Ken kíimik juntúul máax k-yaabiltmeʼ, k-okʼol tumen ku yaatal t-óol. Baʼaleʼ Jesuseʼ kex u yaabiltmaj kaʼach Lázaroeʼ, maʼ okʼolnaj tumen yaat u yóol úuchik u kíimiliʼ. Baʼaxeʼ tumen tu chʼaʼaj óotsilil tiʼ u láakʼtsiloʼob yéetel u amigoʼob, jeʼex u yeʼesik le Bibliaoʼ (Juan 11:36).

Kex tu yojéeltaj kʼojaʼan Lázaroeʼ maʼ jáan bin u tsʼakiʼ. Le Bibliaoʼ ku yaʼalik: «Letiʼeʼ kex tu yojéeltaj kʼojaʼan Lázaroeʼ, pʼáat kaʼapʼéel kʼiin teʼ tuʼux yaan kaʼachoʼ» (Juan 11:6). ¿Baʼaxten maʼ jáan biniʼ? Yaan baʼax oʼolal. Jesuseʼ tu yaʼalaj: «Le kʼojaʼanilaʼ maʼ utiaʼal ka u kíimsiʼ, baʼaxeʼ utiaʼal ka tsʼaʼabak nojbeʼenil tiʼ Dios, utiaʼal beyoʼ ka nojbeʼenkúuntaʼak u Paal Dios tu yoʼolal lelaʼ» (Juan 11:4). Letiʼeʼ yaan baʼax u tukultmaj u beetik kaʼach «utiaʼal ka tsʼaʼabak nojbeʼenil tiʼ Dios». ¿Baʼaxiʼ? Yaan kaʼach u kaʼa kuxkíintik u amigo.

Ka tsikbalnaj Jesús yéetel u disipuloʼob teʼ kʼiin jeʼeloʼ, tu ketaj le kíimil yéetel u wenel máakoʼ. Le oʼolal tu yaʼalaj: «Táan in bin teʼeloʼ utiaʼal ka in wajse» (Juan 11:11). Utiaʼal letiʼeʼ u kaʼa kuxkíintik Lázaroeʼ bey jeʼex juntúul taatatsil ku yajsik u paal táan u weenleʼ. Le oʼolal minaʼan baʼax oʼolal u yaatal u yóol úuchik u kíimil Lázaro.

¿Baʼax túun beet u yokʼol Jesús? Jeʼex tsʼoʼok k-ilkoʼ le Bibliaoʼ ku yaʼalik baʼaxten. Jesuseʼ bin u xíimbalt María, u yíitsʼin Lázaro. Ka tu yilaj bix u yokʼol María bey xan bix u yokʼol uláakʼ máakoʼobeʼ, «yaachaj u yóol u puksiʼikʼaleʼ, ka péeknaj u yóol». Ka tu yilaj bix u muʼyaj u amigoʼobeʼ, jach yaachaj u yóoleʼ ka «káaj u yáalal u jaʼil u yich» (Juan 11:33, 35).

Le baʼax úuchaʼ ku yeʼesikeʼ yaan u páajtalil tiʼ Jesús u tsʼakik wa u kaʼa kuxkíintik máaxoʼob k-yaabiltmaj teʼ túumben luʼum jach naatsʼ yaniloʼ. Ku yeʼesik xaneʼ ku chʼaʼik óotsilil tiʼ máaxoʼob ku yokʼoloʼob tumen tsʼoʼok u kíimil juntúul máax u yaabiltmoʼob. Ku yeʼesiktoʼon xaneʼ unaj k-chʼaʼik óotsilil tiʼ le máaxoʼob ku muʼyajoʼob tumen kíimen juntúul máax u yaabiltmoʼoboʼ.

Jesuseʼ u yojel kaʼach yaan u kaʼa kuxkíintik Lázaro. Baʼaleʼ okʼolnaj tumen u yaabiltmaj u amigoʼob yéetel ku chʼaʼik óotsilil tiʼob. Toʼon xaneʼ tumen k-chʼaʼik óotsilil tiʼ u maasileʼ unaj k-múul okʼol «yéetel le máaxoʼob ku yokʼoloʼoboʼ» (Rom. 12:15). Juntúul máax ku yokʼol tumen tsʼoʼok u kíimil juntúul máax u yaabiltmeʼ maʼ u kʼáat u yaʼal wa maʼ tu creertik yaan u kaʼa kuxkíintaʼaliʼ. Le úuchik u yokʼol Jesús kex u yojel yaan u kaʼa kuxkíintik Lázarooʼ, ku yeʼesiktoʼon unaj k-chʼaʼik óotsilil tiʼ le máaxoʼob kíimen juntúul máax u yaabiltmoʼoboʼ.