Apukalipisi 14:1-20
14 Asui hamaa kua kurderu uiku iwitera rese serawaa Sião aintairumu kuaita sentu kuarenta kuatru mili miraita uriku sera aintaumpinimawaa ipaya rera yuiri aintaruwa rese.
2 Asui hasendu yepe nyenga iwaka sui kuaye paranawasu yawe, kuaye truvão kirimbawa yawe, asui hasendu ae kuaye yasenduwaa yawe kuaita umuapuwaita aintaumuapu arpa irumu.
3 Asui aintaunyengari yepe kansão pisasuwaa Deus trunu runde kiti, aintarunde kiti yuiri kuaita kuatru upakawaita, serakuenawaita yuiri. Asui tiawa upuderi ukuawa kua kansão anyunte kuaita sentu kuarenta kuatru mili upiripanawaita kua mundu sui aintaupuderi aintaukuawa ae.
4 Aintate kuaita tiwaita warixi kunya irumu, nyãse tiwaita warixi ainta. Aintausu sakakuera kua kurderu maa kitintu usu, aintate kuaita uyupiruwaa umukaturu aintapitera rupi sui kuaita miraita Deus supe kurderu supe yuiri.
5 Tiyawasemu gananisawa aintayuru upe, nyãse ikiaimawaita ainta.
Primeru anju umbeu
6 Asui hamaa yepe anju uwewe ara piterupi, uriku yepe nyenga purangawaa tiwa upawa umbue arama ae ainta supe kuaita mundu puraita, panye aintamirasawa yaweyawe aintanyenga rupi, panye mundu puraita supe arama.
7 Asui umbeu nyenga kirimbawa irumu:
—Pesikie Deus sui, pemee ixupe arama purangawaa, nyãse usikana sangawa umbeu arama aintaresewara panye, pemee ixupe arama purangawaa kua umunyawaa panye iwaka, panye iwi, panye parana turusuwaa, panye ii rukenaita yuiri.
Mukuĩsawa anju
8 Asui arire kua mukuĩsawa anju umbeu:
—Uwariana, uwariana Babilunia kua tetama turusuwaa, uxariwaa panye kuaita miraita aintauu arama irumu vinyu ipiaiwasawa warixisawa yuiri.
Musapirisawa anju umbeu
9 Asui kua musapirisawa anju umbeu nyenga kirimbawa irumu:
—Awa umee purangawaa ixupe arama kua suu, sangawa kuera supe yuiri kua uxari aintaumusangawa ae suwa rese ipu rese yuiri,
10 uu yuiri kuri kua vinyu Deus ipiaiwasawa uyusena ixupe tiwa umunani ipiaiwasawa ikupu upe, aintaumpurarakari ae tata kiti enxufre kiti yuiri aintarunde kiti kuaita ianjuita purangawaita, senunde kiti yuiri kua kurderu.
11 Asui tatatinga kua tata umpurarakariwaa ainta uyupiri yawewarawate, tiaintaupuderi aintaupitu ara rame pituna rame yuiri kuaita aintaumee purangawaa suu supe arama sangawa kuera supe yuiri, aintayuiri kuaita urikuwaita sera rangawa.
12 Ape yakuawa timaa aintapiaiwa aintaupurara kuaita uruyariwaita, kuaita uruyariwaa kua Deus umbeuwaa, kuaita uxariwaita aintapia Jesus rese.
Kuatrusa anju umbeu
13 Asui hasendu yepe nyenga iwaka sui, umbeu:
—Rempinima:
—Kuiri kuri suuri kuri kuaita umanuwaita yaneruixawa irumu. Asui kua Espiritu umbeu:
—Supiwa suuri kuri ainta nyãse aintaupitu kuri aintamuraki sui, nyãse aintaumunyawaita usu kuri aintarakakuera.
Upuu kua mundu
14 Asui hamaa yepe nuvẽ murutingawaa, asui yepe uwapika nuvẽ upe kuaye kua unaseriwaa umaa kua mundu, asui uriku yepe kurua uru suiwara iakanga rese asui ipu upe uriku yepe fuise saimbewaa.
15 Asui amu anju usemu templu sui usasemu kirimbawa ixupe kua uwapikawaa nuvẽ upe, umbeu:
—Reyuka nefuise repuu arama, nyãse usikana sangawa repuu arama nyãse aintaukaiwana kuaita repuu aramawaita.
16 Asui kua uwapikawaa nuvẽ rese umusasawa ifuise kua mundu rese, asui upuuwana kua mundu.
Umuatiri mundu puraita iya
17 Asui amu anju usemu templu sui uikuwaa iwaka kiti, ae yuiri uriku ifuise saimbewaa ipu upe.
18 Asui amu anju usemu aintausapiwaa rendawa sui, tata ruixawa kua anju, asui umbeu nyenga kirimbawa irumu ixupe kua urikuwaa ifuise saimbewaa, unyee:
—Repisika nefuise saimbewaa, remuatiri videra iya kua mundu upe nyãse tiaruana iya.
19 Asui kua anju umusasawa ifuise mundu rese, asui upuu iya videra upe kua mundu, asui umburi ae upe kua aintaupiruwaa rendawa uva turusuwaa ae, Deus ipiaiwasawa ae.
20 Asui kua aintaupiruwaa rendawa uva turusuwaa aintaupiru ae apekatu tetama sui, asui tuwi usemu isui iapekatusawa kuaji trezentu vinti mili metru iturususawa, asui itipisawa ate kavalu iyuru rese.
