1 Samuel 7:1-17
7 Le xiiboʼob túun kajaʼanoʼob Kiriat-jearimoʼ taaloʼobeʼ ka tu bisoʼob u cajail u pacto Jéeoba tu yotoch Abinadab+ yaan teʼ puʼukoʼ,* tu yéeyoʼob* xan Eleazar, u hijo, utiaʼal ka u kanáant u cajail u pacto Jéeoba.
2 Máan yaʼab tiempo, máan 20 años taasaʼak u cajail le pacto tu kaajil Kiriat-jearimoʼ, tuláakal túun u kaajil Israeleʼ káaj u kaxtik* u kaʼa suut tu yiknal Jéeoba.+
3 Samuel túuneʼ tu yaʼalaj tiʼ tuláakal u kaajil Israel: «Wa jach tu jaajil táan a suuteʼex tu yiknal Jéeoba yéetel tuláakal a puksiʼikʼaleʼexeʼ,+ kʼaʼabéet a luʼskeʼex ichileʼex u diosoʼob le j-táanxel luʼumiloʼoboʼ+ bey xan u imageniloʼob Astoret.*+ Kʼaʼabéet a kʼubik a puksiʼikʼaleʼex chéen tiʼ Jéeoba yéetel meyajteʼex chéen letiʼ,+ beyoʼ letiʼeʼ yaan u salvarkeʼex tu kʼab le filisteoʼoboʼ».+
4 Le ka tu yuʼuboʼob leloʼ tu xuʼulsoʼob tiʼ le Baaloʼoboʼ bey xan tiʼ u imageniloʼob Astoret, ka joʼopʼ u adorarkoʼob chéen Jéeoba.+
5 Samuel túuneʼ tu yaʼalaj: «Beeteʼex u muchʼtal tuláakal u kaajil Israel tu kaajil Mizpá,+ teen túuneʼ yaan in orar tiʼ Jéeoba ta favoreʼex».+
6 Letiʼob túuneʼ tu muchʼubaʼob tu kaajil Mizpá, tu jóoʼsoʼob jaʼeʼ ka tu wekoʼob tu táan Jéeoba, yéetel ayunarnajoʼob* xan teʼ kʼiin jeʼeloʼ.+ Teʼeloʼ tu yaʼaloʼob: «Tsʼoʼok k-kʼebantal tu contra Jéeoba».+ Samuel túuneʼ káaj u beetik u juezil+ tu yóokʼol le israelitaʼob tu kaajil Mizpáoʼ.
7 Le ka tu yuʼubaj le filisteoʼob u muchʼmuba le israelitaʼob tu kaajil Mizpáoʼ, u nuuktakil túun le filisteoʼoboʼ+ naʼakoʼob baʼateʼel tu contra u kaajil Israel. Le ka tu yilaj le israelitaʼob le jeʼeloʼ jach tu chʼaʼajoʼob saajkil tiʼ le filisteoʼoboʼ.
8 Le oʼolal le israelitaʼoboʼ tu yaʼaloʼob tiʼ Samuel: «Maʼ u xuʼulul a orar tiʼ Jéeoba k-Dios utiaʼal ka u yáantoʼon+ yéetel utiaʼal ka u salvartoʼon tiʼ u kʼab le filisteoʼoboʼ».
9 Samuel túuneʼ tu chʼaʼaj juntúul chan taman maʼ u pʼat u chuʼuchiʼ ka tu kʼubaj tu chúukaʼanil tiʼ Jéeoba bey tóokbil ofrendaeʼ.+ Letiʼeʼ tu kʼáataj xan tiʼ Jéeoba ka u yáant u kaajil Israel, Jéeoba túuneʼ tu núukajtiʼ.+
10 Mientras táan u kʼubik Samuel le tóokbil ofrendaoʼ le filisteoʼoboʼ náatsʼoʼob utiaʼal u baʼateloʼob tu contra Israel. Jéeoba túuneʼ tu beetaj u kíilbal cháak jach kʼaʼam+ tu yóokʼol le filisteoʼoboʼ, tu beetaj u saʼatal u yóoloʼob+ ka ganartaʼaboʼob tumen le israelitaʼoboʼ.+
11 Le israelitaʼob túunoʼ jóokʼoʼob tu kaajil Mizpáeʼ ka tu chʼaʼpachtoʼob le filisteoʼoboʼ, ka joʼopʼ u kʼiʼitbeskoʼob tak tu noojolil* Bet-kar.
12 Samuel túuneʼ tu chʼaʼaj junpʼéel tuunicheʼ+ ka tu tsʼáaj chúumuk tiʼ Mizpá yéetel Jesaná, ka tu tsʼáaj u kʼaabaʼt Ebenézer,* tumen tu yaʼalaj: «Tak beoraaʼ tsʼoʼok k-áantaʼal tumen Jéeoba».+
13 Bey úuchik u ganartaʼal le filisteoʼoboʼ yéetel maʼ suunajoʼob kaʼa okol tu luʼumil Israeliʼ.+ Tuláakal u kʼiiniloʼob u kuxtal Samueleʼ Jéeobaeʼ seguernaj u tsʼáaikuba tu contra le filisteoʼoboʼ.+
14 Tsʼoʼoleʼ tiʼ u kaajil Israeleʼ suʼut xan tuláakal le kaajoʼob chʼaʼantiʼ kaʼach tumen le filisteoʼoboʼ, desde Ecrón tak Gat, bey úuchik u kaʼa chʼaʼik u territorio tiʼ le filisteoʼoboʼ.
Tsʼoʼoleʼ yanchaj xan jeetsʼelil tiʼob yéetel le amorreoʼoboʼ.+
15 Samueleʼ seguernaj u juzgartik u kaajil Israel tuláakal u kʼiiniloʼob u kuxtal.+
16 Cada añoeʼ ku viajar tak Betel,+ Guilgal+ yéetel Mizpá,+ teʼ lugaroʼobaʼ tiʼ ku juzgartik kaʼach le israelitaʼoboʼ.
17 Chéen baʼaleʼ le kéen tsʼoʼokkeʼ ku suut Ramá,+ tumen tiaʼan kaʼach u yotochiʼ yéetel tiʼ xan ku juzgartik le israelitaʼoboʼ. Teʼeloʼ tu beetaj junpʼéel altar utiaʼal Jéeobaiʼ.+
Notas
^ Ich hebreoeʼ ku yaʼalaʼal kaʼach «tu santificartoʼob».
^ Wa «cerrooʼ».
^ Wa «u yokʼol utiaʼal».
^ Ilawil página 2557.
^ Ilawil página 2557.
^ Wa «sur».
^ U kʼáat u yaʼal «Tuunich ku Yáantaj».
