Esdras 3:1-13
3 Teʼ mes siete,+ le tiaʼan le israelitaʼob* tu kaajaloʼoboʼ, tu láaj muchʼubaʼob tu kaajil Jerusalén yéetel junpʼéeliliʼ tuukul.
2 Jesúa+ u hijo Jeozadak yéetel uláakʼ sacerdoteʼob bey xan Zorobabel+ u hijo Sealtiel+ yéetel u láakʼtsiloʼobeʼ líikʼoʼobeʼ ka tu beetoʼob junpʼéel altar* utiaʼal u Dios u kaajil Israel, utiaʼal u páajtal u kʼubkoʼob tóokbil sacrificioʼob tu yóokʼol jeʼex tsʼíibtaʼanil tu Ley Moisés,*+ le máax meyajtik le jaajil Diosoʼ.
3 Kex saajkoʼob kaʼach tiʼ le kaajoʼob yaan tu baʼpachoʼoboʼ tu jel beetoʼob le altar tuʼux yaan kaʼachoʼ+ ka joʼopʼ u kʼubkoʼob tóokbil sacrificioʼob tiʼ Jéeoba, le tóokbil sacrificioʼob ku beetaʼal tempranooʼ bey xan le ku beetaʼal de tardeoʼ.+
4 Ka tsʼoʼokeʼ tu kʼiinbesoʼob u Fiestail le Paseloʼob* jach jeʼex tsʼíibtaʼanil teʼ Leyoʼ.+ Sáamsamal tu kʼuboʼob le jaypʼéel tóokbil sacrificioʼob ku kʼáataʼal ka beetaʼakoʼ.+
5 Ka tsʼoʼokeʼ tu kʼuboʼob le tóokbil ofrenda* mantatsʼ ku kʼuʼubuloʼ,+ le ofrendaʼob ku kʼuʼubul tu kʼiinil túumben lunaʼob,+ le ofrendaʼob ku kʼuʼubul tu kʼiiniloʼob le fiestaʼob+ ku beetaʼal utiaʼal Jéeobaoʼ bey xan tuláakal le ofrendaʼob síij tu puksiʼikʼal le máakoʼob u tsʼáaikoʼob+ tiʼ Jéeobaoʼ.
6 Desde le yáax día tiʼ le mes sieteoʼ+ káaj u kʼubkoʼob tóokbil sacrificioʼob tiʼ Jéeoba. Tu beetoʼob kex maʼ tsʼaʼabak u cimientoil u templo Jéeobaiʼ.
7 Tu tsʼáajoʼob taakʼin tiʼ le máaxoʼob ku póol tuunichoʼoboʼ+ bey xan tiʼ le máaxoʼob beetik uláakʼ meyajoʼoboʼ.+ Tiʼ le sidonioʼob yéetel le tirioʼoboʼ tu tsʼáajoʼob janal, baʼal u yukʼoʼob bey xan aceite. Beyoʼ letiʼobeʼ yaan u taaskoʼob u cheʼil cedro ichil kʼáaʼnáab desde Líbano tak Jope,+ jeʼex u yaʼalmil Ciro, u reyil Persiaeʼ.+
8 Tu kaʼapʼéel año kʼuchkoʼob tu yotoch u jaajil Dios yaan Jerusalénoʼ, jach tu kaʼapʼéel meseʼ, Zorobabel u hijo Sealtiel, Jesúa u hijo Jeozadak yéetel u maasil u láakʼtsiloʼob, le sacerdoteʼob yéetel le levitaʼoboʼ bey xan le máaxoʼob lukʼoʼob teʼ tuʼux bisaʼanoʼob utiaʼal u suutoʼob Jerusalénoʼ+ tu káajsoʼob le meyajoʼ. Letiʼobeʼ tu tsʼáajoʼob le levitaʼob yaantiʼob 20 años wa maasoʼ utiaʼal ka u nuʼuktoʼob le meyaj ku beetaʼal tu yotoch Jéeobaoʼ.
9 Bey túunoʼ Jesúa, u hijoʼob yéetel u láakʼtsiloʼob, bey xan Kadmiel yéetel u hijoʼob, ku taaloʼob tiʼ Judáeʼ, tu muchʼubaʼob yéetel u hijoʼob Enadad, bey xan yéetel u hijoʼob yéetel u láakʼtsiloʼob u hijoʼob Enadad,+ tuláakloʼobeʼ levitaʼob. Tu muchʼubaʼob utiaʼal u nuʼuktikoʼob le meyaj ku beetaʼal tu yotoch le u jaajil Diosoʼ.
10 Le ka tsʼaʼab u cimientoil u templo Jéeoba tumen le j-meyajoʼoboʼ,+ le sacerdoteʼoboʼ u búukintmoʼob u nookʼil u meyajoʼob yéetel u chʼaʼamoʼob trompetaʼob,+ tsʼoʼoleʼ le levitaʼob u hijoʼob Asafoʼ, u chʼaʼamoʼob címbaloʼob.* Tuláakloʼobeʼ waʼalajoʼob utiaʼal u alabarkoʼob Jéeoba, jeʼex u yaʼalmil David u reyil Israeleʼ.+
11 Letiʼobeʼ joʼopʼ u turnarkubaʼob utiaʼal u kʼaayoʼob,+ tu beetoʼob utiaʼal u alabarkoʼob Jéeoba bey xan utiaʼal u tsʼáaikoʼob gracias tiʼ, «tumen letiʼeʼ ku yeʼesik u yutsil, maʼatech u xuʼulul u yeʼesik u nojoch yaabilaj tiʼ Israel».+ Tuláakal le kaajoʼ joʼopʼ u yawatoʼob utiaʼal u alabarkoʼob Jéeoba, tumen tsʼoʼok kaʼach u tsʼaʼabal u cimientoil u yotoch Jéeoba.
12 Yaʼab tiʼ le sacerdoteʼob, le levitaʼob yéetel u nuuktakil le familiaʼob, le máaxoʼob tsʼoʼok u chʼíijloʼob yéetel u yilmoʼob le naj úuchjeakiloʼ,+ joʼopʼ u kʼaʼam okʼoloʼob le ka tu yiloʼob táan u tsʼaʼabal u cimientoil le najoʼ. Mientraseʼ yaʼab uláakʼ máakoʼobeʼ táan u yawatoʼob tumen kiʼimak u yóoloʼob.+
13 Tumen jach kʼaʼam u yawatoʼobeʼ ku yuʼubaʼal desde náachil, chéen baʼaleʼ maʼ páajchaj u yojéeltaʼal wa táan u yawatoʼob tumen kiʼimak u yóoloʼobiʼ wa tumen táan u yokʼoloʼob.
Notas
^ Ich hebreoeʼ ku yaʼalaʼal kaʼach «u paalal Israel».
^ Ilawil página 2554.
^ Ilawil «U Ley Moisés», página 2586.
^ Utiaʼal le fiestaaʼ le israelitaʼoboʼ ku jáan kajtaloʼob tiʼ paseloʼob wa jáakaloʼob u beetmoʼob yéetel u kʼab cheʼob wa yéetel u leʼ palmeraʼob.
^ Ilawil «Tóokbil ofrenda», página 2582.
^ Lelaʼ junpʼéel u nuʼukulil paax bey jeʼex le platillos ku meyaj bejlaʼa utiaʼal u yúuchul paaxoʼ.
