Bix jeʼel u aprovechartik máak le kʼiinoʼob maʼ tsʼokaʼan u beeloʼ
Bix jeʼel u aprovechartik máak le kʼiinoʼob maʼ tsʼokaʼan u beeloʼ
«Le máax jeʼel u páajtal u beetik beyoʼ, ka u beete.» (MAT. 19:12, NM)
1, 2. 1) ¿Baʼax ku yaʼalik jujuntúul máaxoʼob maʼ tsʼoʼok u beeloʼob, jeʼex Pablo yéetel Jesuseʼ? 2) ¿Baʼaxten yaan máaxeʼ maʼ tu yilik bey junpʼéel siibal ku taal tiʼ Dios le u pʼáatal maʼ u tsʼoʼokol u beel máakoʼ?
LE TSʼOʼOKOL beeloʼ junpʼéel tiʼ le baʼaxoʼob jatsʼutstak u tsʼaamajtoʼon Diosoʼ (Pro. 19:14). Baʼaleʼ yaʼab máaxoʼob meyajtik Dioseʼ kiʼimak u yóoloʼob kex maʼ tsʼokaʼan u beeloʼobiʼ. Harold, juntúul máax maʼ tsʼoʼok u beel yaan 95 jaʼaboʼob tiʼeʼ, ku yaʼalik: «Kex utstintʼaan in biskinba yéetel u maasil bey xan in kʼamik uláakʼ máakoʼob tin wotocheʼ, utstintʼaan xan in wantal chéen tin juunal. Maʼ xaaneʼ tsʼaʼanten u páajtalil in pʼáatal chéen tin juunal».
2 Jesucristo yéetel apóstol Pabloeʼ tu yaʼaloʼobeʼ le u pʼáatal maʼ u tsʼoʼokol u beel máakoʼ junpʼéel siibal ku taal tiʼ Dios, jeʼex le tsʼoʼokol beeloʼ (xokaʼak Mateo 19:11, 12 yéetel 1 Corintoiloʼob 7:7). Baʼaleʼ maʼ tuláakal le máaxoʼob maʼ tsʼokaʼan u beeloʼob chéen tumen bey u kʼáatoʼoboʼ. Yanoʼobeʼ chéen maʼ béeyak u tsʼoʼokol u beeloʼobiʼ. Yanoʼob xaneʼ máan yaʼab jaʼaboʼob tsʼokaʼan u beeloʼob, baʼaleʼ tu divorciartubaʼob wa kíim u núupoʼob. Le oʼolal, ¿bix jeʼel u páajtal u yaʼalaʼal le u pʼáatal maʼ u tsʼoʼokol u beel máakoʼ junpʼéel siibal ku taal tiʼ Dios? ¿Bix jeʼel u aprovechartik máak le kʼiinoʼob maʼ tsʼokaʼan u beeloʼ?
Junpʼéel jatsʼuts siibal
3. ¿Baʼax maas ku páajtal u beetik yaʼab sukuʼunoʼob maʼ tsʼokaʼan u beeloʼobiʼ?
3 U suukaʼanileʼ, le máaxoʼob maʼ tsʼokaʼan u beeloʼoboʼ maas yaan tiempo tiʼob utiaʼal u beetkoʼob uláakʼ baʼaloʼob, letiʼobeʼ jeʼel u páajtal u maas tsʼáaik u yóol u meyajtoʼob Dioseʼ, u kʼaj óoltikoʼob u maasil yéetel u maas biskubaʼob yéetel Jéeoba (1 Cor. 7:32-35). Le oʼolal yaʼab máaxoʼob meyajtik Dioseʼ ku chʼaʼtuklikoʼob maʼ u jáan tsʼoʼokol u beeloʼob. Yanoʼob xaneʼ maʼ u tukultmoʼob kaʼach u pʼáatal maʼ u tsʼoʼokol u beeloʼobiʼ. Baʼaleʼ yoʼolal baʼaxoʼob tu aktáantoʼobeʼ, payalchiʼinajoʼob tiʼ Jéeoba, ka tu tsʼáajoʼob cuentaeʼ yéetel u yáantajeʼ, jeʼel u páajtal u máansik u kuxtaloʼob chéen tu juunaloʼobeʼ. Le oʼolal tu chʼaʼtukloʼob maʼ u tsʼoʼokol u beeloʼob (1 Cor. 7:37, 38).
4. ¿Baʼaxten le máaxoʼob maʼ tsʼokaʼan u beeloʼoboʼ minaʼan baʼax oʼolal u yuʼubkoʼob bey yaan baʼax ku bineltiktiʼob utiaʼal u meyajtikoʼob Jéeobaeʼ?
4 Le máaxoʼob maʼ tsʼokaʼan u beeloʼoboʼ, u yojloʼobeʼ maʼ kʼaʼabéet u tsʼoʼokol u beeloʼob utiaʼal u yaabiltaʼaloʼob yéetel u chʼaʼabloʼob en cuentail tumen Jéeoba bey xan tumen u kaajaliʼ. Jéeobaeʼ u yaabiltmaj cada juntúul máax meyajtik (Mat. 10:29-31). Mix máak yéetel mix baʼal jeʼel u beetik u xuʼulul u yaabiltikoʼobeʼ (Rom. 8:38, 39). Le oʼolal kex tsʼokaʼan k-beel wa maʼeʼ, maʼ unaj k-uʼuyik bey yaan baʼax ku bineltiktoʼon utiaʼal k-meyajtik Jéeobaeʼ.
5. ¿Baʼax unaj u beetik máak utiaʼal u aprovechartik le kʼiinoʼob maʼ tsʼokaʼan u beeloʼ?
5 Baʼaleʼ kʼaʼabéet u yilik máak bix jeʼel u aprovechartik tubeel le kʼiinoʼob maʼ tsʼokaʼan u beeloʼ. Lelaʼ jeʼel u béeytal u beetaʼal tumen juntúul xiib wa koʼolel, táankelem wa tsʼoʼok u yantal u jaʼabil; le máax chéen letiʼ tukultmil u pʼáatal tu juunaloʼ wa chéen maʼ páajchajak u tsʼoʼokol u beeliʼ. Koʼoneʼex ilik bix jeʼel u yáantkoʼon le baʼax tu beetaj jujuntúul máaxoʼob meyajt Dios teʼ yáax siglooʼ.
Táankelmoʼob maʼ tsʼokaʼan u beeloʼobiʼ
6, 7. 1) ¿Baʼax meyajiloʼob tu beetaj u hijas Felipe? 2) ¿Baʼaxoʼob tu beetaj Timoteo tumen maʼ tsʼokaʼan u beeliʼ, yéetel baʼax utsiloʼob tu kʼamaj úuchik u meyajtik Jéeoba tu táankelmil?
6 Felipe, juntúul evangelizadoreʼ, yaan kaʼach kantúul u hijas maʼ tsʼokaʼan u beeloʼobiʼ, letiʼob xaneʼ jach tu tsʼáaj u yóoloʼob u kʼaʼaytoʼob le maʼalob péektsiloʼ (Hch. 21:8, 9). Le x-chʼúupalaloʼobaʼ tsʼaʼab u páajtalil u profetizaroʼob, junpʼéel tiʼ le páajtalil tsʼaʼab tumen le kiliʼich muukʼ ku yaʼalik Joel 2:28 yéetel 29.
7 Timoteo xaneʼ juntúul táankelem xiʼipal maʼ tsʼokaʼan u beel tu aprovechartaj u meyajtik Diosiʼ. Yéetel u yáantaj Eunice, u maama, bey xan Loida, u abuelaeʼ, tu kʼaj óoltaj le «Kiliʼich Tsʼíiboʼob» desde tu chichniloʼ (2 Tim. 1:5; 3:14, 15). Maʼ xaaneʼ tu yóoxtúuliloʼob káaj u meyajtikoʼob Dios tu jaʼabil 47 tiʼ le yáax siglooʼ, le ka yáax kʼuch Pablo tu noj kaajil Listra, le tuʼux kajaʼanoʼob kaʼachoʼ. Ka suunaj Pablo tu kaajil Listra tu jaʼabil 49, maʼ xaaneʼ yaan kex 20 jaʼaboʼob tiʼ Timoteo. Baʼaleʼ kex jach táankelem yéetel maʼ úuch káajak u meyajtik Dioseʼ, le ancianoʼob yanoʼob Listra yéetel Iconiooʼ «ku yaʼalikoʼob baʼax uts tu yoʼolal» (Hch. 16:1, 2). Le oʼolal Pabloeʼ tu invitartaj utiaʼal ka xiʼik tu yéetel u kʼaʼayt le maʼalob péektsil tuláakʼ luʼumiloʼoboʼ (1 Tim. 1:18; 4:14). Maʼ k-ojel wa tsʼoʼok u beel Timoteoiʼ. Baʼax k-ojleʼ tu yóotaj bin yéetel Pablo yéetel ich yaʼab jaʼaboʼob tu beetaj u superintendenteil yéetel u misioneroil (Fili. 2:20-22).
8. ¿Baʼax áant Juan Marcos utiaʼal u chʼaʼtuklik u maas meyajtik Dios, yéetel baʼax utsiloʼob tu kʼamaj úuchik u beetik beyoʼ?
8 Uláakʼ juntúul táankelem xiʼipal tu aprovechartaj le kʼiinoʼob maʼ tsʼokaʼan u beeloʼ Juan Marcos. Letiʼ yéetel María, u maama, bey xan Bernabé, u primoeʼ, tiaʼanoʼob ichil le máaxoʼob yanchajoʼob teʼ yáax múuchʼulil yanchaj tu kaajil Jerusalén teʼ yáax siglooʼ. Maʼ xaaneʼ ayikʼaloʼob, tumen yaan u yotochoʼob tu noj kaajil Jerusalén, yéetel yaan juntúul koʼolel ku meyaj tu yotochoʼob (Hch. 12:12, 13). Baʼaleʼ Marcoseʼ maʼ tu yilaj u kaxtik chéen u yutsiliʼ. Mix tu tuklaj xan u pʼáatal kajtal chéen junpʼéel tuʼuxiʼ, u yantal u familia yéetel u yantal u maasil baʼaloʼob tiʼ. Maʼ xaaneʼ le kʼiinoʼob tu máansaj yéetel le apostoloʼoboʼ le áant utiaʼal u taaktal u beetik u misioneroil, le oʼolal ka yanchaj u páajtalil u láakʼintik Pablo yéetel Bernabé tu yáax viajeil u kʼaʼaytajoʼobeʼ, tu séebaʼanil tu chʼaʼtuklaj u bin (Hch. 13:5). Ka máan kʼiineʼ tu láakʼintaj xan Bernabé, tsʼoʼoleʼ bin xan u yáant Pedro tu kaajil Babilonia (Hch. 15:39; 1 Ped. 5:13). Kex maʼ k-ojel jaypʼéel jaʼaboʼob máan maʼ tsʼokaʼan u beeleʼ, le Bibliaoʼ ku yaʼalikeʼ jach kʼaj óoltaʼab yoʼolal bix úuchik u yáantik u maasil bey xan yoʼolal bix úuchik u maas tsʼáaik u yóol u meyajt Dios.
9, 10. ¿Bix jeʼel u maas meyajtaʼal Jéeoba tumen le táankelem paalaloʼob maʼ tsʼokaʼan u beeloʼoboʼ? Aʼal junpʼéeliʼ.
9 Teʼ kʼiinoʼob xanaʼ yaʼab táankelem paalal meyajtik Dioseʼ tsʼoʼok u chʼaʼtuklikoʼob u aprovechartikoʼob le kʼiinoʼob maʼ tsʼokaʼan u beeloʼob utiaʼal u maas meyajtikoʼob Diosoʼ. Jeʼex Marcos yéetel Timoteoeʼ, tumen maʼ tsʼokaʼan u beeloʼobeʼ jeʼel u páajtal u maas meyajtikoʼob Dios «yéetel tuláakal [u] puksiʼikʼal[oʼobeʼ]» (1 Cor. 7:35). U jaajileʼ maas yaʼab baʼaloʼob jeʼel u páajtal u beetkoʼobeʼ. Jeʼex u precursoriloʼob, u binoʼob tuʼux maas kʼaʼabéet j-kʼaʼaytajoʼob, u kankoʼob uláakʼ táan, u yáantajoʼob utiaʼal u beetaʼal u Najiloʼob Reino, u najiloʼob Betel, u binoʼob teʼ Escuela tiʼ Entrenamiento Ministerialoʼ, wa u binoʼob meyaj tu najil Betel. Táankelem paal, wa maʼ tsʼokaʼan a beeleʼ, ¿táan wa a wilik a aprovechartik a beetik jeʼel máakalmáak tiʼ le baʼaloʼobaʼ?
10 Lelaʼ bey tu beetil Mark, letiʼeʼ káaj u beetik u precursoril tu táankelmil, bin teʼ Escuela tiʼ Entrenamiento Ministerialoʼ yéetel tsʼoʼok u bin áantaj tiʼ jejeláas luʼumiloʼob. Tsʼoʼok veinticinco jaʼaboʼob joʼopʼok u beetik u precursoril, letiʼeʼ ku yaʼalik: «Kin wilik in wáantik mantatsʼ le sukuʼunoʼob teʼ múuchʼuliloʼ: kin jóokʼol kʼaʼaytaj yéeteloʼob, kin bin in xíimbaltoʼob, kin invitarkoʼob janal tin wotoch yéetel k-muchʼikba utiaʼal k-náaysik k-óol yéetel utiaʼal k-líiʼsik k-óol. Lelaʼ jach ku beetik u kiʼimaktal in wóol». Le baʼax tu yaʼalaj Markoʼ ku yáantkoʼon k-ileʼ jach ku taasik kiʼimak óolal tiʼ máak u yáantik u maasil, jeʼex u beetaʼal tumen le máaxoʼob u tsʼaamaj u yóoloʼob u meyajtoʼob Diosoʼ (Hch. 20:35). Táankelem paal, jeʼel baʼaxak utstawich yéetel a wojel a beeteʼ, jach yaan tuʼux a maas meyajtik Dios (1 Cor. 15:58).
11. ¿Baʼax utsil ku kʼamik le máaxoʼob maʼatech u jáan tsʼoʼokol u beeloʼoboʼ?
11 Maʼ xaaneʼ ka tuklik u tsʼoʼokol a beel, jeʼex u maasil táankelem paalaleʼ. Baʼaleʼ unaj a kʼaʼajsikeʼ, yaʼab baʼax oʼolal maʼ unaj u jáan tsʼoʼokol a beeliʼ. Pabloeʼ ku yaʼaliktech maʼ u jáan tsʼoʼokol a beel wa «jach táankelme[ch]», wa teʼ kʼiinoʼob jach nojoch u tsʼíibolalil u nupkuba juntúul xiib yéetel juntúul koʼoleloʼ (1 Cor. 7:36, NM). Táanileʼ unaj a kʼaj óoltikaba utiaʼal a yéeyik tubeel máax yéetel kun tsʼoʼokol a beel, utiaʼal lelaʼ yaʼab kʼiinoʼob ku bisik. Maʼ u tuʼubultecheʼ le tsʼoʼokol beeloʼ maʼ chéen báaxaliʼ, baʼaxeʼ utiaʼal tuláakal a kuxtal (Ecl. 5:2-5).
Máaxoʼob chan yaan u jaʼabiloʼob maʼ tsʼokaʼan u beeloʼobiʼ
12. 1) ¿Baʼax tu tsʼáaj táanil Ana ichil u kuxtal ka kíim u yíicham? 2) ¿Baʼax jatsʼuts páajtalil yanchaj tiʼ Ana?
12 U Evangelioil Lucaseʼ ku tʼaan tiʼ Ana, juntúul koʼolel kíim u yíicham chéen siete jaʼaboʼob tsʼoʼokok u beeloʼob. Le Bibliaoʼ maʼatech u yaʼalik wa yanchaj u paalal bey xan wa tu tuklaj u kaʼa tsʼoʼokol u beel, baʼaleʼ ku yaʼalikeʼ ka tu tsʼáaj 84 jaʼaboʼob tiʼeʼ láayliʼ maʼ tsʼokaʼan u beeleʼ. Tsʼoʼoleʼ ku tsʼáaik naʼatbileʼ tu yilaj u maas biskuba yéetel Jéeoba. Letiʼeʼ «yéetel kʼiin yéetel áakʼab táan kaʼach u meyajtik Yuumtsil yéetel suʼukʼin yéetel payalchiʼ» teʼ templooʼ (Luc. 2:36, 37). Jeʼex túun k-ilkoʼ, jach tu tsʼáaj táanil u meyajtik Dios. Maʼ xaaneʼ maʼ chéen chʼaʼabil úuchik u beetik beyoʼ, baʼaleʼ yanchaj u jatsʼuts páajtalil u yilik Jesús tu chichnil yéetel u yaʼalik le meyaj ken u beet le ken tsʼaʼabak u beet u Mesíasiloʼ (Luc. 2:38).
13. 1) ¿Bix k-ojéeltik Dorcaseʼ juntúul koʼolel jach x-meeyjil? 2) ¿Baʼax utsil tu kʼamaj Dorcas yoʼolal le baʼaxoʼob tu beetoʼ?
13 Dorcas, ku kʼaabaʼtik xan Tabitaeʼ, juntúul koʼolel ku meyajtik Dios kajaʼan kaʼach tu noj kaajil Jope, tu xaman-lakʼin Jerusalén. Le ken chʼaʼchiʼitaʼak ichil le Bibliaoʼ, maʼatech u yaʼalaʼal wa tsʼokaʼan u beel, tumen maʼatech u yúuchul tʼaan tiʼ u yíicham. Dorcaseʼ «mantatsʼ táan u beetik uts yéetel táan u yáantik le óotsiloʼob» kaʼachoʼ. Ku chuyik nookʼ u síi tiʼ le koʼoleloʼob kimen u yíichamoʼoboʼ bey xan tiʼ uláakʼ koʼoleloʼob, le oʼolal jach yaabiltaʼabi. Baʼaleʼ jach kʼojaʼanchajeʼ ka kíimi, le sukuʼunoʼob túunoʼ tu túuxtoʼob tʼanbil Pedro, ka joʼopʼ u sen aʼalikoʼobtiʼ ka u kaʼa kuxkíinte. U tsikbalil kaʼa kuxkíintaʼabikeʼ ojéeltaʼab tumen tuláakal u kajnáaliloʼob Jope, le oʼolal yaʼab máakoʼob tu kʼamoʼob le maʼalob péektsiloʼ (Hch. 9:36-42). Maʼ xaaneʼ tak letiʼob kʼam le áantaj ku tsʼáaik Dorcasoʼ.
14. ¿Baʼaxten yaʼab máaxoʼob meyajtik Jéeoba maʼ tsʼokaʼan u beeloʼobeʼ ku yuʼubkoʼob naatsʼ yaniloʼob tiʼ letiʼ?
14 Teʼ kʼiinoʼobaʼ, yaʼab sukuʼunoʼob tsʼoʼok u chan yantal u jaʼabiloʼobeʼ maʼ tsʼokaʼan xan u beeloʼobiʼ. Yanoʼobeʼ maʼ yanak máax yéetel u tsʼoʼokol u beeloʼobiʼ, yanoʼob xaneʼ u divorciarmubaʼob wa kimen u núupoʼob. Tumen minaʼan u núupoʼobeʼ tsʼoʼok u kanik u maas kʼub u yóoloʼob tiʼ Jéeoba (Pro. 16:3). Silvia, juntúul kiik tsʼoʼok maas tiʼ treintaiocho jaʼaboʼob joʼopʼok u meyaj Beteleʼ, ku yilik bey junpʼéel jatsʼuts siibal yanil chéen tu juunaleʼ. Letiʼeʼ ku yaʼalik: «U jaajileʼ kin tuklik ken in líiʼs u yóol u maasil: “Kux túun teen, ¿máax kun líiʼsik in wóol?”. Baʼaleʼ in wojéeltik jach u yojel Jéeoba baʼaxoʼob kʼaʼabéetteneʼ kin wuʼuyik maas naatsʼ yanilen tiʼ letiʼ. Tsʼoʼoleʼ yaan kʼiineʼ ku líiʼsaʼal in wóol tak tumen máaxoʼob maʼ táan in páaʼtikiʼ». Jeʼex le kiikaʼ, tuláakloʼon jeʼel u páajtal k-natsʼikba tu yiknal Jéeobaeʼ, tumen k-ojel letiʼeʼ jach yaan u yáantkoʼon yéetel yaabilaj.
15. ¿Bix jeʼel u páajtal u jeʼik u puksiʼikʼal tiʼ u maasil le máaxoʼob maʼ tsʼokaʼan u beeloʼoboʼ?
15 Tsʼoʼoleʼ le máaxoʼob maʼ tsʼokaʼan u beeloʼoboʼ maas yaan u páajtalil u biskubaʼob yéetel u maasil (xokaʼak 2 Corintoiloʼob 6:11-13). Jolene, juntúul kiik tsʼoʼok treintaicuatro jaʼaboʼob joʼopʼok u beetik u precursoraileʼ, ku yaʼalik: «Kin wilik in biskinba yéetel tuláakal, maʼ chéen yéetel in wéet jaʼabiloʼobiʼ. Toʼon maʼ tsʼokaʼan k-beeleʼ jeʼel u páajtal k-maas meyajtik Jéeobaeʼ, k-maas áantik k-láakʼtsiloʼob, le sukuʼunoʼoboʼ bey xan u maasil. Jeʼex u máan le jaʼaboʼoboʼ, bey u maas kiʼimaktal in wóol tumen maʼ tsʼokaʼan in beeliʼ». U jaajileʼ le sukuʼunoʼob tsʼoʼok u chʼíijloʼoboʼ, le kʼojaʼanoʼoboʼ, le taatatsiloʼob minaʼan u núupoʼoboʼ, le táankelmoʼob yéetel u maasil sukuʼunoʼob teʼ múuchʼuliloʼ jach kiʼimak u yóoloʼob yoʼolal le meyaj ku beetik le máaxoʼob maʼ tsʼokaʼan u beeloʼoboʼ. U jaajileʼ, ken k-eʼes yaabilaj tiʼ u maasileʼ k-uʼuyikba maʼalobil. Le oʼolal maʼalob ka k-tukle: «¿Jeʼel wa u páajtal xan in jeʼik in puksiʼikʼal tiʼ u maasileʼ?».
Maʼ tsʼoʼok u beeloʼobiʼ
16. 1) ¿Baʼaxten maʼ tsʼoʼok u beel Jesusiʼ? 2) ¿Bix úuchik u aprovechartik Pablo le kʼiinoʼob maʼ tsʼokaʼan u beeloʼ?
16 Jesuseʼ maʼ tsʼoʼok u beeliʼ. Tumen u yojel unaj u maas kʼubik u yóol u beet le meyaj túuxtaʼab u beetoʼ. Letiʼeʼ jach yaʼab úuchik u viajar, maʼ sáaschajak táan u káajsik u meyajiʼ yéetel tsʼoʼok u yáakʼabtal táan u pʼatik kaʼachi, yéetel ka tsʼoʼokeʼ tu kʼubaj u kuxtal tu yoʼolal tuláakal máak. Le oʼolal jach maʼalob úuchik u pʼáatal maʼ u tsʼoʼokol u beel. Tuukulnakoʼon xan tiʼ Pablo, letiʼeʼ tu xíimbaltaj u milesil kilómetros utiaʼal u kʼaʼaytik le maʼalob péektsiloʼ yéetel tu muʼyajtaj yaʼab talamiloʼob (2 Cor. 11:23-27). Kex maʼ xaan wa tsʼoʼok u beel tu táankelmileʼ, le ka tsʼoʼok u yéeyaʼal utiaʼal u beet u apostolileʼ tu chʼaʼtuklaj maʼ u tsʼoʼokol u beel (1 Cor. 7:7, 8; 9:5). Jesús yéetel Pabloeʼ tu yaʼaloʼob tiʼ u maasil, wa jeʼel u béeytaleʼ, maʼ u tsʼoʼokol u beeloʼob utiaʼal u maas meyajtikoʼob Dios. Baʼaleʼ mix juntúul tiʼ letiʼob tu yaʼaloʼob wa jach junpuliʼ maʼ unaj u tsʼoʼokol u beel le máaxoʼob nuʼuktik u kaajal Diosoʼ (1 Tim. 4:1-3).
17. 1) Jeʼex Jesús yéetel Pabloeʼ, ¿baʼax tsʼook u beetik jujuntúul sukuʼunoʼob teʼ kʼiinoʼobaʼ? 2) ¿Bix k-ojéeltik Jéeobaeʼ maʼ ken u tuʼubs le baʼaxoʼob ku beetik máak utiaʼal u meyajtikoʼ?
17 Teʼ kʼiinoʼob xanaʼ yaan sukuʼunoʼob yéetel kiikoʼob tsʼoʼok u chʼaʼtuklikoʼob maʼ u tsʼoʼokol u beeloʼob utiaʼal u maas kʼubikubaʼob u meyajtoʼob Dios. Harold, le sukuʼun tsʼoʼok k-yáax aʼalikeʼ, tsʼoʼok maas tiʼ cincuentaiseis jaʼaboʼob joʼopʼok u meyaj Betel. Letiʼeʼ ku yaʼalik: «Ka tu tsʼáaj diez jaʼaboʼob káajak in meyaj Beteleʼ, tsʼoʼok in wilik u jóokʼol yaʼab sukuʼunoʼob tsʼokaʼan u beeloʼob yoʼolal kʼojaʼanil wa utiaʼal u kanáantik u taataʼob. Tumen tsʼoʼok u kíimil in taataʼobeʼ, teneʼ minaʼanten le chiʼichnakiloʼob beyoʼ, jach jatsʼuts in wilik le meyaj kin beetkoʼ, le oʼolal maʼ in kʼáat in pʼat chéen utiaʼal u tsʼoʼokol in beeliʼ». Margaret, juntúul kiik tsʼoʼok u xáantal káajak u beetik u precursoraileʼ, tu yaʼalaj: «Kex yaʼab u téenel yanchaj u páajtalil u tsʼoʼokol in beeleʼ, maʼ tin wóotiʼ. Tin aprovechartaj mix máak yaan in meyajte, mix in pʼáatal chéen junpʼéel tuʼux utiaʼal u páajtal in maas kʼubik in wóol in meyajt Dios, lelaʼ tsʼoʼok u taasikten yaʼabkach kiʼimak óolal». U jaajileʼ Jéeobaeʼ maʼ ken u tuʼubs mix bikʼin tuláakal le baʼaxoʼob tsʼoʼok u beetkoʼob utiaʼal u maas meyajtikoʼoboʼ (xokaʼak Isaías 56:4, 5).
Aprovechart le kʼiinoʼob maʼ tsʼokaʼan a beeloʼ
18. ¿Bix jeʼel u páajtal k-líiʼsik u yóol yéetel k-áantik le sukuʼunoʼob maʼ tsʼokaʼan u beeloʼoboʼ?
18 Le sukuʼunoʼob maʼ tsʼokaʼan u beeloʼob u tsʼaamaj u yóoloʼob u meyajtoʼob Diosoʼ jach unaj k-aʼaliktiʼob jach maʼalob baʼax ku beetkoʼob. Jach maʼalob k-ilik le meyaj ku beetkoʼoboʼ bey xan le modos ku yeʼeskoʼob teʼ múuchʼuliloʼ. Tuláakloʼon unaj k-áantkoʼob u yiloʼonoʼob sukuʼunil, kiikil, maamail yéetel paalalil. Beyoʼ maʼ ken u yuʼububaʼob chéen tu juunaloʼob (xokaʼak Marcos 10:28-30).
19. ¿Bix jeʼel u aprovechartik máak le kʼiinoʼob maʼ tsʼokaʼan u beeloʼ?
19 Wa maʼ tsʼokaʼan a beel, tumen bey a chʼaʼtukultmil wa chéen maʼ páajchajkeʼ, k-kʼáat óoltik ka u yáantech le baʼaxoʼob tu beetaj jujuntúul máaxoʼob meyajt Dios úuchjeakil bey xan teʼ kʼiinoʼob utiaʼal a wilik jeʼel u béeytal u kiʼimaktal a wóol kex maʼ tsʼokaʼan a beeleʼ. Yanoʼobeʼ ku chʼaʼtuklik maʼ u tsʼoʼokol u beeloʼob, yanoʼob xaneʼ chéen maʼ páajchaj u tsʼoʼokol u beeloʼobiʼ. Yanoʼobeʼ kiʼimak u yóoloʼob tumen maʼ tsʼoʼokok u beeloʼobiʼ. ¿Bix jeʼel a aprovechartik le kʼiinoʼob maʼ tsʼokaʼan a beeloʼ? Natsʼaba tiʼ Jéeoba, maas tsʼáa a wóol a meyajte yéetel jeʼekʼabt a puksiʼikʼal tiʼ u maasil. Jeʼex le tsʼoʼokol beel junpʼéel siibal ku taal tiʼ Diosoʼ, bey xan le maʼ u tsʼoʼokol u beel máakoʼ, baʼaleʼ unaj u yilaʼal jeʼex u yilik Jéeobaoʼ yéetel u aprovechartik máak tubeel.
¿Kʼajaʼan wa tech?
• ¿Baʼaxten ku yaʼalaʼal junpʼéel siibal ku taal tiʼ Dios le maʼ u tsʼoʼokol u beel máakoʼ?
• ¿Baʼax utsiloʼob ku taasik maʼ u jáan tsʼoʼokol u beel máak?
• ¿Baʼax ku páajtal u beetik le máaxoʼob maʼ tsʼokaʼan u beeloʼoboʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
¿Táan wa a aprovechartik a maas meyajtik Dios?