1 Corintios 16:1-24
16 Beora túunaʼ, tu yoʼolal le taakʼin ka molkeʼex utiaʼal le máaxoʼob santoʼoboʼ,+ jeʼel u páajtal a beetkeʼex jeʼex tin waʼalil tiʼ u múuchʼuliloʼob Galacia ka u beetoʼobeʼ.
2 Tu yáax kʼiinil cada semanaeʼ, cada juntúul tiʼ teʼexeʼ u jóoʼs junpáayil le bukaʼaj ku páajtal u líiʼsikeʼ, utiaʼal beyoʼ maʼ u máan molbil taakʼin kéen kʼuchken ta wiknaleʼex.
3 Chéen baʼaleʼ kéen kʼuchkeneʼ, le máaxoʼob ken a waʼaleʼex noʼojaʼanoʼob teʼ cartaʼob ken a tsʼíibteʼexoʼ,+ yaan in túuxtikoʼob tu kaajil Jerusalén utiaʼal ka u bisoʼob le baʼaxoʼob ta síiajeʼexoʼ.
4 Chéen baʼaleʼ wa maʼalob xan u yilaʼal ka xiʼiken teneʼ, letiʼobeʼ yaan u binoʼob tin wéetel.
5 Chéen baʼaleʼ yaan in bin ta wiknaleʼex kéen tsʼoʼokok in máan Macedonia, tumen yaan in bin Macedonia.+
6 Tsʼoʼoleʼ maʼ xaaneʼ kin pʼáatal ta wéeteleʼex wa kin máansik tak u kʼiiniloʼob keʼel ta wiknaleʼex, utiaʼal beyoʼ ka a láakʼinteneʼex tiʼ junjaats le bej tuʼux kin binoʼ.
7 Tumen maʼ in kʼáat in xíimbalteʼex beora chéen ichil u chan súutukaʼ; wa Jéeoba u kʼáateʼ, kin páaʼtik ka páajchajak in pʼáatal ta wiknaleʼex wa jaypʼéel kʼiinoʼob.+
8 Chéen baʼaleʼ yaan in pʼáatal tu kaajil Éfeso+ tak tu Fiestail le Pentecostésoʼ;
9 tumen tsʼoʼok u jeʼebelten junpʼéel kóokoch joonaj utiaʼal in maas meyajtik Dios,+ chéen baʼaleʼ yaʼab máakoʼob táan u kʼatkubaʼob tin beel.
10 Wa ku kʼuchul Timoteoeʼ+ ilawileʼex maʼ u chʼaʼik saajkil le tiaʼan ta wiknaleʼexoʼ, tumen jeʼex teneʼ, letiʼeʼ táan xan u beetik le meyaj u kʼubéentmajtoʼon Jéeobaoʼ.+
11 Le oʼolaleʼ maʼ u mixbaʼalkúuntaʼal tumen mix máak. Láakʼinteʼex utiaʼal u jóokʼol u binbal teʼ bejoʼ yoʼolal maʼ u yúuchultiʼ mix baʼal yéetel utiaʼal ka taalak tin wiknal, tumen teen yéetel le sukuʼunoʼoboʼ táan k-páaʼtik.
12 Tiʼ k-sukuʼun Apoloseʼ+ tin sen aʼalajtiʼ ka xiʼik ta wiknaleʼex junmúuchʼ yéetel le sukuʼunoʼoboʼ, chéen baʼaleʼ maʼ u tukultmaj u bin beoraaʼ, pero kéen páajchajkeʼ yaan u bin ta wiknaleʼex.
13 Maʼ a weenleʼex,+ maʼ a péekeʼex tiʼ a fejeʼex,+ maʼ a chʼaʼikeʼex saajkil,*+ muʼukʼaʼanchajkeʼex.+
14 Beeteʼex tuláakal baʼal yéetel yaabilaj.+
15 Beoraaʼ, sukuʼuneʼex, kin jach aʼalikteʼex ka a beeteʼex lelaʼ: a wojleʼexeʼ Estéfanas yéetel le máaxoʼob yanoʼob tu yotochoʼ, letiʼob yáax kʼuch u beetubaʼob discípuloil* tu luʼumil Acaya, yéetel letiʼobeʼ tu kʼububaʼob u meyajtoʼob le máaxoʼob santoʼoboʼ.
16 Maʼ u xuʼulul a tsʼáaikabaʼex yáanal u páajtalil le máakoʼob jeʼex le jeʼeloʼobaʼ bey xan yáanal u páajtalil le máaxoʼob jach ku xupkubaʼob meyaj yéetel ku yáantajoʼoboʼ.+
17 Chéen baʼaleʼ ku kiʼimaktal in wóol, tumen kex teʼex minaʼaneʼex tin wiknaleʼ way yanoʼob Estéfanas,+ Fortunato yéetel Acaicoeʼ.
18 Letiʼobeʼ tsʼoʼok u líiʼskoʼob in wóol yéetel tsʼoʼok xan u líiʼskoʼob a wóoleʼex. Le oʼolaleʼ respetarteʼex máakoʼob jeʼex le jeʼeloʼobaʼ.
19 U múuchʼuliloʼob Asiaeʼ ku túuxtikoʼob saludos tiʼ teʼex. Áquila yéetel Prisca* bey xan le sukuʼunoʼob ku muchʼkubaʼob tu yotochoʼoboʼ,+ ku túuxtikoʼob saludos tiʼ teʼex yéetel tuláakal u puksiʼikʼaloʼob tu kʼaabaʼ Yuumtsil.
20 Tuláakal le sukuʼunoʼoboʼ ku túuxtikoʼob saludos tiʼ teʼex. Saludartabaʼex ta baatsileʼex yéetel junpʼéel tsʼuʼutsʼ.*
21 Teen Pabloeʼ táan in túuxtik saludos tiʼ teʼex, lelaʼ teen tsʼíibte.
22 Wa yaan máax maʼ u yaabiltmaj Yuumtsileʼ maldecirtaʼak. ¡K-Yuumtsil, koʼoten!
23 Ka yanak ta wéeteleʼex u nojoch utsil Yuumtsil Jesús.
24 In sukuʼuneʼex, in yaabiltmeʼex tuláakleʼex jeʼex u yaabiltmileʼex Cristo Jesúseʼ.
Notas
^ Wa «xiixibmáakchajkeʼex».
^ Ich griegoeʼ ku yaʼalaʼal kaʼach «yáax ichoʼob».
^ Wa «Priscila».
^ Ich griegoeʼ ku yaʼalaʼal kaʼach «junpʼéel tsʼuʼutsʼ santo». Bey kaʼach u saludarkuba u discípuloʼob Cristo le kéen u yilubaʼoboʼ.
