Unaj k-kʼubik k-óol tiʼ Jéeoba, le Dios ku líiʼsaj óoloʼ
Unaj k-kʼubik k-óol tiʼ Jéeoba, le Dios ku líiʼsaj óoloʼ
«Koʼox kiʼikiʼtʼantik Jajal Dios u Taata k-Yuumtsil Jesucristo, le Taata ku chʼaʼik tiʼ toʼon óotsililoʼ yéetel le Jajal Dios ku [«líiʼsaj óol», NM] mantatsʼoʼ.» (2 COR. 1:3)
1. ¿Baʼax ku kʼaʼabéettaltoʼon ichil tuláakal u kʼiinil k-kuxtal?
CHÉEN pʼel u síijil máakeʼ, ku kʼaʼabéetchajal u líiʼsaʼal u yóol. Ku yokʼol utiaʼal ka méekʼaʼak wa utiaʼal ka tséentaʼak. Baʼaleʼ tak ken nojochchajak máakeʼ láayliʼ ku kʼaʼabéettal u líiʼsaʼal u yóol, maases ken joʼopʼok u muʼyajtik wa baʼax talamil.
2. ¿Bix u yeʼesik le Biblia yaan u líiʼsaʼal u yóol le máaxoʼob ku kʼubik u yóoloʼob tiʼ Jéeobaoʼ?
2 Yaan kʼiineʼ ku líiʼsaʼal k-óol tumen k-láakʼtsiloʼob wa tumen k-amigoʼob. Baʼaleʼ yaan kʼiineʼ tumen jach yaj le baʼax ku yúuchultoʼonoʼ, mix letiʼob jeʼel u páajtal u líiʼskoʼob k-óoleʼ. U jaajileʼ chéen Dios jeʼel u páajtal u líiʼsik k-óol tak teʼ súutukiloʼob jach talamtakoʼ. Le Bibliaoʼ ku yaʼalik: «Yuumtsil[eʼ] naatsʼ yanil tiʼ máaxoʼob tʼanik, [...] le ken u kʼáatoʼob áantaj tiʼeʼ, ku yuʼubikoʼob» (Sal. 145:18, 19). Ku yaʼalik xan: «Yuumtsileʼ u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob» (Sal. 34:15). Baʼaleʼ wa k-kʼáat ka u yáantoʼon yéetel ka u líiʼs k-óoleʼ, unaj k-kʼubik k-óol tiʼ letiʼ. Lelaʼ bey úuchik u yaʼalik David ichil junpʼéel salmo: «Yuumtsileʼ ku kanáantik le máaxoʼob yetsʼaʼanoʼoboʼ; letiʼ kanáantkoʼob tiʼ u kʼiinil yaj óolal. Yuumtsil, le máaxoʼob u kʼaj óoltmajechoʼoboʼ u kʼubmajoʼob u yóoloʼob tiʼ teech, tumen mix bikʼin ka xúumpʼattik le máaxoʼob ku kaxtikechoʼoboʼ» (Sal. 9:9, 10).
3. ¿Bix úuchik u yeʼesik Jesús le yaabilaj ku yuʼubik Jéeoba yoʼolal le máaxoʼob meyajtikoʼ?
3 Jéeobaeʼ jach u yaabiltmaj le máaxoʼob meyajtikoʼ. Lelaʼ bey úuchik u yaʼalik Jesús: «¿Maʼ wa ku koʼonol cinco mejen chʼíichʼoʼob tu yoʼolal kaʼapʼéel mejen taakʼiniʼ? Baʼaleʼ Jajal Dioseʼ maʼatech u tuʼubsik mix juntúul tiʼ letiʼobiʼ. Tumen tak u tsoʼotsel a pooleʼexeʼ láaj xokaʼantak. Maʼ a chʼaʼikeʼex saajkil, tumen teʼexeʼ [maas] yaan a tojoleʼex tiʼ yaʼabkach mejen chʼíichʼoʼob» (Luc. 12:6, 7). Tsʼoʼoleʼ tu libroil Jeremíaseʼ, Jéeobaeʼ tu yaʼalaj tiʼ u kaajil Israel: «Teneʼ tin yaabiltajech yéetel yaakunaj minaʼan xuʼulul; le óolal kin biskinba ta wéetel yéetel utsil» (Jer. 31:3).
4. ¿Baʼaxten jach unaj k-creertik le baʼaxoʼob ku yaʼalik u beetik Jéeobaoʼ?
4 Tu kʼiiniloʼob táan u muʼyaj máakeʼ, jach jeʼel u líikʼil u yóol wa ku kʼubik u yóol tiʼ Jéeoba bey xan tiʼ le baʼaxoʼob ku yaʼalik u beetkoʼ. Kʼaʼabéet u yantaltoʼon le tuukul jeʼex le yanchaj tiʼ Josué úuchjeakiloʼ, letiʼeʼ tu yaʼalaj: «Tsʼoʼok u béeychajal tuláakal baʼax tu séebchiʼitaj [wa tu yaʼalaj] Yuumtsil. Mix junpʼéel u séebchiʼ [wa baʼax u yaʼalmaj] pʼáat wa maʼ béeychajiʼ» (Jos. 23:14). Kex ka k-muʼyajt junpʼéel nojoch talamileʼ, jeʼel u páajtal k-creertikeʼ Dioseʼ yaan u yáantkoʼon yéetel mix bikʼin ken u pʼat le máaxoʼob meyajtik yéetel chúukaʼan óolaloʼ (xokaʼak 1 Corintoiloʼob 10:13).
5. ¿Baʼax jeʼel u yáantkoʼon k-líiʼs u yóol u maasileʼ?
5 Pabloeʼ tu yaʼaleʼ Jéeobaeʼ letiʼe «Jajal Dios ku [«líiʼsaj óol», NM] mantatsʼoʼ». Le tʼaan líiʼsaj óoloʼ u kʼáat u yaʼal: «U yuʼubikuba maʼalobil le máax muʼyajtik junpʼéel baʼax jach yajoʼ». Lelaʼ letiʼe bix u beetik k-uʼuyikba k-Taata yaan teʼ kaʼanoʼ (2 Cor. 1:3, 4). Mix máak yéetel mix baʼal jeʼel u beetik maʼ u yáantik le máaxoʼob meyajtik tu jaajil u yóoloʼoboʼ. Tiʼ letiʼeʼ yaan tuláakal baʼax kʼaʼabéet utiaʼal u beetik. Yoʼolal le áantaj ku tsʼáaiktoʼonoʼ ku páajtal xan k-líiʼsik u yóol k-sukuʼunoʼob ken u muʼyajtoʼob jeʼel baʼalak talamileʼ. Teʼ súutukiloʼob beyoʼ «k-tsʼáaiktiʼob le kiʼimak óolal u tsʼaamajtoʼon Diosoʼ». ¿Máasaʼ jach jatsʼuts le páajtalil yaan tiʼ Jéeoba utiaʼal u líiʼsik u yóol le máaxoʼob ku muʼyajoʼob, jeʼex úuchik u yaʼalik Pablo tiʼ le corintoiloʼoboʼ?
Le baʼax jeʼel u yáantkoʼon k-aktáant junpʼéel baʼax beetik k-muʼyajoʼ
6. ¿Baʼaxoʼob jeʼel u beetik k-muʼyajeʼ?
6 Jach yaʼab baʼaxoʼob beetik u kʼaʼabéettal u líiʼsaʼal k-óol. Junpʼéel tiʼ le baʼaxoʼob beetik u jach yaatal u yóol máakoʼ letiʼe u kíimil u núup wa u paaloʼ. Baʼaleʼ jach ku yaatal xan u yóol máak ken pʼektaʼak yoʼolal u chʼiʼibal wa yoʼolal baʼax luʼumil u taal, yoʼolal kʼojaʼanil, le chʼíijiloʼ, óotsilil, talamil ku yantal yéetel u núup wa yoʼolal uláakʼ baʼaloʼob ku muʼyajtaʼal bejlaʼeʼ.
7. 1) ¿Baʼax kʼaʼabéettoʼon ken joʼopʼok k-muʼyaj? 2) ¿Baʼax jeʼel u beetik Jéeoba wa k-uʼuyik bey «xeʼexeʼetʼpajaʼan» k-puksiʼikʼaleʼ?
7 Teʼ kʼiinoʼob táan k-muʼyajoʼ letiʼe kʼiinoʼob maas ku kʼaʼabéettal u líiʼsaʼal k-óoloʼ. Koʼoneʼex ilik bix jeʼel k-áantaʼal k-aktáant muʼyajiloʼob ken yaachajak k-puksiʼikʼal, ken joʼopʼok k-sen tuukul, ken jach chiʼichnakchajkoʼon, ken kʼojaʼanchajkoʼon wa ken lúubuk k-óol k-meyajt Dios. Táanileʼ koʼoneʼex tʼaan yoʼolal le puksiʼikʼaloʼ. Le Bibliaoʼ ku yaʼalikeʼ yaan kʼiineʼ jeʼel k-uʼuyik bey «xeʼexeʼetʼpajaʼan[eʼ]» (Sal. 51:17). Baʼaleʼ ku yaʼalik xaneʼ Jéeoba «tsʼakik máaxoʼob kʼilaʼan u puksiʼikʼaloʼob» yéetel «ku toʼik xan u yajiloʼob» (Sal. 147:3). Tak teʼ súutukiloʼob táan k-aktáantik junpʼéel nojoch talamiloʼ, jeʼel u líikʼil k-óol wa k-payalchiʼ tiʼ Dios yéetel fe bey xan wa k-beetik baʼax ku yaʼalikeʼ (xokaʼak 1 Juan 3:19-22 yéetel 5:14, 15).
8. ¿Bix u yáantkoʼon Jéeoba utiaʼal maʼ k-sen tuukul?
8 Yaan kʼiin xaneʼ k-tuukuleʼ ku túuntaʼal u yóol tumen jejeláas talamiloʼob. Teʼ kʼiinoʼob beyoʼ jach kʼaʼabéet u líiʼsaʼal k-óol, tumen chéen t-juunaleʼ maʼ kun yantaltoʼon u muukʼil utiaʼal k-aktáantikoʼob. Toʼoneʼ láayliʼ jeʼel k-kʼamik le áantaj tu kʼamaj xan le salmistaoʼ, letiʼeʼ tu yaʼalaj: «Chúumuk tiʼ le sen tuukulil baʼaloʼob ku muchʼkubaʼob tin súutpacheʼ, techeʼ ka tsʼáaikten jeʼelel yéetel kiʼimak óolal» (Sal. 94:19). Tsʼoʼoleʼ Pabloeʼ tu tsʼíibtaj: «Maʼ a sen sen tuukuleʼex tu yoʼolal mix baʼal, baʼaleʼ tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan. Jajal Dios túuneʼ bíin u tsʼáateʼex jeetsʼel óolal, lelaʼ maas nojoch tiʼ le ku páajtal u naʼatik máakoʼ; le jeetsʼel óolal[oʼ] bíin u kanáant a puksiʼikʼaleʼex yéetel a tuukuleʼex tiʼ Cristo Jesús» (Fili. 4:6, 7). Jeʼex túun k-ilkoʼ, u xokik máak le Biblia yéetel u tuukul tiʼ le baʼax ku yaʼalikoʼ jeʼel u yáantaj utiaʼal u líikʼil u yóoleʼ (2 Tim. 3:15-17).
9. ¿Baʼax jeʼel u yáantkoʼon ken joʼopʼok k-jach chiʼichnaktaleʼ?
9 Ken jach lúubuk k-óoleʼ jeʼel k-chiʼichnaktal ka tak joʼopʼok k-tuklik baʼaloʼob maʼ maʼalobtakeʼ. Maʼ xaaneʼ jeʼel k-tuklik maʼ tu páajtal k-beetik junpʼéel baʼax ku yaʼalik le Bibliaoʼ wa junpʼéel meyaj ku tsʼaʼabaltoʼon teʼ múuchʼuliloʼ. Teʼ súutukiloʼob beyoʼ Jéeobaeʼ ku yáantkoʼon yéetel ku líiʼsik k-óol. Le ka tsʼaʼab Josué u nuʼuk le israelitaʼob utiaʼal u baʼateloʼob tu contra uláakʼ nukuch kaajoʼoboʼ, Moiseseʼ tu yaʼalajtiʼob: «Muʼukʼaʼanchajak a wóoleʼex; maʼ a sajaktaleʼex mix u jaʼakʼal a wóoleʼex ken baʼatelnakeʼex yéeteloʼob, tumen Yuumtsil a Dioseʼexeʼ tiʼ yaan ta wéeteleʼexeʼ, maʼ bíin u xúumpʼatteʼexiʼ» (Deu. 31:6). Yoʼolal u yáantaj Jéeobaeʼ, Josueeʼ páajchaj u yoksik le israelitaʼob teʼ Luʼum Aʼalaʼan u Tsʼaʼabaloʼ yéetel páajchaj u ganartik le máaxoʼob pʼekmiloʼoboʼ. Yaʼab jaʼaboʼob táanil lelaʼ, Moiseseʼ tu yilaj u yáantaj Dios teʼ Chak kʼáaʼnáaboʼ (Éxo. 14:13, 14, 29-31).
10. ¿Baʼax áantajil yaantoʼon wa k-kʼojaʼantal yoʼolal le talamiloʼob k-aktáantikoʼ?
10 Le talamiloʼob xanoʼ jeʼel u beetkoʼob k-kʼojaʼantaleʼ. Wa k-kanáantik baʼaxoʼob k-jaantik, k-jeʼelel tubeel, k-beetik ejercicio yéetel k-pʼatik limpioil k-otoch yéetel k-wíinklileʼ maas maʼ ken k-jach kʼojaʼantal. Baʼaleʼ maas jeʼel u yáantaj ka kuxlakoʼon jeʼex u yaʼalik le Bibliaoʼ. Le ken joʼopʼok k-aktáantik talamiloʼobeʼ, maʼalob ka k-kʼaʼajs le baʼax tu yaʼalaj Pabloaʼ: «Kex yaantoʼon yaayaj óolaloʼob tuláakal tuʼuxeʼ, mix juntéen ku pʼáatal minaʼan tuʼux k-jóokʼol. Kex yaan baʼax k-sen tukulteʼ, mix juntéen ku saʼatal k-óol. Kex k-chʼaʼpachtaʼaleʼ, maʼatan k-xúumpʼattaʼal; kex k-lúuʼsaʼal luʼumeʼ, maʼatan k-xuʼulsaʼal» (2 Cor. 4:8, 9).
11. ¿Baʼax jeʼel u yáantkoʼon wa k-uʼuyik táan u lúubul k-óol k-meyajt Dioseʼ?
11 Le talamiloʼob xanoʼ jeʼel u beetkoʼob u xuʼulul k-tsʼáaik k-óol k-meyajt Dioseʼ. Le ken úuchuktoʼon beyaʼ, k-Taata yaan teʼ kaʼanoʼ ku yáantkoʼon tu séebaʼanil. Le Bibliaoʼ ku yaʼalik: «Le Yuumtsiloʼ letiʼ áantik le máaxoʼob ku lúubuloʼ, yéetel ku líiʼsik le máaxoʼob ku lúubul yóoloʼoboʼ» (Sal. 145:14). ¿Baʼax jeʼel u yáantkoʼon wa k-uʼuyik táan u lúubul k-óol k-meyajt Dioseʼ? Unaj k-kʼáatik u yáantaj le ancianoʼob teʼ múuchʼuliloʼ (Sant. 5:14, 15). Uláakʼ baʼax jeʼel u yáantoʼon utiaʼal maʼ u xuʼulul u yantal k-fe ken túuntaʼak k-óoleʼ, letiʼe maʼ u xuʼulul k-tuukul tiʼ le kuxtal minaʼan u xuul ku taal u kʼiinoʼ (Juan 17:3).
Le máaxoʼob líiʼsaʼab u yóoloʼob tumen Diosoʼ
12. ¿Bix úuchik u líiʼsaʼal u yóol Abrahán tumen Jéeoba?
12 Juntúul salmistaeʼ tu yaʼalaj tiʼ Jéeoba: «Kʼaʼajaktech le tʼaan ta tsʼáaj tiʼ le a paalilaʼ; tiʼ letiʼeʼ ta beetaj in tsʼáaik in páaʼtajil. Lelaʼ letiʼ in kiʼimak óolal ichil okʼom óolal: tumen yéetel a tsʼaatʼaanoʼobeʼ [wa baʼax a waʼalmeʼ] ka tsʼáaikten kuxtal» (Sal. 119:49, 50). Ichil le Bibliaoʼ jeʼel u páajtal k-ilik bix úuchik u líiʼsaʼal u yóol yaʼab máakoʼob tumen Dios úuchjeakileʼ. Juntúul tiʼ letiʼobeʼ Abrahán. Maʼ xaaneʼ jach chiʼichnakchaj le ka tu yojéeltaj yaan u xuʼulsaʼal u kaajil Sodoma yéetel Gomorra. Le oʼolal tu kʼáataj tiʼ Jéeoba: «¿Bíin wa a xuʼuls le máaxoʼob maʼ sipaʼanoʼob [wa toj u kuxtaloʼob] yéetel le j-kʼebanoʼoboʼ?». Letiʼeʼ tu yaʼalajtiʼ maʼ ken u xuʼul tiʼ Sodoma wa yaan kex chéen cincuenta u túulal máakoʼob beetik baʼax maʼalobiʼ. Baʼaleʼ Abrahaneʼ tu kʼáataj uláakʼ cinco u téenel baʼax jeʼel u yúuchul wa maas junpʼíit máaxoʼob beetik baʼax maʼalobeʼ. Táanileʼ tu yaʼalaj cuarentaicinco, tsʼoʼoleʼ cuarenta, treinta, veinte, tak ka tu chukaj diez. Dioseʼ chúukpaj u yóol u yuʼubej yéetel tu yaʼalajtiʼeʼ wa yaan le bukaʼaj tu yaʼaloʼ maʼ ken u xuʼuls tiʼ Sodoma. Ka tsʼoʼokeʼ, kex maʼ yanchaj mix diez máaxoʼob toj u kuxtaloʼobeʼ, tu salvartaj Lot yéetel u hijas (Gén. 18:22-32; 19:15, 16, 26).
13. ¿Bix úuchik u yeʼesik Ana ku kʼubik u yóol tiʼ Jéeoba?
13 Tuukulnakoʼon xan tiʼ Ana, u yatan Elcana. Kex jach taak u yantal u paalaleʼ maʼ tu béeytal. Le oʼolaleʼ tu kʼáataj tiʼ Jéeoba ich payalchiʼ, yéetel Elí, le nojoch j-kʼiinoʼ, tu yaʼalajtiʼ: «Ka u tsʼáa tiʼ teech u [Dios] Israel baʼax tsʼoʼok a kʼáatiktiʼ». Yoʼolal leloʼ líikʼ u yóol, «mix juntéen suunaj yaj óoltal» (1 Sam. 1:8, 17, 18). Letiʼeʼ tu jach kʼubaj u yóol tiʼ Jéeoba ka tu pʼataj tuláakal tu kʼab. Maʼ u yojel bix kun béeytal le baʼax tu kʼáatoʼ, baʼaleʼ yanchaj jeetsʼelil tiʼ tu puksiʼikʼal. Ka máan kʼiineʼ tu yilaj bix úuchik u núukaʼal u payalchiʼ, pʼáat embarazadail, ka síij u chan hijo, ka tu tsʼáaj u kʼaabaʼint Samuel (1 Sam. 1:20).
14. ¿Baʼaxten jach kʼaʼabéetchaj u líiʼsaʼal u yóol David, yéetel tiʼ máax tu kʼáataj?
14 Uláakʼ máax líiʼsaʼab u yóol tumen Jéeobaeʼ, David. Jéeobaeʼ ku yilik le puksiʼikʼaloʼ, le oʼolal u yojel, kex chéen paaleʼ, ku tsʼáaik u yóol u beet baʼax maʼalob, le oʼolal tu yéeyaj utiaʼal u beet u reyil tu kaajil Israel (1 Sam. 16:7; 2 Sam. 5:10). Baʼaleʼ le táan u beetik u reyiloʼ, núupkʼebanchaj yéetel Betsabé [wa Bat-seba] yéetel tu yóotaj u taʼak le baʼax tu beetoʼ, tsʼoʼoleʼ tu túuxtaj kíimsbil u yíicham. Ka tu tsʼáaj cuenta maʼ maʼalob le baʼax tsʼoʼok u beetkoʼ tu kʼáat óoltaj tiʼ Jéeoba: «Yuumtsil, tu yoʼolal a yaakunajeʼ, chʼaʼten óotsilil, tu yoʼolal a nojoch muumun óolaleʼ, luʼs in siʼipiloʼob. ¡Pʼoʼo in kʼasaʼanil! ¡Luʼs in kʼeban! Kin kʼaj óoltik [j-]maʼ uʼuyajtʼaanen; in kʼebaneʼ maʼ tu páajtal in tuʼubsik» (Sal. 51:1-3). Tumen arrepentirnaj tu jaajil u yóol yéetel tu yeʼesaj kabal óolaleʼ, perdonartaʼab tumen Dios. Baʼaleʼ jach muʼyajnaj yoʼolal le baʼax kʼaas tu beetoʼ (2 Sam. 12:9-12). Kex beyoʼ, líikʼ u yóol úuchik u chʼaʼabal óotsilil tiʼ tumen u Taata yaan teʼ kaʼanoʼ.
15. ¿Baʼax áantajil tu kʼamaj Jesús le taʼaytak u kíimsaʼaloʼ?
15 Le tiaʼan Jesús way Luʼumaʼ chaʼab u muʼyajtik nukuch talamiloʼob tumen Jéeoba. Baʼaleʼ letiʼeʼ chúukpaj u yóol mantatsʼ, beyoʼ tu yeʼeseʼ jach ku kʼubik u yóol tiʼ u Taata yéetel chéen u gobernación u maas maʼalobil. Le taʼaytak u kʼuʼubul utiaʼal kíimsbiloʼ, tu yaʼalaj: «Maʼ u beetaʼal le baʼax in kʼáat teneʼ, baʼaleʼ le baʼax a kʼáat techeʼ». Teʼ súutukoʼ chíikpaj juntúul ángel utiaʼal u líiʼsik u yóol (Luc. 22:42, 43). Bey úuchik u líiʼsaʼal u yóol tumen Jéeobaoʼ, le baʼax jach kʼaʼabéettiʼ teʼ kʼiin jeʼeloʼ.
16. ¿Bix jeʼel u yáantkoʼon Jéeoba teʼ súutukiloʼob jeʼel tak k-peʼertik k-kuxtal yoʼolal k-fejoʼ?
16 Jéeobaeʼ jeʼel xan u yáantkoʼon utiaʼal ka chúukpajak k-óol k-meyajt, tak teʼ súutukiloʼob jeʼel tak k-peʼertik k-kuxtal yoʼolal k-fe tiʼ letiʼoʼ. Tsʼoʼoleʼ ku líiʼsik k-óol k-ojéeltik yaan u kaʼa kuxkíintik le kimenoʼoboʼ. «U tsʼook baʼax kun xuʼulsbileʼ letiʼ le kíimiloʼ» (1 Cor. 15:26.) ¿Máasaʼ jach k-tsʼíiboltik k-ilik le kʼiin jeʼeloʼ? Dioseʼ yaan u kaʼa kuxkíintik tuláakal le máaxoʼob pʼaatal tu tuukuloʼ, ichiloʼobeʼ tiaʼan le máaxoʼob chúukpaj u yóoloʼoboʼ bey xan u maasil máakoʼoboʼ (Juan 5:28, 29; Hch. 24:15). K-kʼubik k-óol tiʼ le baʼax ku yaʼalikoʼ jach ku líiʼsik k-óol, maases wa táan k-chʼaʼpachtaʼal.
17. ¿Bix u líiʼsik k-óol Jéeoba ken kíimik juntúul máax k-yaabiltmaj?
17 Jéeobaeʼ ku yaʼalikeʼ le máaxoʼob k-yaabiltmoʼob tsʼoʼok u kíimloʼoboʼ yaan u kaʼa kuxtaloʼob way Luʼumeʼ, letiʼobeʼ maʼ ken u muʼyajtoʼob le baʼaxoʼob ku yilaʼaloʼob bejlaʼaʼ. Tsʼoʼoleʼ ku yaʼalikeʼ le «yaʼabkach máakoʼob» meyajtikoʼ yaan u salvarkubaʼob ken xuʼulsaʼak le kʼasaʼan yóokʼol kaabaʼ, beyoʼ yaan u kʼamkoʼob tuláakal le máaxoʼob kun kaʼa kuxtaloʼob utiaʼal u kaʼanskoʼob u jaajil tiʼoboʼ (Apo. 7:9, 10). ¿Máasaʼ jach jatsʼuts le baʼax ku taal u kʼiinoʼ?
Ku yáantkoʼon yéetel u páajtalil
18, 19. ¿Bix tsʼoʼok u líiʼsaʼal u yóol tumen Jéeoba le máaxoʼob muʼyajtik chʼaʼpachtajiloʼ?
18 Ichil junpʼéel jatsʼuts kʼaayeʼ, Moiseseʼ tu yaʼalaj tiʼ le israelitaʼoboʼ: «Le Dios minaʼan u xuʼulul tiʼoʼ letiʼ a taʼakbesajil, u páajtalil minaʼan u xuul» (Deu. 33:27). Ka máan kʼiineʼ profeta Samueleʼ tu yaʼalaj tiʼob: «Maʼ a pʼatikeʼex Yuumtsil, [adorarteʼex] tu jaajil a wóoleʼex yéetel tuláakal a puksiʼikʼaleʼex. [...] Yuumtsileʼ bíin u tsʼáaj tsikbeʼenil tiʼ u kʼaabaʼ utiaʼal maʼ u pʼatikeʼex» (1 Sam. 12:20-22). Jeʼex túun k-ilkoʼ, wa ku chúukpajal k-óol mantatsʼ k-meyajt Dioseʼ, letiʼeʼ maʼ ken u pʼatoʼon. Yaan u tsʼáaik le áantaj kʼaʼabéettoʼonoʼ.
19 Teʼ kʼiinoʼob jach talamtakaʼ, Jéeobaeʼ maʼ xuʼuluk u yáantik yéetel u líiʼsik u yóol le máaxoʼob meyajtikoʼ. Ichil le maas tiʼ cien jaʼaboʼob tsʼoʼok u máanoʼ, u milesil sukuʼunoʼob tsʼoʼok u pʼektaʼaloʼob yéetel ku kʼaʼalaloʼob yoʼolal baʼax ku creertikoʼob. Tuláakloʼobeʼ tsʼoʼok u yilkoʼobeʼ Dioseʼ ku kanáantik le máaxoʼob meyajtik ken u aktáantoʼob talamiloʼoboʼ. Lelaʼ bey úuchik tiʼ juntúul sukuʼun teʼ Unión Soviéticaoʼ, letiʼeʼ aʼalaʼab yaan u máansik veintitrés jaʼaboʼob cárcel yoʼolal u fe, kex beyoʼ líiʼsaʼab u yóol mantatsʼ yéetel le kaʼansaj ku keʼetel yéetel janaloʼ. Letiʼeʼ tu yaʼalaj: «Ichil tuláakal le jaʼaboʼoboʼ tin kanaj in kʼub in wóol tiʼ Jéeoba, letiʼ xaneʼ tu tsʼáajten u muukʼil utiaʼal u chúukpajal in wóol» (xokaʼak 1 Pedro 5:6, 7).
20. ¿Bix k-ojéeltik Jéeobaeʼ maʼ ken u pʼatoʼon?
20 Maʼ k-ojel baʼax talamiloʼob ku taal u kʼiin k-muʼyajtikiʼ, baʼaleʼ jeʼel baʼaxak ka úuchuk toʼoneʼ, unaj k-kʼaʼajsik le baʼax tu yaʼalaj le salmistaaʼ: «Le Yuumtsiloʼ maʼ [...] bin u xúumpʼat u kaajal[iʼ]» (Sal. 94:14). Baʼaleʼ maʼ chéen toʼon unaj u líiʼsaʼal k-óoliʼ. Baʼaxeʼ unaj k-líiʼsik xan u yóol u maasil. Jeʼex ken k-il tuláakʼ xookoʼ, jeʼel u béeytal k-líiʼsik u yóol le máaxoʼob táan u muʼyajoʼob yoʼolal le yaʼabkach talamiloʼob ku yilaʼal teʼ kʼiinoʼobaʼ.
¿Baʼax jeʼel k-núukikeʼ?
• ¿Baʼaxoʼob beetik k-muʼyaj?
• ¿Bix u líiʼsik u yóol Jéeoba le máaxoʼob meyajtikoʼ?
• ¿Baʼax líiʼsik k-óol tak teʼ súutukiloʼob jeʼel tak k-peʼertik k-kuxtaloʼ?
[U kʼáatchiʼiloʼob le xookoʼ]
[Fotoʼob yéetel cuadroʼob yaan teʼ táan juʼun 25]
BIX UNAJ K-AKTÁANTIK LE BAʼAXOʼOB BEETIK K-MUʼYAJOʼ
▪ le puksiʼikʼaloʼ Sal. 147:3; 1 Juan 3:19-22; 5:14, 15
▪ le tuukuloʼ Sal. 94:19; Fili. 4:6, 7
▪ le bix u yuʼubikuba máakoʼ Éxo. 14:13, 14; Deu. 31:6
▪ le toj óolaloʼ 2 Cor. 4:8, 9
▪ u lúubul u yóol máak u meyajt Dios Sal. 145:14; Sant. 5:14, 15
