Juan 11:1-57
11 Yaan kaʼach juntúul máak kʼojaʼan ku kʼaabaʼtik Lázaro. Letiʼeʼ tiʼ kajaʼan kaʼach Betaniaeʼ, teʼ kaaj tuʼux kajaʼan xan María yéetel Marta u kiikoʼ.+
2 Le Maríaaʼ letiʼe koʼolel tu yalaj kiʼibok aceite tiʼ Yuumtsil yéetel tu choʼaj u yook yéetel u tsoʼotsel u pooleʼ.+ Letiʼeʼ íitsʼintsil tiʼ Lázaro, le máax kʼojaʼanoʼ.
3 Le koʼoleloʼob túunaʼ tu túuxtoʼob aʼalbil tiʼ Jesús: «Yuumtsil, le máax jach a yaabiltmeʼ kʼojaʼan».
4 Chéen baʼaleʼ le ka tu yuʼubaj Jesús lelaʼ tu yaʼalaj: «Le kʼojaʼanilaʼ maʼ utiaʼal ka u kíimsiʼ, baʼaxeʼ utiaʼal ka alabartaʼak Dios,+ yéetel utiaʼal ka alabartaʼak xan u Paal Dios tu yoʼolal leloʼ».
5 Jesúseʼ u yaabiltmaj kaʼach Marta, María bey xan Lázaro.
6 Chéen baʼaleʼ letiʼeʼ kex tu yojéeltaj kʼojaʼan Lázaroeʼ maʼ bin u yiliʼ, pʼáat kaʼapʼéel kʼiin teʼ tuʼux yaan kaʼachoʼ.
7 Ka tsʼoʼokeʼ tu yaʼalaj tiʼ le discípuloʼoboʼ: «Koʼoneʼex Judea tu kaʼatéen».
8 Le discípuloʼoboʼ tu yaʼaloʼobtiʼ: «J-Kaʼansaj,+ maʼ sen úucheʼ óolak muruxtuntaʼakech tumen u kajnáaliloʼob Judea,+ ¿yaan wa túun a kaʼa biniʼ?».
9 Jesúseʼ tu núukaj: «Doce horas ku sáasilkunaj le Kʼiinoʼ, ¿máasaʼ?+ Wa yaan máax ku máan tu sáasilil kʼiineʼ maʼ tu tʼóochpajal tiʼ mix baʼal, tumen ku yilik le sáasil yaan teʼ yóokʼol kaabaʼ.
10 Wa yaan máax ku máan de áakʼabeʼ ku tʼóochpajal tumen minaʼan mix baʼal utiaʼal sáasilkuntik u beel».
11 Ka tsʼoʼok u yaʼalik le baʼaloʼobaʼ tu yaʼalaj xan: «K-amigo Lázaroeʼ táan u wenel,+ chéen baʼaleʼ teneʼ táan in bin teʼeloʼ utiaʼal ka in wajse».
12 Le discípuloʼob túunoʼ tu yaʼaloʼobtiʼ: «Yuumtsil, wa táan u weenleʼ jeʼel u yutstaleʼ».
13 Chéen baʼaleʼ Jesúseʼ táan kaʼach u yaʼalik tsʼoʼok u kíimil Lázaro. Pero letiʼobeʼ ku tuklikoʼob kaʼacheʼ táan u tʼaan tiʼ u wenel máak utiaʼal u jeʼelskuba.
14 Jesús túuneʼ juntaatsʼ úuchik u yaʼaliktiʼob: «Lázaroeʼ tsʼoʼok u kíimil.+
15 Teneʼ minaʼanen ka úuchi, chéen baʼaleʼ leloʼ yaan u tsʼáaik tuʼux u maas nojochtal a fejeʼex. Koʼoneʼex teʼ tuʼux yanoʼ».
16 Tomás túuneʼ, le ku yaʼalaʼaltiʼ gemelooʼ, tu yaʼalaj tiʼ le u maasil discípuloʼoboʼ: «Koʼoneʼex túun xaniʼ utiaʼal ka kíimkoʼon tu yéetel».+
17 Ka kʼuch Jesúseʼ tsʼoʼok kanpʼéel kʼiinoʼob tsʼaʼabak Lázaro ichil le muknaloʼ.
18 Betaniaeʼ tiʼ yaan kaʼach naatsʼ Jerusaléneʼ, kex bey óoxpʼéel kilómetro tiʼeʼ.
19 Yaʼab judíoʼob binoʼob tu yiknal Marta yéetel María utiaʼal u líiʼskoʼob u yóoloʼob úuchik u kíimil Lázaro.
20 Marta túuneʼ ka tu yojéeltaj táan u taal Jesúseʼ jóokʼ u yile, chéen baʼaleʼ Maríaeʼ+ pʼáat kutal ich naj.
21 Martaeʼ tu yaʼalaj tiʼ Jesús: «Yuumtsil, wa way yanech kaʼacheʼ bejlaʼa maʼ tu kíimil in wíitsʼineʼ.
22 Kex beyoʼ beoraaʼ in wojel jeʼel baʼalak ka a kʼáat tiʼ Dioseʼ, Dioseʼ yaan u tsʼáaiktech».
23 Jesúseʼ tu yaʼalajtiʼ: «A wíitsʼineʼ yaan u líikʼil».
24 Martaeʼ tu yaʼalajtiʼ: «Teneʼ in wojel yaan u líikʼil kéen kaʼa kuxkíintaʼak+ le kimenoʼob teʼ tu tsʼook kʼiinoʼ».
25 Jesúseʼ tu yaʼalajtiʼ: «Teen le kuxtaloʼ bey xan le kaʼa kuxtaloʼ.+ Le máax ku tsʼáaik u fe tiʼ teneʼ kex ka kíimkeʼ yaan u kaʼa kuxtal.
26 Tuláakal xan máax kuxaʼan yéetel ku tsʼáaik u fe tiʼ teneʼ mix bikʼin kun kíimil.+ Techeʼ ¿ka creertik wa lelaʼ?».
27 Martaeʼ tu núukajtiʼ: «Yuumtsil, kin creertik. Teneʼ tsʼoʼok in creertik teech le Cristo u Paal Diosoʼ, le máax aʼalaʼan kun taal way yóokʼol kaaboʼ».
28 Le ka tsʼoʼok u yaʼalik Marta lelaʼ bineʼ ka tu tʼanaj María u yíitsʼin, ka tu yaʼalaj tu xikin: «Le j-Kaʼansajoʼ+ way yaneʼ yéetel táan u tʼankech».
29 Le ka tu yuʼubaj María lelaʼ líikʼ tu séebaʼanileʼ ka joʼopʼ u bin teʼ tuʼux yaan Jesúsoʼ.
30 Teʼ súutuk jeʼeloʼ Jesúseʼ maʼ okok kaʼach teʼ kaajoʼ, baʼaxeʼ láayliʼ tiʼ yaan kaʼach teʼ tuʼux ilaʼab tumen Martaoʼ.
31 Le oʼolaleʼ le judíoʼob yanoʼob kaʼach yéetel María ichil le naj le táan kaʼach u líiʼskoʼob u yóoloʼ chéen ka tu yiloʼob u séeb líikʼil María yéetel u jóokʼol. Letiʼob túuneʼ binoʼob tu paach, tumen ku tuklikoʼob kaʼach táan u bin okʼol tu yiknal le muknaloʼ.+
32 Ka kʼuch María tak teʼ tuʼux yaan Jesúsoʼ tu yileʼ ka tu xóolkʼabtuba tu táaneʼ ka tu yaʼalajtiʼ: «Yuumtsil, wa way yanech kaʼacheʼ bejlaʼa maʼ tu kíimil in sukuʼuneʼ».
33 Jesús túuneʼ ka tu yilaj táan u yokʼol María bey xan le judíoʼob taaloʼob tu yéeteloʼ yaachaj u yóol u puksiʼikʼaleʼ ka péeknaj u yóol,
34 ka tu yaʼalaj: «¿Tuʼux a tsʼaameʼex?». Letiʼobeʼ tu núukoʼobtiʼ: «Yuumtsil, koʼoten ka a wile».
35 Jesús túuneʼ káaj u yáalal u jaʼil u yich.+
36 Le oʼolal le judíoʼoboʼ káaj u yaʼalikoʼob: «¡Ilawil bukaʼaj u yaabiltmil kaʼachi!».
37 Chéen baʼaleʼ yaan tiʼ letiʼobeʼ tu yaʼaloʼob: «Le máak tu tsʼáaj u sáasilil u yich le máak chʼóopeʼ,+ ¿maʼ wa túun tu páajtal kaʼach u beetik wa baʼax utiaʼal maʼ u kíimil le máakaʼ?».
38 Jesús túuneʼ kaʼa yaachaj u yóol u puksiʼikʼal, tsʼoʼoleʼ ka bin teʼ tuʼux yaan le muknaloʼ. U jaajileʼ le muknalaʼ junpʼéel sajkab kaʼachi, yéetel nakkúuntaʼan junpʼéel tuunich tu jool.
39 Jesúseʼ tu yaʼalaj: «Luʼseʼex le tuunichoʼ». Chéen baʼaleʼ Marta u kiik le animáasoʼ tu yaʼalajtiʼ: «Yuumtsil, míin tsʼoʼok u káajal u yantal u book, tumen tsʼoʼok kanpʼéel kʼiin muʼukuk».
40 Jesúseʼ tu yaʼalajtiʼ: «¿Maʼ wa tin waʼalajtecheʼ wa yaan a fejeʼ yaan a wilik bukaʼaj u poder Dios?».+
41 Ka túun luʼsaʼab le tuunichoʼ. Jesús túuneʼ tu líiʼsaj u yich kaʼaneʼ+ ka tu yaʼalaj: «In Yuum, kin tsʼáaiktech gracias tumen tsʼoʼok a wuʼuyik in oración.
42 U jaajileʼ teneʼ in wojel mantatsʼ ka wuʼuyik in oraciónoʼob, chéen baʼaleʼ lelaʼ tsʼoʼok in waʼalik yoʼolal le yaʼabkach máakoʼob waʼalakbaloʼob tin baʼpachaʼ, utiaʼal ka u creertoʼob teech túuxtmilen».+
43 Ka tsʼoʼok u yaʼalik le baʼaloʼobaʼ tu kʼaʼam aʼalaj: «¡Lázaro, jóokʼen!».+
44 Le máak kimen kaʼachoʼ le ka jóokʼeʼ bakʼaʼan u yookoʼob bey xan u kʼaboʼob yéetel nookʼ. U yich xaneʼ bakʼaʼan yéetel junxéetʼ nookʼ. Jesús túuneʼ tu yaʼalaj tiʼ le máakoʼoboʼ: «Luʼseʼex le nookʼoʼob bakʼaʼantiʼoʼ utiaʼal ka páajchajak u xíimbal».
45 Le oʼolaleʼ yaʼab tiʼ le judíoʼob binoʼob yéetel María, yéetel tu yiloʼob le baʼax tu beetaj Jesúsoʼ tu tsʼáaj u fejoʼob tiʼ letiʼ.+
46 Chéen baʼaleʼ yaan tiʼ letiʼobeʼ binoʼob tu yiknal le fariseoʼoboʼ ka joʼopʼ u yaʼalikoʼob le baʼaxoʼob tu beetaj Jesúsoʼ.
47 Le oʼolaleʼ u nuuktakil le sacerdoteʼob yéetel le fariseoʼoboʼ tu muchʼubaʼob yéetel u jueziloʼob le Sanedrínoʼ* ka joʼopʼ u yaʼalikoʼob: «¿Baʼax ken k-beete?, tumen le máakaʼ yaʼab milagroʼob ku beetik.+
48 Wa k-pʼatik chéen beyoʼ tuláakal máak ken u tsʼáa u fe tiʼ letiʼ. Le romanoʼob túunoʼ yaan u taaloʼob yéetel yaan u luʼskoʼobtoʼon le páajtalil yaantoʼon yóokʼol le templooʼ bey xan yóokʼol le kaajaʼ».
49 Chéen baʼaleʼ Caifás+ juntúul tiʼ letiʼobeʼ, u maas nojchil le sacerdoteʼob teʼ jaʼab jeʼeloʼ, tu yaʼalajtiʼob: «Teʼexeʼ maʼ a wojleʼex mix baʼaliʼ,
50 yéetel maʼ ta naʼatkeʼexeʼ maas maʼalob a tiaʼaleʼex ka kíimik juntúul máak yoʼolal le kaajaʼ ke ka xuʼulsaʼak tiʼ tuláakal le kaajaʼ».
51 Lelaʼ maʼ tu yaʼalaj chéen tu juunal u yóoliʼ. Tumen letiʼ u maas nojchil le sacerdoteʼob teʼ jaʼab jeʼeloʼ tu profetizartaj yaniliʼ u kíimil Jesús tu yoʼolal le judíoʼoboʼ,
52 tsʼoʼoleʼ maʼ chéen tu yoʼolal le judíoʼoboʼ, baʼaxeʼ utiaʼal ka u muchʼkíint xan le u paalaloʼob Dios kʼiʼitpajaʼanoʼoboʼ.
53 Le oʼolaleʼ desde teʼ kʼiin jeʼeloʼ joʼopʼ u chʼaʼtuklikoʼob bix ken u kíimsiloʼob.
54 Jesús túuneʼ xuʼul u máan ichil le judíoʼob teʼ tuʼux chochoʼkiloʼ. Letiʼeʼ lukʼ teʼeloʼ ka bin táanxel luʼumil, naatsʼ tiʼ le desiertooʼ, tiʼ junpʼéel kaaj ku kʼaabaʼtik Efraín.+ Teʼeloʼ tiʼ pʼáat yéetel u discípuloʼobiʼ.
55 Teʼ kʼiinoʼob jeʼeloʼ maʼ yaʼab u bin utiaʼal u kʼiinbesaʼal le Pascua+ tumen le judíoʼoboʼ. Yaʼab máakoʼob túun tiʼ le luʼumil jeʼeloʼ binoʼob Jerusalén táanil tiʼ le Pascuaoʼ, binoʼob utiaʼal u limpiokíinkubaʼob jeʼex u yaʼalik le Leyoʼ.
56 Le máakoʼob túunoʼ táan kaʼach u kaxtikoʼob Jesús yéetel táan kaʼach u yaʼalikoʼob tu baatsiloʼob le waʼalakbaloʼob teʼ templooʼ: «¿Baʼax ka tuklikeʼex? ¿Jach junpuliʼ wa maʼ kun taal tiʼ le kʼiinbesajaʼ?».
57 Chéen baʼaleʼ u nuuktakil le sacerdoteʼob yéetel le fariseoʼoboʼ tsʼokaʼaniliʼ kaʼach u yaʼalikoʼobeʼ wa yaan máax ku yojéeltik tuʼux yaneʼ ka u yaʼale, utiaʼal ka xiʼik chʼaʼabil.
Notas
^ Ilawil página 2578.
