Mayé remaãwana kuá papera upé, Bíblia umbeuwaá upoderi uajudari indé asuí ne anamaitá. Jeová uputari reikú arama surí. Aé uprometeri sá remuñhã Ivontade primeiro ne vida upé Aé “uxari kurí peñhe arama pañhe maã”. (Mateu 6:33) Deus uputari repitá isumuara. Ape, remuñhã pañhe maã repoderiwaá remukirimbá arama ne amizade Jeová irum. Kuá maã puranga piriwaá repoderi rerikú. — Mateu 22:37, 38.

MAÃ BÍBLIA UMBEU: “‘Pe paya kurí ixé, se raíraitá kurí peñhe, se rayeraitá kurí peñhe’, yawé uñheẽ yané Ruixawa.” (2 Korintowaraitá 6:18) Deus uputari repitá arama isumuara. Repoderi remuñhã kuayé oração rupí. Jeová uconvidari repurandúwara arama irum. (1 Tesalonikawaraitá 5:17) Aé uputari ukuá mayé reyusaã ne piá upé. (Filipowaraitá 4:6) Mairamé reorari ne anamaitá irum, aintá ta usú ta umaã reruyari Deus resé.

Reprecisari yuíri resendú maã Deus umbeuwaá. Remuñhã kuayé reyumbué ramé Bíblia asuí paperaitá uajudariwaá rekuá arama Bíblia resé. (Salmo 1:1, 2) Remanduári maã resé reyumbuewaá. (Salmo 77:11, 12) Resendú Deus yuíri reyumuatiri ramé cristão supíwaitá irum. — Salmo 122:1-4.

Remukirimbá ne amizade Deus irum yuíri rembeu ramé sesé amú miraitá supé. Remuñhã ramé kuayé, resú repitá piri Jeová rumuara. — Mateu 28:19, 20.

MAÃ REPODERI REMUÑHÃ:

• Reyuka tempo muíri ara releri arama Bíblia asuí repurandú arama Deus irum.

• Reajudari ne anamaitá ta umaã arama maã espiritual importante piri ta umusaraiwaá suí.

MAÃ BÍBLIA UMBEU: “Pemusuakí Deus, ape kurí umusuakí peñhe.” (Tiago 4:8) Reyuka tempo muíri semana readorari arama Jeová ne anama irum. (Gênesis 18:19) Ma reprecisari remuñhã amú maã: remanduári Deus pañhe maã upé remuñhãwaá. Rekuntariwara ramé sesé ‘ne ruka upé, rewatá ramé, resú ramé rekiri asuí repaka ramé’, resú remukirimbá ne anamaitá amizade Deus irum. (Deuteronômio 6:6, 7) Resikari remuñhã mayé Josué yawé, umbeuwaá: “Ixé asuí se anamaitá yasú yamuñhã Jeová vontade.” — Josué 24:15.

MAÃ REPODERI REMUÑHÃ:

• Resikari remuñhã yepé anama adoração uajudariwaá pañhe awá ne ruka upé.