Juan 21:1-25
21 Ka tsʼoʼok u yaʼalik le baʼaloʼobaʼ Jesúseʼ tu kaʼa chíikbesuba tiʼ u discípuloʼob tu jáal le Mar de Tiberíadesoʼ. Bey úuchik u chíikbeskubaaʼ:
2 u muchʼmuba kaʼach Simón Pedro, Tomás (le máax ku yaʼalaʼaltiʼ gemelooʼ),+ Natanael+ le máax sijnáal tu kaajil Caná tiʼ u luʼumil Galilea, u paalal Zebedeo+ yéetel uláakʼ kaʼatúul discípuloʼob.
3 Simón Pedro túuneʼ tu yaʼalajtiʼob: «Nikaʼaj chuk kay». Letiʼobeʼ tu yaʼaloʼobtiʼ: «Jeʼel k-bin xan ta wéeteleʼ». Jóokʼoʼob túuneʼ ka naʼakoʼob teʼ barcooʼ, chéen baʼaleʼ mix baʼal tu chukoʼob teʼ áakʼab jeʼeloʼ.+
4 Le jach táan u taal u sáastaloʼ Jesúseʼ tu chíikbesuba waʼalakbal tu jáal le jaʼoʼ, pero le discípuloʼoboʼ maʼ tu kʼaj óoltoʼob wa Jesúsiʼ.+
5 Jesús túuneʼ tu kʼáatajtiʼob: «Mejen paalaleʼex, ¿máasaʼ minaʼan mix baʼal* a jaanteʼex?». Letiʼobeʼ tu núukoʼob: «¡Minaʼan!».
6 Letiʼeʼ tu yaʼalajtiʼob: «Jáaychʼint u redil a chuk kayeʼex tu x-noʼoj le barcooʼ utiaʼal ka chuuknakeʼex». Ka túun tu jáaychʼintoʼob, chéen baʼaleʼ pʼáat maʼ tu páajtal u jóoʼskoʼob tumen jach táaj chuup yéetel kayoʼob.+
7 Le oʼolaleʼ le discípulo jach yaabiltaʼan tumen Yuumtsiloʼ+ tu yaʼalaj tiʼ Pedro: «¡Letiʼe Yuumtsiloʼ!». Simón Pedro túuneʼ le ka tu yuʼubaj u yaʼalaʼal letiʼe Yuumtsiloʼ tu takaj u nookʼ, tumen óoliʼ x-maʼ nookʼil yanil kaʼachi, ka tu píikchʼintuba ichil le kʼáaʼnáaboʼ.
8 Chéen baʼaleʼ le uláakʼ discípuloʼoboʼ taaloʼob yéetel le barco táan u jíiltikoʼob le red chuup yéetel le kayoʼoboʼ, tumen maʼ náach yaniloʼob tiʼ u jáal le jaʼoʼ, kex 90 metros.
9 Chéen baʼaleʼ ka éemoʼob tiʼ le barco tu jáal le jaʼoʼ tu yiloʼob yaan chúuk tʼabaʼaniʼ yéetel tsʼaʼan kayoʼob tu yóokʼol bey xan waaj.
10 Jesúseʼ tu yaʼalajtiʼob: «Taaseʼex wa jaytúul tiʼ le kayoʼob táant a chukikeʼexoʼ».
11 Simón Pedro túuneʼ naʼak teʼ barcooʼ ka tu jíiltaj jáal jaʼ le red chuup yéetel nukuch kayoʼoboʼ, leloʼobaʼ 153 u túulaloʼob. Chéen baʼaleʼ kex jach yaʼaboʼobeʼ maʼ jatkʼaj le redoʼ.
12 Jesúseʼ tu yaʼalajtiʼob: «Koʼoteneʼex ukʼul». Chéen baʼaleʼ mix juntúul tiʼ le discípuloʼob taakchaj u kʼáatkoʼobtiʼ: «¿Máaxechiʼ?», tumen u yojloʼob kaʼach letiʼ le Yuumtsiloʼ.
13 Náatsʼ túun Jesúseʼ tu chʼaʼaj le waajoʼ ka tu tsʼáajtiʼob, bey xan tu beetil yéetel le kayoʼ.
14 Lelaʼ letiʼ u yóoxtéen+ úuchik u chíikbeskuba Jesús tiʼ u discípuloʼob le tsʼokaʼaniliʼ u líiʼsaʼal ichil le kimenoʼoboʼ.
15 Le ka tsʼoʼok u yukʼuloʼobeʼ Jesúseʼ tu yaʼalaj tiʼ Simón Pedro: «Simón u paal Juan, ¿maas wa a yaabiltmen tiʼ leloʼobaʼ?». Letiʼeʼ tu núukajtiʼ: «Beyoʼ Yuumtsil, techeʼ a wojel in yaabiltmech». Jesúseʼ tu yaʼalajtiʼ: «Tséent in walakʼ tamanoʼob».+
16 Jesúseʼ tu kaʼa kʼáatajtiʼ: «Simón u paal Juan, ¿a yaabiltmen wa?». Letiʼeʼ tu núukajtiʼ: «Beyoʼ Yuumtsil, techeʼ a wojel in yaabiltmech». Jesúseʼ tu yaʼalajtiʼ: «Kanáant in mejen alakʼ tamanoʼob».+
17 Jesúseʼ tu yóoxtéen tu kʼáatajtiʼ: «Simón u paal Juan, ¿a yaabiltmen wa?». Pedroeʼ okʼomchaj u yóol tumen tsʼoʼok óoxtéen u kʼáataʼaltiʼ tumen Jesús: «¿A yaabiltmen wa?». Le oʼolal tu yaʼalajtiʼ: «Yuumtsil, techeʼ tuláakal baʼal a wojel, techeʼ jach a wojel in yaabiltmech». Jesús túuneʼ tu yaʼalajtiʼ: «Tséent in mejen alakʼ tamanoʼob.+
18 Jach tu jaajil kin waʼaliktech: kaʼach maas táankelmecheʼ ta juunal ka takik a nookʼ yéetel ka bin jeʼel tuʼuxak a kʼáateʼ. Chéen baʼaleʼ kéen chʼíijkecheʼ yaan a tichʼik a kʼaboʼob yéetel yaanal máax kun takiktech a nookʼ, yéetel yaan u kuchkech utiaʼal ka u bisech tuʼux maʼ a kʼáatiʼ».
19 Lelaʼ tu yaʼalaj utiaʼal u yeʼesik bix kun kíimil Pedro, le baʼax kun úuchultiʼoʼ yaan u beetik u alabartaʼal Dios. Ka tsʼoʼok u yaʼalik le baʼaloʼobaʼ tu yaʼalajtiʼ: «Maʼ u xuʼulul a taal tin paach».+
20 Ka tu sutuba Pedroeʼ tu yileʼ le discípulo jach yaabiltaʼan tumen Jesúsoʼ+ táan u taal tu paachoʼob, lelaʼ letiʼe discípulo tu jach natsʼuba tu yiknal Jesús le táan u cenaroʼob utiaʼal u kʼáatiktiʼeʼ: «Yuumtsil, ¿máax le kun traicionarkechoʼ?».
21 Pedro túuneʼ le ka tu yilaj le discípuloaʼ tu kʼáataj tiʼ Jesús: «Yuumtsil, kux túun letiʼ, ¿baʼax ken u beete?».
22 Jesúseʼ tu núukajtiʼ: «Wa in kʼáat ka pʼáatak tak ken suunakeneʼ techeʼ, ¿baʼax yanech a wiliʼ? Techeʼ maʼ u xuʼulul a taal tin paach».
23 Le oʼolaleʼ ichil le sukuʼunoʼoboʼ joʼopʼ u yaʼalaʼaleʼ le discípuloaʼ maʼ kun kíimil, chéen baʼaleʼ Jesúseʼ maʼ tu yaʼalaj wa maʼ kun kíimiliʼ, baʼaxeʼ tu yaʼalaj: «Wa in kʼáat ka pʼáatak tak ken suunakeneʼ techeʼ, ¿baʼax yanech a wiliʼ?».
24 Lelaʼ letiʼe discípulo+ tsʼíibtik yéetel tsʼáaik ojéeltbil le baʼaloʼobaʼ, yéetel k-ojleʼ le baʼax ku yaʼalikoʼ jach jaaj.
25 U jaajileʼ jach yaʼab uláakʼ baʼaloʼob tu beetaj Jesús. Wa ka kʼuchuk tsʼíibtbil tuláakal jach jeʼex úuchik u beetkoʼ in tuklikeʼ mix tu túulisil yóokʼol kaab jeʼel u yantal tuʼux u tsʼaʼabal tuláakal le rolloʼob kun tsʼíibtbiloʼ.+
Notas
^ Wa «mix juntúul kay».
