2 Corintios 11:1-33
11 Kex beyen juntúul máak minaʼan u naʼateʼ in kʼáat ka a aguantarteneʼex. ¡Kex u jaajileʼ táan a aguantarkeneʼex!
2 Teneʼ jach in kʼáat in kanáanteʼex jeʼex u kanáantkeʼex Dioseʼ, tumen teen aʼal yaan u tsʼoʼokol a beeleʼex yéetel juntúuliliʼ máak, Cristo, yéetel in kʼáat in kʼubeʼex tiʼ letiʼ bey juntúul x-chʼúupaleʼ.*+
3 Chéen baʼaleʼ saajken ka yanak wa máax kʼaskúuntik a tuukuleʼex utiaʼal ka xuʼuluk a tsaypachtikeʼex Cristo+ yéetel tuláakal a puksiʼikʼaleʼex bey xan utiaʼal ka xuʼuluk a biskeʼex le kuxtal limpio ku taal tiʼ letiʼoʼ, saajken ka úuchukteʼex le baʼax úuch tiʼ Eva le ka tuʼus tumen le kaan jach u yojel tuusoʼ.+
4 Tumen jeʼex yanileʼex beoraaʼ wa ka taalak wa máax u tsikbaltteʼex tu yoʼolal juntúul Jesús yaanal tiʼ le t-tsikbaltajteʼexoʼ teʼexeʼ séeb jeʼel a kʼamkeʼexeʼ. Wa ka tsʼaʼabakteʼex junpʼéel muukʼ yaanal tiʼ le tsʼaʼanteʼexoʼ teʼexeʼ séeb jeʼel a kʼamkeʼexeʼ. Wa xan ka tsikbaltaʼakteʼex baʼaloʼob jelaʼantak tiʼ le ta yáax kʼameʼexoʼ+ séeb jeʼel a kʼamkeʼex xaneʼ.
5 Tumen in tuklikeʼ tiʼ tuláakal le baʼaxoʼob kin beetkoʼ mix baʼal eʼesik wa maas chichnen tiʼ le máaxoʼob yanoʼob ichileʼex ku taaskubaʼob nukuch apóstoloʼoboʼ.+
6 Maʼ xaaneʼ maʼ jach in wojel tʼaaniʼ,+ chéen baʼaleʼ yaʼab baʼaxoʼob in wojel, lelaʼ jejeláas bix tsʼoʼok k-eʼesikteʼex tiʼ tuláakal baʼax k-beetik.
7 Teneʼ maʼ tin kʼáatajteʼex ka a boʼoteneʼexiʼ, kex beyoʼ kiʼimak in wóol úuchik in tsikbaltikteʼex le maʼalob baʼaloʼob ken u beet Diosoʼ. ¿Kʼebanchajen wa túun úuchik in mixbaʼalkúuntkinba utiaʼal ka nojbaʼalkúuntaʼakeʼex?+
8 Teneʼ tin kʼamaj le áantaj ku tsʼáaik le múuchʼuliloʼoboʼ, leloʼ bey luʼsbil tin beetajtiʼob utiaʼal ka in wáanteʼexeʼ.+
9 Chéen baʼaleʼ le tiaʼanen ta wiknaleʼex yéetel le ka pʼáat minaʼanten le baʼaxoʼob kʼaʼabéettenoʼ, jach junpuliʼ maʼ chʼuylajen tiʼ mix máakiʼ, tumen le sukuʼunoʼob macedoniailoʼob taaljaʼanoʼob kaʼachoʼ tu tsʼáajoʼobten yaʼab tiʼ le baʼaloʼob kʼaʼabéetchajtenoʼ.+ Bey túunoʼ tin beetaj tuláakal le ku páajtal utiaʼal maʼ in chʼuytal tiʼ teʼexoʼ yéetel bey xan kun seguer in beetkoʼ.+
10 Mientras táan in tsaypachtik Cristoeʼ mix baʼal ken u beet u xuʼulul in nojbaʼalkúuntkinba+ tu kaajiloʼob Acaya tu yoʼolal le baʼax kin beetkoʼ.
11 ¿Baʼax oʼolal kin beetik? ¿Tumen maʼ in yaabiltmeʼexiʼ? Dioseʼ u yojel in yaabiltmeʼex.
12 Chéen baʼaleʼ le baʼax kin beetkoʼ yaan u seguer in beetik+ utiaʼal maʼ in tsʼáaik tuʼux u tʼaan le máaxoʼob ku yaʼalikubaʼob apóstoloʼob jeʼex toʼoneʼ, yéetel utiaʼal maʼ u yantal baʼax oʼolal u nojbaʼalkúuntkubaʼob.
13 Tumen le máakoʼob jeʼeloʼ maʼ jaaj wa apóstoloʼobiʼ, letiʼobeʼ chéen tuus ku beetkoʼob yéetel chéen ku yeʼeskubaʼob bey u apóstoloʼob Cristoeʼ.+
14 Lelaʼ maʼ unaj u beetik u jaʼakʼal u yóol máakiʼ tumen tak Satanáseʼ maʼ tu xuʼulul u yeʼeskuba bey juntúul u ángelil sáasileʼ.+
15 Le oʼolaleʼ le máaxoʼob meyajtik Satanásoʼ maʼ jelaʼan u yeʼeskubaʼob bey máaxoʼob ku beetkoʼob baʼax tojeʼ. Chéen baʼaleʼ yaan u xuʼulsaʼaloʼob jeʼex u náajmatikoʼob yoʼolal le baʼaloʼob ku beetkoʼoboʼ.+
16 Kin kaʼa aʼalik: mix máak ka u tukult wa minaʼan in naʼat. Chéen baʼaleʼ wa teʼex ka tuklikeʼex beyenoʼ, kʼameneʼex kex ka a wileneʼex bey juntúul máak minaʼan u naʼateʼ utiaʼal ka in nojbaʼalkúuntinba xan kex chéen junpʼíit.
17 Le bix in tʼaan beoraaʼ maʼ jeʼex u tʼaan Yuumtsileʼ, baʼaxeʼ jeʼex u tʼaan juntúul máak minaʼan u naʼat ku nojbaʼalkúuntkuba yéetel ku confiar chéen tiʼ letiʼeʼ.
18 Tumen yaʼab máakoʼob táan u nojbaʼalkúuntkubaʼob tu yoʼolal luʼumkabil baʼaloʼobeʼ, teen xaneʼ yaan in nojbaʼalkúuntkinba.
19 Teʼexeʼ ka waʼalikeʼex jach yaan a naʼateʼex, ¿baʼaxten túun yéetel kiʼimak óolal ka aguantarkeʼex le máaxoʼob minaʼan u naʼatoʼoboʼ?
20 U jaajileʼ teʼexeʼ ka aguantarkeʼex jeʼel máaxak ku esclavizarkeʼexeʼ, jeʼel máaxak ku luʼsikteʼex yéetel ku tokikteʼex le baʼaxoʼob yaanteʼexoʼ, jeʼel máaxak ku nojbaʼalkúuntkuba ta wóokʼoleʼexoʼ yéetel jeʼel máaxak ku lajik u táan a wicheʼexoʼ.
21 Lelaʼ kin waʼalik utiaʼal k-pʼáatal ich suʼtsilil, tumen maʼ xaaneʼ yaan máax jeʼel u yilik maʼ maʼalob bix u meyajtoʼon le autoridad yaantoʼonoʼ.
Chéen baʼaleʼ wa uláakʼ máakoʼob yéetel x-maʼ saajkilil ku beetkoʼob wa baʼaxeʼ —táan in tʼaan jeʼex juntúul máak minaʼan u naʼateʼ— teen xaneʼ yéetel x-maʼ saajkilil kin beetik wa baʼax.
22 Letiʼobeʼ ¿hebreoʼob wa? Teen xaneʼ hebreoen.+ Letiʼobeʼ ¿israelitaʼob wa? Teen xaneʼ israelitaen. ¿U paalaloʼob wa Abrahán? Bey xan teen.+
23 ¿Ku meyajtikoʼob wa Cristo? Kin núukik jeʼex juntúul máak maʼ tu yóol yaneʼ: teneʼ maas kin meyajtik Cristo ke letiʼob,+ tumen maas yaʼab baʼaloʼob tsʼoʼok in beetik, maas yaʼab u téenel tsʼoʼok in kʼaʼalal cárcel,+ yaʼab u téenel tsʼoʼok in muʼyajtik in sen jaʼajatsʼaʼal, yéetel yaʼab u téenel tsʼoʼok in wantal tu chiʼ kíimil.+
24 Cinco u téenel tsʼaʼabten 39 u puulul jaatsʼ tumen le judíoʼoboʼ.+
25 Óoxtéen jaʼatsʼen yéetel cheʼ,+ juntéen sen chʼiʼinchʼinaʼaben,+ óoxtéen in muʼyajtmaj u búulul le barco tuʼux kin binoʼ,+ junpʼéel áakʼab yéetel junpʼéel kʼiin tin máansaj chéen ich kʼáaʼnáab.
26 Yaʼab tuʼuxoʼob kʼaʼabéetchaj in bin, in kuxtaleʼ yanchaj tu chiʼ kíimil teʼ áalkab jaʼoboʼ, tu táan j-ookoloʼob, tu táan in wéet kaajaloʼob,+ tu táan le j-táanxel luʼumiloʼoboʼ,+ tu táan u kajnáaliloʼob le noj kaajoʼoboʼ,+ teʼ desiertooʼ, teʼ kʼáaʼnáaboʼ, ichil máaxoʼob chéen ku taaskubaʼob bey sukuʼunoʼobeʼ,
27 tin sen kíimsinba meyaj, tin máansaj áakʼaboʼob x-maʼ weenlil,+ pʼáat maʼ tin janal yéetel maʼ tin wukʼik mix baʼal,+ yaʼab u téenel pʼáat minaʼan baʼal in jaante,+ tin máansaj keʼelil yéetel pʼáat minaʼan in nookʼ.*
28 Tsʼoʼoleʼ maʼ chéen le baʼaloʼob úuchtenaʼ, baʼaxeʼ sáamsamal xan kin chiʼichnaktal tu yoʼolal tuláakal le múuchʼuliloʼoboʼ.+
29 Wa yaan máax ku lúubul u muukʼeʼ, ¿maʼ wa tu lúubul in muukʼ xan tu yéetel? Wa yaan máax ku beetaʼal u tʼóochpajleʼ, ¿maʼ wa tu tʼaʼabal in kʼiʼikʼel?
30 Wa yaan in nojbaʼalkúuntkinbaeʼ, yaan in nojbaʼalkúuntkinba tu yoʼolal le baʼaxoʼob eʼesik lubaʼan in muukʼoʼ.
31 U Dios yéetel u Taata Yuumtsil Jesús, le Máax mantatsʼ unaj u alabartaʼaloʼ, u yojel maʼ táan in tuusiʼ.
32 Tu kaajil Damascoeʼ, le gobernador tsʼaʼan yáanal u páajtalil le rey Aretasoʼ, tu tsʼáaj máakoʼob kanáantik u joonajiloʼob le kaaj utiaʼal u chukikenoʼ.
33 Chéen baʼaleʼ tsʼaʼaben tiʼ junpʼéel xúuxakeʼ ka jalkʼesaʼaben tiʼ junpʼéel ventana yaan tu baʼpakʼil le kaajoʼ+ ka púutsʼen.
Notas
^ Ich griegoeʼ le tʼaan ku meyaj teʼelaʼ ku tsʼáaik naʼatbil juntúul x-chʼúupal mix baʼal yanchajaʼan u yil yéetel juntúul xiib.
^ Ich griegoeʼ ku yaʼalaʼal kaʼach «chaknuulil».
