XOOK 6
¿Yaan wa u kaʼa kuxtal le kimenoʼoboʼ?
1. ¿Yaan wa u kaʼa kuxtal le kimenoʼoboʼ?
Juntéenjeakeʼ Jesúseʼ bin Betania, tiʼ kajaʼan kaʼach Lázaroiʼ. Baʼaleʼ ka kʼucheʼ tsʼoʼok kanpʼéel kʼiin kíimik Lázaro, ka túun láakʼintaʼab tumen Marta yéetel María teʼ tuʼux tsʼaʼab u wíinklil Lázarooʼ. Maʼ xáanchaj ka joʼopʼ u taal le máakoʼob teʼ tuʼux yanoʼoboʼ. Bukaʼaj wal kiʼimakchajik u yóol Marta yéetel María le ka tu yiloʼob tsʼoʼok u kaʼa kuxkíintaʼal Lázarooʼ. Xok Juan 11:21-24, 38-44.
Le Bibliaoʼ ku yaʼalikeʼ yaan u kaʼa kuxkíintaʼal le kimenoʼoboʼ. Martaeʼ jach ku creertik yaan u kʼuchul u kʼiinil u kaʼa kuxkíintaʼal le kimenoʼob way Luʼumeʼ. Xok Job 14:14, 15.
2. ¿Yaan wa baʼax ku pʼáatal kuxaʼanil tiʼ máak kéen kíimik?
Dioseʼ tu yaʼalaj tiʼ Adán: «Tumen luʼumech yéetel teʼ luʼum bíin suunakechoʼ» (GÉNESIS 3:19)
Wíinikeʼ beetaʼan yéetel «luʼum» (Génesis 2:7; 3:19). Minaʼan junpʼéel pixan ichil k-wíinklil. Beetaʼanoʼon de bakʼ yéetel baak, le beetik kéen kíimkoʼoneʼ mix baʼal ku pʼáatal kuxaʼanil. Le kéen kíimik u cerebro máakeʼ ku xuʼulul u tuukul yéetel u sufrir, jach mix baʼal ku yuʼubik. Le oʼolal Lázaroeʼ maʼ tu tsikbaltaj mix baʼal le ka tsʼoʼok u kaʼa kuxkíintaʼaloʼ. Xok Salmo 146:4; Eclesiastés 9:5, 6, 10.
¿Yaan wa túun junpʼéel infierno tuʼux ku beetaʼal u sufrir máak tumen Dios? Minaʼan. Jeʼex tsʼoʼok k-ilkoʼ le kimenoʼoboʼ jach mix baʼal ku yuʼubikoʼob. Le baʼax ku yaʼalik le máakoʼob yoʼolal le infiernooʼ chéen tuus, u kʼáatoʼob ka tuklaʼak kʼasaʼan Jéeoba. Pero u jaajileʼ Dioseʼ mix tu tuukul ku máan u beetik u sufrir máak wa u tóokik. Xok Deuteronomio 12:31.
Chaʼant le video ¿Baʼax kun úuchul yéetel le kimenoʼoboʼ?
3. ¿Ku páajtal wa u tʼaan le kimenoʼoboʼ?
Le kimenoʼoboʼ maʼ tu páajtal u tʼaanoʼob mix u yuʼubikoʼon (Salmo 115:17). Chéen baʼaleʼ yaan kʼasaʼan ángeloʼobeʼ ku beetkoʼob bey letiʼe máaxoʼob kimenoʼob ku tʼaanoʼob yéetel máakoʼ (2 Pedro 2:4). Le beetik Jéeobaeʼ claro u yaʼalik maʼ unaj k-tʼaan yéetel le kimenoʼoboʼ. Xok Deuteronomio 18:10, 11.
4. ¿Máaxoʼob kun kaʼa kuxkíintbiloʼob?
U millonesil máakoʼob kimenoʼobeʼ yaan u kaʼa kuxkíintaʼaloʼob way Luʼumeʼ. Hasta yaan u kaʼa kuxkíintaʼal le máaxoʼob tu beetoʼob baʼaloʼob kʼaastakoʼ tumen maʼ tu kʼaj óoltoʼob Diosiʼ. Xok Lucas 23:43; Hechos 24:15.
Kéen kaʼa kuxkíintaʼakoʼobeʼ yaan u páajtal u kaanbaloʼob tiʼ Dios, tsʼoʼoleʼ yéetel baʼax ken u beetoʼobeʼ yaan u yeʼeskoʼob wa yaan u fejoʼob tiʼ Jesús (Apocalipsis 20:11-13). Wa ku yuʼubikoʼob u tʼaan Dioseʼ mix bikʼin kun kaʼa kíimloʼob. Xok Juan 5:28, 29.
5. U kaʼa kuxkíintaʼal le kimenoʼoboʼ, ¿baʼax ku kaʼansiktoʼon yoʼolal Jéeoba?
Le kaʼa kuxtaloʼ ku kaʼansiktoʼoneʼ Jéeobaeʼ jach uts yéetel nojoch u yaabilaj. Chéen tumen tu túuxtaj u Hijo kíimil t-oʼolaleʼ ku páajtal u kaʼa kuxtal le kimenoʼoboʼ. Techeʼ, ¿máax ka tsʼíiboltik a wilik kéen kaʼa kuxkíintaʼak le kimenoʼoboʼ? Xok Juan 3:16; Romanos 6:23.
