¿Táan wa k-kuxtal jeʼex kuxlajik Cristoeʼ?
¿Táan wa k-kuxtal jeʼex kuxlajik Cristoeʼ?
«Jeʼel bix t-kaʼansaj ka kuxlakeʼex jeʼel bix utstutʼaan Jajal Diosoʼ bey ka a beeteʼex mantatsʼ.» (1 TES. 4:1)
1, 2. 1) ¿Baʼaxoʼob tu yilaj le máakoʼob tu kʼiiniloʼob Jesusoʼ? 2) ¿Baʼaxoʼob ku yilaʼaloʼob xan teʼ tu tsʼook kʼiinoʼobaʼ?
¿KA MÁANSIK wa ta tuukul bukaʼaj jaʼtsil ka kuxlakech kaʼach tu kʼiiniloʼob Jesús? Maʼ xaaneʼ jeʼel a bin tu yiknal utiaʼal ka u tsʼak upʼéel baʼax ka muʼyajtikeʼ. Wa maʼ xaaneʼ jeʼel a natsʼkaba a wuʼuy le baʼaxoʼob ku kaʼanskoʼ wa utiaʼal ka wil le milagroʼob ku beetkoʼ (Mar. 4:1, 2; Luc. 5:3-9; 9:11). ¿Máasaʼ jach jatsʼuts wa ka u yil máak le baʼaxoʼob tu beetoʼ? (Luc. 19:37.) Baʼaleʼ mix máak uláakʼ u yil le baʼax tu beetaj Jesusoʼ. Letiʼeʼ tu kʼubaj xan u kuxtal utiaʼal ka páajchaj u jáalkʼabtik máak tiʼ le kʼebanoʼ (Heb. 9:26; Juan 14:19).
2 Baʼaleʼ bejlaʼeʼ jach yaʼab baʼaloʼob táan u yúuchloʼob mix utéen ilaʼakoʼob. Tsʼoʼoleʼ kuxaʼanoʼon «tiʼ u tsʼook jaʼaboʼob» wa u tsʼook kʼiinoʼob (Dan. 12:1-4, 9; 2 Tim. 3:1). Satanaseʼ tsʼoʼok u luʼsaʼal teʼ kaʼanoʼ yéetel maʼ kun xáantaleʼ yaan u kʼaʼaxal utiaʼal ka puʼuluk teʼ «taamkach chʼeʼenoʼ» (Apo. 12:7-9, 12; 20:1-3). Tsʼoʼoleʼ tsʼaʼantoʼon upʼéel jatsʼuts meyaj maʼ kun kaʼa beetbil: u kʼaʼaytaʼal tiʼ tuláakal yóokʼol kaab u «maʼalob péektsilil le reino[oʼ]» yéetel bix le kuxtal kun yantal teʼ Paraísooʼ (Mat. 24:14).
3. 1) ¿Baʼax tu yaʼalaj Jesús tiʼ u disipuloʼob ka u beetoʼob? 2) ¿Baʼax uláakʼ táakaʼan ichil le baʼax tu yaʼalaj ka beetaʼakoʼ?
3 Le jach taʼaytak u suut Jesús teʼ kaʼanoʼ, tu yaʼalaj tiʼ u disipuloʼob: «[Kʼaʼayteʼex] in kʼaabaʼ Jerusalén, tiʼ tuláakal Judea yéetel Samaria, tak [teʼ] kúuchiloʼob yaan tu xuul yóokʼol kaaboʼ» (Hch. 1:8). Le baʼaxoʼob tu yaʼaloʼ ku yeʼeskeʼ yaan u kaʼansaʼal u kajnáaliloʼob yóokʼol kaab. ¿Baʼax oʼolal kun kaʼansbiloʼob? Utiaʼal ka u tsaypachtoʼob Cristo táanil tiʼ le xuʼulsajiloʼ (Mat. 28:19, 20). ¿Baʼax kʼaʼabéet utiaʼal k-beetik tubeel le baʼax tu yaʼalaj Jesusoʼ?
4. 1) ¿Baʼax ku yaʼalik 2 Pedro 3:11 yéetel 12 unaj k-beetik? 2) ¿Baʼax maʼ unaj k-chaʼik u yúuchul toʼoniʼ?
4 Bejlaʼeʼ unaj k-beetik le baʼax tu yaʼalaj apóstol Pedroaʼ: «Bey túunoʼ yéetel bukaʼaj kʼub óolal yéetel kiliʼichil unaj a kuxtaleʼex. Páaʼteʼex yéetel séebkunteʼex u kʼuchbal u kʼiinil Jajal Dios» (2 Ped. 3:11, 12). Lelaʼ ku yeʼesiktoʼoneʼ le máaxoʼob meyajtik Dios teʼ tu tsʼook kʼiinoʼobaʼ, jach unaj u yilkoʼob maʼ u náayal u yóoloʼob, baʼaxeʼ unaj u tsʼáaik u yóol u kʼaʼaytoʼob le maʼalob péektsiloʼ. ¿Máasaʼ jach ku beetik u kiʼimaktal k-óol k-ilik yaʼab sukuʼunoʼob táan u beetkoʼob le baʼax tu yaʼalaj Jesusoʼ? Baʼaleʼ k-ojel u kʼasaʼan yóokʼol kaab Satanás yéetel le kʼeban yaan t-wíinkliloʼ ku taasiktoʼon yaʼab chiʼichnakiloʼob, tuláakal le baʼaloʼob ku yúuchultoʼonoʼ jeʼel u beetik u xuʼulul k-tsʼáaik k-óol teʼ kʼaʼaytajoʼ yéetel k-tsaypachtik Cristo mantatsʼ. ¿Baʼax jeʼel u yáantkoʼon utiaʼal maʼ u yúuchultoʼon lelaʼ?
Unaj k-beetik yéetel kiʼimak óolal le baʼax tu yaʼalaj Cristooʼ
5, 6. 1) ¿Baʼaxten kiʼimakchaj u yóol Pablo yéetel le sukuʼunoʼob yanoʼob Jerusalenoʼ, baʼaleʼ baʼax tu yaʼalajtiʼob? 2) ¿Baʼaxten maʼ unaj k-ilik bey maʼ jach kʼaʼabéet u beetaʼal le baʼaxoʼob ku yaʼalik Diosoʼ?
5 Tu tsʼíibil Hebreobeʼ, apóstol Pabloeʼ tu yaʼalaj tiʼ le sukuʼunoʼob yanoʼob tu kaajil Jerusalenoʼ, jach kiʼimak u yóol u yilik tsʼoʼok u chúukpajal u yóol u meyajtoʼob Dios kex chʼaʼapachtaʼaboʼob. Letiʼeʼ tu yaʼalajtiʼob: «Kʼaʼajakteʼex le kʼiinoʼob tsʼoʼok u máanoʼoboʼ, le kʼiinoʼob ka ta kʼamajeʼex le sáasiloʼ yéetel ka ta mukʼyajtajeʼex yéetel chukaʼan óolal u yaayaj óolaliloʼob jumpʼéel nojoch baʼateʼel». Letiʼobeʼ u yojloʼob mix bikʼin kun tuʼubsbil tumen Jéeoba le baʼax tu beetoʼoboʼ (Heb. 6:10; 10:32-34). Le baʼax tu yaʼalaj Pablooʼ, maʼ xaaneʼ jach tu líiʼsaj u yóol le sukuʼunoʼoboʼ. Baʼaleʼ láayliʼ tu tsʼíibil Hebreobeʼ, tu yaʼalajtiʼobeʼ utiaʼal maʼ u xuʼulul u tsʼáaik u yóoloʼob u meyajtoʼob Dioseʼ, unaj u yilkoʼob maʼ u beetkoʼob upʼéel baʼal jach suuk u beetaʼal tumen óoliʼ tuláakal máak: u kaxtik chéen baʼax u yaʼal utiaʼal maʼ u beetik le baʼax ku yaʼalaʼaltiʼoʼ. Tu yaʼalajtiʼobeʼ maʼ unaj u kaxtikoʼob chéen baʼax u yaʼaloʼob utiaʼal maʼ u beetkoʼob le baʼax ku yaʼalik Diosoʼ (Heb. 12:25).
6 Le baʼax tu yaʼalajtiʼoboʼ láayliʼ bey unaj k-beetkoʼ. Toʼoneʼ maʼ unaj k-kaxtik chéen baʼaloʼob k-aʼal utiaʼal maʼ k-beetik le baʼaxoʼob ku yaʼalik Diosoʼ. Maʼ unaj k-ilik bey maʼ jach kʼaʼabéet u beetaʼaleʼ mix u xuʼulul k-tsʼáaik k-óol k-beetiʼ (Heb. 10:39). Kʼaʼajaktoʼoneʼ yaʼab máakoʼob unaj k-áantik utiaʼal ka u salvartubaʼob (1 Tim. 4:16).
7, 8. 1) ¿Baʼax jeʼel u yáantkoʼon k-tsʼáa k-óol meyajt Dioseʼ? 2) ¿Baʼax maʼ unaj u tuʼubultoʼon yoʼolal Jéeoba yéetel Jesús wa tsʼoʼok u pʼáatal maʼ táan k-meyajtik jeʼex le ka t-kʼubaj k-kuxtal tiʼeʼ?
7 ¿Baʼax jeʼel u yáantkoʼon k-beet yéetel kiʼimak óolal le baʼaxoʼob ku yaʼalik Jéeobaoʼ? Yáaxeʼ letiʼe ka tuukulnakoʼon mantatsʼ tiʼ le baʼax t-aʼalaj tiʼ Jéeoba le ka t-kʼubaj k-kuxtal tiʼoʼ. U jaajileʼ t-aʼalajtiʼ k-kʼáat k-beet baʼax utstutʼaan yéetel k-kʼáat tsʼoʼokbes le baʼax t-aʼalajtiʼoʼ (Mat. 16:24). Le oʼolal cada wa baʼax kʼiineʼ maʼalob ka k-tukle: «¿Láayliʼ wa jach taak in beetik le baʼax utstutʼaan Jéeoba jeʼex le kʼiin ka tin kʼubaj in kuxtal tiʼoʼ? ¿Wa tsʼoʼok u pʼáatal maʼ jach taak in beetkiʼ?».
8 Wa k-ilik tsʼoʼok u pʼáatal maʼ táan k-jach beetik le baʼax t-aʼalaj tiʼ Jéeobaoʼ, kʼaʼajaktoʼon le baʼaxoʼob tu yaʼalaj profeta Sofoníasoʼ: «[¡]Maʼ a chaʼik u lúubul u muukʼoʼob a kʼab! Yuumtsil a [Dioseʼ] tiʼ yaan tiʼ a chúumuk kaajeʼ; ¡letiʼeʼ [yaan páajtalil tiʼ], bíin u tokech! Yuumtsileʼ, bíin kiʼimakchajak u yóol ta woʼolal» (Sof. 3:16, 17). Le tʼaanoʼobaʼ aʼalaʼabtiʼ le israelitaʼob jóoʼkʼoʼob tu kaajil Babilonia utiaʼal u binoʼob Jerusalenoʼ. Baʼaleʼ le baʼaxoʼob aʼalaʼabtiʼoboʼ láayliʼ bey u yúuchul teʼ kʼiinoʼobaʼ. Maʼ u tuʼubultoʼoneʼ Jéeoba tsʼaamiltoʼon le meyajoʼ, le oʼolal letiʼ yéetel u Hijoeʼ yaan u tsʼáaiktoʼon u muukʼil utiaʼal k-beetik (Mat. 28:20; Fili. 4:13). Wa jach tu jaajil k-óol k-beetik le baʼax ku yaʼalik Diosoʼ, letiʼeʼ jach yaan u yáantkoʼon utiaʼal ka k-maas meyajte.
Unaj k-tsʼáaik k-óol k-kaxt táanil «u [reino] Jajal Dios»
9, 10. ¿Baʼax ku chíikbesik le nojoch janal tu tsikbaltaj Jesusoʼ yéetel baʼax ku kaʼansiktoʼon?
9 Le táan u janal Jesús tu yotoch utúul u nojchil le fariseoʼoboʼ tu tsikbaltaj baʼax úuch tiʼ upʼéel nojoch janal utiaʼal u yeʼesik le jatsʼuts páajtalil tsʼaʼab tiʼ yaʼab máakoʼob utiaʼal u gobernaroʼob yéetel Jesús teʼ Reino yaan teʼ kaʼanoʼ. Tsʼoʼoleʼ teʼ tsikbalaʼ tu yaʼalaj upʼéel baʼax jach suukaʼan u yaʼalik máak utiaʼal maʼ u beetik le baʼax ku yaʼalaʼaltiʼoʼ (xokaʼak Lucas 14:16-21). Teʼ tsikbalaʼ le máaxoʼob invitartaʼaboʼoboʼ, jejeláas baʼax tu kaxtaj u yaʼaloʼob utiaʼal maʼ u binoʼob teʼ jaanloʼ: Utúuleʼ tu yaʼalaj jach táant u manik upʼéel luʼumeʼ, le oʼolal jach kʼaʼabéet u bin u yile; uláakʼ utúuleʼ tu yaʼalaj kʼaʼabéet u bin u yil wa jaytúul wakax táant u manikeʼ yéetel u yóoxtúuloʼ tu yaʼalaj maʼ tu páajtal u bin tumen jach táant u tsʼoʼokol u beeleʼ. Jeʼex túun k-ilkoʼ chéen tu kaxtaj baʼax u yaʼaloʼob utiaʼal maʼ u binoʼob. Tumen u suukaʼanileʼ le máaxoʼob manik upʼéel luʼum wa utúul baʼalcheʼiʼ táanil ku bin u yiloʼob. Le oʼolal maʼ jach kʼaʼabéet u jáan kaʼa bin u yiloʼobiʼ. ¿Jach wa tu jaajil utúul máax táant u tsʼoʼokol u beeleʼ maʼ tu páajtal u bin tiʼ upʼéel nojoch kʼiimbesaj? Le oʼolal bakáan tsʼíikilnaj le máax invitartoʼoboʼ.
10 Le kettʼaanaʼ jach yaan baʼax ku kaʼansiktoʼon: jeʼex tu yaʼalil Jesusoʼ mix utéen unaj k-beetik chéen baʼaxoʼob k-kʼáat utiaʼal maʼ k-meyajtik Jéeoba. Tumen wa k-tsʼáaik táanil chéen baʼaxoʼob k-kʼáateʼ yaan u xuʼulul k-tsʼáaik k-óol k-meyajte (xokaʼak Lucas 8:14). Utiaʼal maʼ u yúuchultoʼon beyoʼ, unaj k-beetik mantatsʼ le baʼax tu yaʼalaj Jesusaʼ: «Kaxteʼex táanil u [reino] Jajal Dios yéetel le toj kuxtal utstutʼaan letiʼoʼ» (Mat. 6:33). ¿Máasaʼ jach ku líiʼsik k-óol k-ilik yaʼabach sukuʼunoʼob jejeláas u jaʼabiloʼobeʼ jach táan u beetkoʼob le baʼax tu yaʼaloʼ? Yaʼab tiʼ letiʼobeʼ tsʼoʼok u chʼaʼatuklikoʼob u kuxtaloʼob chéen yéetel upʼíit baʼal utiaʼal u maas kʼaʼaytajoʼob. Tsʼoʼok u yilkoʼobeʼ minaʼan uláakʼ baʼax ku taasik kiʼimak óolal jeʼex le ku kʼamikoʼob ken u tsʼaʼob táanil le Reinooʼ.
11. ¿Baʼax tsikbalil ku yeʼesiktoʼon unaj k-meyajtik Jéeoba yéetel tuláakal k-puksiʼikʼal?
11 Utiaʼal k-maas naʼatik baʼaxten kʼaʼabéet u chúukpajal k-óol k-meyajt Dioseʼ, koʼoneʼex kʼaʼajsik baʼax úuch tiʼ Joás utúul u reyil Israel. Le ka bin Siria baʼateʼel tu contra u kaajil Israeleʼ, Joaseʼ bin u yil Eliseo ka joʼopʼ u sen oʼtik ka áantaʼak. Eliseoeʼ tu yaʼalajtiʼ ka yanak tu tojil le ventanaoʼ yéetel ka chʼiinak yéetel upʼéel flecha tu tojil Siria. Le baʼax aʼalaʼabtiʼ ka u beetoʼ tu yeʼesaj yaan u yáantaʼal tumen Jéeoba ka u ganart u kaajil Siria. Lelaʼ unaj u beetik u líikʼil u yóol kaʼachi. Baʼaleʼ maʼ bey úuchikoʼ. Le ka aʼalaʼabtiʼ tumen Eliseo ka u jaʼajatsʼ le flechaʼob teʼ luʼumoʼ, letiʼeʼ chéen óoxtéen tu jatsʼaj. Eliseoeʼ tsʼíikilnaji tumen utiaʼal u «paʼik u muukʼ le sirioʼob» yéetel u xuʼulsik tiʼoboʼ unaj kaʼach u jatsʼik tak cinco wa seis utéenel. Tumen maʼ tu tsʼáaj u yóol u jatsʼ le luʼumoʼ, chéen óoxtéen páajchaj u ganartik Siria, maʼ béeychaj u xuʼulsik tiʼiʼ (2 Rey. 13:12-20). ¿Baʼax ku kaʼansiktoʼon le baʼax tu beetoʼ? Wa k-kʼáat ka u yáantoʼon Jéeobaeʼ kʼaʼabéet k-meyajtik yéetel tuláakal k-puksiʼikʼal.
12. 1) ¿Baʼax unaj k-beetik utiaʼal maʼ u xuʼulul k-tsʼáaik k-óol meyajt Dios? 2) ¿Baʼax utsiloʼob tsʼoʼok u taasiktech a táakpajal mantatsʼ teʼ kʼaʼaytajoʼ?
12 Le talmiloʼob k-aktáantik sáamsamaloʼ ku beetkoʼob k-eʼesik wa chúukaʼan k-óol k-meyajt Jéeoba. Bejlaʼeʼ yaʼab sukuʼunoʼob máansik óotsilil. Yanoʼob xaneʼ kʼojaʼanoʼob wa yantiʼob uláakʼ talmil. Kex beyoʼ tuláakloʼoneʼ jeʼel u béeytal k-tsʼáaik k-óol meyajt Dios jeʼex tu beetil Cristoeʼ. Le cuadro ku kʼaabaʼtik «Baʼaxoʼob jeʼel u yáantkech kuxtal jeʼex kuxlajik Cristoeʼ» jach jeʼel u yáantkoʼon k-il bix jeʼel k-beetkeʼ. Leloʼ yaʼab utsiloʼob ken u taastoʼon. Tsʼoʼoleʼ wa k-tsʼáaik k-óol mantatsʼ teʼ kʼaʼaytajoʼ jach yaan u yantal u beelal k-kuxtal, yaan u yantaltoʼon jeetsʼelil yéetel kiʼimak óolal (1 Cor. 15:58). Tsʼoʼoleʼ maʼ kun tuʼubultoʼon taʼaytak u kʼuchul «u kʼiinil Jajal Dios» (2 Ped. 3:12).
Unaj k-ilik baʼax táan k-beetik
13. ¿Bix jeʼel k-ilik wa k-jach tsʼaamaj k-óol k-meyajt Dioseʼ?
13 Baʼaleʼ le jaypʼéel horaʼob ku máansik máak teʼ kʼaʼaytajoʼ maʼ letiʼe baʼax eʼesik wa jach u tsʼaamaj u yóol u meyajt Diosoʼ. Tumen maʼ upʼéeliliʼ baʼax ku páajtal u beetik tuláakal máakiʼ. Jeʼex wa utúul j-kʼaʼaytaj kʼojaʼan chéen upʼéel wa kaʼapʼéel hora ku kʼubik cada meseʼ, ku kiʼimakkúuntik u yóol Jéeoba, tumen u yojel chéen letiʼe bukaʼaj ku páajtal u beetkoʼ (ket yéetel Marcos 12:41-44). Le oʼolal cada utúul tiʼ toʼoneʼ jach unaj u yilik wa táan u beetik tuláakal le ku páajtal utiaʼal u meyajtik Diosoʼ. Tsʼoʼoleʼ tumen u disipuloʼon Cristoeʼ, k-kʼáat kuxtal jeʼex kuxlajikoʼ (xokaʼak Romailoʼob 15:5; 1 Cor. 2:16). ¿Baʼax tu tsʼáaj táanil ichil u kuxtal? Letiʼeʼ tu yaʼalaj tiʼ u kajnáaliloʼob Capernaum: «Kʼaʼabéet in tsʼáaik u maʼalob péektsilil u [reino] Jajal Dios tiʼ uláakʼ kaajoʼob xan, tumen le u biilal túuxtaʼabilaken» (Luc. 4:43; Juan 18:37). K-tuukul tiʼ bix tu tsʼáajil u yóol Jesús u meyajt Dioseʼ yaan u yáantkoʼon k-il wa jeʼel u béeytal k-beetik u maasil teʼ kʼaʼaytajoʼ (1 Cor. 11:1).
14. ¿Baʼaxoʼob jeʼel k-beetik utiaʼal k-maas meyajtik Dioseʼ?
14 Ken tuukulnakoʼon tiʼ bix k-meyajtik Dioseʼ maʼ xaaneʼ yaan k-tsʼáaik cuenta jeʼel u béeytal k-maas meyajtikeʼ (Mat. 9:37, 38). Lelaʼ bey tsʼoʼok u beetik yaʼab táankelem yéetel x-lóoʼbayan paalaloʼob ken jóoʼkoʼob tu xookoʼob, bejlaʼeʼ táan u beetik u precursoriloʼob. ¿A kʼáat wa ka yanaktech xan kiʼimak óolal jeʼex letiʼoboʼ? Yaan sukuʼunoʼobeʼ ku chʼaʼatuklik u binoʼob áantaj tuʼux maas kʼaʼabéet teʼ luʼumil tuʼux kajaʼanoʼoboʼ wa tuláakʼ luʼumil, yanoʼob xaneʼ ku kanikoʼob uláakʼ tʼaanil utiaʼal u yáantkoʼob le j-táanxel luʼumiloʼob kajaʼanoʼob teʼ tuʼux ku kʼaʼaytajoʼoboʼ. Maʼ xaneʼ maʼ chéen chʼaʼabil jeʼel a maas meyajtik Jéeobaeʼ, baʼaleʼ jeʼel u taasiktech yaʼab utsiloʼob wa ka beetkeʼ; ichil lelaʼ tiaʼan le a wáantik uláakʼ máakoʼob utiaʼal «ka kʼuchuk u chúukaʼan kʼaj óoltoʼob le jaajoʼ» (1 Tim. 2:3, 4; 2 Cor. 9:6).
Unaj k-kuxtal jeʼex le máakoʼob meyajt Dios úuchjeakiloʼ
15, 16. Aʼal baʼax tu beetaj jujuntúul máakoʼob jach tu tsʼáaj u yóol u tsaypachtoʼob Jesús.
15 Tuukulnakoʼon tiʼ le baʼax tu beetaj jujuntúul tiʼ le máaxoʼob kʼuch u beetubaʼob apostolil tiʼ Jesusoʼ. ¿Baʼax tu beetoʼob ka invitartaʼaboʼob? Mateoeʼ «tu pʼataj tuláakaleʼ ka bin tu paach Jesús» (Luc. 5:27, 28). Ka invitartaʼab Pedro yéetel Andrés xaneʼ «tu séeblakil tu pʼatajoʼob u kʼáanil u chuk kayoʼobeʼ ka binoʼob tu yéetel». Tsʼoʼoleʼ Santiago yéetel Juaneʼ, táan u yutskíintkoʼob kaʼach u kʼáanil u chuk kayoʼob, ka invitartaʼaboʼobeʼ «tu séeblakil tu pʼatajoʼob u taataʼobeʼ bey xan le cheemoʼ ka binoʼob tu paach» (Mat. 4:18-22).
16 Uláakʼ máak bey xan tu beetiloʼ Saulo, le máax kʼaj óoltaʼab bey apóstol Pablooʼ. Kex jach yaʼab u chʼaʼapachtik kaʼach le máaxoʼob tsaypachtik Cristooʼ, tu pʼataj le baʼaxoʼob maʼ maʼalobtak ku beetkoʼ ka túuxtaʼab kʼaʼaytaj tu kʼaabaʼ Jesús. Le Bibliaoʼ ku yaʼalik: «Tu séebaʼanil xaneʼ bin teʼ sinagogaʼoboʼ ka joʼopʼ u kʼaʼaytik baʼaloʼob yaan yil yéetel Jesús, táan u yaʼalikeʼ le Máakaʼ u Paal Dios, NM» (Hch. 9:3-22). Kex jach chʼaʼapachtaʼab yéetel yaʼab baʼaloʼob tu muʼyajteʼ, maʼ xuʼul u tsʼáaik u yóol u meyajt Jéeobaeʼ (2 Cor. 11:23-29; 12:15).
17. 1) ¿Baʼax taak a beetik utiaʼal a kuxtal jeʼex kuxlajik Jesuseʼ? 2) ¿Baʼax utsiloʼob ken k-kʼam wa k-tsʼáaik k-óol meyajt Dios?
17 Maʼ xaaneʼ tuláakloʼon k-kʼáat k-beet jeʼex le yáax cristianoʼoboʼ yéetel k-kʼáat kʼam tu séebaʼanil le invitación ku tsʼáaik Cristooʼ (Heb. 6:11, 12). ¿Baʼax utsiloʼob jeʼel k-kʼamik wa maʼ u xuʼulul k-kuxtal jeʼex kuxlajik Cristooʼ? Yaan u taasiktoʼon kiʼimak óolal k-beetik baʼax utstutʼaan Jéeoba, yaan k-maas táakpajal teʼ meyajoʼob ku beetaʼal teʼ múuchʼuliloʼ bey xan tiʼ uláakʼ meyajoʼob ku beetaʼal ichil u kaajaloʼ (Sal. 40:8; xokaʼak 1 Tesalonicailoʼob 4:1). Wa jach k-tsʼáaik k-óol kuxtal jeʼex kuxlajik Cristoeʼ, yaan u yantaltoʼon kiʼimak óolal, jeetsʼelil, yaan u kʼamikoʼon Jéeoba yéetel maʼ kun xuʼulul k-páaʼtik le kuxtal minaʼan u xuuloʼ (1 Tim. 4:10).
¿Kʼajaʼan wa tech?
• ¿Baʼax meyajil tsʼaʼantoʼon yéetel bix unaj k-ilik?
• ¿Baʼax suukaʼan u beetik máak maʼ maʼalob ka k-beetiʼ, yéetel baʼaxten?
• ¿Baʼaxten jach unaj k-ilik bix k-meyajtik Dios?
• ¿Baʼax jeʼel u yáantkoʼon k-kuxtal jeʼex kuxlajik Cristoeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 27]
Baʼaxoʼob jeʼel u yáantkech kuxtal jeʼex kuxlajik Cristoeʼ
▪ Xok sáamsamal le Bibliaoʼ yéetel tuukulnen tiʼ baʼax ku yaʼalik (Sal. 1:1-3; 1 Tim. 4:15).
▪ Kʼáat mantatsʼ u yáantaj Dios yéetel u kiliʼich muukʼ (Zac. 4:6; Luc. 11:9, 13).
▪ Bisaba yéetel le máaxoʼob jach ku tsʼáaik u yóol u meyajtoʼob Diosoʼ (Pro. 13:20; Heb. 10:24, 25).
▪ Maʼ u tuʼubultech kuxaʼanoʼon tu tsʼook kʼiinoʼob (Efe. 5:15, 16).
▪ Kʼaʼajaktech le talmiloʼob ku taasik u kaxtik máak chéen baʼax u yaʼal utiaʼal maʼ u beetik wa baʼaxoʼ (Luc. 9:59-62).
▪ Tuukulnen tiʼ le baʼax ta waʼalaj tiʼ Jéeoba le ka ta kʼubaj a kuxtal tiʼoʼ yéetel tiʼ le utsiloʼob tsʼoʼok u taasiktech a meyajtikoʼ bey xan a tsaypachtik Cristo yéetel u jaajil a wóoloʼ (Sal. 116:12-14; 133:3; Pro. 10:22).