Túumben baʼaloʼob ku taasik le revista utiaʼal le múuchʼuliloʼ

PAX ICH

Túumben baʼaloʼob ku taasik le revista utiaʼal le múuchʼuliloʼ

Desde bejlaʼeʼ U Pʼíich Tulumil Kanan, utiaʼal le múuchʼuliloʼ maas jatsʼutskíintaʼan utiaʼal u maas áantik máak u xok le Bibliaoʼ (Sal. 1:2; 119:97).

Tsʼoʼok kanpʼéel jaʼab káajak k-jóoʼsik le revista utiaʼal kʼaʼaytbiloʼ, yéetel junpʼéeleʼ utiaʼal u j-jaajkunajoʼob Jéeoba yéetel le máaxoʼob u kʼáat u maas tsʼáa u yóol u meyajtoʼob Diosoʼ.

Juntúul sukuʼun úuch joʼopʼok u meyajtik Jéeobaeʼ tu yaʼalaj: «Le bix u kaʼansik u jaajiloʼ jach ku kʼuchul tu puksiʼikʼal máak. Lelaʼ letiʼe baʼax tin tukultaj le ka tin xokaj le u yáax revistail U Pʼíich Tulumil Kanan jóoʼsaʼab utiaʼal le múuchʼuliloʼ. Jach ku kʼuchul tin puksiʼikʼal le bix u tsolik le baʼaxoʼob talam u naʼataʼal ku kaʼansik le Bibliaoʼ. Jach diosboʼotik yoʼolal le jatsʼuts siibalaʼ». Uláakʼ juntúul sukuʼuneʼ tu tsʼíibtaj: «Jach kin tsʼíiboltik in jóoʼsik yaʼab tiempo utiaʼal in xokik le revista utiaʼal le múuchʼulil yéetel in Biblia ku taasik u referenciailoʼoboʼ». K-tsʼíiboltik wa bey xan a wuʼuyikabaoʼ.

¿Kʼajaʼan wa tech baʼax kʼiin ka káaj u jóoʼsaʼal U Pʼíich Tulumil Kanan? ¡Desde tu jaʼabil 1879! Lelaʼ chéen tsʼoʼok u béeytal yoʼolal u yáantaj Jéeoba yéetel yoʼolal u kiliʼich muukʼ (Zac. 4:6). Ichil le ciento treintaitres jaʼaboʼoboʼ, yaʼab u téenel tsʼoʼok u kʼeʼexel u yáax táan juʼunil. Ichil u jaʼabil 2012, cada revistaeʼ yaan u taasik junpʼéel foto de color ku yeʼesik le meeyjil kʼaʼaytaj k-beetkoʼ. Beyoʼ yaan u kʼaʼajsiktoʼon mantatsʼ le meyaj u tsʼaamajtoʼon Jéeoba utiaʼal k-tsʼáaik kʼaj óoltbil u Reinooʼ (Hch. 28:23). Teʼ tu kaʼapʼéel táan juʼuniloʼ yaan u kaʼa chíikpajal le foto yaan teʼ yáax táan juʼunoʼ yéetel yaan u tsolik baʼax ku beetaʼaliʼ yéetel tuʼux chʼaʼab le fotooʼ. Cada meseʼ yaan u kʼaʼajsiktoʼon, u j-jaajkunajoʼon Jéeobaeʼ, k-kʼaʼaytik le maʼalob péektsil «tiʼ tuláakal yóokʼol kaab[oʼ]» (Mat. 24:14).

Baʼaleʼ yaan uláakʼ baʼaloʼob túumbentak ku taasik le revistaaʼ. Jeʼex le xookoʼob utiaʼal xakʼaltbil teʼ múuchʼuliloʼ, yaan a wilkeʼ le kʼáatchiʼob ku beetaʼal utiaʼal u kʼaʼajsaʼal le baʼaxoʼob ku kaʼansikoʼ tu káajbal yaan. Beyoʼ yaan a wilik desde tu káajbal tiʼ baʼax ku tʼaan utiaʼal a kaxtik u núukiloʼob ken a líiʼsaba yéetel U Xookil U Pʼíich Tulumil Kanan. Jeʼex suukileʼ le kʼáatchiʼobaʼ yaan u seguer u meyaj utiaʼal u kʼaʼajsaʼal le baʼax ilaʼab teʼ muchʼtáambaloʼ. Tsʼoʼoleʼ yaan a wilik xaneʼ u jáalik le letraʼoboʼ maas kóochtak yéetel u numeroil le xóotʼoloʼob yéetel u kʼáatchiʼiloʼoboʼ booxtakoʼob.

Tsʼoʼoleʼ yaan a wilkeʼ yaan junpʼéel túumben jaats. Lelaʼ ku kʼaabaʼtik «Le baʼaxoʼob k-líiʼsmoʼ»; jeʼex u tsolik le revistaaʼ, yaan u meyaj utiaʼal u kʼaʼajsaʼal le baʼaxoʼob jatsʼutstak u beetmaj u j-jaajkunajoʼob Jéeoba teʼ tu tsʼook kʼiinoʼobaʼ. Tsʼoʼoleʼ teʼ jaats ku kʼaabaʼtik «Tu kʼubaj u yóoloʼob meyaj yéetel kiʼimak óolal», yaan u jóoʼsaʼal cada wa baʼax kʼiin utiaʼal u tsolik le kiʼimak óolal ku yuʼubik le sukuʼunoʼob ku meyajoʼob teʼ tuʼuxoʼob maas kʼaʼabéet j-kʼaʼaytajoʼoboʼ.

K-tsʼíiboltik ka u yáantech le revista utiaʼal u maas jatsʼutstal a wilik a xokik le Bibliaoʼ.

Le máaxoʼob jóoʼsik le revistaaʼ