JOSUEEʼ tsʼaʼab junpʼéel nojoch meyaj u beete: u nuʼuktik u kaajil Israel utiaʼal ka okok tak teʼ Luʼum Aʼalaʼan u Tsʼaʼabaloʼ. Utiaʼal u beetkeʼ yaʼab baʼaloʼob talamtak ken u aktáante. Baʼaleʼ Jéeobaeʼ tu yaʼalajtiʼeʼ yaan u páajtal u beetik, le oʼolal tu yaʼalajtiʼ maʼ u chʼaʼik saajkil. Tu yaʼalaj xan tiʼeʼ ka u beet baʼax ku nuʼuktik u Ley yéetel ka u xok sáamsamal, beyoʼ yaan u beetik tuláakal le baʼax ku yaʼalikoʼ. Tu tsʼookeʼ tu kʼaʼajsajtiʼeʼ wa ku beetkeʼ yaan u bin utsil tiʼ yéetel yaan u yantal u naʼat (Jos. 1:7, 8).

Teʼ tu tsʼook kʼiinoʼobaʼ toʼon xaneʼ táan k-aktáantik baʼaloʼob talamtak (2 Tim. 3:1). Baʼaleʼ jeʼel u bintoʼon maʼalobil wa k-beetik le baʼax aʼalaʼab tiʼ Josué tumen Jéeobaoʼ. K-xokik sáamsamal le Bibliaoʼ jeʼel u yáantkoʼon k-beet baʼax ku yaʼalik Jéeoba kéen k-aktáant wa baʼaxeʼ.

Yaʼab tiʼ toʼoneʼ maʼ k-ojel bix jeʼel k-xakʼalxookeʼ wa maʼ jatsʼuts k-ilkiʼ. Chéen baʼaleʼ jach kʼaʼanaʼan k-beetik, le oʼolaleʼ maʼalob ka k-il baʼax ku yaʼalik le jaats « Beet lelaʼ». Teʼ jaatsaʼ yaan a wilik jujunpʼéel baʼaloʼob jeʼel u yáantkech utiaʼal u jatsʼutstal a wilik a xakʼalxoktik le Bibliaoʼ yéetel a jóoʼsik u yutsil.

Juntúul salmistaeʼ tu yaʼalaj: «Bisen tiʼ u bejil a waʼalmajtʼaanoʼob, tumen tiʼ letiʼ yaan in kiʼimak óolal» (Sal. 119:35). Teech xaneʼ jeʼel u kiʼimaktal a wóol wa ka xokik u Tʼaan Dioseʼ. Jeʼex u bin a xakʼaltikeʼ bey kun bin a kanik yaʼab baʼaloʼob jatsʼutstakiʼ.

Maʼ xaaneʼ maʼ kun antal a nuʼuktik junpʼéel nojoch kaaj jeʼex tu beetil Josueeʼ, baʼaleʼ yaʼab baʼaloʼob ken a aktáant ichil a kuxtal. Le oʼolaleʼ jeʼex Josueeʼ xakʼalxokt le Bibliaoʼ yéetel tsʼáa ichil a kuxtal. Wa ka beetkeʼ yaan u bintech utsil yéetel yaan a weʼesik yaan a naʼat.