Síijen Mulhouse, tu xaman-lakʼin Francia, baʼaleʼ líikʼen tiʼ junpʼéel colonia tuʼux kajaʼan meeyjil máakoʼob, pero yaʼab u yúuchul baʼateliʼ. Tin chichnileʼ kin wilik kaʼach yaʼab u yúuchul baʼateʼel ichil le familiaʼoboʼ. Tin wotocheʼ le xiiboʼoboʼ u pʼekmoʼob le koʼoleloʼoboʼ, maʼatech u chʼaʼikoʼob en cuenta. Kaʼansaʼabteneʼ u meyaj koʼoleleʼ u yantal kʼóoben, u kanáantik u yíicham yéetel u paalal.

Kʼaas binikten tin paalil. Diez años yaanten ka kíim in papá ikil u sen káaltal. Cinco años úuchuk lelaʼ tu kíimsuba in sukuʼun. Teʼ año xanoʼ tin wilaj u kíimsaʼal juntúul máak ichil junpʼéel familia le táan u baʼateloʼoboʼ, ka jach sajakchajen. Jujuntúul in láakʼtsiloʼobeʼ tu kaʼansoʼobten in usart navaja, pistola, yéetel ka baʼatelnaken wa kʼaʼabéet. Tin táankelmileʼ yaʼab in wokskinba tiʼ problema, tin láaj tatuartaj in wíinklil yéetel joʼopʼ in sen káaltal.

Ka tin cumplirtaj 16 añoseʼ kin wukʼik 10 wa tak 15 cervezas sáamsamal yéetel káaj in drogartkinba. Utiaʼal in manikeʼ kin konik chatarra yéetel kin wookol. Ka tu tsʼáaten diecisieteeʼ tsʼoʼok tak in woksaʼal cárcel. Dieciocho u téenel kʼaʼalen cárcel ikil in wookol yéetel in baʼateʼel.

Ka tu tsʼáajten 20 añoseʼ maas kʼaschajen. Kin tsʼuʼutsʼik 20 u chamalil marihuana sáamsamal, tsʼoʼoleʼ kin usartik heroína yéetel uláakʼ drogaʼob, le oʼolal yaʼab u téenel máan in kíimil. Kin konik droga kaʼachi yéetel mantatsʼ armadoen. Juntéenjeakeʼ tin tsʼonaj juntúul máak; u maʼalobileʼ tu hebillail u faja tsaʼayi. Veinticuatro años yaanten ka kíim in maama, ka maas kʼaschajen. Le máakoʼoboʼ saajkoʼob ten. Ken u yiloʼob in náatsʼal tu yiknaloʼobeʼ ku máanoʼob tuláakʼ u tséel le calleoʼ. Tumen yaʼab in baʼateleʼ, utiaʼal sábado yéetel domingoeʼ maases kʼalaʼanen wa tiaʼanen hospital utiaʼal u chuʼuyul tuʼux beetaʼanten loobeʼ.

Veintiocho años yaanten ka tsʼoʼok in beel. Pero maʼ tin respetartaj in wataniʼ. Kin pochʼik yéetel kin jatsʼik. Maʼatech in jóoʼsik tiempo utiaʼal in wantal tu yéetel. Kin tuklik kaʼacheʼ yaan yéetel in sen tsʼáaiktiʼ le alhajas kin woklikoʼ. Junpʼéel kʼiineʼ in wataneʼ káaj u xokik le Biblia yéetel u j-jaajkunajoʼob Jéeobaoʼ. Ka tsʼoʼok u yáax xookeʼ tu xulaj u tsʼuʼutsʼ chamal yéetel u kʼamik le taakʼin kin woklikoʼ, ka tu sutajten le alhajasoʼ. Teneʼ jach pʼuʼujen, tin waʼalajtiʼ ka u xul u xokik le Bibliaoʼ, tsʼoʼoleʼ ken in tsʼuʼutsʼ chamaleʼ  kin wustik u buutsʼil tu yich yéetel kin pʼatik ich suʼtsilil tu táan u maasil.

Junpʼéel áakʼab jach kalaʼaneneʼ tin tʼabaj le cuarto tuʼux kajaʼanoʼonoʼ. Chéen tu yoʼolal in watan maʼ eeloʼon yéetel in chan hija de cinco añosiʼ. Ka jóom in wóoleʼ jach yaachaj tin wóol le baʼax úuchoʼ, tumen tiʼ teen anchaj u culpail. Tin tuklaj mix bikʼin ken u perdonarten Dios. Kʼaʼajten in wuʼuymaj u yaʼalik juntúul sacerdoteeʼ le kʼasaʼanoʼoboʼ ku binoʼob infierno. Tak juntúul psiquiatraeʼ tu yaʼalajten: «¡Tsʼoʼoktech beyoʼ! ¡Minaʼantech utskíinajil!».

Ka tsʼoʼok u yelel k-otocheʼ binoʼon kajtal yiknal in suegro. Le ka bin xíimbaltbil in watan tumen le j-Jaajkunajoʼoboʼ, tin kʼáatajtiʼob: «¿Jeʼel wa u perdonartiken Dios kex jach yaʼab baʼax kʼaas tsʼoʼok in beetkeʼ?». Letiʼobeʼ tu xokoʼobten 1 Corintoiloʼob 6:9-11 tuʼux ku yaʼalik baʼaxoʼob u pʼekmaj Dios, chéen baʼaleʼ ku yaʼalik xan: «Jujuntúul tiʼ teʼexeʼ beyeʼex kaʼachoʼ». Lelaʼ tu kaʼansajteneʼ jeʼel u páajtal in kʼexik in kuxtaleʼ. Tu xokoʼob xan 1 Juan 4:8 utiaʼal u yeʼeskoʼobten u yaabiltmen Dios. Leloʼ tu líiʼsaj in wóol yéetel tin wuʼuyajtiʼob wa jeʼel u tsʼáaikoʼobten xook kaʼatéen tiʼ junpʼéel semanaeʼ; ka tsʼoʼokeʼ káaj xan in bin muchʼtáambal. Mantatsʼ kin orar tiʼ Jéeoba.

Ka máan junpʼéel meseʼ tin chʼaʼtuklaj in xulik in drogartkinba yéetel in káaltal, pero tin wuʼuyaj ku kʼáatikten in wíinklil. Káaj in kʼojaʼantal, ku sen chiʼibal in pool, ku yaatal in nakʼ, kin kikilankil yéetel kin náaytik kʼaakʼas baʼaloʼob. Teʼ kʼiinoʼoboʼ Jéeobaeʼ jach tu yáanten. Úuchten jeʼex apóstol Pablo ka tu yaʼalaj le tʼaanoʼobaʼ: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Filiposiloʼob 4:13). Ka máan kʼiineʼ tin xulaj in tsʼuʼutsʼik chamal (2 Corintoiloʼob 7:1).

Le Bibliaoʼ tu kʼexaj in kuxtal yéetel káaj in biskinba maʼalob yéetel in familia. Káaj in respetartik in watan, káaj in waʼalik jatsʼuts tʼaanoʼob tiʼ jeʼex «diosboʼotik» yéetel «beet uts». Joʼopʼ in máansik tiempo yéetel in chan hija. Junpʼéel año káajak in xokik le Bibliaoʼ okjaʼanajen jeʼex úuchik u beetik xan in watanoʼ.

Letiʼe Biblia salvartenoʼ. Tak in láakʼtsiloʼob maʼ j-Jaajkunajoʼobeʼ ku yaʼalikoʼobeʼ wa maʼ úuchik in kʼexik in kuxtaleʼ bejlaʼa úuch kíimken ikil in sen drogartkinba wa ikil in baʼateleʼ.

Jach kʼexpaj in kuxtal. Káaj in biskinba maʼalob yéetel in familiaeʼ, ka tin beetinba maʼalob íichamtsil yéetel taatatsil jeʼex u kaʼansik le Bibliaoʼ (Efesoiloʼob 5:25; 6:4). Káaj k-múul meyaj bey familiaeʼ. Bejlaʼeʼ maʼatech in waʼalik tiʼ in watan chéen kʼóoben unaj u yantal; kin wáantik yéetel kiʼimak óolal tumen ku máansik maas tiʼ setenta horas táan u kʼaʼaytaj. Yaʼab bix u yáantken xan utiaʼal in beetik in ancianoil teʼ múuchʼuliloʼ.

U yaabilaj yéetel u chʼaʼ óotsilil Jéeoba Dioseʼ tsʼoʼok u kʼexik in kuxtal. Lelaʼ ku yeʼesikteneʼ jeʼel máaxak u kʼáat u kʼex u kuxtaleʼ jeʼel u páajtal u beetik yéetel u yáantaj le Bibliaoʼ. Le oʼolal kin tsʼíiboltik in tsikbaltik baʼax ku kaʼansik Jéeoba tiʼ le máaxoʼob ku yilaʼal bey minaʼan utskíinajil tiʼoboʼ. Le Bibliaoʼ tsʼoʼok u kaʼansikten in yaabilt yéetel in respetart tuláakal máak, táakak xiib yéetel koʼolel, yéetel tsʼoʼok xan u kaʼansikten in respetart in kuxtal.