«Wa ka kʼáatkeʼex wa baʼax tiʼ le Taataoʼ letiʼeʼ yaan u tsʼáaikteʼex tin kʼaabaʼ» (Juan 16:23).

Jesúseʼ tu kaʼanse Jéeobaeʼ u kʼáat ka orarnakoʼon chéen tiʼ letiʼ, maʼ u kʼáat ka orarnakoʼon tiʼ imagenoʼob, ángeloʼob wa máaxoʼob kimenoʼob. Tsʼoʼoleʼ u kʼáat ka orarnakoʼon tu kʼaabaʼ Jesús. Toʼoneʼ k-ojel ku yuʼubikoʼon Dios kéen orarnakoʼon tiʼ úuchik u kʼubik u kuxtal u paal t-oʼolal, le oʼolal kéen orarnakoʼon tiʼeʼ unaj k-beetik tu kʼaabaʼ Jesús. Letiʼeʼ tu yaʼalaj: «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6).

«Jeʼekʼabt a puksiʼikʼaleʼex tiʼ letiʼ» (Salmo 62:8).

Kéen orarnakoʼon tiʼ Jéeobaeʼ unaj k-beetik jeʼex kéen tsikbalnakoʼon yéetel k-papáeʼ. Tu lugar k-xokik tiʼ junpʼéel libro wa k-aʼalik de memoria k-oracióneʼ, unaj u jóokʼol t-puksiʼikʼal le baʼax ken k-tsikbalttiʼoʼ. Tsʼoʼoleʼ kéen k-beeteʼ kʼaʼabéet k-eʼesik tsiikil tiʼ.

«Jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik» (1 Juan 5:14).

Le Bibliaoʼ ku yaʼaliktoʼon baʼax ken u beet Dios t-oʼolal yéetel baʼax ku páaʼtik ka k-beete. Utiaʼal ka u yuʼub k-oracióneʼ maʼ unaj u «bin tu contra u voluntad» le baʼax ken k-kʼáattiʼoʼ. Utiaʼal lelaʼ kʼaʼabéet k-xokik le Bibliaoʼ, beyoʼ yaan k-maas kʼaj óoltik yéetel yaan u yuʼubikoʼon.

Baʼaxoʼob kʼaʼabéettoʼon. Jeʼel u páajtal k-kʼáatik tiʼ Dios baʼaloʼob jeʼex janal, nookʼ wa tuʼux k-kajtal. Jeʼel u páajtal xan k-kʼáatiktiʼ ka u yáantoʼon utiaʼal k-chʼaʼtuklik k-beetik baʼax maʼalobeʼ yéetel ka u yáantoʼon k-aktáant wa baʼax problemaileʼ. Jeʼel u páajtal k-kʼáatiktiʼ ka u perdonartoʼoneʼ, ka u muʼukʼaʼankúunt k-fe yéetel ka u kanáantoʼon (Lucas 11:3, 4, 13; Santiago 1:5, 17).

Baʼaxoʼob kʼaʼabéet tiʼ u maasil. Le taatatsiloʼoboʼ jach ku kiʼimaktal u yóoloʼob kéen u yiloʼob jach u yaabiltmuba u paalaloʼob. Jéeoba, k-Taata yaan teʼ kaʼanoʼ, u kʼáat ka k-paklan kanáantba, le oʼolaleʼ maʼalob ka orarnakoʼon yoʼolal k-íicham, k-atan, k-paalal, k-familia wa yoʼolal k-amigoʼob. Le discípulo Santiagooʼ ku yaʼalik: «Orarneneʼex ta baatsileʼex» (Santiago 5:16).

Unaj k-tsʼáaik gracias tiʼ Dios. Le Bibliaoʼ ku yaʼalikeʼ Dioseʼ yaʼab baʼaloʼob tu beetaj yoʼolal wíinik, ku yaʼalik: «Letiʼeʼ tu beetaj u kʼáaxal jaʼ, u yichankil le cheʼoboʼ, tu tsʼáaj baʼal u jaantoʼob yéetel tu beetaj u kiʼimaktal u yóol u puksiʼikʼaloʼob» (Hechos 14:17). Wa k-tuukul yoʼolal le baʼaxoʼob tsʼoʼok u beetik Dios t-oʼolaloʼ yaan k-tsʼáaik gracias tiʼ. Uláakʼ bix jeʼel k-tsʼáaik graciaseʼ letiʼe kéen k-beet baʼax ku yaʼalikoʼ (Colosenses 3:15).

Yaan horaeʼ jeʼel u lúubul k-óol wa maʼ tu séeb núukaʼal k-oraciónoʼobeʼ. Lelaʼ, ¿u kʼáat wa u yaʼal maʼ yaabiltaʼanoʼon tumen Diosiʼ? Maʼatech. Yaan horaeʼ chéen unaj u seguer k-orar. Koʼox ilik jujunpʼéel baʼaloʼob eʼesik lelaʼ.

Teʼ yáax xookoʼ tʼaanajoʼon yoʼolal Steve, letiʼe ku yaʼalik: «Wa maʼ yoʼolal le oraciónoʼ bejlaʼa úuch pʼáatak maʼ kiʼimak in wóoleʼ». ¿Baʼax áante? Letiʼeʼ káaj u xokik le Bibliaoʼ yéetel tu kanaj maʼ unaj u xuʼulul u orariʼ. Bejlaʼeʼ Steveeʼ ku yaʼalik: «Kin tsʼáaik gracias tiʼ Dios tumen tu péeksaj in amigoʼob utiaʼal ka u yáantenoʼob. Bejlaʼeʼ maas kiʼimak in wóol».

¿Kux túun Jenny ku tuklik kaʼach maʼ tu merecertik ka uʼuyaʼak u oración tumen Dios? Letiʼeʼ ku yaʼalik: «Le ka jach lúub in wóoleʼ tin kʼáataj tiʼ Dios ka u yáanten in naʼat baʼaxten bey in wuʼuyikinbaoʼ». ¿Áantaʼab wa? Letiʼeʼ ku yaʼalik: «Úuchik in orar tiʼ Dioseʼ tu yáanten in wilimba jeʼex u yilken letiʼoʼ. Tin tsʼáaj cuentaeʼ kex teen kin wuʼuyik mix baʼal in biilaleʼ, maʼ bey u yilken Diosiʼ. Dioseʼ tu yáanten utiaʼal maʼ in tuklik wa tsʼoʼokten beyoʼ». ¿Baʼax utsiloʼob tu kʼamaj? Letiʼeʼ ku yaʼalik: «Le oraciónoʼ tu yáanten in wil Jéeoba bey juntúul in amigoeʼ, in taata, yéetel juntúul Dios jach tu jaajil yaan. Wa teen kin beetik baʼax uts tu tʼaaneʼ, letiʼeʼ mantatsʼ kun antal tin wéetel yéetel yaan u yáantken».

Beoraeʼ koʼox ilik baʼax úuch tiʼ Isabel. Le doctoroʼoboʼ tu yaʼaloʼobtiʼeʼ kéen síijik u chan hijoeʼ yaan u yantal junpʼéel discapacidad tiʼ. Letiʼeʼ jach lúub u yóol. Ku yaʼalik: «Tumen jach yaj in muʼyajeʼ tin wuʼuyaj nikaʼaj kíimil». ¿Baʼax tu beetaj? Ku yaʼalik: «Yaʼab u téenel orarnajen tiʼ Dios utiaʼal ka u yáanten». Ka máan kʼiineʼ síij Gerard, u chan hijo, yéetel junpʼéel discapacidad. ¿Núukaʼab wa u oración Isabel? Núukaʼabi. Letiʼeʼ ku yaʼalik: «Beora tsʼoʼok u máan 14 añosaʼ in hijo Gerardeʼ letiʼe baʼax beetik u maas kiʼimaktal in wóoloʼ. In wilik bix kiʼimakil u yóol in hijo kex kʼojaʼaneʼ letiʼe baʼax beetik in tsʼáaik cuenta núukaʼab in oraciónoʼ».

Le baʼax ku yaʼalik le maamatsilaʼ ku kʼaʼajsiktoʼon le baʼax ku yaʼalik le salmistaaʼ: «Jéeoba Dios, techeʼ yaan a wuʼuyik u oración le utsul máakoʼoboʼ. Yaan a wáantkoʼob utiaʼal u chúukpajal u yóoloʼob, yaan a beetik u cuentailoʼob» (Salmo 10:17). ¿Máasaʼ lelaʼ ku yeʼesik maʼ unaj u xuʼulul k-orariʼ?

Teʼ Bibliaoʼ ku chíikpajal yaʼab oraciónoʼob tu beetaj Jesús. Junpʼéel tiʼ le maas kʼaj óolaʼanoʼ letiʼe tu kaʼansaj tiʼ u discípuloʼoboʼ. ¿Baʼax ku kaʼansiktoʼon le oraciónaʼ?