Juan 2:1-25
2 Tu yóoxpʼéel kʼiin túuneʼ yanchaj junpʼéel tsʼoʼokol beel tu kaajil Caná, tiʼ u luʼumil Galilea. U maama Jesúseʼ tiʼ yaan kaʼach teʼ festejooʼ.
2 Jesús yéetel u discípuloʼobeʼ aʼalaʼabtiʼob xan ka xiʼikoʼob teʼ tsʼoʼokol beeloʼ.
3 Le ka xuʼup le vinooʼ u maama Jesúseʼ tu yaʼalajtiʼ: «Minaʼan vino tiʼob».
4 Chéen baʼaleʼ Jesúseʼ tu yaʼalaj tiʼ u maama: «¿Baʼaxten ka waʼalikten leloʼ? Maʼ kʼuchuk u kʼiinil in weʼesik máaxeniʼ».
5 U maamaeʼ tu yaʼalaj tiʼ le máaxoʼob ku meyajoʼoboʼ: «Beeteʼex tuláakal baʼax ken u yaʼalteʼex».
6 Teʼ túunoʼ yaan kaʼach seis tinajaʼob beetaʼan yéetel tuunichiʼ. Leloʼobaʼ ku meyajoʼob kaʼach utiaʼal u tsʼaʼabal jaʼ utiaʼal u pʼoʼikuba le judíoʼob jeʼex u yaʼalik le ley yaantiʼoboʼ.+ Cada junpʼéel tinajaeʼ jeʼel u bisik kaʼach kex 44 wa tak 66 litros jaʼeʼ.
7 Jesús túuneʼ tu yaʼalajtiʼob: «Chupeʼex yéetel jaʼ le tinajaʼoboʼ». Letiʼob túuneʼ tu yíiʼchuptoʼob.
8 Ka tu yaʼalaj xan tiʼob: «Beoraaʼ jóoʼseʼex junpʼíiteʼ ka a biseʼex tiʼ le máax tsʼaʼan u yil le festejooʼ». Letiʼob túuneʼ tu bisoʼobtiʼ.
9 Le máax tsʼaʼan u yil le festejooʼ maʼ u yojel kaʼach tuʼux chʼaʼab le vinooʼ, chéen le máaxoʼob jóoʼs le jaʼ u yojloʼob kaʼachoʼ, letiʼ túuneʼ ka tu túuntaj le jaʼ sutaʼan vinoiloʼ tu tʼanaj le noviotsiloʼ
10 ka tu yaʼalajtiʼ: «Tuláakal máakeʼ yáaxeʼ ku tsʼáaik le maʼalob vinooʼ, yéetel le kéen káalchajak le máakoʼoboʼ ku tsʼáaik le maʼ maʼaloboʼ. Chéen baʼaleʼ techeʼ ta wilaj ka yanak maʼalob vino tak beoraaʼ».
11 Le yáax milagroaʼ beetaʼab tumen Jesús tu kaajil Caná tiʼ u luʼumil Galilea. Le baʼax tu beetaʼ tu yeʼesaj le páajtalil yaantiʼoʼ.+ U discípuloʼob túuneʼ tu tsʼáaj u fejoʼob tiʼ letiʼ.
12 Ka tsʼoʼok u yúuchul lelaʼ Jesúseʼ bin yéetel u maama, u yíitsʼinoʼob+ bey xan yéetel u discípuloʼob tu kaajil Capernaúm,+ chéen baʼaleʼ maʼ yaʼab kʼiinoʼob pʼáatoʼobiʼ.
13 Le táan u náatsʼal kaʼach u kʼiinil le Pascua*+ ku beetik le judíoʼoboʼ Jesúseʼ bin Jerusalén.
14 Teʼ templo túunoʼ tu yilaj yaan máakoʼob táan u konkoʼob wakaxoʼob, tamanoʼob yéetel palomaʼobiʼ.+ Tu yilaj xan le máaxoʼob ku kʼexkoʼob taakʼin kulukbaloʼob tu kʼaancheʼoboʼ.
15 Ka tsʼoʼok túun u beetik junpʼéel chicote yéetel suumeʼ tu tojolchʼintaj teʼ templo tuláakal le máakoʼobaʼ paʼteʼ yéetel le tamanoʼoboʼ bey xan yéetel le wakaxoʼoboʼ. Tu kʼíitchʼintaj xan u taakʼin le máaxoʼob kʼexik taakʼinoʼ yéetel tu walkʼesaj u mesaʼob.+
16 Ka tu yaʼalaj tiʼ le máaxoʼob ku kon palomaʼoboʼ: «¡Luʼseʼex le baʼaloʼob teʼelaʼ! ¡Maʼ a sutkeʼex u yotoch in Taata junpʼéel lugar utiaʼal koonol!».+
17 Ka túun kʼaʼaj tiʼ u discípuloʼob le baʼax tsʼíibtaʼanaʼ: «Le yaabilaj kin wuʼuyik tu yoʼolal a wotochoʼ bey junpʼéel kʼáakʼ kun tóochʼbal ichil tiʼ teneʼ».+
18 Le judíoʼob túunoʼ ka tu yiloʼob lelaʼ tu yaʼaloʼobtiʼ: «¿Baʼax señalil ken a tsʼáa utiaʼal a weʼesiktoʼon+ yaantech u páajtalil a beetik le baʼaloʼobaʼ?».
19 Jesúseʼ tu núukajtiʼob: «Nikeʼex le temploaʼ ka in líiʼs ichil óoxpʼéel kʼiin».+
20 Le oʼolal le judíoʼoboʼ tu yaʼaloʼob: «Le temploaʼ 46 años tu bisaj u líiʼsaʼal, chéen baʼaleʼ techeʼ, ¿chéen ichil óoxpʼéel kʼiin ken a líiʼse?».
21 Chéen baʼaleʼ le ka tʼaanaj tiʼ le templooʼ letiʼeʼ táan kaʼach u tʼaan tiʼ u wíinklil.+
22 Le ka líiʼsaʼab ichil le kimenoʼoboʼ kʼaʼaj tiʼ u discípuloʼob le baʼax suuk kaʼach u yaʼalik Jesúsoʼ.+ Letiʼob túuneʼ tu creertoʼob le baʼax ku yaʼalik u Tʼaan Diosoʼ bey xan le baʼax ku yaʼalik kaʼach Jesúsoʼ.
23 Chéen baʼaleʼ le tiaʼan Jesús tu kaajil Jerusalén tu festejoil le Pascuaoʼ yaʼab máakoʼob tu tsʼáaj u fejoʼob tiʼ letiʼ* le ka tu yiloʼob le milagroʼob tu beetoʼ.
24 Chéen baʼaleʼ Jesúseʼ ku kanáantkuba kaʼach tiʼob tumen u láaj kʼaj óoloʼob.
25 Tiʼ letiʼeʼ maʼ kʼaʼabéet kaʼach u yaʼalaʼaltiʼ tumen mix máak baʼax ku tuklik le wíinikoʼoboʼ, tumen letiʼeʼ ku páajtal kaʼach u yilik baʼax yaan tu puksiʼikʼal cada máak.+
