¿JEʼEL wa u bintoʼon utsil wa k-chaʼik u nuʼuktikoʼon Jéeobaeʼ? Utiaʼal k-ojéeltikeʼ unaj k-xakʼaltik le tsolnuʼukoʼob ku tsʼáaik ichil le Bibliaoʼ. ¿Jach wa tu jaajil maʼalobtakoʼob? ¿Jach wa jeʼel u yáantkoʼon utiaʼal ka xiʼiktoʼon utsileʼ? Tu libroi Proverbioseʼ Salomoneʼ tu tsʼíibtaj yaʼabach tsolnuʼukoʼob jeʼel u yáantik máak ichil u kuxtaleʼ. Koʼox ilik jujumpʼéeliʼ.

Utiaʼal u biskuba máak yéetel Dios. Utiaʼal u biskuba máak yéetel Jéeobaeʼ unaj u jach kʼubik u yóol tiʼ letiʼ. Salomoneʼ tu yaʼalaj: «Okes a wóol tiʼ Yuumtsil yéetel tuláakal a puksiʼikʼal[,] maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej» (Proverbios 3:5, 6). ¿Bix jeʼel k-eʼesik k-kʼubik óol tiʼ Dioseʼ? Letiʼe ken k-chaʼa u nuʼuktikoʼonoʼ yéetel ken k-beet baʼaxoʼob ku yaʼalik. Wa k-beetik beyoʼ yaan u yantal u beelal k-kuxtal, tumen yaan k-kiʼimakkúuntik u yóol Jéeoba yéetel yaan xan k-eʼesik chéen táan u tuus Satanás (Proverbios 27:11).

Le familiaoʼ yéetel u amigoʼob máak. Le familiaʼob bejlaʼaʼ jach kʼaʼabéettiʼob le nuʼuktaj ku tsʼáaik Diosoʼ. Dioseʼ ku yaʼalik tiʼ le íichamtsiloʼoboʼ: «Kiʼimakchajak a wóol yéetel u koʼolelil a táankelmil», lelaʼ u kʼáat u yaʼaleʼ maʼ unaj u tusik u yatan máak yéetel uláakʼ koʼoleliʼ (Proverbios 5:18-20). Le capítulo 31 tiʼ Proverbiosoʼ ku yeʼesik baʼax ku beetik utúul atantsil utiaʼal u maas yaabiltaʼal tumen u yíicham yéetel tumen u paalal. Yéetel ku yaʼalik tiʼ le paalaloʼob ka u yuʼuboʼob u tʼaan u taataʼoboʼ (Proverbios 6:20). U libroi Proverbioseʼ ku yeʼesik xan u kʼaʼananil u biskuba máak yéetel u maasil, yéetel ku yaʼalikeʼ le máax ku náachkuntikuba tiʼ u maasileʼ chéen u yutsil ku kaxtik (Proverbios 18:1). Baʼaleʼ unaj u kanik máak u yéey yéetel máaxoʼob ken u bisuba utiaʼal maʼ u beetaʼal u náachtal tiʼ Dios (Proverbios 13:20; 17:17).

Uláakʼ bix u yáantkoʼon. U libroi Proverbioseʼ ku taasik tsolnuʼukoʼob jeʼel u yáantkoʼon k-luʼs t-tuukul baʼaloʼob kʼaastakeʼ, ku yáantkoʼon utiaʼal ka k-pʼat vicioʼob jeʼex le káaltaloʼ, ka k-maʼalobkíint k-modos yéetel ka k-tsʼáa k-óol meyaj (Proverbios 6:6; 14:30; 20:1). Tsʼoʼoleʼ ku yeʼesiktoʼon le talmiloʼob ku taasik u beetik máak baʼaloʼob ku bin tu contra baʼaxoʼob ku yaʼalik Diosoʼ (Proverbios 14:12). Ku yaʼalik xan toʼoneʼ ka k-kanáant k-puksiʼikʼal, tumen «letiʼ u sayabil» le kuxtaloʼ (Proverbios 4:23).

Le tsolnuʼukoʼobaʼ tsʼoʼok u yáantik u millonesi máakoʼob u yutskíint u kuxtaloʼob, letiʼobeʼ tsʼoʼok u yilkoʼobeʼ minaʼan uláakʼ baʼax maas maʼalob tiʼ u beetik máak baʼax ku yaʼalik Jéeoba.

(Chʼaʼabaʼan tu libroi Proverbios.)