TIʼ U YÁAX TÁAN JUʼUNIL | BAʼAXTEN MAʼ SAʼAT LE BIBLIAOʼ
Maʼ kʼaschaj tuʼux tsʼíibtaʼaniʼ
BAʼAX ÚUCHI. Le máaxoʼob tsʼíibt le Bibliaoʼ maases meyajnajtiʼob papiro yéetel pergamino (2 Timoteo 4:13). * ¿Baʼaxten talam u kanáantaʼal maʼ u kʼastal le baʼaloʼobaʼ?
Le papirooʼ séeb u káachal, u bin u color yéetel u laʼabal. «Ken máanak kʼiineʼ junwáal papiroeʼ ku suut polvoil yéetel chéen ku pʼáatal u chʼilibil —ku yaʼalik Richard Parkinson yéetel Stephen Quirke, kaʼatúul egiptologoʼob—. Ken koʼotsʼok junpʼéel papiro utiaʼal líiʼsbileʼ ku bin u kuuxumtal yéetel ku tuʼutal; tsʼoʼoleʼ wa mukaʼaneʼ ku jaantaʼal tumen chʼoʼ wa ku yokol u yikʼel, maases le sak síinikoʼ.» Jujunpʼéel papiroʼobeʼ séeb kʼaschajoʼob tumen ka tsʼoʼok u kaxtaʼaloʼobeʼ sen juʼul tumen sáasil wa ook humedad tiʼob.
Le pergaminooʼ maas ku chan xáantal, pero láayliʼ ku kʼastal wa maʼ tu kanáantaʼal, wa ku chaʼabal u sen juʼulul tumen kʼiineʼ bey xan wa ku yokol humedad tiʼ. * Le pergaminooʼ ku yokol xan u yikʼel. Jeʼex u yaʼalik junpʼéel libroeʼ, «óoliʼ mix junpʼéel úuchben tsʼíib [tiʼ pergamino] pʼaatal teʼ kʼiinoʼobaʼ» (Everyday Writing in the Graeco-Roman East). Wa ka láaj kʼaschajak u úuchben tsʼíibiloʼob le Bibliaoʼ jeʼel u saʼatal kaʼach le baʼax ku yaʼalikoʼ.
BAʼAXTEN TAK BEJLAʼA YANEʼ. U Ley le judíoʼoboʼ ku yaʼalikeʼ tuláakal le reyoʼob unaj u tsʼíibtikoʼob junpʼéel u copiail le leyoʼ; leloʼ u yáax cinco libroiloʼob le Bibliaoʼ (Deuteronomio 17:18). Tsʼoʼoleʼ tu tsʼoʼokbal le yáax siglooʼ yaʼab u copiasil le Kiliʼich Tsʼíiboʼob líiʼsaʼan tu sinagogailoʼob Israel yéetel Macedoniaoʼ. Le copiaʼobaʼ beetaʼab tumen máakoʼob jach u yojloʼob tsʼíib (Lucas 4:16, 17; Hechos 17:11). ¿Bix túun maʼ saʼat le úuchben tsʼíiboʼobaʼ?
U Rolloiloʼob le Kimen Kʼáaʼnáaboʼ máan siglos líiʼsaʼan ich pʼúuloʼob taʼakaʼanoʼob ich áaktunoʼob teʼ desiertooʼ
Philip Comfort, juntúul máak jach u kʼaj óol le Nuevo Testamentooʼ, tu yaʼaleʼ «le judíoʼob binoʼ ku líiʼskoʼob u rolloiloʼob le Kiliʼich Tsʼíiboʼob tiʼ pʼúuloʼob utiaʼal maʼ u kʼastaloʼoboʼ». Le yáax cristianoʼob xanoʼ bey seguernaj u beetkoʼoboʼ. Le oʼolal yaan jujunpʼéel úuchben tsʼíiboʼob tiʼ le Biblia tsʼoʼok u kaxtaʼal ich pʼúuloʼob wa ich cajonoʼob kʼalaʼantak bey xan ich áaktunoʼob jach táaj tikinoʼob.
U YUTSIL. U milesil úuchben tsʼíiboʼob tiʼ le Biblia tsʼakaʼanoʼob tak bejlaʼeʼ, yanoʼobeʼ tsʼoʼok maas tiʼ dos mil años tsʼíibtaʼakoʼob. Chéen u tsʼíibiloʼob le Biblia tsʼoʼok u jach copiartaʼal yéetel u jach kanáantaʼal ichil le bukaʼaj tiempoaʼ.
^ xóot’ol 3 Le papirooʼ junpʼéel clase juʼun beetaʼan yéetel junpʼéel xíiw ku yantal jáal jaʼ. Le pergaminooʼ u kʼéewelil baʼalcheʼ.
^ xóot’ol 5 Por ejemploeʼ le Declaración de Independencia de los Estados Unidosoʼ tiʼ pergamino yáax tsʼíibtaʼabi. Kex maʼ u tsʼáa mix 250 años tsʼíibtaʼakeʼ istikyaj u xoʼokol tumen táan u bin u tuʼupul u tsʼíibil.
Maʼ xaaneʼ jeʼel u yutstal xan ta wicheʼ
LE MÁAX KU KANANOʼ
Junpʼéel úuchben tesoro kaxtaʼab ich basura
Le junxóotʼ papiroaʼ letiʼe tsʼíib maas úuchben tiʼ u Evangelioil Juan tsʼoʼok u kaxtaʼaloʼ.
