1. ¿Baʼaxten maʼ unaj u náayal k-óoliʼ? Tsʼáa junpʼéel ejemplo. (Ilawil le foto yaan tu káajbal le xookaʼ.)

LE ASAMBLEAOʼ tsʼoʼok u káajal. Le sukuʼun ku presidiroʼ waʼalakbal teʼ plataformaoʼ yéetel táan u yaʼalik nukaʼaj káajal le paaxoʼ, ken káajakeʼ tuláakal le máaxoʼob yanoʼoboʼ u yojloʼob kʼaʼabéet u kutaloʼob. Yanoʼobeʼ taak u yuʼubikoʼob le jatsʼuts paaxoʼob kun tsʼaabiloʼ yéetel táan u páaʼtkoʼob u káajal le discursoʼoboʼ. Chéen baʼaleʼ yanoʼob xaneʼ maʼ tu chʼenxikintikoʼob baʼax ku yaʼalik le sukuʼunoʼ mix tu beetkoʼob u cuentail wa tsʼoʼok u káajal le paaxoʼ, chéen táan u kʼakʼatmáanoʼob wa táan u tsikbaloʼob yéetel u amigoʼob. Lelaʼ ku yeʼesik baʼax jeʼel u yúuchul wa ku náayal k-óol yéetel wa maʼ t-tsʼáaik cuenta baʼax táan u yúuchleʼ. Jach maʼalob ka k-chʼaʼ en cuenta lelaʼ tumen maʼ kun xáantaleʼ yaan u yúuchul junpʼéel baʼal maas nojoch yéetel jach junpuliʼ maʼ unaj u náayal k-óoliʼ. ¿Baʼax kun úuchul?

2. ¿Baʼaxten tu yaʼalaj Jesús tiʼ u disipuloʼob maʼ u náayal u yóoloʼob?

² Jesuseʼ tu yaʼalaj tiʼ u disipuloʼob maʼ u náayal u yóoloʼob yéetel ka u preparartubaʼob utiaʼal ken taalak «u tsʼoʼokol tiʼ le yóokʼol kaabaʼ». Tu yaʼalajtiʼob: «Maʼ u xuʼulul a paakateʼex yéetel maʼ a weenleʼex, tumen maʼ a wojleʼex baʼax kʼiin ken kʼuchuk le kʼiin aʼalaʼanoʼ». Ka tsʼoʼokeʼ yaʼab u téenel tu yaʼalajtiʼob: «Maʼ u náayal a wóoleʼex» (Mat. 24:3; xok Marcos 13:32-37). Le tʼaanoʼob  xanaʼ ku chíikpajal tu libroil Mateo, teʼeloʼ Jesuseʼ tu yaʼalaj tiʼ u disipuloʼob: «Maʼ u náayal a wóoleʼex, tumen maʼ a wojleʼex baʼax kʼiin ken taalak a Yuumtsileʼexiʼ». Tsʼoʼoleʼ tu yaʼalajtiʼob: «Eʼeseʼex xan maʼ táan a weenleʼexiʼ, tumen u Paal máakeʼ yaan u kʼuchul tiʼ junpʼéel hora maʼ táan a páaʼtkeʼexiʼ». Tsʼoʼoleʼ tu yaʼalaj xan tiʼob: «Maʼ a weenleʼex, tumen maʼ a wojleʼex mix u kʼiinil mix u yorailiʼ» (Mat. 24:42-44; 25:13).

3. ¿Baʼaxten unaj k-chʼaʼik en cuenta le baʼax tu yaʼalaj Jesusoʼ?

³ Toʼoneʼ k-jach chʼaʼamaj en cuenta le baʼax tu yaʼalaj Jesús tiʼ u disipuloʼoboʼ. K-ojel xan kuxaʼanoʼon «tu tsʼook kʼiin» yéetel maʼ kun xáantal ken káajak junpʼéel «nojoch muʼyajil» (Dan. 12:4; Mat. 24:21). Jeʼex tu yaʼalaj Jesusoʼ, teʼ kʼiinoʼobaʼ u kaajal Jéeobaeʼ táan u kʼaʼaytik tuláakal tuʼux le baʼaxoʼob ken u beet le Reinooʼ. Tsʼoʼoleʼ tuláakal tuʼux táan xan u yilaʼal guerraʼob, kʼojaʼaniloʼob, u tíitkuba luʼum yéetel wiʼijil. Bejlaʼeʼ yaan xan yaʼab religionoʼob maʼatech u kaʼanskoʼob u jaajil yéetel yaʼab máakoʼob kʼasaʼanoʼob yaan (Mat. 24:7, 11, 12, 14; Luc. 21:11). ¿Máasaʼ jach táan k-páaʼtik u kʼuchul u kʼiinil u taal Jesús utiaʼal u béeykuntik le baʼaxoʼob u yaʼalmaj Jéeobaoʼ? (Mar. 13:26, 27.)

4. 1) ¿Baʼaxten k-aʼalik Jesuseʼ u yojel baʼax kʼiin ken káajak le Armagedonoʼ? 2) Kex maʼ k-ojel baʼax kʼiin ken taalak le nojoch muʼyajiloʼ, ¿baʼax k-ojel?

⁴ Ken xiʼikoʼon tiʼ junpʼéel asambleaeʼ k-ojel baʼax hora ken káajak cada jaats. Chéen baʼaleʼ maʼ k-ojel jach baʼax kʼiin ken káajak le nojoch muʼyajiloʼ. Le ka taal Jesús way Luʼumeʼ, tu yaʼalaj: «Baʼaleʼ u kʼiinil yéetel u yoraileʼ, mix máak u yojel, mix le angeloʼob yanoʼob teʼ kaʼanoʼ, mix le Paaloʼ, chéen le Taataoʼ» (Mat. 24:36). Tumen Jesús kun nuʼuktik u baʼatelil Armagedoneʼ, jeʼel u páajtal k-aʼalikeʼ teʼ kʼiinoʼobaʼ letiʼeʼ u yojel baʼax kʼiin ken káajak le nojoch baʼatelaʼ (Apo. 19:11-16). Chéen baʼaleʼ toʼoneʼ maʼ k-ojel u kʼiinil mix u yorail ken taalak le xuʼulsajiloʼ. Le oʼolal maʼ unaj u náayal k-óoliʼ. Jéeobaeʼ tsʼoʼok u chʼaʼtuklik baʼax kʼiin ken káajak le nojoch muʼyajiloʼ yéetel cada kʼiin ku máaneʼ maas naatsʼ yanil, toʼoneʼ k-ojleʼ maʼ kun xáantal ken kʼuchuk «u kʼiinil u béeytal» (xok Habacuc 2:1-3). ¿Baʼaxten bey k-aʼalikaʼ?

5. Tsol baʼaxten k-aʼalikeʼ le profecíaʼob ku yaʼalik Jéeobaoʼ ku béeychajal jach teʼ kʼiin u yaʼalmoʼ.

⁵ Le baʼaxoʼob ku yaʼalik Jéeobaoʼ ku béeychajal jach tu kʼiinil. Koʼox tʼaan tiʼ le ka jóoʼsaʼab u kaajil Israel tu luʼumil Egiptooʼ. Lelaʼ úuch tu kʼiinil 14 tiʼ Nisán tiʼ u añoil 1513 táanil tiʼ u taal Jesús. Le ka tʼaanaj tiʼ le kʼiinaʼ Moiseseʼ tu yaʼalaj: «Jach le kʼiin ka tu tsʼáaj 430 añosoʼ, u kaajal Jéeobaeʼ jóokʼ tiʼ u luʼumil Egipto, en orden úuchik u jóokʼloʼob jeʼex u beetik junpʼéel ejércitoeʼ» (Éxo. 12:40-42, Traducción del Nuevo Mundo, TNM). Le 430 años tu yaʼalaj Moisesoʼ káaj tu añoil 1943, lelaʼ letiʼe ka joʼopʼ u bendecirtik Jéeoba u chʼiʼibal Abrahán jeʼex u yaʼalmiltiʼoʼ (Gal. 3:17, 18). Maʼ úuch u beet le pacto Jéeoba yéetel Abrahanoʼ, tu yaʼalajtiʼ: «Dios túuneʼ tu yaʼalaj tiʼ Abrán: ‹Jach tu jaajil kin waʼaliktecheʼ a paalaleʼ yaan u binoʼob kajtal táanxel luʼumil, yaan u esclavizartaʼaloʼob yéetel yaan u beetaʼal u sufriroʼob durante 400 años tumen u kajnáaliloʼob le luʼum jeʼeloʼ›» (Gén. 15:13, TNM; Bax. 7:6). Le cuatrocientos añosoʼ káaj tu añoil 1913 táanil tiʼ u taal Jesús. Lelaʼ letiʼe ka pʼaʼastaʼab Isaak tumen Ismaeloʼ yéetel tsʼoʼok tu añoil 1513, le ka jáalkʼabtaʼab le israelitaʼob tu luʼumil Egiptooʼ (Gén. 21:8-10; Gal. 4:22-29). Lelaʼ ku yeʼesikeʼ Jéeobaeʼ desde cuatrocientos años anteseʼ tu yaʼalaj jach baʼax kʼiin ken u jáalkʼabt u kaajal.

6. ¿Baʼaxten k-ojel yaan u salvartik Jéeoba u kaajal?

⁶ Josueeʼ juntúul tiʼ le israelitaʼob jóoʼsaʼaboʼob  Egiptooʼ. Ka máan yaʼab añoseʼ letiʼeʼ tu kʼaʼajsaj tiʼ u kaajil Israel: «In kʼáat ka a wutsil kʼaj óolteʼex yéetel tuláakal a puksiʼikʼaleʼex bey xan yéetel tuláakal a wóoleʼex tsʼoʼok u béeychajal tuláakal baʼax [u yaʼalmaj] Yuumtsil. Mix junpʼéel [baʼax u yaʼalmaj] pʼáat wa maʼ béeychajiʼ» (Jos. 23:2, 14). Jéeobaeʼ tsʼoʼok u yaʼalik yaan u salvartik u kaajal ken taalak le nojoch muʼyajiloʼ yéetel yaan u tsʼáaiktiʼob kuxtal minaʼan u xuul teʼ túumben luʼumoʼ. Toʼoneʼ k-ojel jach yaan u beetik Jéeoba le baʼax u yaʼalmoʼ. Le oʼolaleʼ wa toʼon k-kʼáat antal teʼ túumben luʼumoʼ, maʼ unaj u náayal k-óoliʼ.

7, 8. 1) ¿Baʼax táakaʼan ichil le meyaj ku beetik le máaxoʼob tsʼaʼanoʼob u kanáantoʼob le kaajoʼob úuchjeakiloʼ, yéetel baʼax k-kanik tiʼob? 2) ¿Baʼax jeʼel u yúuchul wa ku wenel le máaxoʼob tsʼaʼanoʼob kananoʼ? Tsʼáa junpʼéel ejemplo.

⁷ Yaan baʼax jeʼel u páajtal k-kanik tiʼ le máaxoʼob tsʼaʼanoʼob u kanáantoʼob le kaajoʼob úuchjeakiloʼ. Yaʼab tiʼ le kaajoʼoboʼ, jeʼex u kaajil Israeleʼ, tsʼaʼan kaʼanal pakʼoʼob tu baʼpach utiaʼal maʼ u páajtal u yokol le enemigoʼoboʼ. Le máaxoʼob kanáantik le kaajoʼ ku waʼataloʼob tu maas kaʼanlil le pakʼoʼ, desde teʼeloʼ ku béeytal u yilkoʼob tuláakal u baʼpach le kaajoʼ. Tu joonajiloʼob le kaajoʼ ku waʼatal kaʼach uláakʼ máaxoʼob kananiʼ. Le máaxoʼob ku kananoʼobaʼ maʼ unaj u náayal u yóoloʼob mix de kʼiin mix de áakʼabiʼ. Wa ku yilkoʼob táan u taal le enemigoʼoboʼ tu séebaʼanil ku avisarkoʼob u máakiloʼob le kaajoʼ (Isa. 62:6). Letiʼobeʼ u yojloʼob jach junpuliʼ maʼ unaj u weenloʼobiʼ mix u náayal u yóoloʼob, beyoʼ jeʼel u páajtal u yilkoʼob baʼaxoʼob ku yúuchleʼ. Wa maʼ u beetkoʼob kaʼacheʼ yaʼab máax jeʼel u kíimileʼ (Eze. 33:6).

⁸ Josefo, juntúul historiadoreʼ, tu yaʼalaj bix úuchik u yokol le romanoʼob tu kaajil Jerusalén tu añoil 70 tsʼoʼokok u taal Jesusoʼ. Jujuntúul tiʼ le máaxoʼob tsʼaʼanoʼob u kanáantoʼob u jaats tiʼ le kaajoʼ ook u weenloʼob, le oʼolal le soldadoʼob romanoʼoboʼ béeychaj u yookloʼob teʼ kaajoʼ. Le soldadoʼoboʼ ookoʼob tak teʼ templooʼ ka tu tóokoʼob. Tsʼoʼoleʼ ka tu xuʼulsoʼob le kaajoʼ. Bey úuchik u tsʼoʼokol le maas nojoch muʼyajil anchaj tiʼ tuláakal le judíoʼoboʼ.

9. ¿Baʼax maʼ u yojel yaʼab máakoʼob teʼ kʼiinoʼobaʼ?

⁹ Bejlaʼeʼ le gobiernoʼoboʼ ku tsʼáaikoʼob soldadoʼob utiaʼal u kanáantoʼob u fronterail le kaajoʼoboʼ wa ku meyajtiʼob uláakʼ baʼaloʼob túumbentak jeʼex le camaraʼoboʼ. Beyoʼ le gobiernoʼoboʼ ku kanáantkoʼob maʼ u yokol mix baʼal wa mix máak u beet loob tiʼ le luʼum tuʼux kajaʼanoʼoboʼ. Chéen baʼaleʼ maʼ tu tsʼáaikoʼob cuenta wa yaan junpʼéel gobierno teʼ kaʼan maas yaan u páajtaliloʼ yéetel u reyileʼ Jesucristo. Maʼ kun xáantaleʼ le gobiernoaʼ yaan u xuʼulsik tiʼ tuláakal le gobiernoʼob yaan way Luʼumoʼ (Isa. 9:6, 7; 56:10; Dan. 2:44). Toʼoneʼ táan k-tsʼíiboltik ka kʼuchuk le kʼiinaʼ yéetel k-kʼáat líiʼsba utiaʼal k-páaʼtik u kʼuchul. Le oʼolaleʼ mantatsʼ unaj k-tuukul tiʼ le profecíaʼob yanoʼob teʼ Bibliaoʼ yéetel maʼ unaj u xuʼulul u chúukpajal k-óol k-meyajt Jéeobaiʼ (Sal. 130:6).

10, 11. 1) ¿Baʼax maʼ unaj k-beetkiʼ, yéetel baʼaxten? 2) Techeʼ, ¿baʼax beetik a creertik pixaʼan u tuukul le máakoʼob tumen le Kʼaasilbaʼaloʼ?

¹⁰ Tuukulnakoʼon tiʼ juntúul velador bul áakʼab maʼ weenkiʼ, le táan u taal u sáastaloʼ tumen jach táaj kaʼanaʼaneʼ maas istikyaj u yilik maʼ u yokol u wenel. Bejlaʼeʼ kuxaʼanoʼon tiʼ u tsʼook kʼiiniloʼob le yóokʼol kaabaʼ. Le oʼolaleʼ jeʼex u bin u maas náatsʼal u xuul le yóokʼol kaabaʼ bey u bin u maas talamtal k-pʼilik k-ich. ¿Máasaʼ jach jeʼel u yaatal k-óol wa ka weenkoʼon le jach taʼaytak u taal le xuʼulsajiloʼ? Koʼox tʼaan tiʼ óoxpʼéel baʼaloʼob jeʼel u beetik u náayal k-óol teʼ kʼiinoʼobaʼ.

 ¹¹ Le Kʼaasilbaʼaloʼ ku tusik máak. Le Bibliaoʼ ku yaʼalikeʼ letiʼ «u gobernanteil le yóokʼol kaabaʼ». Antes tiʼ u kíimileʼ Jesuseʼ óoxtéen tu yaʼalaj tiʼ u disipuloʼob letiʼe Kʼaasilbaʼal nuʼuktik le yóokʼol kaabaʼ (Juan 12:31; 14:30; 16:11). Tiʼ le Kʼaasilbaʼaloʼ ku meyaj le religión maʼatech u kaʼansik u jaajil utiaʼal u tusik le máakoʼoboʼ. Yoʼolal lelaʼ yaʼab máakeʼ maʼatech u beetik u cuentail wa táan u béeytal le profecíaʼob ku yeʼeskoʼob naatsʼ yanil u kʼiinil u xuʼulsaʼal le kʼasaʼan yóokʼol kaabaʼ (Sof. 1:14). Jeʼex k-ilkoʼ «le máakoʼob maʼatech u creertikoʼob Diosaʼ pixaʼan u tuukuloʼob tumen u diosil le yóokʼol kaabaʼ» (2 Cor. 4:3-6). Teʼ kʼiinoʼobaʼ le máakoʼoboʼ maʼatech u yuʼubkoʼonoʼob ken k-aʼaltiʼob taʼaytak u xuʼulsaʼal le kʼasaʼan yóokʼol kaabaʼ bey xan ken k-aʼaltiʼob táan u gobernar Jesús. Yaan horaeʼ hasta ku yaʼalikoʼob: «Maʼ in kʼáat in wuʼuy mix baʼaliʼ».

12. ¿Baʼaxten maʼ unaj k-chaʼik u tuskoʼon le Kʼaasilbaʼaloʼ?

¹² Kex yaʼab máakoʼob maʼ u kʼáat u yojéeltoʼob baʼax profecíaʼob táan u béeytaloʼobeʼ, maʼ unaj u lúuʼskoʼob k-óoliʼ. Toʼoneʼ k-ojel jach junpuliʼ maʼ unaj u náayal k-óoliʼ. Pabloeʼ tu yaʼalaj tiʼ le sukuʼunoʼoboʼ: «Tumen tak teʼex jach a wojleʼexeʼ u kʼiinil Jéeobaeʼ yaan u taal jach jeʼex u taal juntúul j-ookol de áakʼabeʼ» (xok 1 Tesalonicailoʼob 5:1-6). Jesús xaneʼ tu yaʼalaj: «Eʼeseʼex maʼ táan a weenleʼexiʼ, tumen tiʼ junpʼéel hora maʼ táan a páaʼtkeʼexeʼ yaan u kʼuchul u Paal máak» (Luc. 12:39, 40). Maʼ kun xáantaleʼ, le Kʼaasilbaʼaloʼ yaan u beetik u tuklaʼal «¡tuláakal jejetsʼkil yéetel maʼalob yanil!». Chéen baʼaleʼ ken úuchuk lelaʼ letiʼe ken taalak le xuʼulsajiloʼ, le máakoʼob túunoʼ jach yaan u jaʼakʼal u yóoloʼob. ¿Kux túun toʼon? Wa maʼ k-kʼáat ka tuʼuskoʼon yéetel ka náayak k-óol jeʼex letiʼobeʼ «unaj k-pʼilik k-ich mantatsʼ yéetel unaj k-kanáantik maʼ u saʼatal k-óol». Chéen baʼaleʼ utiaʼal k-beetik lelaʼ unaj k-xokik sáamsamal le Bibliaoʼ yéetel k-tuukul tiʼ baʼax ku yaʼaliktoʼon Jéeoba.

13. ¿Bix u tusik máak le yóokʼol kaabaʼ, yéetel baʼax jeʼel u yáantkoʼon utiaʼal maʼ k-beetik beyoʼ?

¹³ Le bix u tuukul le yóokʼol kaabaʼ ku tusik máak. Bejlaʼeʼ óoliʼ tuláakal máak ku tuklik maʼ jach kʼaʼanaʼan u náatsʼal tiʼ Diosiʼ (Mat. 5:3). Letiʼobeʼ maas ku yilkoʼob u xupikoʼob u tiempoʼob yéetel u muukʼoʼob utiaʼal u yantaltiʼob u maasil baʼaloʼob teʼ yóokʼol kaabaʼ (1 Juan 2:16). Tsʼoʼoleʼ bejlaʼeʼ yaan u  jejeláasil náaysaj óoloʼob jeʼex mix juntéen ilaʼakeʼ. Le náaysaj óolaloʼobaʼ ku túulchʼintik máak u beet chéen baʼax u kʼáat bey xan baʼax ku tsʼíiboltik (2 Tim. 3:4). Le baʼaloʼobaʼ ku beetik maʼ u tsʼáaik cuenta máak baʼax maas kʼaʼanaʼan yéetel maʼ u yilik u kʼaʼabéetil u náatsʼal tiʼ Dios. Utiaʼal maʼ u beetkoʼob chéen baʼax ku tsʼíiboltkoʼobeʼ Pabloeʼ tu yaʼalaj tiʼ le sukuʼunoʼob úuchjeakiloʼ: «U kʼiinil a waajleʼex» (Rom. 13:11-14).

14. ¿Baʼax ku yaʼalik Lucas 21:34 yéetel 35 maʼ unaj u yúuchultoʼoniʼ?

¹⁴ Toʼoneʼ k-kʼáat ka u nuʼuktoʼon u kiliʼich muukʼ Dios maʼ letiʼe yóokʼol kaabaʼ. Yéetel le kiliʼich muukʼaʼ Jéeobaeʼ ku yáantkoʼon utiaʼal k-naʼatik le baʼaxoʼob táan u yúuchloʼ ^[1] (1 Cor. 2:12). Chéen baʼaleʼ unaj k-kanáantikba tumen maʼ xaaneʼ tak le baʼaxoʼob kʼaʼabéet utiaʼal k-kuxtal jeʼel u beetkoʼob u xuʼulul k-meyajtik Jéeobaoʼ (xok Lucas 21:34, 35). Maʼ xaaneʼ yaan máakeʼ jeʼel u tuklik minaʼan k-naʼat ikil k-creertik kuxaʼanoʼon tu tsʼook u kʼiiniloʼob le yóokʼol kaabaʼ (2 Ped. 3:3-7). Chéen baʼaleʼ maʼ unaj u lúubul k-óoliʼ, toʼoneʼ k-ojel yaʼab baʼaxoʼob eʼesik taʼaytak le xuʼulsajiloʼ. Wa k-kʼáat ka u nuʼuktoʼon u kiliʼich muukʼ Dioseʼ unaj k-antal mantatsʼ yéetel le sukuʼunoʼob teʼ muchʼtáambaloʼoboʼ.

15. ¿Baʼax úuch tiʼ Pedro, Santiago yéetel Juan, yéetel bix jeʼel u yúuchultoʼon xan beyoʼ?

¹⁵ Le kʼeban yaan t-wíinkliloʼ jeʼel u beetik u náayal k-óoleʼ. Jesuseʼ u yojel kaʼach kʼebanoʼon yéetel séeb jeʼel k-beetik baʼax kʼaaseʼ. Koʼox tʼaan tiʼ le baʼax úuch teʼ áakʼab táanil tiʼ u kíimsaʼaloʼ. Kex minaʼan u kʼeban Jesuseʼ, u yojel utiaʼal u chúukpajal u yóoleʼ unaj u orar tiʼ u Taata utiaʼal u kʼáatik ka áantaʼak. Jesuseʼ tu yaʼalaj tiʼ Pedro, Santiago yéetel Juan maʼ u weenloʼob mientras táan kaʼach u orar. Chéen baʼaleʼ letiʼobeʼ maʼ tu tsʼáajoʼob cuenta bukaʼaj kʼaʼabéetil kaʼach maʼ u náayal u yóoloʼobiʼ, tumen kaʼanaʼanoʼob yéetel jach taak u weenloʼob. Jesús xaneʼ kaʼanaʼan kaʼachi, chéen baʼaleʼ seguernaj u orar, maʼ weeniʼ. Lelaʼ letiʼe baʼax unaj u beetik kaʼach le apostoloʼoboʼ (Mar. 14:32-41).

16. Jeʼex u yaʼalik Lucas 21:36, ¿baʼax tu yaʼalaj Jesús unaj k-beetik utiaʼal maʼ u náayal k-óol?

¹⁶ ¿Baʼax jeʼel u yáantkoʼon utiaʼal maʼ u náayal k-óol yéetel utiaʼal k-eʼesik táan k-páaʼtik u kʼuchul u kʼiinil Jéeobaeʼ? Unaj u taaktal k-beetik mantatsʼ baʼax maʼalob. Chéen baʼaleʼ maʼ chéen letiʼe baʼax unaj k-beetkoʼ. Maʼ yaʼab kʼiinoʼob u bin u kíimsaʼaleʼ, Jesuseʼ tu yaʼalaj tiʼ u disipuloʼob unaj u oraroʼob mantatsʼ tiʼ Jéeoba utiaʼal u kʼáatkoʼob u yáantaj (xok Lucas 21:36). Utiaʼal xan u chúukpajal k-óol teʼ kʼiinoʼobaʼ mantatsʼ unaj k-orar tiʼ Jéeoba (1 Ped. 4:7).

17. ¿Baʼax ken u yáantoʼon k-preparartba ken taalak le xuʼulsajiloʼ?

¹⁷ Jesuseʼ tu yaʼaleʼ le xuʼulsajiloʼ ‹yaan u kʼuchul tiʼ junpʼéel hora maʼ táan k-páaʼtikiʼ› (Mat. 24:44). Le oʼolaleʼ jach junpuliʼ maʼ unaj u náayal k-óoliʼ. Maʼ u kʼiinil k-kaxtik le baʼaxoʼob ku yaʼalik u yóokʼol kaab Satanás jeʼel u taasiktoʼon kiʼimak óolaloʼ, tumen lelaʼ mix baʼal u biilal. Teʼ Bibliaoʼ Jéeoba yéetel Jesuseʼ ku yaʼalikoʼobtoʼon baʼax unaj k-beetik utiaʼal maʼ u náayal k-óol. Le oʼolaleʼ unaj k-tuukul tiʼ bix táan u béeychajal le profecíaʼob yanoʼob teʼ Bibliaoʼ. Unaj xan u seguer k-antal naatsʼ tiʼ Jéeoba yéetel k-tsʼáaik táanil ichil k-kuxtal u Reino. Beyoʼ preparadoʼon ken taalak le xuʼulsajiloʼ (Apo. 22:20). Wa k-beetik lelaʼ yaan k-salvartik k-kuxtal.