Ezequiel 31:1-18
-
Ku lúubul Egipto, le nuxiʼ cedrooʼ (1-18)
31 Teʼ año 11 tiʼ u yáax díail le óoxpʼéel mesoʼ* Jéeobaeʼ tu kaʼa tʼaneneʼ ka tu yaʼalajten:
2 «U paal máak, aʼal tiʼ Faraón u reyil Egipto bey xan tiʼ u ejército:+
‹¿Yaan wa máax jeʼel u páajtal u ketik u nojchil ta wéeteleʼ?
3 Techeʼ beyech juntúul asirioeʼ, beyech junkúul u cedroil Líbanoeʼ,jatsʼuts u kʼaboʼob jeʼex junkúul cheʼ jach ku tsʼáaik boʼoyeʼ yéetel jach kaʼanal,u puntaeʼ ku kʼuchul tak teʼ múuyaloʼoboʼ.
4 Tumen yaan jaʼ tiʼeʼ jach nojochchaji, le jaʼ ku taal tu taamil le luʼumoʼ tu beetaj u kaʼantal.
Le tuʼux pakʼaʼanoʼ baʼpachtaʼan kaʼach tumen mejen ríoʼob.
Le u maasil cheʼob yanoʼob teʼ luʼumoʼ ku jóoyabtaʼaloʼob tumen u canaliloʼob le jaʼoʼ.
5 Le oʼolal maas kaʼanchaj tiʼ tuláakal le u maasil cheʼob yanoʼob teʼ luʼumoʼ.
Tu yoʼolal le bukaʼaj jaʼ yaantiʼoʼu kʼaboʼobeʼ yaʼabchajoʼob yéetel nuukchajoʼob.
6 Tuláakal le chʼíichʼoʼob ku máanoʼob teʼ kaʼanoʼ tu beetaj u kʼuʼob tu kʼaboʼob le cheʼoʼ,tu yáanal u kʼaboʼobeʼ tiʼ ku síijsik kaʼach u mejnil tuláakal le baʼalcheʼob yanoʼob teʼ kʼáaxoʼ,yéetel tuláakal le nukuch kaajoʼoboʼ tiʼ kajaʼanoʼob kaʼach yáanal u boʼoyeʼ.
7 Jach kiʼichkelemchaji yéetel nuukchaj u kʼaboʼob,tumen u mootsoʼobeʼ kʼuch tak tuʼux yaan yaʼabkach jaʼ.
8 Mix junkúul tiʼ le cedroʼob yanoʼob tu jardín Dios+ jeʼel u páajtal u ketkubaʼob kaʼach tu yéeteloʼ.
Mix junkúul enebro yaan kaʼach u kʼaboʼob jeʼex le yaantiʼoʼ,mix junkúul plátano* ku páajtal u ketik u kʼaboʼob kaʼach tu yéetel.
Mix junkúul cheʼ yaan tu jardín Dios jeʼel u páajtal u ketik u kiʼichkelmil kaʼach tu yéeteleʼ.
9 Jach kiʼichkelem úuchik in beetik, jach piim u leʼob.
Pʼektaʼan kaʼach a kiʼichkelmil tumen tuláakal le u maasil cheʼob yanoʼob Edénoʼ, le u jardín u jaajil Diosoʼ›.
10 Le oʼolaleʼ Jéeoba, le máax yaan tuláakal autoridad tiʼoʼ, ku yaʼalik: ‹Letiʼeʼ* jach nojochchaji yéetel u puntaeʼ kʼuch tak teʼ múuyaloʼoboʼ ka joʼopʼ u creerkuba u puksiʼikʼal tumen jach kaʼanchaji. Tu yoʼolal leloʼ
11 yaan in kʼubik tu kʼab le gobernante jach yaan u páajtaliloʼ, le máax gobernartik le kaajoʼoboʼ.+ Letiʼ túuneʼ yaan u líikʼil tu contra, yéetel teneʼ yaan in pʼektik tumen jach kʼasaʼan.
12 Yaan u chʼaʼakal yéetel yaan u xúumpʼattaʼal teʼ montañaʼob tumen le j-táanxel luʼumiloʼoboʼ, le máaxoʼob maas kʼasaʼanoʼob yanoʼob teʼ luʼumoʼoboʼ. U leʼobeʼ yaan u júutul tiʼ tuláakal le táax luʼumoʼoboʼ, yéetel le u kʼaboʼob kun kaʼakachpajloʼ yaan u pʼáatloʼob jaytal tiʼ tuláakal le ríoʼob yanoʼob teʼ luʼumoʼ.+ Tuláakal le kaajoʼob yanoʼob teʼ luʼumoʼ yaan u náachtaloʼob tiʼ u boʼoy, yaan u xúumpʼatkoʼob.
13 Tuláakal le chʼíichʼoʼob ku máanoʼob teʼ kaʼanoʼ yaan u kajtaloʼob teʼ tu chuun cheʼil lubaʼanoʼ. Yéetel tuláakal u baʼalcheʼiloʼob le kʼáaxoʼ yaan u kajtaloʼob tu kʼaboʼob.+
14 Bey túunoʼ mix junkúul tiʼ le cheʼob yanoʼob naatsʼ tiʼ le jaʼ kun sen nojochtal ka tak kʼuchuk u puntaʼob teʼ múuyaloʼoboʼ, yéetel mix junkúul cheʼ chúukaʼan u jaʼil kun kʼuchul u kaʼanlil tak teʼ múuyaloʼoboʼ. Tumen tuláakloʼobeʼ yaan u xuʼulsaʼaloʼob, yaan u binoʼob tu tsʼuʼ luʼum paʼteʼ yéetel le máakoʼob ku binoʼob teʼ muknaloʼ›.
15 Jéeoba, le máax yaan tuláakal autoridad tiʼoʼ, ku yaʼalik: ‹Le kʼiin ken xiʼik teʼ Muknaloʼ* yaan in beetik u yaatal u yóol le máakoʼoboʼ. Le oʼolaleʼ yaan in kʼalik u beel le taamkach jaʼoboʼ yéetel yaan in beetik ka xuʼuluk u yáalkab u jaʼiloʼob utiaʼal maʼ u seguer u taal le bukaʼaj jaʼoʼ. Yaan in beetik u yéeʼjochʼeʼental le Líbano tu yoʼolaloʼ yéetel yaan u tijil tuláakal le cheʼob yanoʼob teʼ kʼáaxoʼ.
16 Le kéen in beet u lúubuleʼ yaan u tíitkuba le kaajoʼoboʼ. Lelaʼ yaan u yúuchul teʼ kʼiin ken in beet u bin teʼ Muknal* paʼteʼ yéetel le máaxoʼob ku binoʼob tsʼuʼ luʼumoʼ. Tuláakal túun le cheʼob yanoʼob Edén,+ le maas kiʼichkelmoʼob yéetel le maas maʼalobtakoʼob yanoʼob teʼ Líbanooʼ bey xan tuláakal le cheʼob chúukaʼan u jaʼiloʼoboʼ yaan u beetaʼal u kiʼimaktal u yóoloʼob tu maas taamil le luʼumoʼ.
17 Letiʼobeʼ tsʼoʼok u binoʼob teʼ Muknal* paʼteʼ tu yéeteloʼ, teʼ tuʼux yaan le máaxoʼob kíimsaʼanoʼob yéetel espadaoʼ,+ junmúuchʼ yéetel le máaxoʼob áantik kaʼach kajaʼanoʼob ichil le u maasil kaajoʼoboʼ›.+
18 ‹¿Yaan wa junkúul tiʼ le cheʼob yanoʼob Edén jeʼel u páajtal u keʼetel u kiʼichkelmil yéetel u nojchil ta wéeteleʼ?+ Kex beyoʼ techeʼ yaan u beetaʼal a bin tu tsʼuʼ le luʼum paʼteʼ yéetel le cheʼob yanoʼob Edénoʼ. Tiʼ kan pektal chúumuk tiʼ le máakoʼob maʼ circuncidartaʼanoʼoboʼ,* le máakoʼob kíimsaʼanoʼob yéetel espadaoʼ. Leloʼ letiʼe baʼax kun úuchul tiʼ Faraón yéetel tiʼ tuláakal u ejércitooʼ›, leloʼ bey u yaʼalik Jéeoba, le máax yaan tuláakal autoridad tiʼoʼ».
Notas
^ U kʼaabaʼ le mesaʼ Siván. Ilawil «Siván», página 2580.
^ Lelaʼ junkúul cheʼ kʼaj óolaʼan bey plátano orientaleʼ.
^ Ich hebreoeʼ ku yaʼalaʼal kaʼach «Techeʼ».
^ Ilawil página 2572.
^ Ilawil página 2572.
^ Ilawil página 2572.
^ Ilawil página 2559.
