Ezequiel 33:1-33
33 Jéeobaeʼ tu tʼaneneʼ ka tu yaʼalajten:
2 «U paal máak, aʼal tiʼ a wéet kaajaloʼob+ lelaʼ:
‹Koʼox aʼalikeʼ kin taasik junpʼéel espada tu contra junpʼéel kaaj,+ tuláakal u kajnáaliloʼob le kaaj túunoʼ ku yéeyikoʼob juntúul máak utiaʼal u kanáantik le kaajoʼ.
3 Le máak túunoʼ le kéen u yil táan u taal le enemigo tu contra le kaajoʼ ku yustik le baak utiaʼal u avisartik le máakoʼoboʼ.+
4 Wa juntúul máak ku yuʼubik u yustaʼal le baak, chéen baʼaleʼ maʼ tu beetik u cuentaileʼ+ tiʼ letiʼ kun antal u culpail le kéen kíimsaʼak tumen le enemigooʼ.+
5 Letiʼeʼ tu yuʼubaj u yustaʼal le baakoʼ, chéen baʼaleʼ maʼ tu beetaj u cuentailiʼ. Tiʼ letiʼ yaan u culpail úuchik u kíimsaʼal. Wa ka u beet u cuentail le baʼax aʼalaʼabtiʼoʼ tsʼoʼok kaʼach u salvartik u kuxtaleʼ.
6 Beoraaʼ koʼox aʼalikeʼ le máak tsʼaʼan kananoʼ ku yilik u taal le enemigooʼ, pero maʼ tu yustik le baak utiaʼal u avisartik le máakoʼoboʼ.+ Tu yoʼolal leloʼ le enemigooʼ ku taaleʼ ku kíimsik wa máax. Le máakoʼ yaan u kíimil tu yoʼolal le baʼax maʼ maʼalob u beetmoʼ, chéen baʼaleʼ u kʼiʼikʼeleʼ yaan in reclamartik tiʼ le máak tsʼaʼan kananoʼ›.+
7 U paal máak, teneʼ tsʼoʼok in yéeyikech utiaʼal a beetkaba juntúul j-kanan utiaʼal u kaajil Israel. Le kéen a wuʼuy baʼax kin waʼalikeʼ techeʼ unaj a tsʼáaik u yojéeltoʼob.+
8 Wa kin waʼalik tiʼ juntúul kʼasaʼan máak: ‹¡Techeʼ yaan a kíimil!›,+ pero techeʼ maʼ ta waʼalik mix baʼal tiʼ le kʼasaʼan máak utiaʼal u pʼatik u kʼaakʼas kuxtaloʼ, letiʼeʼ yaan u kíimil tu yoʼolal le baʼaloʼob kʼaastak ku beetkoʼ,+ chéen baʼaleʼ tiʼ teech ken in kʼáat cuenta tu yoʼolal u kʼiʼikʼel.
9 Chéen baʼaleʼ wa ka waʼalik tiʼ juntúul kʼasaʼan máak ka u kʼex u kuxtal, pero maʼ tu yóotik u beeteʼ, letiʼeʼ yaan u kíimil tu yoʼolal le baʼax kʼaas ku beetkoʼ,+ pero techeʼ yaan a salvartik a kuxtal.+
10 U paal máak, techeʼ unaj a waʼalik tiʼ u kaajil Israel lelaʼ: ‹Teʼexeʼ tsʼoʼok a waʼalikeʼex: «¿Bix jeʼel u páajtal u seguer k-kuxtaleʼ? Si toʼoneʼ hasta bey táan k-peʼechʼel yéetel táan u xuʼulsaʼaltoʼon tumen k-kʼebanoʼob+ yéetel tumen le baʼaloʼob t-beetaj tumen tercoʼonoʼ»›.+
11 Aʼaltiʼob: ‹Jéeoba, le máax yaan tuláakal autoridad tiʼoʼ, ku yaʼalik: «Jeʼex jach tu jaajil kuxaʼaneneʼ, teneʼ junpuliʼ maʼatech u kiʼimaktal in wóol le kéen kíimik juntúul kʼasaʼan máak,+ baʼax kiʼimakkúuntik in wóoleʼ letiʼe u kʼexik u kuxtal+ juntúul kʼasaʼan máak utiaʼal u seguer u kuxtaloʼ.+ Le oʼolaleʼ u kaajil Israel, pʼateʼex le baʼax kʼaas ka beetkeʼexoʼ,+ xúumpʼatteʼex, ¿baʼaxten bíin kíimkeʼex?»›.+
12 U paal máak, techeʼ unaj a waʼalik tiʼ a wéet kaajaloʼob lelaʼ: ‹Le kʼiin ken u beet u tercoil juntúul utsul máakeʼ maʼ kun salvarbil tumen le baʼaloʼob maʼalobtak ku beetik kaʼachoʼ.+ Le kʼiin ken u pʼat le baʼaloʼob kʼaastak ku beetik juntúul kʼasaʼan máakoʼ maʼ kun kíimil tu yoʼolal le baʼaloʼob kʼaastak ku beetik kaʼachoʼ.+ Le kʼiin ken kʼebanchajak juntúul utsul máakeʼ maʼ ken u salvartuba tu yoʼolal le baʼaloʼob maʼalobtak ku beetik kaʼachoʼ.+
13 Koʼox aʼalikeʼ kin waʼalik tiʼ juntúul utsul máak: «Techeʼ yaan u seguer a kuxtal». Le máak túunaʼ ku tuklik yaan u salvarkuba tu yoʼolal le baʼaloʼob maʼalobtak u beetmoʼ yéetel ku joʼopʼol u beetik baʼax kʼaas.*+ Le máakoʼ yaan u kíimil tu yoʼolal le baʼax kʼaas tsʼoʼok u beetkoʼ, maʼ kun kʼaʼajsbil mix junpʼéel tiʼ le baʼaloʼob maʼalobtak u beetmoʼ.+
14 Chéen baʼaleʼ koʼox aʼalikeʼ kin waʼalik tiʼ juntúul kʼasaʼan máak: «Techeʼ yaan a kíimil». Le máak túunoʼ ku xuʼulul u kʼebantal, ku káajal u beetik baʼax uts, ku beetik baʼax toj,+
15 ku sutik le baʼax u chʼaʼamaj tiʼ wa máax bey garantíaoʼ,+ ku sutik le baʼax u yokoltmoʼ,+ ku kuxtal jeʼex unajeʼ yéetel ku xuʼulul u beetik baʼax kʼaas. Tu yoʼolal leloʼ le máakaʼ yaan u seguer u kuxtal,+ maʼ kun kíimil.
16 Maʼ kun kʼaʼajsbil mix junpʼéel tiʼ u kʼebanoʼob.+ Letiʼeʼ yaan u seguer u kuxtal tumen ku beetik baʼax uts yéetel baʼax toj›.+
17 Chéen baʼaleʼ a kaajaleʼ ku yaʼalik: ‹Maʼ maʼalob le baʼax ku chʼaʼtuklik u beetik Jéeobaoʼ›, kex u jaajileʼ letiʼob chʼaʼtuklik u beetkoʼob baʼax maʼ maʼalobiʼ.
18 Juntúul utsul máak ku xuʼulul u beetik baʼax maʼalob yéetel ku káajal u beetik baʼax kʼaaseʼ yaan u kíimil.+
19 Chéen baʼaleʼ wa juntúul kʼasaʼan máak ku xuʼulul u beetik baʼaloʼob kʼaastak yéetel ku joʼopʼol u beetik baʼax toj yéetel baʼax maʼalobeʼ yaan u seguer u kuxtal.+
20 Chéen baʼaleʼ teʼexeʼ ka waʼalikeʼex: ‹Maʼ maʼalob le baʼax ku chʼaʼtuklik u beetik Jéeobaoʼ›.+ U kaajil Israel, teneʼ yaan in juzgartik cada juntúul tiʼ teʼex yoʼolal baʼax ku beetik».
21 Teʼ día cinco tiʼ le mes diez, tu 12 años bisaʼakoʼon táanxel luʼumileʼ, juntúul máak púutsʼ Jerusaléneʼ taal u yileneʼ+ ka tu yaʼalajten: «¡Tsʼoʼok u chʼaʼabal le kaajoʼ!».+
22 Tu áakʼabil antes u taal le máakoʼ Jéeobaeʼ tu tsʼáaj u kʼab tin wóokʼoleʼ ka tu jeʼekʼabtaj in chiʼ antes u kʼuchul le máak tin wiknal de tempranooʼ. Le oʼolal páajchaj in tʼaan tu kaʼatéen, mix juntéen kaʼa mudochajen.+
23 Le ka tsʼoʼokeʼ Jéeobaeʼ tu kaʼa tʼaneneʼ ka tu yaʼalajten:
24 «U paal máak, u kajnáaliloʼob le kaajoʼob xuʼulsaʼabtiʼoboʼ+ táan u yaʼalikoʼob tu yoʼolal u luʼumil Israel: ‹Abraháneʼ kex chéen juntúul máak kaʼacheʼ tu tiaʼalintaj le luʼumaʼ.+ Chéen baʼaleʼ toʼoneʼ yaʼaboʼon, le oʼolal seguro tsʼoʼok u tsʼaʼabaltoʼon le luʼumaʼ›.
25 Le oʼolal unaj a waʼaliktiʼob: ‹Jéeoba, le máax yaan tuláakal autoridad tiʼoʼ, ku yaʼalik: «Teʼexeʼ ka jaantikeʼex bakʼ paʼteʼ yéetel u kʼiʼikʼel,+ ka kʼubik a wóoleʼex tiʼ a x-lalaʼ* imageneʼex, yéetel maʼ tu xuʼulul a kíimskeʼex máak.+ ¿Baʼaxten túun ka tuklikeʼex unaj a tiaʼalintkeʼex le luʼumoʼ?
26 Teʼexeʼ a kʼubmaj a wóoleʼex tiʼ a espadaʼex,+ chéen baʼaloʼob kʼaastak ka beetkeʼex, yéetel tuláakleʼexeʼ ku yantal baʼal a wileʼex yéetel u yatan a wéet xiibileʼex.+ ¿Baʼaxten túun ka tuklikeʼex unaj a tiaʼalintkeʼex le luʼumoʼ?»›.+
27 Techeʼ unaj a waʼaliktiʼob lelaʼ: ‹Jéeoba, le máax yaan tuláakal autoridad tiʼoʼ, ku yaʼalik: «Jeʼex jach tu jaajil kuxaʼaneneʼ yaan u kíimsaʼal yéetel espada tuláakal le máaxoʼob kajaʼanoʼob teʼ kaajoʼob kʼaskúuntaʼanoʼoboʼ. Le máaxoʼob yanoʼob kʼáaxoʼ yaan in kʼubkoʼob tiʼ le tsʼíitsʼik baʼalcheʼob utiaʼal ka jaantaʼakoʼoboʼ. Le máaxoʼob yanoʼob teʼ lugaroʼob kaʼanal u pakʼiloʼob bey xan teʼ sajkaboʼoboʼ yaan u kíimsaʼaloʼob tumen kʼaakʼas kʼojaʼaniloʼob.+
28 Le luʼumaʼ yaan in beetik u pʼáatal jeʼex junpʼéel desierto tuʼux mix baʼal yaneʼ+ yéetel yaan in beetik u xuʼulul u creerkuba yéetel u taaskuba nojbaʼalil. U montañailoʼob Israeleʼ yaan u pʼáatal kʼaas yaniloʼob,+ mix máak kun máaniʼ.
29 Tu yoʼolal le baʼaloʼob kʼaastak tsʼoʼok u beetkoʼoboʼ le luʼumaʼ yaan in beetik u pʼáatal bey junpʼéel desierto tuʼux mix baʼal yaneʼ,+ le kéen in beet leloʼ yaan u yojéeltikoʼob máax Jéeoba»›.+
30 U paal máak, a wéet kaajaloʼobeʼ yaan baʼax ku tsikbaltikoʼob ta woʼolal naatsʼ tiʼ le pakʼoʼoboʼ bey xan tu joonajiloʼob le najoʼoboʼ.+ Letiʼobeʼ táan u yaʼalikoʼob tu baatsiloʼob: ‹Koʼoneʼex uʼuyik le baʼax ku yaʼalik Jéeobaoʼ›.
31 Letiʼobeʼ yaan u muchʼkubaʼob utiaʼal u kutaloʼob ta táan jeʼex u beetik kaʼach in kaajaleʼ. Letiʼobeʼ yaan u yuʼubikoʼob baʼax ken a waʼale, chéen baʼaleʼ maʼ ken u beetoʼob.+ Tumen kex ku alabarkechoʼob yéetel u chiʼobeʼ u puksiʼikʼaloʼobeʼ jach táan u tsʼíiboltik u yantaltiʼob baʼaloʼob kex ka u beetoʼob baʼaloʼob maʼ maʼalobtakiʼ.
32 ¡Uʼuy a wuʼuye! Tu táanoʼobeʼ techeʼ beyech juntúul máak jatsʼuts u kʼaay táan u kʼayik junpʼéel u kʼaayil yaabilaj mientras táan u paxik junpʼéel u nuʼukulil paax yaan u cuerdaileʼ. Letiʼobeʼ yaan u yuʼubikoʼob baʼax ka waʼalik, chéen baʼaleʼ mix máak ken u beet le baʼax ka waʼalikoʼ.
33 Le baʼax tsʼoʼok a waʼalikoʼ yaan u béeytal, le kéen béeychajkeʼ yaan u yojéeltikoʼob yanchaj juntúul profeta ichiloʼob».+
Notas
^ Wa «ku beetik injusticia».
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
