Tuukulnakoʼon tiʼ le baʼaxoʼob tsʼoʼok u beetik Jéeoba t-oʼolaloʼ

LE TÁANT u kaʼa kuxtal Cristooʼ, kaʼatúul tiʼ u disipuloʼobeʼ lukʼoʼob Jerusalén utiaʼal u binoʼob Emaús. U Evangelioil Lucaseʼ ku yaʼalik: «[Le] táan u tsikbaltikoʼob yéetel [le] táan u tʼanaltʼaanoʼobeʼ, Jesuseʼ tu natsʼuba tu yiknaloʼobeʼ ka joʼopʼ u xíimbal yéeteloʼob. Baʼaleʼ kex tu yilajoʼobeʼ yaan baʼax beetik maʼ u kʼaj óoltikoʼob máaxiʼ. Ka túun kʼáataʼabtiʼob tumen Jesús: ¿Baʼax ka tʼanaltʼantikeʼex [le] táan a xíimbaleʼex teʼ bejaʼ? ¿Baʼaxten jach lubaʼan a wóoleʼex?». Letiʼobeʼ lubaʼan u yóoloʼob tumen táan u páaʼtkoʼob kaʼach u jáalkʼabtaʼal u kaajil Israel yáanal u páajtalil Roma tumen Jesús, baʼaleʼ maʼ béeychajiʼ tumen kíimsaʼabi. Le oʼolal lubaʼan u yóoloʼob (Luc. 24:15-21; Hch. 1:6).

Jesuseʼ joʼopʼ u tsikbal yéeteloʼob. «Ka túun joʼopʼ u tsoliktiʼob le baʼax ku yaʼalik tuláakal le Kiliʼich Tsʼíiboʼob tu yoʼolal letiʼoʼ, káaj yéetel u tsʼíiboʼob Moisés ka tu tsʼoʼoksaj yéetel u tsʼíiboʼob tuláakal le [profetaʼoboʼ].» Tu kʼaʼajsajtiʼob le kʼiinoʼob táan u kʼaʼaytajoʼ yaan baʼaxoʼob úuchoʼob tu muʼukʼaʼankúuntaj u fe le máaxoʼob tsaypachtoʼ. Le táan u yuʼubikoʼob le baʼax ku tsolaʼaltiʼoboʼ, joʼopʼ u kiʼimaktal u yóoloʼob. Teʼ áakʼab jeʼeloʼ letiʼobeʼ tu yaʼaloʼob: «¿Maʼ wa jaaj bey junpʼéel kʼáakʼ tʼaʼab tiʼ k-puksiʼikʼal le ka tʼaanaj t-éetel teʼ bejoʼ, kaʼalikil táan u tsoliktoʼon le Kiliʼich Tsʼíiboʼoboʼ?» (Luc. 24:27, 32). ¿Baʼax ku kaʼansiktoʼon le bix úuchik u tuukul le kaʼatúul disipuloʼobaʼ?

Le bix u yuʼubkuba máak ken pʼáatak maʼ tu béeytal baʼax ku páaʼtikoʼ

Le kaʼatúul disipuloʼobaʼ lubaʼan kaʼach u yóoloʼob tumen maʼ béeychaj le baʼax ku páaʼtkoʼoboʼ. Tak le Bibliaoʼ ku yaʼalikeʼ wa maʼ tu béeytal baʼax ku páaʼtik máakeʼ ku yaatal u yóol u puksiʼikʼal (Pro. 13:12). Bejlaʼeʼ bey xan u yúuchloʼ: yaan máaxoʼob úuch joʼopʼok u meyajtikoʼob Jéeobaeʼ ku tuklikoʼobeʼ bejlaʼa úuch u taas Jéeoba le «nojoch muʼyajil[oʼ]» yéetel bejlaʼa tiʼ kuxaʼanoʼon teʼ túumben yóokʼol kaaboʼ (Mat. 24:21, NM; Apo. 7:14). Le oʼolal ku naʼataʼal baʼaxten ku lúubul k-óol ken k-il maʼ béeyak baʼax k-páaʼtikiʼ.

Baʼaleʼ kʼaʼajaktoʼoneʼ le kaʼatúul disipuloʼobaʼ kaʼa kiʼimakchaj u yóoloʼob le ka beetaʼab u tuukuloʼob tiʼ le profecíaʼob tsʼoʼok  u béeytaloʼoboʼ, yaan tiʼ leloʼobaʼ tak letiʼob il u béeytal. Toʼon xaneʼ jeʼel u kaʼa kiʼimaktal k-óol kex maʼ béeyak le baʼax k-páaʼtikoʼ. Michael, juntúul sukuʼun úuch joʼopʼok u beetik u ancianoileʼ tu yaʼalaj: «Maʼ a tuukul tiʼ baʼax maʼ u béeykunt Jéeobaiʼ, baʼaxeʼ tuukulnen tiʼ le baʼax tsʼoʼok u béeykuntikoʼ». ¿Máasaʼ jach maʼalob le baʼax tu yaʼaloʼ?

Le baʼax tsʼoʼok u béeykuntik Jéeobaoʼ

Tuukulnen tiʼ jujunpʼéel baʼaxoʼob tsʼoʼok u béeykuntik Jéeoba. Jesuseʼ tu yaʼalaj: «Le máax oksaj óoltikeneʼ yaan u beetik xan le baʼaloʼob kin beetkoʼ, baʼaloʼob maas nuuktak kun u beete» (Juan 14:12). Bejlaʼeʼ táan k-kʼaʼaytik le maʼalob péektsil tiʼ tuláakal yóokʼol kaaboʼ. Yéetel maas tiʼ siete millones máakoʼob táan u páaʼtik u salvarkubaʼob ken taalak le xuʼulsajiloʼ. ¡Mix juntéen yanak jach yaʼab máakoʼob meyajtik Jéeoba ichil le bukaʼaj luʼumiloʼoboʼ! Jéeobaeʼ tsʼoʼok u beetik u béeytal le baʼax tu yaʼalaj u Hijooʼ. U jaajileʼ le máaxoʼob meyajtikoʼ tsʼoʼok u beetkoʼob meyajoʼob «maas nuuktak» tiʼ le tu beetaj Jesusoʼ.

¿Baʼax uláakʼ tsʼoʼok u beetik Jéeoba? Tsʼoʼok u chaʼik u jóokʼol yaʼabkach máakoʼob tiʼ le kʼasaʼan yóokʼol kaabaʼ utiaʼal ka ookkoʼob ichil u kaajal ku keʼetel yéetel junpʼéel paraíso (2 Cor. 12:1-4). Tuukulnen tiʼ jujunpʼéel baʼaxoʼob yaan ichil le paraíso jeʼel u yáantkoʼon mantatsʼoʼ. Pakt jaypʼéel libroʼob a líiʼsmaj wa le yanoʼob teʼ najil Reinooʼ. Walaʼt le libro Índice de las publicaciones Watch Tower wa ilawil le bukaʼaj jóoʼsaʼaniloʼob yaan ichil Watchtower Library. Uʼuy junpʼéel drama. Máans ta tuukul baʼax ta wuʼuyaj yéetel baʼax ta wilaj le ka binech tu tsʼook asamblea. Tuukulnen xan tiʼ le bix jatsʼutsil k-bisikba yéetel k-sukuʼunoʼoboʼ. ¿Máasaʼ Jéeobaeʼ jach uts tumen ku tsʼáaiktoʼon yaʼabkach kaʼansaj ku keʼetel yéetel janal bey xan ku páajtal k-bisikba yéetel sukuʼunoʼob jach yaan u yaabilajoʼob? Jach tu jaajil bey tiʼ junpʼéel paraíso kuxaʼanoʼoneʼ.

Davideʼ tu yaʼalaj: «Yaʼabkach le jakʼ óol meyajoʼob ta beetajtechoʼ, yaʼab a chʼaʼa óotsilil tiʼ toʼon» (Sal. 40:5). Bey túunoʼ wa k-tuukul tiʼ le baʼaxoʼob tsʼoʼok u beetik Jéeoba, k-Taata yaan teʼ kaʼan, bey xan tiʼ le yaabilaj ku yeʼesiktoʼonoʼ, yaan u líikʼil k-óol yéetel yaan u chúukpajal k-óol k-beet le meyaj u tsʼaamajtoʼonoʼ (Mat. 24:13).

[U tsolajil le oochel teʼ táan juʼun 31]

Jesuseʼ tu yáantaj u disipuloʼob utiaʼal ka tuukulnakoʼob tiʼ le baʼax tsʼoʼok u beetik Jéeoba tu yoʼolaloʼoboʼ

[U tsolajil le oochel teʼ táan juʼun 32]

Máans ta tuukul baʼax ta wuʼuyaj yéetel baʼax ta wilaj le ka binech tu tsʼook asamblea