Kʼáatchiʼob ku beetaʼal

¿Baʼax ku taasik le tuʼux ku yaʼalaʼal bukaʼaj meyaj beetaʼab cada jaʼaboʼ?

Junpʼéel tiʼ le baʼaxoʼob maas jatsʼutstak ku taasik le Anuariooʼ letiʼe bukaʼaj meyaj beetaʼab ichil junpʼéel jaʼab tumen u kaajal Jéeoba tiʼ tuláakal le Luʼumaʼ. Tuláakloʼon ku kiʼimaktal k-óol k-ilik, tumen ku yeʼesik bix u bin le kʼaʼaytaj yéetel le kaʼansaj ku beetik u j-jaajkunajoʼob Jéeobaoʼ. Junpʼéel baʼax jeʼel u yáantkoʼon utiaʼal k-jóoʼsik u yutsil le jaatsaʼ letiʼe k-naʼatik jach baʼax ku taaskoʼ. Koʼoneʼex ilik jujunpʼéeliʼ.

U jaʼabil meeyjil. Teʼ Anuariooʼ ku jóoʼsaʼal bukaʼaj meyaj tu beetaj u j-jaajkunajoʼob Jéeoba tiʼ le jaʼab tsʼoʼok u máanoʼ, lelaʼ ku káajal u xoʼokol tu mesil septiembre tak tu mesil agosto tiʼ uláakʼ jaʼaboʼ. Bey túunoʼ le Anuario 2011 ku taasik le bukaʼaj meyaj beetaʼab tu jaʼabil 2010, káaj 1 tiʼ septiembre tiʼ 2009 tak 31 tiʼ agosto tiʼ 2010.

U maas yaʼabil yéetel u promedioil le j-kʼaʼaytajoʼoboʼ. Le máaxoʼob tsikbaltik u maʼalob péektsilil le Reinooʼ ku yaʼalaʼaltiʼob «j-kʼaʼaytajoʼob», kex okjaʼanajaʼanoʼob wa maʼ. ¿Baʼax táakaʼan ichil le jaats «u maas yaʼabil j-kʼaʼaytajoʼoboʼ»? Letiʼe u maas yaʼabil j-kʼaʼaytajoʼob táakpajoʼob ichil junpʼéel mesoʼ. Teʼ jaats jeʼelaʼ yaan kʼiineʼ ku xoʼokol kaʼatéen juntúul j-kʼaʼaytaj, jeʼex le maʼ tu séeb kʼubaj le bukaʼaj tu beetaj teʼ mes máanikoʼ. Le máax maʼ tu kʼubaj le bukaʼaj tu beetaj teʼ mes jeʼeloʼ maʼatech u xoʼokol. Lelaʼ ku yeʼesik baʼaxten jach kʼaʼabéet k-séeb kʼubik le bukaʼaj t-beetaj cada mesoʼ. ¿Bix túun u yojéeltaʼal u «promedioil tiʼ le j-kʼaʼaytajoʼoboʼ? Ku xoʼokol jaytúul j-kʼaʼaytajoʼob tu kʼuboʼob bukaʼaj tu beetoʼob ichil le jaʼaboʼ, tsʼoʼoleʼ ku jaʼatsal ich doce.

Jaypʼéel horaʼob beetaʼabi. Jeʼex u yaʼalik le Anuario 2011, teʼ jaʼab máanikoʼ maas tiʼ 1,600 millones horaʼob kʼaʼaytajnajoʼon. ¿Chéen wa letiʼe bukaʼaj horaʼob t-máansaj utiaʼal k-adorartik Jéeobaoʼ? Maʼatech, tumen maʼatech u chíikbesik le jaypʼéel horaʼob tu máansaj máak teʼ muchʼtáambaloʼoboʼ, le u xook máak tu juunal yéetel u tuukul tiʼ le baʼax ku xokikoʼ, bey xan le tiempo ku máansik le ancianoʼob táan u xíimbaltikoʼob le sukuʼunoʼoboʼ.

Bajux xuʼupi. U j-jaajkunajoʼob Jéeobaeʼ tu xupoʼob maas tiʼ 155 millones tiʼ dólares utiaʼal u yáantkoʼob le precursor especialoʼob, misioneroʼob yéetel le superintendente viajanteʼob tu jaʼabil 2010. Baʼaleʼ ichil lelaʼ maʼ táakbesaʼan le bajux xuʼup utiaʼal u beetaʼal le jóoʼsaʼaniloʼoboʼ mix le bajux xuʼup utiaʼal u yáantaʼal le maas tiʼ veinte mil sukuʼunoʼob ku meyajoʼob tu najiloʼob Betel tiʼ tuláakal yóokʼol kaaboʼ.

Jaytúul tu jaantoʼob le waaj yéetel tu yukʼoʼob le vino teʼ Kʼaʼajsajiloʼ. Lelaʼ ku chíikbesik le jaytúul sukuʼunoʼob yéetel kiikoʼob tu jaantoʼob le waaj yéetel tu yukʼoʼob le vino teʼ Kʼaʼajsajiloʼ. ¿Unaj wa k-tuklik letiʼe jaytúul sukuʼunoʼob yéeyaʼanoʼob pʼaatloʼob way Luʼumeʼ? Maʼatech. Unaj u kʼaʼajaltoʼoneʼ, yoʼolal u religión kaʼacheʼ wa yoʼolal wa baʼax kʼojaʼanil yaantiʼeʼ, yaan máakeʼ jeʼel u tuklik yéeyaʼan utiaʼal u bin kaʼaneʼ. U jaajileʼ maʼ tu páajtal u yaʼalaʼal jach jaytúul sukuʼunoʼob yéeyaʼanoʼob pʼaatloʼob way Luʼumeʼ, baʼaleʼ leloʼ maʼ jach kʼaʼabéet u yojéeltaʼal xaniʼ. Tiʼ le Cuerpo Gobernanteoʼ minaʼan junpʼéel lista tuʼux ku chíikpajal u kʼaabaʼ le máaxoʼob ku jaantkoʼob le waaj yéetel ku yukʼikoʼob le vinooʼ yéetel maʼatech u meyajtiʼob Internet utiaʼal u tsikbal yéetel tuláakal le máaxoʼob yéeyaʼanoʼob yanoʼob way Luʼumaʼ. *

Baʼax jach k-ojleʼ jujuntúul tiʼ «u palitsiloʼob k-Jajal Dios» u yéeymoʼ láayliʼ tiaʼanoʼob way Luʼum ken káajak le nojoch muʼyajiloʼ (Apo. 7:1-3). Le maʼ kʼuchuk le kʼiin jeʼeloʼ, le sukuʼunoʼob yéeyaʼanoʼoboʼ yaan u seguer u yilik u kʼaʼaytajoʼob tuláakal tuʼux, jeʼex u chíikbesik le bukaʼaj meyaj ku beetaʼal cada jaʼab tiʼ tuláakal yóokʼol kaaboʼ.

[Tsolajil]