XOOKIL 3
Rahabeʼ tu tsʼáaj u fe tiʼ Jéeoba
Tukulteʼ tiaʼanoʼon tu kaajil Jericoeʼ. Le kaajaʼ tiaʼan kaʼach tu úuchben luʼumil Canaaneʼ, u kajnáaliloʼobeʼ maʼatech u meyajtikoʼob Jéeoba. Tu kaajil Jericoeʼ yaan juntúul koʼolel ku kʼaabaʼtik Rahab.
Tu paalileʼ Rahabeʼ tu yuʼubaj u tsikbaltaʼal bix úuchik u jaʼatsal u jaʼil le Chak Kʼáaʼnáab tumen Moisesoʼ yéetel bix úuchik u jóoʼsik le israelitaʼob tu luʼumil Egiptooʼ. Tu yuʼubaj xan bix áantaʼabikoʼob tumen Jéeoba utiaʼal u ganarkoʼob le máaxoʼob pʼekmiloʼoboʼ. Beoraaʼ letiʼeʼ ku yuʼubik tiaʼan le israelitaʼob naatsʼ tiʼ Jericooʼ.
Rahabeʼ tu yáantaj le kaʼatúul israelitaʼoboʼ tumen u tsʼaamaj u fe tiʼ Jéeoba
Junpʼéel kʼiin le táan u taal u yáakʼabtaloʼ, túuxtaʼab kaʼatúul israelitaʼob u chʼúuktoʼob le kaajoʼ. Letiʼobeʼ binoʼob tu yotoch Rahab. Letiʼeʼ tu yaʼalajtiʼob ka pʼáatkoʼobiʼ. Teʼ áakʼaboʼ u reyil Jericoeʼ tu yojéelteʼ tu yotoch Rahabeʼ yaan kaʼatúul máakoʼob taaljaʼanoʼob u chʼúuktoʼob le kaajoʼ. Le rey túunoʼ tu túuxtaj ka taasaʼakoʼob tu táan. Rahabeʼ tu taʼakaj le kaʼatúul israelitaʼob tu techoil u yotochoʼ yéetel tu yaʼalaj tiʼ le máaxoʼob túuxtaʼaboʼob tumen le reyoʼ: «Le máaxoʼob ka kaxtikeʼexoʼ weyanoʼob kaʼacheʼ, baʼaleʼ tsʼoʼok u binoʼob. ¡Wa ka áalkabnakeʼexeʼ, jeʼel a chukpachkeʼexoʼobeʼ!» ¿A wojel wa baʼaxten tu yáantaj Rahab le kaʼatúul israelitaʼoboʼ?... Tumen letiʼeʼ u tsʼaamaj u fe tiʼ Jéeoba, yéetel u yojel yaan u tsʼáaik u luʼumil Canaán tiʼ le israelitaʼoboʼ.
Táanil tiʼ u lukʼul le israelitaʼob tu yotoch Rahaboʼ, tu yaʼaloʼobtiʼeʼ letiʼ yéetel u familiaeʼ yaan u salvarkubaʼob ken xuʼulsaʼak tiʼ Jericó. ¿A wojel wa baʼax tu yaʼaloʼobtiʼ ka u beete?... Tu yaʼaloʼobtiʼ: «Chʼaʼ le chak suumaʼ ka a chʼúuykʼaxt tu ventanail a wotoch. Wa ka beetkeʼ, le máaxoʼob yanoʼob ta wotochoʼ yaan u salvarkubaʼob». Rahabeʼ tu beetaj jach jeʼex aʼalaʼabiktiʼoʼ. ¿A wojel wa baʼax úuch ka tsʼoʼoki?...
Jéeobaeʼ tu salvartaj Rahab yéetel u familia
Ka máan wa jaypʼéel kʼiineʼ, le israelitaʼoboʼ xíimbalnajoʼob tu baʼpach le kaajoʼ baʼaleʼ maʼ tʼaanajoʼobiʼ. Seis kʼiinoʼob bey úuchik u xíimbaloʼob tu baʼpach le kaajoʼ, juntéen tiʼ junpʼéel kʼiin. Baʼaleʼ tu siete kʼiinileʼ siete u téenel xíimbalnajoʼob, tu tsʼookeʼ joʼopʼ u yaawtoʼob jach kʼaʼam. Jéeobaeʼ túuneʼ tu beetaj u níikil u baʼpakʼiloʼob le kaajoʼ. Baʼaleʼ le naj tuʼux chʼuykíintaʼan le chak suumoʼ, maʼ níikiʼ. ¿Ka wilik wa teʼ dibujo le najoʼ?... ¡Bey úuchik u salvartaʼal Rahab yéetel u familiaoʼ!
¿Baʼax ka kanik tiʼ Rahab?... Letiʼeʼ tu tsʼáaj u fe tiʼ Jéeoba yoʼolal le baʼaxoʼob jatsʼutstak tu yuʼubaj u beetmajoʼ. Teech xaneʼ yaʼab baʼaloʼob jatsʼutstak táan a kanik tiʼ Jéeoba. ¿Yaan wa a tsʼáaik a fe tiʼ Dios jeʼex Rahabeʼ?... Yaan ¿máasaʼ?
