¿Yaan wa máax tsʼoʼok u chaambel aʼaliktech junpʼéel baʼal ta xikin chéen utiaʼal ka a wuʼuy teech?... * ¿A wojel wa baʼax le kiaʼaliktech beyoʼ? Junpʼéel secreto. ¿Baʼaxten? Tumen chéen tiʼ teech tu yaʼalaj, mix máak uláakʼ u yojel. Le Bibliaoʼ ku tʼaan tiʼ junpʼéel secreto kʼaj óolaʼan bey «kiliʼich baʼal taʼakaʼaneʼ». Lelaʼ kiliʼich wa santo tumen tiʼ Dios u taal. Tsʼoʼoleʼ junpʼéel secreto tumen mix máak u yojel kaʼachi. Tak le angeloʼob taak kaʼach u yojéeltikoʼoboʼ ¿A kʼáat wa a wojéelt baʼax le secretoaʼ?...

Úuchjeakileʼ Dioseʼ tu beetaj le yáax xiib yéetel le yáax koʼoleloʼ. U kʼaabaʼobeʼ Adán yéetel Eva. Dioseʼ tu tsʼáajoʼob tiʼ junpʼéel jatsʼuts kúuchil tu kʼaabaʼtaj jardín tiʼ Edén. Dioseʼ u kʼáat kaʼacheʼ Adán yéetel u paalaloʼobeʼ ka u sutoʼob tuláakal le Luʼum bey jeʼex le jatsʼuts jardinoʼ yéetel ka kuxlakoʼob utiaʼal minaʼan u xuul teʼ jatsʼuts Paraísooʼ. Baʼaleʼ maʼ bey úuchikiʼ. ¿A wojel wa baʼaxten?...

Tumen Adán yéetel Evaeʼ maʼ tu yuʼuboʼob u tʼaan Diosiʼ, le oʼolal bejlaʼeʼ maʼ kuxaʼanoʼon tiʼ junpʼéel paraísoiʼ. Baʼaleʼ Dioseʼ u yaʼalmaj yaan u sutik le Luʼum bey junpʼéel paraísooʼ. Teʼeloʼ yaan u yantal kiʼimak óolaliʼ yéetel mix máak kun kíimiliʼ. ¿Bix túun ken u beetil? Máan yaʼab jaʼaboʼob mix máak u yojel. ¡Junpʼéel secreto kaʼachi!

Le secretoaʼ jujunpʼíitil úuchik u yojéeltaʼal. Le ka taal Jesús way Luʼumeʼ tu yaʼalaj tiʼ le máakoʼob baʼax le secretoaʼ. Tu yaʼaleʼ yaan yil yéetel u Reino Dios. Tu yaʼalaj xaneʼ ken orarnakoʼoneʼ unaj k-kʼáatik ka taalak le Reinoaʼ. ¿Baʼaxten? Tumen le Reinoaʼ yaan u jatsʼutskíintik tuláakal le Luʼumaʼ.

¿Máasaʼ jach jatsʼuts le baʼax ken u beet Diosaʼ?... Baʼaleʼ maʼ u tuʼubultecheʼ chéen máaxoʼob uʼuyik u tʼaan Dios kun kuxtaloʼob teʼ Paraísooʼ. Le Bibliaoʼ ku tʼaan tiʼ xiiboʼob yéetel koʼoleloʼob tu yuʼuboʼob u tʼaan Jéeoba. ¿A kʼáat wa a wojéelt máaxoʼobiʼ?... Koʼox ilik máaxoʼobiʼ yéetel bix jeʼel u páajtal k-beetik jeʼex letiʼobeʼ.