Jesúseʼ tu kaʼanseʼ unaj k-ilik u yantaltoʼon jeetsʼelil yéetel u maasil. Chéen baʼaleʼ juntéenjeakeʼ tu yaʼalaj tiʼ u apóstoloʼob: «Maʼ a tuklikeʼex wa taalen in taas jeetsʼelil way luʼumeʼ; maʼ taalen in taas jeetsʼeliliʼ, baʼaxeʼ taalen in beet u yantal baʼatelil. Tumen taalen in beet u jatskuba le máakoʼoboʼ; le hijotsiloʼ yaan u bin tu contra u papá, le hijatsiloʼ tu contra u maama, yéetel le x-ilibtsiloʼ tu contra u suegra» (Mat. 10:34, 35). ¿Baʼaxten tu yaʼalaj Jesús leloʼ?

Jesúseʼ maʼ u kʼáat kaʼach u jats le familiaʼoboʼ, chéen baʼaleʼ u yojleʼ le baʼax ku kaʼansikoʼ jeʼel u beetik kaʼach maʼ u biskubaʼobeʼ. Le máaxoʼob u kʼáat u beetubaʼob u discípuloʼob Jesúsoʼ kʼaʼabéet u naʼatkoʼobeʼ maʼ xaaneʼ u familiaʼobeʼ maʼ kun utstal tu tʼaanoʼob le baʼax taak u beetkoʼoboʼ. Maʼ xaaneʼ tu contraeʼ jeʼel u tsʼáaikuba u yíichameʼ, u yatan wa uláakʼ juntúul u láakʼtsil, leloʼ jeʼel u beetik u difíciltal tiʼ máak u beetkuba u discípulo Jesúseʼ.

Le Bibliaoʼ ku yaʼalik: «Yanakteʼex jeetsʼelil yéetel tuláakal máak» (Rom. 12:18). Chéen baʼaleʼ le baʼaxoʼob tu kaʼansaj Jesúsoʼ yaan kʼiineʼ jeʼel u beetik u yantal baʼateʼel ichil le familiaʼoboʼ. Lelaʼ ku yúuchul le kéen joʼopʼok u tsʼáaik máak ichil u kuxtal le baʼax tu kaʼansaj Jesúsoʼ, chéen baʼaleʼ u láakʼtsiloʼobeʼ maʼ uts tu tʼaanoʼobiʼ wa hasta ku tsʼáaikubaʼob tu contra. Bey túunoʼ ikil u kanik u jaajileʼ le máaxoʼob yanoʼob ichil u yotochoʼ ku pʼáatloʼob bey u enemigoʼobeʼ (Mat. 10:36).

Le u discípuloʼob Jesús kajaʼanoʼob yéetel u láakʼtsiloʼob yaanal u religiónoʼoboʼ yaan kʼiineʼ jach ku kʼaʼabéettal u yeʼeskoʼob bukaʼaj u yaabiltmiloʼob Jéeoba yéetel Jesús. Maʼ xaaneʼ u láakʼtsiloʼobeʼ ku sen aʼalikoʼobtiʼob ka táakpajkoʼob teʼ fiestaʼob ku beetik u religiónoʼoboʼ. Teʼ súutukiloʼob beyoʼ u discípuloʼob Jesúseʼ kʼaʼabéet u yeʼeskoʼob tiʼ máax u kʼáatoʼob lúubul utsil. Jesúseʼ tu yaʼalaj: «Le máax maas u yaabiltmaj u papá wa u maama ke teneʼ maʼ u náajaltmaj u taal tin paachiʼ» (Mat. 10:37). Jesúseʼ maʼ táan kaʼach u yaʼalik tiʼ u discípuloʼob wa maʼ unaj u jach yaabiltik u taataʼobiʼ. Le baʼax táan kaʼach u kaʼansiktiʼoboʼ es ke unaj u naʼatkoʼob baʼax maas kʼaʼanaʼan u beetkoʼob. Wa juntúul k-láakʼtsil maʼ uts tu tʼaan k-meyajtik Jéeobaeʼ maʼ tu xuʼulul k-yaabiltik, chéen baʼaleʼ k-ojleʼ maas unaj k-yaabiltik Dios ke letiʼ.

U jaajileʼ jach ku muʼyaj máak le kéen u tsʼáauba u láakʼtsil tu contra. Chéen baʼaleʼ u discípuloʼob Jesúseʼ maʼ tu tuʼubultiʼob le baʼax tu yaʼalaʼ: «Tuláakal máax maʼ tu yóotik u kuch u cheʼil u muʼyaj utiaʼal u taal tin paacheʼ, maʼ u náajaltmaj u taal tin paachiʼ» (Mat. 10:38). Toʼoneʼ k-ojleʼ utiaʼal u beetkuba máak u discípulo Jesúseʼ kʼaʼabéet u yóotik u muʼyajt jejeláas baʼaloʼob, ichil lelaʼ tiaʼan u pʼektaʼal máak tumen u láakʼtsiloʼobiʼ. Tsʼoʼoleʼ maʼ tu xuʼulul xan k-beetik baʼaloʼob maʼalobtak tumen k-ojleʼ maʼ xaaneʼ jeʼel u kʼexik u tuukuloʼobeʼ yéetel jeʼel u taaktal u kaanbaloʼob tiʼ le Bibliaoʼ (1 Ped. 3:1, 2).