Ezequiel 3:1-27
3 Le ka tsʼoʼokeʼ letiʼeʼ tu yaʼalajten: «U paal máak, jaant le rollo yaan ta táanoʼ.* Le kéen tsʼoʼokok a jaantikeʼ ka bin tʼaan yéetel u kaajil Israel».+
2 Letiʼeʼ tu tsʼáajten le rollo utiaʼal ka in jaantoʼ, teen túuneʼ tin japaj in chiʼ utiaʼal in jaantik.
3 Letiʼeʼ tu yaʼalaj xan ten: «U paal máak, jaant le rollo tin tsʼáajtechoʼ ka a naʼajkúuntaba tu yéetel». Teen túuneʼ joʼopʼ in jaantikeʼ ka tin wuʼuyaj chʼujuk bey kaabeʼ.+
4 Le ka tsʼoʼokeʼ tu yaʼalajten: «U paal máak, xeen tu yiknal le israelitaʼoboʼ ka a tsʼáa u yojéeltoʼob baʼax kin waʼalik.
5 Teneʼ maʼ táan in túuxtikech tu yiknal junpʼéel kaaj maʼ tu naʼataʼal bix u tʼaan wa hasta mix kʼaj óolaʼan le idioma ku tʼankoʼ, baʼaxeʼ táan in túuxtikech tu yiknal u kaajil Israel.
6 Maʼ táan in túuxtikech tu yiknal kaajoʼob maʼ tu naʼataʼal bix u tʼaanoʼob wa hasta mix kʼaj óolaʼan le idioma ku tʼankoʼob ka tak pʼáatak maʼ tu páajtal a naʼatik bix u tʼaanoʼoboʼ. Wa ka in túuxtech tu yiknaloʼobeʼ letiʼobeʼ jeʼel u yuʼubikoʼob a tʼaaneʼ.+
7 Chéen baʼaleʼ u kaajil Israeleʼ maʼ ken u chʼenxikintech tumen letiʼeʼ deporsi maʼ taak u yuʼubik baʼax kin waʼalikiʼ.+ Tuláakal u kajnáaliloʼob Israeleʼ jach tercoʼob yéetel chich u puksiʼikʼaloʼob.+
8 Ilawile, teneʼ yaan in beetik a pechkaba jeʼex u pechkuba letiʼoboʼ.*+
9 A táanpoolaleʼ tsʼoʼok in beetik u pʼáatal jeʼex junpʼéel diamanteeʼ, maas chich ke junpʼéel tokʼ tuunich.+ Maʼ a chʼaʼik saajkil tiʼob mix a kikilankil tu yoʼolal bix u paktikechoʼob,+ letiʼobeʼ deporsi jach tercoʼob».
10 Letiʼ túuneʼ tu yaʼalajten: «U paal máak, chʼenxikinteniʼ yéetel tsʼáa ichil a puksiʼikʼal tuláakal baʼax kin waʼaliktech.
11 Xeen tʼaan yéetel le a wéet kaajaloʼob* bisaʼanoʼob táanxel luʼumiloʼ.+ Wa tu chʼenxikintechoʼob wa maʼeʼ,+ techeʼ unaj a waʼaliktiʼob: ‹Lelaʼ letiʼe baʼax ku yaʼalik Jéeoba, le máax yaan tuláakal autoridad tiʼoʼ›».
12 Ka tsʼoʼokeʼ junpʼéel baʼal yaan u muukʼeʼ* tu biseneʼ+ ka tin wuʼuyaj junpʼéel kʼaʼamkach tʼaan paachil tiʼ teen ku yaʼalik: «Desde teʼ tuʼux yaan Jéeobaoʼ alabartaʼak le páajtalil yéetel le kiʼichkelmil yaantiʼoʼ».
13 Tin wuʼuyaj bix u juum u jiʼikuba u xiikʼoʼob+ le kantúul baʼaloʼob kuxaʼanoʼoboʼ. Tin wuʼuyaj bix u juum le ruedas yaan tu tséeloʼoboʼ+ bey xan u juum junpʼéel baʼal jach kʼaʼam u kíilbal.
14 Le baʼal yaan u muukʼoʼ tu líiʼsen utiaʼal in bin, teen túuneʼ binen. Teʼ súutukoʼ chiʼichnaken yéetel jach jelaʼan in wuʼuyikinba. U poder Jéeobaeʼ táan kaʼach u nuʼuktiken yéetel le páajtalil yaantiʼoʼ.
15 Teen túuneʼ binen tu yiknal le israelitaʼob bisaʼanoʼob kajtal Tel-abib tu jáal le río Kebaroʼ,+ teʼeloʼ tiʼ pʼáateniʼ. Le tiaʼanen tu yiknaloʼoboʼ siete días pʼáaten bey saatal in wóoleʼ.+
16 Le ka máan le siete díasoʼ tu tʼanen Jéeobaeʼ ka tu yaʼalajten:
17 «U paal máak, teneʼ tsʼoʼok in yéeyikech utiaʼal a beetkaba juntúul j-kanan utiaʼal u kaajil Israel.+ Le kéen a wuʼuy baʼax kin waʼalikeʼ techeʼ unaj a tsʼáaik u yojéeltoʼob.+
18 Wa kin waʼalik tiʼ juntúul kʼasaʼan máak: ‹Techeʼ yaan a kíimil›, pero techeʼ maʼ ta waʼalik mix baʼal tiʼ yéetel mix ta kʼaʼajsik u yiikʼ utiaʼal u pʼatik u kʼaakʼas kuxtal utiaʼal u salvarkubaeʼ,+ letiʼeʼ yaan u kíimil tu yoʼolal le baʼaloʼob kʼaastak ku beetkoʼ,+ chéen baʼaleʼ tiʼ teech ken in kʼáat cuenta tu yoʼolal u kʼiʼikʼel.+
19 Chéen baʼaleʼ wa ka waʼalik tiʼ le kʼasaʼan máak baʼax kun úuchultiʼ kex beyoʼ letiʼeʼ maʼ tu xuʼulul u beetik u kʼasaʼanil mix tu pʼatik le kʼaakʼas kuxtal ku biskoʼ, letiʼeʼ yaan u kíimil tu yoʼolal le baʼax maʼ maʼalob ku beetkoʼ, chéen baʼaleʼ techeʼ yaan a salvartik a kuxtal.+
20 Chéen baʼaleʼ wa juntúul utsul máak ku xuʼulul u beetik baʼax maʼalob yéetel ku joʼopʼol u beetik baʼax kʼaaseʼ teneʼ yaan in tsʼáaik junpʼéel baʼal tu beel utiaʼal ka kíimik.+ Wa maʼ ta waʼalaj mix baʼal tiʼeʼ, letiʼeʼ yaan u kíimil tu yoʼolal le baʼaloʼob kʼaastak ku beetkoʼ, teneʼ junpuliʼ maʼ ken in kʼaʼajs le baʼaloʼob maʼalobtak tu beetoʼ, chéen baʼaleʼ tiʼ teech ken in kʼáat cuenta tu yoʼolal u kʼiʼikʼel.+
21 Pero wa tsʼoʼok a waʼalik tiʼ juntúul utsul máak ka u kanáantuba utiaʼal maʼ u kʼebantal, yéetel maʼ tu kʼebantaleʼ, letiʼ túuneʼ maʼ kun kíimil tumen ta waʼalajtiʼ baʼax unaj u beetik,+ teech xaneʼ yaan a salvartik a kuxtal».
22 Le tiaʼanen teʼeloʼ, taal u poder Jéeoba tin wóokʼol, letiʼ túuneʼ tu yaʼalajten: «Líiʼkecheʼ ka xiʼikech teʼ táax luʼumoʼ, teʼeloʼ tiʼ kin tʼaan ta wéeteliʼ».
23 Teen túuneʼ líikʼeneʼ ka binen teʼ táax luʼumoʼ. Teʼeloʼ tin wilaj le páajtalil yéetel le kiʼichkelmil yaan tiʼ Jéeobaoʼ,+ bey jeʼex le tin wilaj tu jáal le río Kebaroʼ.+ Teen túuneʼ xolajeneʼ ka chinlajen.
24 Ka tsʼoʼokeʼ taal u poder Dios tin wóokʼoleʼ ka tu beetaj in waʼatal,+ letiʼ túuneʼ tu tʼaneneʼ ka tu yaʼalajten:
«Xeen ta wotocheʼ ka a kʼalaba.
25 U paal máak, techeʼ yaan a kʼaʼaxal yéetel suumoʼob utiaʼal maʼ u páajtal a bin teʼ tuʼux yaan le máakoʼoboʼ.
26 Teen xaneʼ yaan in beetik u táakʼal a waakʼ ta náaʼkaʼan utiaʼal maʼ u páajtal a tʼaan. Techeʼ maʼ kun páajtal a tojkíintikoʼob, tumen letiʼobeʼ deporsi junpʼéel kaaj jach tercoʼob.
27 Chéen baʼaleʼ le kéen in tʼanecheʼ yaan in tsʼáaiktech u páajtalil a tʼaan utiaʼal a waʼaliktiʼob:+ ‹Lelaʼ letiʼe baʼax ku yaʼalik Jéeoba, le máax yaan tuláakal autoridad tiʼoʼ›. Le máax taak u yuʼubikeʼ u yuʼube,+ le máax maʼ taak u yuʼubikeʼ maʼ u yuʼubik, tumen letiʼobeʼ deporsi junpʼéel kaaj jach tercoʼob.+
Notas
^ Ich hebreoeʼ ku yaʼalaʼal kaʼach «jaant le baʼax ken a kaxtoʼ».
^ Ich hebreoeʼ ku yaʼalaʼal kaʼach «teneʼ yaan in beetik u chichtal u táan a wich jeʼex u táan u yichoʼoboʼ yéetel yaan u chichtal a táanpoolal jeʼex u táanpoolaloʼoboʼ».
^ Ich hebreoeʼ ku yaʼalaʼal kaʼach «u paalal a kaajal».
^ Maʼ xaaneʼ teʼelaʼ táan u tʼaan tiʼ u poder Dios wa tiʼ juntúul ángel.
