1 Juan 4:1-21
4 In yaabilaj sukuʼuneʼex, jeʼel baʼalak kaʼansajil ku yaʼalaʼal tiʼ Dios u taaleʼ maʼ a creerkeʼex,+ baʼaxeʼ ilawileʼex wa jach tu jaajil tiʼ Dios u taal,+ tumen yaʼab maʼ jaajil profetaʼob tsʼoʼok u chíikpajloʼob teʼ yóokʼol kaabaʼ.+
2 Lelaʼ letiʼe bix jeʼel a wojéeltikeʼex wa tiʼ Dios u taal junpʼéel kaʼansajaʼ: jeʼel baʼalak kaʼansajil ku yaʼalik de ke Jesucristo taal bey wíinikeʼ tiʼ Dios u taal.+
3 Chéen baʼaleʼ jeʼel baʼalak kaʼansajil maʼ tu yaʼalik taal Jesús bey wíinikeʼ maʼ tiʼ Dios u taaliʼ.+ U jaajileʼ leloʼ letiʼe baʼax aʼalaʼabteʼex ken u kaʼans le anticristooʼ,*+ yéetel beoraaʼ tiʼ yaan teʼ yóokʼol kaabaʼ.+
4 In mejen paalaleʼex, teʼexeʼ tiʼ Dios a taaleʼex yéetel tsʼoʼok a tsʼáanchaʼatikeʼex le máakoʼobaʼ,+ tumen le máax yaan ta wéeteleʼexoʼ+ maas nojoch tiʼ le máax yaan yéetel le yóokʼol kaaboʼ.+
5 Letiʼobeʼ tiʼ le yóokʼol kaab u taaloʼoboʼ,+ le oʼolal ku tʼaanoʼob tiʼ le baʼaloʼob yaan teʼ yóokʼol kaaboʼ yéetel ku yuʼubaʼal u tʼaanoʼob tumen le yóokʼol kaaboʼ.+
6 Toʼoneʼ tiʼ Dios k-taal. Le máax ku kʼuchul u kʼaj óolt Dioseʼ ku yuʼubik baʼax k-aʼalik.+ Le máax maʼ tiʼ Dios u taaleʼ maʼ tu yuʼubik baʼax k-aʼalik.+ Tu yoʼolal leloʼ ku páajtal k-kʼaj óoltik máakalmáak le kaʼansaj ku taal tiʼ le jaajoʼ yéetel máakalmáak ku taal tiʼ le tuusoʼ.+
7 In yaabilaj sukuʼuneʼex, maʼ u xuʼulul k-paklan yaabiltikbaʼex,+ tumen le yaabilajoʼ u tiaʼal Dios. Tuláakal máax ku yeʼesik yaabilajeʼ u paal Dios yéetel u kʼaj óol Dios.+
8 Jeʼel máaxak minaʼan u yaabilajeʼ maʼ kʼuchuk u kʼaj óolt Diosiʼ, tumen Dioseʼ yaabilaj.+
9 Dioseʼ bey úuchik u yeʼesiktoʼon u yaabilajaʼ: tu túuxtaj u juntúuliliʼ Paal+ teʼ yóokʼol kaabaʼ, utiaʼal beyoʼ ka yanaktoʼon kuxtal tu yoʼolal letiʼ.+
10 Lelaʼ letiʼe baʼax u kʼáat u yaʼal le yaabilajoʼ, maʼ tumen toʼon yaabilt Diosiʼ, baʼaxeʼ letiʼ yaabiltoʼon úuchik u túuxtik u Paal kíimil t-oʼolal+ utiaʼal u tsʼáaik tuʼux u perdonartaʼal k-kʼebanoʼob.+
11 In yaabilaj sukuʼuneʼex, wa bey úuchik u yaabiltikoʼon Diosoʼ toʼon túuneʼ ku páaʼtaʼal ka k-paklan yaabiltbaʼex.+
12 Mix juntéen ilaʼak Dios tumen mix máak.+ Wa maʼ tu xuʼulul k-paklan yaabiltikbaʼexeʼ Dioseʼ yaan u pʼáatal junmúuchʼ t-éetel, yéetel yaan u yeʼesiktoʼon tuláakal u yaabilaj.+
13 Toʼoneʼ k-ojel láayliʼ junmúuchʼ yaniloʼon tu yéeteleʼ, letiʼ xaneʼ junmúuchʼ yanil t-éetel, tumen u tsʼaamajtoʼon u espíritu santo.
14 Toʼon xaneʼ tsʼoʼok k-ilkeʼ le Taataoʼ tsʼoʼok u túuxtik u Paal utiaʼal u salvartik le yóokʼol kaaboʼ yéetel k-aʼalik jach jaaj leloʼ.+
15 Jeʼel máaxak ku kʼamik Jesús bey u Paal Dioseʼ,+ Dioseʼ ku pʼáatal junmúuchʼ tu yéetel, letiʼ xaneʼ ku pʼáatal junmúuchʼ yéetel Dios.+
16 Toʼoneʼ tsʼoʼok k-ilik bix le yaabilaj ku yuʼubik Dios t-oʼolaloʼ yéetel k-ojel jach u yaabiltmoʼon.+
Dioseʼ yaabilaj,+ le máax mantatsʼ ku yeʼesik yaabilajoʼ ku pʼáatal junmúuchʼ yéetel Dios, Dios xaneʼ ku pʼáatal junmúuchʼ yéetel le máakaʼ.+
17 Bey túunoʼ yaan u chúukpajal le yaabilaj yaantoʼonoʼ, yéetel yaan u páajtal k-tʼaan yéetel u jaajil k-óol*+ tu kʼiinil le juiciooʼ, tumen toʼoneʼ teʼ yóokʼol kaabaʼ beyoʼon jeʼex Jesucristoeʼ.
18 Juntúul máax saajkeʼ yaʼab baʼax maʼ tu páajtal u beetik. Chéen baʼaleʼ máax u yaabiltmaj Dioseʼ maʼ kun sajaktal,+ tumen máax chúukaʼan u yaabilajeʼ maʼatech u chʼaʼik saajkil. Le máax ku chʼaʼik saajkileʼ maʼ chúukaʼan u yaabilajiʼ.+
19 Toʼoneʼ k-eʼesik yaabilaj tumen Dios yáax eʼestoʼon yaabilaj.+
20 Wa yaan máax ku yaʼalik: «Teneʼ in yaabiltmaj Dios», chéen baʼaleʼ táan u pʼektik u sukuʼuneʼ, chéen táan u tuus.+ Tumen le máax maʼ tu yaabiltik u sukuʼun+ kex táan u yilkeʼ maʼ tu páajtal u yaabiltik Dios máax maʼ u yiliʼ.+
21 Lelaʼ letiʼe baʼax tsʼoʼok u yaʼaliktoʼonaʼ: le máax u yaabiltmaj Dioseʼ kʼaʼabéet u yaabiltik xan u sukuʼun.+
Notas
^ Wa «le máax yaan tu contra Cristooʼ». Ilawil «Anticristo», página 2555.
^ Wa «yéetel maʼ ken k-sajaktal tʼaan».
