Yurupari aé kuera yepé anjo satambika. Aé ukuá yarikuté yadorari añhu Jeová Deus, ma usikari miraita ta uadorari arama aé. Aé uganani Eva. Yawéwaá resewara Bíblia umbeu “ti yamaã supiwaá ipiá upé.” (João 8:44) Eva umuñhã mayé Yurupari uputariwaá asuí ti usendu Deus. Adão ti usendu Deus yuíri. Aintá umuñhã resewara yawé, yapurará asuí yamanu.​—Releri 2 Korintowaraita 11:3; Romawaraita 5:12.

Yurupari upitá Deus Governo ruaxá. Aé uputari yapitá Deus Governo ruaxá yuíri, mayé umuñhãwaá uganani ramé Eva. Kuíri siya miraita ti ta uputari Deus mayé ta ruixawa. Aintá ta usendu Yurupari. Yawéwaá resewara aé kuíri “kuá mundo ruixawa”.​—Releri João 14:30; 1 João 5:19.

Umbá. Pañhe maã Jeová umuñhãwaá satambika. Miraita asuí anjoita ta upuderi ma kuera ta usendu Deus. (Deuteronômio 32:4, 5) Deus uxári yaparawaka sá yasu yamuñhã maã purangawaá u puxiwerawaá. Sá yasaisu Deus yasu yamuñhã maã satambikawaá.​—Releri Tiago 1:13-15; 1 João 5:3.

Awáita ta usenduwaá Yurupari ta umaité ti ta uprecisari Deus ta uviveri arama puranga. Jeová uxári uiku usasá yepé tempo ta umukameẽ arama awá uiku satambika. Ma kuá tempo upawana uiku asuí uxári yakuá añhu Deus Governo upuderi umusurí miraita. (Eclesiastes 7:29; 8:9) Ne yepé miraita governo upuderi umbawa guerra, puxiwerawaá, tiwaá satambika asuí masiita irum. Bíblia umbeu Jeremias 10:23 upé: “Akuáté Jeová, apigaita ti ta upuderi ta uwatá puranga ta pesua ta peé rupí. Ti ta ukuá ta uwatá ta rupíté.”​—Releri Romawaraita 9:17.

 Deus Governo amurupíté miraita governo suí, ñhasé umuñhakunta miraita resé ta uikuwaá irum. (Isaías 48:17, 18) Ikentuwana Deus usu umbawa pañhe miraita governo irum. Bíblia umbeu Daniel 2:44 upé: “Kua reiita ta tempo ramé, Deus iwakapura umuñhã kurí yepé governo pisasu tiwaá kurí upawa. Kuá Reino ti usu usasá amu miraita supé. Usu umukañhemu pañhe mira governoita, asuí añhu kuá Reino upitá kurí pañhe ara.” Añhu awá uputari Deus mayé iruixá usu kurí uviveri Iwí upé. — Isaías 11:9.

Remaã kuá vídeo Marã Yapurará Retana?

Yapuderi yaxári ta ukuá sá yaputari Deus Governo u apigáita governo yané rikusá rupí. Yurupari umbeu ne awá usu usendu Deus saisusá rupí. Bíblia umbeu Jó 1:9, 11 upé: “Ape Yurupari usuaxara Jeová: “Ne maã rikuyara será Jó usendu Deus? . . . ma kuíri, resupiri ne pu asuí rembáwa pañhe imaãita irum, asuí remaã kurí usu upitá ne ruaxá.”” Ma yapuderi yaxári ukuá aé ti ukuntari supí.​—Releri 2 João 4.

Yaparawaka Deus mayé yané Ruixawa yayumbué ramé Biblía asuí yamuñhã rupí umunduwaá. (João 4:23) Mayé Jesus yawé ti yayumunai política ne guerra irum. Ape yaxári ta ukuá yaiku Deus irum, umbá Yurupari irum.​—Releri João 17:14.

Yurupari uganani miraita ta umuñhã arama puxiwerawaá. Ape mairamé tiã yamuñhã maã puxiwerawaá yepéyepé yané rumuara u yané anama ta suí amuramé ta usikari yandé u ta upuká yané resé. (1 Pedro 4:3, 4) Será yasu yasendu aintá u yasu yamuñhã maã Deus umundúwaá? Yurupari umbeu miraita añhu usendu Deus iwasuíma ramé. Ma Deus lei puranga yandé arama. Yasendu ramé, yaxári ta ukuá Yurupari uganani uiku.​—Releri 1 Korintowaraita 6:9, 10; 15:33.

Deus ugustari retana yandé. Yawéwaá rupí yapuderi yakuá aé usu umbawa yapurawaá irum. Awá uruyari asuí usendu Deus usu uviveri pañhe ara Iwí upé.​—Releri João 3:16.