Eclesiastés 7:1-29
7 Junpʼéel maʼalob kʼaabaʼeʼ maas maʼalob tiʼ junpʼéel maʼalob aceite,+ u kʼiinil u kíimil máakeʼ maas maʼalob ke u kʼiinil u síijil.
2 Maas maʼalob ka xiʼik máak tiʼ junpʼéel naj tuʼux táan u yoʼtaʼal juntúul kimen ke ka xiʼik tiʼ junpʼéel naj tuʼux yaan fiesta,+ tumen bey kun tsʼoʼokol tuláakal máakoʼ, le máaxoʼob kuxaʼanoʼoboʼ unaj u tsʼáaik tu puksiʼikʼaloʼob leloʼ.
3 Maas maʼalob le yaj óolal ke le kiʼimak óolaloʼ,+ tumen kex chíikaʼan triste u yich máakeʼ ku beetik uts tiʼ u puksiʼikʼal.+
4 U puksiʼikʼal le máax yaan u naʼatoʼ tiaʼan teʼ naj tuʼux ku yoʼtaʼal juntúul kimenoʼ, pero u puksiʼikʼal le j-maʼ naʼatoʼ tiaʼan teʼ naj tuʼux yaan fiestaoʼ.*+
5 Maas maʼalob ka uʼuyaʼak u tsolnuʼuk juntúul máax yaan u naʼat+ ke ka uʼuyaʼak u chʼujuk tʼaan* le j-maʼ naʼatoʼoboʼ.
6 Tumen jeʼex u wáakʼal le kʼiʼixoʼob táan u yeleloʼob yáanal le ollaoʼ bey u cheʼej le j-maʼ naʼatoʼ.+ Leloʼ chéen kunel xan.
7 Tak juntúul máax yaan u naʼateʼ jeʼel u chokotal u pool wa ku pechʼ óoltaʼaleʼ, junpʼéel baʼal ku x-mukul tsʼaʼabal xaneʼ jeʼel u kʼaskúuntik u puksiʼikʼal máakeʼ.+
8 Maas maʼalob u tsʼoʼokbal junpʼéel baʼal ke u káajbal. Maas maʼalob juntúul máax yaan paciencia tiʼ ke juntúul máax nojbaʼal u taaskuba.+
9 Maʼ a séeb pʼuʼujul,+ tumen le máaxoʼob ku pʼuʼujuloʼoboʼ minaʼan u naʼatoʼob.*+
10 Maʼ a waʼalik: «Maas maʼalob le kʼiinoʼob tsʼoʼok u máanoʼob ke le jeʼeloʼobaʼ», tumen juntúul máax yaan u naʼateʼ maʼ tu yaʼalik leloʼ.+
11 Yaan junpʼéel baʼax maʼalob yéetel ku taasik utsil tiʼ le máaxoʼob kuxaʼanoʼoboʼ, letiʼe naʼat paʼteʼ yéetel junpʼéel herenciaoʼ.
12 Tumen jeʼex le naʼat ku kanáantik máakoʼ+ le taakʼin xanoʼ ku kanáantik máak,+ pero u kaanbal máak yéetel u yantal u naʼateʼ maas maʼalob tumen le baʼaloʼobaʼ ku tsʼáaikoʼob kuxtal tiʼ máak.+
13 Jach ilawil baʼax u beetmaj u jaajil Dios, tumen ¿máax jeʼel u páajtal u tojkíintik le baʼax tsʼoʼok u lochikoʼ?+
14 Tiʼ junpʼéel maʼalob kʼiineʼ eʼes a wutsil,+ pero kéen yanak junpʼéel yaayaj kʼiineʼ kʼaʼajaktecheʼ Dios chaʼamil u yantal le maʼalob kʼiinoʼ bey xan le yaayaj kʼiinoʼ,+ beyoʼ wíinikeʼ maʼ kun páajtal u yojéeltik jach baʼax ku taal u kʼiin.+
15 Ichil le kunel kʼiinoʼob tsʼoʼok in kuxtaloʼ+ tsʼoʼok in wilik tuláakal baʼal, tsʼoʼok in wilik juntúul utsul máak ku kíimil kex toj u kuxtal,+ yéetel tsʼoʼok in wilik juntúul kʼasaʼan máak ku kuxtal yaʼab años kex ku beetik u kʼasaʼanil.+
16 Maʼ a taaskaba jach justo+ mix a weʼesik jach yaan a naʼat.+ ¿Baʼaxten unaj a taasik kʼaas ta wóokʼol?+
17 Maʼ u píitmáan a beetik a kʼasaʼanil mix a beetik a j-maʼ naʼatil.+ ¿Baʼaxten unaj a kíimil kex maʼ kʼuchuk u kʼiiniliʼ?+
18 Maas maʼalob ka a beet u cuentail le baʼax yáax aʼalaʼaboʼ,* pero maʼ a pʼatik xan le uláakʼ baʼax aʼalaʼaboʼ.*+ Tumen le máax ku respetartik Diosoʼ yaan u yuʼubik tu kaʼapʼéelal.
19 Le naʼatoʼ ku beetik u maas antal u muukʼ juntúul máak ke diez muʼukʼaʼan máakoʼob kanáantik junpʼéel kaaj.+
20 Way luʼumeʼ minaʼan juntúul máax toj u kuxtal ka u beet mantatsʼ baʼax maʼalob yéetel maʼ u kʼebantal.+
21 Maʼ a beetik u cuentail tuláakal baʼax ku yaʼalaʼal,+ beyoʼ maʼ ken a wuʼuy a maldecirtaʼal tumen a esclavo.
22 Tumen a puksiʼikʼaleʼ jach u yojel tak techeʼ yaʼab u téenel tsʼoʼok a maldecirtik uláakʼ máakoʼob.+
23 Yéetel le naʼat yaantenoʼ tin xakʼaltaj tuláakal le baʼaloʼobaʼ ka tin waʼalaj: «Yaan u jach antal in naʼat», pero maʼ béeychajiʼ.
24 Tuláakal baʼax tsʼoʼok u yúuchleʼ maʼ tu páajtal u naʼataʼal, bey jach taam yaniloʼobeʼ, mix máak jeʼel u páajtal u naʼatkoʼobeʼ.+
25 Yéetel in puksiʼikʼaleʼ tin tsʼáaj in wóol kaanbal, xaakʼal yéetel in kaxt le naʼatoʼ. Tin tsʼáaj in wóol xan in wil baʼaxten ku yúuchul tuláakal baʼal utiaʼal in naʼatik baʼaxten ku beetik u kʼasaʼanil juntúul j-maʼ naʼat, yéetel baʼaxten ku beetik u j-maʼ naʼatil le choko pooloʼoboʼ.+
26 Teen túuneʼ tin wilaj lelaʼ: yaan juntúul koʼolel maas peor* tiʼ le kíimiloʼ, tumen letiʼeʼ bey junpʼéel trampaeʼ, u puksiʼikʼaleʼ bey u redil chuk kayeʼ, u kʼaboʼobeʼ bey jeʼex le cadenaʼob ku tsʼaʼabal tiʼ le máaxoʼob ku kʼaʼalaloʼ. Le máax ku lúubul utsil tiʼ u jaajil Dioseʼ yaan u púutsʼul tiʼ le koʼolelaʼ,+ pero le máax ku kʼebantaloʼ yaan u chuʼukul tumen le koʼolelaʼ.+
27 Le máax ku kaʼansajoʼ*+ ku yaʼalik: «Letiʼe baʼax tin wilaʼ, jujunpʼéelil úuchik in xakʼaltik le baʼaloʼob utiaʼal in tsʼáaik cuentaoʼ,
28 le baʼax tin tsʼáaj in wóol in kaxtoʼ, maʼ tin kaxtiʼ. Ichil mil máakoʼobeʼ tin kaxtaj juntúul xiib toj u kuxtal, pero maʼ tin kaxtaj mix juntúul koʼolel toj u kuxtaliʼ.
29 Chéen letiʼe baʼax tin wilaʼ: U jaajil Dioseʼ maʼalob úuchik u beetik máak,+ pero máakeʼ tsʼoʼok u beetik chéen le baʼax ku chʼaʼtuklikoʼ».+
Notas
^ Wa «teʼ naj tuʼux yaan kiʼimak óolaloʼ».
^ Ich hebreoeʼ ku yaʼalaʼal kaʼach «u kʼaay».
^ Uláakʼ bix u traducirtaʼaleʼ «letiʼe baʼax chíikbesik minaʼan u naʼat máakoʼ».
^ Lelaʼ letiʼe baʼax aʼalaʼab teʼ versículo 16.
^ Lelaʼ letiʼe baʼax aʼalaʼab teʼ versículo 17.
^ Ich hebreoeʼ ku yaʼalaʼal kaʼach «maas kʼáaj».
^ Wa «Le máax ku muchʼik máakoʼ».
