XOOK 10
¿Máakalmáak le religión kaʼansik u jaajiloʼ?
1. ¿Chéen wa junpʼéel jaajil religión yaan?
«Kanáantabaʼex tiʼ le maʼ jaajil profetaʼoboʼ» (MATEO 7:15)
Jesúseʼ tu kaʼanseʼ chéen junpʼéel jaajil religión yaan. Tu comparartaj yéetel junpʼéel bej ku bisik máak tiʼ kuxtal minaʼan u xuul, le oʼolal maʼ yaʼab máak kaxtikiʼ (Mateo 7:14). Dioseʼ ku kʼamik chéen le religión teʼ Biblia ku chʼaʼik baʼax ku kaʼansikoʼ. Le máaxoʼob adorartik Dios jeʼex u yaʼalik le Bibliaoʼ junpʼéeliliʼ baʼax ku creerkoʼob. Xok Juan 4:23, 24; 14:6; Efesios 4:4, 5.
Chaʼant le video ¿Ku kʼamik wa Dios tuláakal le religiónoʼoboʼ?
2. ¿Baʼax tu yaʼalaj Jesús yoʼolal le maʼ jaajil profetaʼoboʼ?
«Letiʼobeʼ tu táan tuláakal máak ku yaʼalikoʼob u kʼaj óoloʼob Dios, chéen baʼaleʼ yéetel baʼax ku beetkoʼobeʼ ku yeʼeskoʼob maʼ beyiʼ» (TITO 1:16)
Jesúseʼ tu yaʼaleʼ yaan u yantal maʼ jaajil profetaʼob yaan u kʼaskúuntikoʼob u fe le máaxoʼob adorartik Diosoʼ. Le máakoʼobaʼ ku yaʼalikoʼobeʼ táan u adorarkoʼob Dios, pero yéetel baʼax ku beetkoʼobeʼ chíikaʼan maʼ beyiʼ. Le máaxoʼob jach tu jaajil adorartik Diosoʼ ku páajtal u kʼaj óoltaʼaloʼob yoʼolal bix u modosoʼob bey xan yoʼolal bix u kuxtaloʼob. Xok Mateo 7:13-23.
3. ¿Máaxoʼob jach tu jaajil adorartik Dios?
Yaan cinco baʼaloʼob eʼesik, koʼox ilik máakalmáakoʼobiʼ:
-
Ku yilkoʼob le Biblia bey u Tʼaan Dioseʼ. Letiʼobeʼ maʼ tu kaʼanskoʼob baʼaloʼob chéen tu tuukul wíinik u taal, baʼaxeʼ tuláakal le baʼax ku kaʼanskoʼoboʼ teʼ Biblia u taaloʼ (Mateo 15:7-9). Tsʼoʼoleʼ ku tsʼáaikoʼob ichil u kuxtaloʼob le baʼax ku kaʼanskoʼoboʼ. Xok Juan 17:17; 2 Timoteo 3:16, 17.
-
Ku kaʼanskoʼob u kʼaabaʼ Dioseʼ, Jéeoba. Jesúseʼ tu kaʼansaj u kʼaabaʼ Dios tiʼ le máakoʼoboʼ. Tu kaʼansaj xaneʼ kéen orarnak máakeʼ unaj u kʼáatik ka santificartaʼak u kʼaabaʼ Dios (Mateo 6:9). Teʼ tuʼux kajaʼanechoʼ, ¿baʼax religiónil kaʼansik u kʼaabaʼ Dios? Xok Juan 17:26; Romanos 10:13, 14.
-
Ku tsikbaltikoʼob le baʼaxoʼob ken u beet u Reino Diosoʼ. Jesúseʼ taal way Luʼum utiaʼal u tsikbaltik le jatsʼuts baʼaloʼob ken u beet u Reino Diosoʼ, letiʼeʼ tak le kʼiin ka kíimoʼ maʼ xuʼul u tʼaan tiʼ le Reinooʼ (Lucas 4:43; 8:1; 23:42, 43). Tsʼoʼoleʼ tu yaʼaleʼ u discípuloʼobeʼ yaan u tsikbaltikoʼob baʼax ken u beet le Reinooʼ. Wa ku náatsʼal wa máax u tsikbalttech yoʼolal u Reino Dioseʼ, ¿tiʼ baʼax religiónil a tuklik ku bin? Xok Mateo 24:14.
-
Maʼ tu táakpajloʼob tiʼ le baʼaxoʼob ku beetaʼal teʼ yóokʼol kaabaʼ. U discípuloʼob Jesúseʼ maʼ tu táakpajloʼob tiʼ política mix tiʼ baʼateloʼob (Juan 17:16; 18:36). Maʼ xan tu beetkoʼob le baʼaloʼob kʼaastak suuk u beetik le máakoʼoboʼ. Xok Santiago 4:4.
-
Jach ku yeʼeskoʼob yaabilaj. Tsʼoʼok u kankoʼob teʼ Bibliaoʼ unaj u respetarkoʼob tuláakal máak. Le maʼ jaajil religiónoʼoboʼ ku apoyarkoʼob le guerraʼoboʼ, pero le máaxoʼob jach tu jaajil adorartik Diosoʼ maʼ tu beetkoʼob beyoʼ (Miqueas 4:1-3). Letiʼobeʼ ku xupik u tiempoʼob utiaʼal u yáantkoʼob u maasil. Xok Juan 13:34, 35; 1 Juan 4:20.
4. ¿A wojel wa máakalmáak le religión kaʼansik u jaajiloʼ?
Techeʼ baʼax ka tuklik: ¿Baʼax religiónil ku chʼaʼik teʼ Biblia tuláakal le baʼax ku kaʼansikoʼ, ku kaʼansik u kʼaabaʼ Dios yéetel ku kaʼansik le jatsʼuts baʼaloʼob ken u beet u Reino Diosoʼ? ¿Baʼax religiónil jach ku yeʼesik yaabilaj ichiloʼob yéetel maʼ tu apoyarkoʼob le guerraoʼ? Xok 1 Juan 3:10-12.
