Yaan máakeʼ nak óol u yilik u xookil le Bibliaoʼ. Yaan xaneʼ jach jatsʼuts u yilik. ¿Kux túun teech? ¿Bix a wilik? Koʼox ilik jujunpʼéel baʼaloʼob jeʼel u yáantkech utiaʼal u jatsʼutstal a wilkeʼ.

Yéey junpʼéel maʼalob Biblia séeb u naʼatpajal. Wa ken xooknakech ka wilik tʼaanoʼob maʼ tu naʼatpajal wa úuchbentakeʼ maʼ jatsʼuts ken a wil a xookiʼ. Le beetkeʼ maʼalob ka yanaktech junpʼéel Biblia séeb u naʼataʼal yéetel maʼalob traducirtaʼanil. Beyoʼ yaan u kʼuchul ta puksiʼikʼal baʼax ka xokik. *

Meyajnaktech le tecnologíaoʼ. Bejlaʼeʼ le Bibliaoʼ jeʼel u páajtal a xokik ich Interneteʼ, wa a wéemsik ta computadora, ta tablet wa ta celular. Jujunpʼéel bibliaʼobeʼ ken a tsʼáa ta computadora wa ta tableteʼ jeʼel u páajtal a comparartik baʼax ku yaʼalik junpʼéel versículo wa junpʼéel tsikbalil yéetel uláakʼ bibliaʼobeʼ. Tsʼoʼoleʼ wa uʼuybil a kʼáat a beeteʼ jeʼel xan u páajtal a wéemsikeʼ. Yaʼab máakeʼ uts tu tʼaan u yuʼubik mientras táan u bin meyaj, táan u viajar, táan u pʼoʼ wa táan u beetik uláakʼ baʼaloʼob. Techeʼ ¿bix a kʼáat? ¿Xokbil, wa uʼuybil?

Kaxt uláakʼ áantajoʼob. Yaan libroʼob jeʼel u yáantkech a maas jóoʼs u yutsil le Biblia ken a xokoʼ. Yaan mapaʼob xaneʼ jeʼel u yáantkech a wil tuʼux yaan le lugaroʼob ku chʼaʼchiʼitaʼal teʼ tsikbaloʼ bey xan a máans ta tuukul bix úuchik le baʼax ku tsikbaltaʼaloʼ. Tsʼoʼoleʼ le xookoʼob ku jóoʼsaʼal teʼ revista  bey xan teʼ kúuchil jw.org, jeʼel u yáantkech a maas naʼat le baʼax ka xokik teʼ Bibliaoʼ.

Jejeláas bix ka a xoke. Wa nak óol a wilik a xokik le Biblia desde tu káajbaloʼ, xok junpʼéel jaats maas jatsʼuts a wilkiʼ. Jeʼel xan u páajtal a xokik u tsikbalil u kuxtal le máakoʼob ku chʼaʼchiʼitaʼal teʼ Bibliaoʼ, beyoʼ yaan a wojéeltik u maasil tu yoʼolaloʼob. Tsʼoʼoleʼ jeʼel u páajtal a xokik por temasileʼ wa tu tsoolol jeʼex úuchik u bin u yúuchul le baʼaloʼob ku tsikbaltikoʼ. Le cuadro « Kʼaj óolt le máaxoʼob ku chʼaʼchiʼitaʼal teʼ Bibliaoʼ» jeʼel u yáantkech a yéey le tsikbaloʼob a kʼáat a xokoʼ. Kexiʼ ka páajchajak a xokik jeʼex tsʼoʼok u tsoʼolol teʼ xookaʼ.