Techeʼ ¿tsʼoʼok wa a wuʼuyikaba jeʼex le máakoʼobaʼ? Maʼ xaaneʼ ta káajsaj a xokik le Bibliaoʼ, pero ta xulaj a beetik. Yaʼab máak tuklikeʼ jach nak óol u xookil le Bibliaoʼ. Chéen baʼaleʼ, ¿jeʼel wa a xokik wa ka a wojéelt ku taasik kiʼimak óolal yéetel jeʼel u tsʼáaik u biilal a kuxtaleʼ? ¿A wojel wa yaan baʼax jeʼel u yáantkech utiaʼal ka taakchajak a xokikeʼ?

Jujuntúul máakoʼobeʼ ka káaj u xokikoʼob le Bibliaoʼ tu tsʼáajoʼob cuenta ku taasik utsil. Koʼox ilik baʼax ku yaʼalikoʼob.

Ezekiel, yaan kex 20 años tiʼeʼ, ku yaʼalik: «In kuxtal kaʼacheʼ bey jeʼex juntúul máak chéen táan u viajar yéetel u coche pero mix u yojel tuʼux ku biniʼ. Baʼaleʼ u xookil le Bibliaoʼ tu yáanten in wil baʼax bejil unaj in bisik. Maʼalob tsolnuʼukoʼob ku taasik utiaʼal in nuʼuktik in kuxtal sáamsamal».

Frieda, yaan kex 20 años xan tiʼeʼ, ku yaʼalik: «Teneʼ kin kʼuuxil kaʼach yoʼolal jeʼel baʼalakeʼ. Pero yéetel u yáantaj le Bibliaoʼ tsʼoʼok in kanik in controlartinba. Tsʼoʼok in maʼalobkíintik in modos yéetel bejlaʼeʼ maas yaʼab in amigoʼob».

Eunice, yaan kex 50 años tiʼeʼ, ku yaʼalik: «Le Bibliaoʼ táan u yáantken in kʼex in kuxtal yéetel in pʼatik le baʼaxoʼob maʼ maʼalobtak kin beetkoʼ».

Bejlaʼeʼ u millonesil máakoʼob jeʼex le tsʼoʼok k-aʼalikoʼ tsʼoʼok u yilkoʼob ku taasik kiʼimak óolal u xoʼokol le Bibliaoʼ (Isaías 48:17, 18). U xookil le Bibliaoʼ yaan u yáantkech 1) a chʼaʼtukult tubeel baʼax ken a beete, 2) a yéeyik maʼalob amigoʼob, 3) utiaʼal maʼ a sen chiʼichnaktal yéetel u maas kʼaʼanaʼanileʼ 4) utiaʼal a kaanbal tiʼ Dios. Le tsolnuʼukoʼob yaan teʼ Bibliaoʼ tiʼ Dios u taal, le oʼolal jeʼel u bintoʼon utsil wa k-tsʼáaik ichil k-kuxtaleʼ. Le tsolnuʼukoʼob ku tsʼáaik Diosoʼ láaj maʼalobtak.

K-líiʼsik a wóol utiaʼal ka a xoke. ¿Baʼax jeʼel u yáantkech utiaʼal ka taakchajak a xokik le Biblia yéetel maʼ u náakal a wóoloʼ? Koʼox ilik.