilungun Got e flaab nga fayleng ni fan ngak e piin nib t’uf Jehovah rorad. Som’on e ngad weliyed aningeg yang ko fare pow ni yog Jesus nra m’ug ko ngiyal’ ney.

6, 7. Uw rogon ni ke lebug e thin rok Jesus u murung’agen e mahl, nge uyungol e chiney?

⁶ “Ya bay reb e nam me cham ngak reb e nam, ma gin nsuwon reb e  pilung e bayi mahl ko gin nsuwon reb e pilung.” (Matthew 24:7) Nap’an fa raay i duw ni ke yan ma bokum milyon e girdi’ ni kar m’ad ni bochan e mahl ni yibe tay. Be’ nu Britain ni ma yoloy e chep ko girdi’ e ke gaar: “Nap’an fapi duw ni 1901 nge mada’ ko 2000 ma ireram e pi duw nri boor e girdi’ ni kan thang e fan rorad ni ka nap’an e chep ko girdi’. . . . Ba chugur ni nge gubin e duw u lan e re raay i duw nem ni un mahl nib gel. Kemus nri in e duw e gathi ri un mahl.” Bay reb ulung ni ka nog e Worldwatch Institute ngay ni gaar: “Boor e girdi’ ni kar m’ad ko pi mahl ni un tay u lan e re raay i duw nem ya ke mun dalip yay ngay urngin e girdi’ ni kar m’ad ko pi mahl ni ka nap’an Jesus nge mada’ ko duw ni 1899.” Ke pag 100 milyon e girdi’ ni kar m’ad ni bochan e mahl ni ka nap’an e duw ni 1914. Gad manang gelngin e kireban’ ni ma tay be’ u nap’an nra yim’ be’ nib t’uf rok u nap’an e mahl, machane ba mo’maw’ ni ngad nanged gelngin e kireban’ nge amith ni be tay bokum milyon e girdi’ ni bochan urngin e girdi’ ni yad be yim’.

⁷ “Ma bay i yib e uyungol.” (Matthew 24:7) Ke yog e piin ni yad ma  fil murung’agen e ggan ni kari yoor e ggan u lan fa 30 i duw ni ke yan. Machane, ka bay e uyungol ni bochan e der gaman e salpiy ko girdi’ ni ngar chuw’iyed e ggan ngay ara dariy e binaw rorad ni ngar wolduggad riy. Bay boch e nam ni ke pag reb e bilyon e girdi’ riy ni puluwrad u reb e rran e reb e dolla ara ba lich ko reb e dolla. Ma ba ga’ ni pi girdi’ nem e yad ma yim’ ko bilig u gubin e rran. Ke yog fare ulung ni World Health Organization ni gonap’an lal milyon e bitir ni yad be yim’ u gubin e duw ni bochan e der fel’ e abich rorad.

8, 9. Mang e be micheg ni ke lebug e thin rok Jesus u murung’agen e durru’ nge liliy?

⁸ “Ma gubin yang ni bay i yib e durru’ nib gel riy.” (Luke 21:11) Be yog e piin ni ma fil murung’agen e but’ u Meriken ni yibe lemnag nra reb e duw ma sogonap’an 19 e durru’ nra i yib. Ma pi durru’ ney e rib gel gelngin nrayog ni nge kirebnag e naun me tareg e but’. Gubin e duw ni be yib e durru’ nib gel nrayog ni nge buthug e naun. Rogon ni ke m’ug u babyoren boch e durru’ e ka nap’an e duw ni 1900 ma boor ko l’agruw milyon e girdi’ ni ke yim’ ni bochan e durru’. Rogon ni  ke yog ba ken e babyor e: “Buchuuw e girdi’ e ke yag ni ngan ayuweg e yafas rorad ni bochan fapi masin nib beech ni be yog murung’agen e durru’ ni bay yib.”

⁹ “Ma gubin yang ni bay i yib e liliy nib machreg ni ma af ko girdi’ i yan.” (Luke 21:11) Be mon’og e tafalay i yan, machane ka be gafgow e girdi’ ni bochan boch e m’ar ni ke n’uw nap’an nge boch e m’ar ni kab beech. Bay reb e babyor ni be yog ni bay 20 mit e m’ar nib muun e safrit nge m’ar ko neng ngay, nge m’ar ni bay ko ran nge yugu boch e m’ar. Maku be sum boch e m’ar nib mo’maw’ ni ngan pirieg e falay riy. Ka bay gonap’an 30 mit e m’ar ni ka fini sum. Ma boch e pi m’ar nem e dariy e falay riy ma yima yim’ riy.

10. Uw rarogon e girdi’ ni ga be guy e ngiyal’ ney nrogon ni be weliy e 2 Timothy 3:1-5?

¹⁰ Ke weliy e Bible u m’on riy e n’en nra buch u fayleng ko tin tomuren e rran, miki weliy nra thil rarogon e girdi’. I tamilangnag apostal Paul rarogon e girdi’. I yog ni gaar: “Tin tomren e rran e ri bay  mo’maw’ ni ngan par nrogon e tin riyul’ ni girdien Kristus.” (Mu beeg e 2 Timothy 3:1-5.) I yog Paul ni

• bayi par e girdi’ ni ke mus ni yad e yad be lemnagrad

• kari gel e chogow rorad

• dab kur folgad rok e gallabthir rorad

• dab kur pininged e magar ngak be’

• dab kur runguyed e girdi’

• yad ba damumuw

• bayi t’uf e fafel rorad me tomur Got u wun’rad

• bay ur dake yad be liyor ngak Got, machane bay ra pied keru’rad nga gelngin

11. Mang e be yog e Psalm 92:7 nra buch rok e piin ni yad ba kireb?

¹¹ Aram rogon e girdi’ u lan e binaw rom, fa? Dariy e maruwar riy ni bay e girdi’ nib kireb e ngongol rorad u gubin yang. Re n’ey e be tamilangnag ni dabki n’uw nap’an ma ra rin’ Got ban’en, ya be yog e Bible ni: ‘Piin kireb e lem rorad e yad ra ilal ni bod e pan, ma piin yad ma ngongliy e kireb e yad ra mon’og; machane bay ni thirifrad u but’.’​—Psalm 92:7, BT.

12, 13. Uw rogon nra “ga’ e llowan’ i yan” ko “ngiyal’ ni ke chugur nga tomuren e re m’ag ney”?

¹² Riyul’ ni ke yoor e gafgow ko tin tomuren e rran ni bod rogon ni ke yog e Bible. Machane bay boch ban’en nib fel’ ni be rin’ e piin ni yad ma liyor ngak Jehovah.

¹³ “Ma bay i ga’ e llowan’ i yan.” Ereray e thin rok Daniel u lan e Bible ni be weliy murung’agen e tamilangan’ u murung’agen Got. Wuin e ra buch e  re n’ey? Ra tabab ko “ngiyal’ ni ke chugur nga tomuren e re m’ag ney.” (Daniel 12:4, NW) Ka nap’an e duw ni 1914 ma ke ayuweg Jehovah e piin ni yad baadag ni ngar pigpiggad ngak ni nge tamilang e thin ko Bible u wun’rad. Kar nanged e tin riyul’ u murung’agen e ngachal rok Got nge tin nib m’agan’ ngay, nge murung’agen e biyul rok Jesus Kristus, nge rarogon e piin ni kar m’ad nge murung’agen e fas ko yam’. Miki fil e piin ni yad ma liyor ngak Jehovah rogon ni ngar pared nib fel’ e ngongol rorad mi nog e sorok ngak Got ni bochan. Ma ki tamilang u wun’rad rogon nra yal’uweg Gil’ilungun Got urngin e magawon u fayleng. Ere, mang e yad ma rin’ ni bochan e kar filed e pi n’ey? Re deer ney e be tamilangnag yugu reb e thin ko profet ni ke lebug ko tin tomuren e rran.

14. Uw ga’ngin yang ni yibe machibnag fare thin nib fel’ riy ni murung’agen Gil’ilungun Got e ngiyal’ ney? Mini’ e piin ni be machibnag fare thin nib fel’?

¹⁴ “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng.” Ireray e n’en ni yiiynag Jesus Kristus u nap’an ni be weliy murung’agen e “ngiyal’ ni ke chugur nga tomuren e re m’ag ney.” (Mu beeg e Matthew 24:3, 14. *) Ke pag 230 e nam ni yibe machibnag fare thin nib fel’ riy ni murung’agen Gil’ilungun Got. Ma ke pag bokum  miriay mit e thin ni yibe machibnag murung’agen Gil’ilungun Got riy, nge n’en nra rin’, nge n’en ni thingar da rin’ed ya nge yag e flaab ngodad. Bokum milyon e Pi Mich Rok Jehovah ni yad ba pasig i machibnag fare thin nib fel’ ni murung’agen Gil’ilungun Got. Pi Mich Rok Jehovah e kar bad u “gubin e nam, nge ganong, nge gubin mit e girdi’, ngu gubin e thin.” (Revelation 7:9) Ma fil e Pi Mich Rok Jehovah e Bible ngak e piin ni yad baadag ni ngar nanged e n’en ni be fil e Bible ndariy puluwon. Ba tamilang ni ke lebug fare thin ko profet ni ngan machibnag fare thin nib fel’ u gubin yang u fayleng, ma ki yog Jesus ni bay ni ‘fanenikay e tin riyul’ e Kristiano’!​—Luke 21:17.

15. (a) Mmich u wan’um ni gad bay ko tin tomuren e rran, fa? Mang fan? (b) Nap’an nra yib e “tomur” ma mang e ra buch rok e piin ni yad ma togopuluw ngak Jehovah? Mang e ra buch rok e piin ni yad ma fol ko Gagiyeg rok Got?

¹⁵ Ri boor e thin ko profet ni ke lebug e ngiyal’ ney. Ba mich u wan’um ni gad bay ko tin tomuren e rran, fa? Nap’an ni yira machibnag fare thin nib fel’ nge yan i aw nrogon nib m’agan’ Jehovah ngay ma aram me yib e “tomur.” (Matthew 24:14) Re “tomur” ney e be yip’ fan e ngiyal’ nra chuweg Got urngin e kireb u fayleng. Ra fanay Jehovah Jesus nge fapi engel nib gel ni ngar thanged urngin e girdi’ ni yad ma togopuluw Ngak. (2 Thessalonika 1:6-9) Ma aram e dabki bannag Satan nge pi moonyan’ rok e girdi’ nu fayleng. Tomuren e re ngiyal’ i n’em e ra flaabnag Gil’ilungun Got urngin e piin ni yad ma fol ko gagiyeg rok.​—Revelation 20:1-3; 21:3-5.

16. Mang e susun ni ngam rin’?

 ¹⁶ Bochan ni ke chugur ni ngan thang e m’ag rok Satan, ma thingar mu fithem ni nge lungum, ‘Mang e susun ni nggu rin’?’ Rib fel’ ni nguum fil murung’agen Jehovah nge tin ni ke tay chilen ni ngad rin’ed. (John 17:3) Nguum tiyan’um ko fol Bible. Ngam guy rogon ni ngam un ko muulung mag chag ngak e girdi’ ni yad baadag ni ngar rin’ed e tin nib m’agan’ Jehovah ngay. (Mu beeg e Hebrews 10:24, 25.) Mu fil e Thin rok Jehovah Got ya nge yag nim nang murung’agen, mag thilyeg e ngongol rom ya nge felan’ Got ngom.​—James 4:8.

17. Mang fan nra gin e girdi’ u nap’an ni yira thang e piin nib kireb?

¹⁷ I yog Jesus u m’on riy ni boor e girdi’ ni dabi mich u wan’rad ni gad bay ko tin tomuren e rran. Yira thang e piin nib kireb nib tomgin, maku ra buch e re n’ey u ba ngiyal’ ni dan lemnag nra buch riy. Ra yib ni bod e moro’ro’ nnep’, ma ra gin e girdi’ ngay. (Mu beeg e 1 Thessalonika 5:2.) I gaar Jesus: “Wub nra tay e en ni Fak e Girdi’ e ra bod e n’en nrin’ ko fa ngiyal’ i n’em nnap’an Noah. Ni bod rogon fapi rran ni ba aram ni immoy nga m’on ko fa ngiyal’ i n’em ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e Girdi’ riy.”​—Matthew 24:37-39.

18. Mang e yog Jesus ni ngad folgad riy?

¹⁸ I yog Jesus ngak e piin ni ur motoyilgad ngak ni  gaar: “Mu ayuwgad, ma dab mpaged gimed nguum pired nib ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal. Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed mi gimed yan mu sak’iygad nga p’eowchen e en ni Fak e Girdi’ [ni be yip’ fan ni kar fel’gad u wan’].” (Luke 21:34-36) Gad ba gonop ni faan gad ra fol ko thin rok Jesus. Mang fan? Ya piin ni kar fel’gad u wan’ Jehovah Got nge Jesus Kristus ni ir e “en ni Fak e Girdi’,” e rayog ni ngar mageygad ni yad ba fas u tomuren e m’ag rok Satan, mi yad par ni manemus u lan fare m’ag nib beech ni kari chugur ni nge yib!​—John 3:16; 2 Peter 3:13.