Bix jeʼel k-beetik le adoración ich familiail wa ken xooknakoʼon t-juunaloʼ

TU MESIL enero tiʼ u jaʼabil 2009, joʼopʼ u yantaltoʼon chéen tiʼ junpʼéel kʼiin le muchʼtáambal ku yantal kaʼach tiʼ kaʼapʼéel kʼiinoʼ. Le Cuerpo Gobernanteoʼ tu yaʼaleʼ unaj u yantaltoʼon le adoración ich familiail wa utiaʼal k-xook t-juunal teʼ kʼiin ku yantal kaʼach le U Xookil Librooʼ. ¿Táan wa k-ilik k-beetik beyoʼ?

Yaʼab sukuʼunoʼobeʼ ku kʼáatkoʼob baʼax jeʼel u páajtal u xokikoʼob teʼ kʼiin jeʼeloʼ. U jaajileʼ maʼatech u páaʼtaʼal ka xoʼokok junpʼéeliliʼ baʼal tumen tuláakal le sukuʼunoʼob cada semanaoʼ, baʼaxeʼ cada juntúul unaj u yilik baʼax maas jeʼel u yáantikeʼ wa baʼax maas jeʼel u yáantik u familiaeʼ.

¿Baʼaxoʼob jeʼel u páajtal u beetaʼal teʼ áakʼab jeʼeloʼ? Yanoʼobeʼ ku líiʼskubaʼob utiaʼal le muchʼtáambaloʼoboʼ, baʼaleʼ yaan uláakʼ baʼaloʼob jeʼel u páajtal u beetaʼaleʼ. Jeʼel u páajtal k-xokik le Bibliaoʼ, k-xokik wa baʼax jóoʼsaʼanil wa k-beetik junpʼéel u chan dramail le baʼax ku yaʼalik le Biblia, maases wa yaan mejen paalal ichil k-familia. Tsʼoʼoleʼ maʼ mantatsʼ unaj u beetaʼal jeʼex u beetaʼal teʼ muchʼtáambaloʼ. Maas maʼalob ka beetaʼak jejeláas bixi, beyoʼ tuláakal kun táakpajal tiʼ le tsikbaloʼ yéetel tuláakal kun taaktal u yaʼalik baʼax ku tuklik. Beyoʼ yaan u yáantaj tuláakal utiaʼal u jatsʼutstal le adoración ich familiailoʼ.

Juntúul sukuʼun yaan óoxtúul u paalaleʼ tu yaʼalaj: «U suukileʼ ku meyajtoʼon le baʼax k-xokik teʼ Bibliaoʼ. Tuláakloʼon k-yáax xokik le capituloʼoboʼ, yéetel le paalaloʼoboʼ ku xakʼaltikoʼob le jaats u kʼáatoʼobeʼ. Tsʼoʼoleʼ k-muchʼikba utiaʼal u tsolkoʼob le baʼax tu kanoʼoboʼ. Michael [yaan siete jaʼaboʼob tiʼeʼ] yaan kʼiineʼ ku bonik wa ku tsʼíibtik u chan xóotʼ tiʼ le baʼax tu naʼatoʼ. David yéetel Kaitlyn [yaan 13 yéetel 15 jaʼaboʼob tiʼobeʼ] ku tsʼíibtikoʼob bey tiaʼanoʼob le táan u yúuchul le baʼax ku yaʼalik le xookoʼ. Jeʼex le ka t-xokaj [le capítulo 40 tiʼ Génesis] ku tʼaan tiʼ u wayakʼ le máax beetik u yoʼoch waaj faraón yéetel le máax pichik vino tiʼoʼ, Kaitlyneʼ tu tsʼíibtaj le baʼax tu naʼataj bey tiaʼan teʼ cárcel yéetel Joseoʼ».

Tumen cada familia yaanal baʼax kʼaʼabéettiʼeʼ, maʼ xaaneʼ yaanal baʼaxoʼob jeʼel u páajtal a beetkeʼex ken yanakteʼex le adoración ich familiailoʼ. Teʼ tuláakʼ táan juʼunoʼ ku taasik jejeláas baʼax jeʼel u páajtal a beetik ken xooknakech ta juunal wa ken yanaktech le adoración ich familiailoʼ. ¿Yaan wa uláakʼ bix a tuklik jeʼel u páajtal a beetkeʼ?

 [U tsolajil le oochel teʼ táan juʼun 7]

Le familiaʼob yaan táankelem paalaloʼoboʼ:

• A xokikeʼex yéetel a tsikbaltikeʼex baʼax ka kankeʼex tiʼ wa baʼax capituloil tiʼ le libro Los jóvenes preguntan.

• A xokikeʼex u jaats tiʼ le Bibliaoʼ yéetel a tuklikeʼex: «¿Baʼax jeʼel a beetik teech kaʼacheʼ?» (ilaʼak La Atalaya 15 tiʼ mayo tiʼ 1996, táan juʼun 14, xóotʼol 17 yéetel 18).

• A tsikbaltikeʼex baʼax tsʼoʼok a chʼaʼtuklik a beetkeʼex utiaʼal a maas meyajtikeʼex Dios naatsʼkʼin wa maʼ jach séebaʼaniʼ.

• A chaʼantikeʼex yéetel a tsikbaltikeʼex baʼax ta kaneʼex tiʼ junpʼéel video ku taal tiʼ le palitsiloʼ.

• A xakʼalxoktikeʼex le jaats «Utiaʼal xiʼipalaloʼob yéetel chʼúupalaloʼob», ku taasik U Pʼíich Tulumil Kanan.

Le máaxoʼob minaʼan u paalaloʼoboʼ:

• A xokkeʼex le capítulo 1, 3 yéetel 11 tak 16 tiʼ le libro Le baʼax jeʼel u taasik kiʼimak óolal ichil le familiaoʼ.

• A xakʼalxoktikeʼex yéetel a tsikbaltikeʼex junpʼéel baʼax ta xokeʼex teʼ Bibliaoʼ.

• A líiʼskabaʼex utiaʼal U Xookil le Biblia teʼ Múuchʼuliloʼ wa utiaʼal U Xookil U Pʼíich Tulumil Kanan.

• A wilkeʼex bix jeʼel a maas táakpajleʼex teʼ kʼaʼaytajoʼ.

Máaxoʼob maʼ tsʼokaʼan u beeloʼobiʼ wa chéen tu juunaloʼob ku meyajtikoʼob Dios:

• A xokikeʼex le jóoʼsaʼaniloʼob ku tʼoʼoxol teʼ asambleaʼob tiʼ distritooʼ.

• A xokikeʼex le Anuario tiʼ le jaʼabaʼ wa le tsʼoʼok u máanoʼoboʼ.

• A kaxtikeʼex u núukil le kʼáatchiʼob suuk u beetaʼal teʼ tuʼux ka kʼaʼaytajeʼexoʼ.

• A líiʼskabaʼex yéetel jujunpʼéel bix jeʼel a káajsik a tsikbaleʼex teʼ kʼaʼaytajoʼ.

Le familiaʼob yaan mejen paalaloʼoboʼ:

• A beetkeʼex u dramail jujunpʼéel baʼax ku tsikbaltik le Bibliaoʼ.

• A beetkeʼex mejen báaxaloʼob jeʼel u yáantkeʼex a kʼaʼajseʼex le baʼax ka kankeʼex, jeʼex le ku taasik le táan juʼun 30 yéetel 31 tiʼ u revistail ¡Despertad!

• A jóoʼskeʼex u tiempoil utiaʼal a beetkeʼex wa baʼax (ilaʼak le xook ku kʼaabaʼtik “Estudiamos la Biblia en el zoológico”, tiʼ ¡Despertad! 8 tiʼ marzo tiʼ 1996, táan juʼun 16 tak 19).

• A xokikeʼex le jaats ku kʼaabaʼtik «Kaʼans a paalaleʼex», ku taasik U Pʼíich Tulumil Kanan.