WA TEECH bey xan wa a láakʼtsilil, ku yojéeltik jeʼel tak u kíimil yoʼolal le kʼojaʼanil yaantiʼoʼ, maʼ xaaneʼ ka naʼatik bix u yuʼubikuba máak. Lelaʼ jeʼel u beetik u yuʼubik máak minaʼan u biilal u kuxtaleʼ. Tsʼoʼoleʼ ku maas talamtal kéen káajak a sen bin yiknal doctor, a kaxtik u tojol a tsʼaak wa kéen a wuʼuy bix u pʼatkech le tsʼaakoʼob ku tsʼaʼabaltechoʼ. Le a sen tuukul tiʼ le kʼojaʼanil yaantechoʼ jeʼel u beetik a maas kʼojaʼantaleʼ.

¿Baʼax jeʼel u yáantik máak teʼ súutukoʼob beyaʼ? Yaʼab máakeʼ tsʼoʼok u líikʼil u yóol ikil u orar yéetel u xokik le Bibliaoʼ. Uláakʼ baʼax líiʼsik u yóoloʼobeʼ  letiʼe yaabilaj ku yeʼesaʼaltiʼob tumen u láakʼtsiloʼob bey xan u amigoʼoboʼ.

Robert, yaan 58 años tiʼeʼ, ku yaʼalik: «Kʼub a wóol tiʼ Dios, chéen letiʼ jeʼel u yáantik máakeʼ. Aʼal tiʼ Jéeoba bix a wuʼuyikaba. Aʼaltiʼ ka u yáantech utiaʼal maʼ a sen chiʼichnaktal, beyoʼ tak a láakʼtsiloʼobeʼ yaan u yuʼubikubaʼob maas maʼalobil».

Letiʼeʼ ku seguer u yaʼalik: «Kʼáat tiʼ a láakʼtsiloʼob maʼ u tuʼubskechoʼob. Teneʼ sáamsamal ku tʼanken kaʼach juntúul tiʼ in láakʼtsiloʼob utiaʼal u yojéeltikoʼob bix yanilen. Tsʼoʼoleʼ in amigoʼob xaneʼ tu líiʼsoʼob in wóol. Leloʼ jach tu beetaj in wuʼuyikinba maʼalobil yéetel tu yáanten utiaʼal maʼ u jach lúubul in wóol».

¿Táan wa a tuklik a bin a xíimbalt wa máax kʼojaʼan? Wa beyoʼ, chʼaʼ en cuenta baʼax ku yaʼalik Linda: «Juntúul máax kʼojaʼaneʼ maʼ u kʼáat ka ilaʼak bey jach maʼ tu páajtal u beetik mix baʼaleʼ, maʼ xaaneʼ hasta maʼ u kʼáat u tsikbalt láalaj hora baʼax ku yúuchultiʼiʼ. Le oʼolal maas maʼalob ka tʼaanakeʼex tiʼ uláakʼ baʼaloʼob jeʼel u beetik u kiʼimaktal u yóoleʼ».

U kʼáatik máak u yáantaj Dios, u xokik le Biblia bey xan le yaabilaj ku yeʼesaʼaltiʼ tumen u láakʼtsiloʼob wa u amigoʼoboʼ, jeʼel u yáantik máak u yil yaan u biilal u kuxtaleʼ.