1, 2. 1) ¿Bix le meyaj ku beetik kaʼach juntúul j-kanan tamanoʼ? 2) Le taatatsiloʼoboʼ, ¿baʼaxten beyoʼob j-kanan tamanoʼobeʼ?

U MEYAJ juntúul j-kanan taman úuchjeakil tu kaajil Israeleʼ maʼ chéen chʼaʼabiliʼ. Tumen ku muʼyajtik kaʼach keʼel yéetel ooxol, kex beyoʼ kʼaʼabéet u pʼáatal u kanáant u yaalakʼ tamanoʼob tiʼ le j-ookoloʼob yéetel tiʼ le tsʼíitsʼik baʼalcheʼoboʼ. Letiʼeʼ kʼaʼabéet kaʼach u yilik bix yanil cada juntúul tiʼ le tamanoʼoboʼ, tsʼoʼoleʼ wa ku yilik yaan juntúul kʼojaʼan wa uchaʼan loob tiʼeʼ ku tsʼakik. Baʼaleʼ maases ku kanáantik le mejentakoʼoboʼ tumen séeb jeʼel u yúuchul loob tiʼobeʼ (Gén. 33:13).

² Le taatatsiloʼob meyajtik Diosoʼ beyoʼob jeʼex le j-kanan tamanoʼoboʼ. Jeʼex juntúul j-kanan tamaneʼ unaj yeʼeskoʼob jatsʼuts modos utiaʼal u tsʼoʼokbeskoʼob le meyaj tsʼaʼantiʼob tumen Diosaʼ: ‹U líiʼskoʼob yéetel u kaʼanskoʼob u paalaloʼob yéetel u tsolnuʼuk Jéeoba› (Efe. 6:4). ¿Chéen chʼaʼabil wa u beetaʼal lelaʼ? Maʼatech. Tumen le paalaloʼoboʼ deporsi ku talamtal u beetkoʼob baʼax maʼalob yoʼolal le kʼebanoʼ. Tsʼoʼoleʼ le kʼasaʼan yóokʼol kaabaʼ ku beetik u tsʼíiboltkoʼob baʼaloʼob jeʼel u kʼaskúuntik u tuukuloʼobeʼ (2 Tim. 2:22; 1 Juan 2:16). Wa yaan a paalaleʼ, ¿bix jeʼel a kanáantkoʼob tubeel jeʼex juntúul  j-kanan tamaneʼ? Koʼox ilik óoxpʼéel baʼal jeʼel u yáantkecheʼ: a kʼaj óoltikoʼob, a kaʼanskoʼob yéetel a nuʼuktikoʼob.

3. Le taatatsiloʼoboʼ, ¿bix jeʼel u kʼaj óoltikoʼob tubeel u paalaloʼobeʼ?

³ Juntúul maʼalob j-kanan tamaneʼ utiaʼal u yilik wa mix juntúul tiʼ u tamanoʼob kʼojaʼaneʼ ku jach ilik bix yanil cada juntúul. Wa taatatsilecheʼ láayliʼ bey unaj a beetik yéetel a paalaloʼ. Le Bibliaoʼ ku yaʼalik: «Ojéelt mantatsʼ bix yanil a tamanoʼob» (Pro. 27:23). Utiaʼal a beetik lelaʼ kʼaʼabéet a wojéeltik baʼax ku beetkoʼob, bix u tuukuloʼob yéetel bix u yuʼubikubaʼob. ¿Baʼax jeʼel u yáantkecheʼ? A tsikbal mantatsʼ tu yéeteloʼob.

4, 5. 1) ¿Baʼax jeʼel u beetik le taatatsiloʼob utiaʼal u yojéeltikoʼob baʼax ku tuklik u paaloʼoboʼ? (Ilawil le foto yaan tu káajbal le xookaʼ.) 2) Techeʼ, ¿baʼax tsʼoʼok a beetik utiaʼal a wojéeltik bix u yuʼubikuba a paalal?

⁴ Jujuntúul taatatsiloʼobeʼ maas istikyaj u yilik u tsikbal yéetel u paalaloʼob ken joʼopʼok u yokloʼob tu táankelmiloʼob. Teʼ jaʼaboʼob beyaʼ le paalaloʼoboʼ maases u kʼáatoʼob antal tu juunaloʼob yéetel maʼ u kʼáat u yaʼaloʼob bix u tuukuloʼob wa bix u yuʼubikubaʼobiʼ. Wa bey u beetik a paalaloʼoboʼ, ¿baʼax jeʼel u páajtal a beetkeʼ? Tu lugar a kukíinsikoʼob utiaʼal a tsikbal tu yéeteloʼob yaʼab tiempoeʼ, ilawil a tsikbal tu yéeteloʼob tiʼ jejeláas súutukiloʼob. Kaxt tiʼ baʼax súutukil maas jeʼel u yóotkoʼob tsikbaleʼ (Deu. 6:6, 7). Utiaʼal lelaʼ kʼaʼabéet a máansik tiempo tu yéeteloʼob. Maʼalob ka jóokʼkech xíimbal tu yéeteloʼob, ka báaxalnakech, ka a múul beet ta wotocheʼex junpʼéel meyaj wa uláakʼ baʼaloʼob. Teʼ súutukiloʼobaʼ le paalaloʼoboʼ ku yuʼubikoʼob maʼ táan u obligartaʼaloʼob tsikbaliʼ, le oʼolal maas jeʼel u yaʼalikoʼob bix u yuʼubikubaʼobeʼ.

⁵ ¿Kux túun wa láayliʼ maʼ tu yaʼaliktech mix baʼaleʼ? Kaxt uláakʼ bix jeʼel a tsikbal tu yéeteleʼ. Tu lugar a kʼáatik tiʼ a hija: «¿Bix biniktech bejlaʼeʼ?», maas maʼalob ka a tsikbalttiʼ baʼax ta beetaj teech. Maʼ xaaneʼ beyoʼ jeʼel u yaʼaliktech bix biniktiʼeʼ. Wa a kʼáat a wojéelt baʼax ku tuklik yoʼolal wa baʼaxeʼ maʼ u taatsʼ ka a kʼáattiʼiʼ. Maʼ xaaneʼ jeʼel u páajtal a kʼáatiktiʼ baʼax ku tuklik u amigaʼob yoʼolal le baʼax taak a wojéeltikoʼ. Tsʼoʼoleʼ kʼáattiʼ baʼax jeʼel u yaʼalik tiʼ u amiga utiaʼal u yáantik u kʼex u tuukuleʼ.

6. ¿Bix jeʼel a weʼesik tiʼ a paalal a kʼáat tsikbal tu yéeteloʼobeʼ?

⁶ Wa a kʼáat a wojéelt baʼax yaan tu puksiʼikʼal a paalaleʼ, kʼaʼabéet u yilkoʼob yaantech tiempo utiaʼal a máans tu yéeteloʼob yéetel jach kʼáat a wuʼuyoʼob. Le paalaloʼoboʼ wa ku yilkoʼob minaʼantech tiempo utiaʼal a tsikbal tu yéeteloʼobeʼ, maas maʼ ken u tsikbaltoʼobtech mix baʼal. ¿Bix jeʼel a weʼesik tiʼ a paalal jach a kʼáat tsikbal tu yéeteloʼobeʼ? Maʼ chéen yaan yéetel ka a waʼaltiʼob: «Jeʼel baʼax hora a kʼáat tsikbaleʼ way yaneneʼ». Maʼalob ka u yojéelteʼ kex wa maʼ nuuktak baʼax ku aktáantikeʼ taak a wáantik yéetel maʼ kan tsʼíikil. Kayla, juntúul x-chʼúupal 19 jaʼaboʼob yaantiʼeʼ, ku yaʼalik: «Teneʼ tuláakal baʼax jeʼel u páajtal in tsikbaltik yéetel in taataeʼ. Ku chaʼik in tsʼoʼoksik baʼax kin waʼalik, maʼatech u jáan aʼalik maʼ maʼalob baʼax kin beetkiʼ, chéen ku jach chʼenxikintiken. Ken tsʼoʼokok túuneʼ ku tsʼáaikten jach maʼalob tsolnuʼukoʼob».

7. 1) ¿Bix unaj u tsikbal le taatatsiloʼob yéetel u paalaloʼob yoʼolal baʼaloʼob talamtakoʼ? 2) Yaan horaeʼ, ¿bix jeʼel u ‹beetik u kʼuuxil u paalal› le taatatsiloʼoboʼ?

⁷ Yaan horaeʼ yaan u kʼaʼabéettal a tsikbal yéetel a paalal tiʼ baʼaloʼob talamtak. Jeʼex ken kʼaʼabéetchajak a tsikbal tu yéeteloʼob yoʼolal u yantal u novioʼob wa u noviaʼobeʼ, maʼ chéen unaj a tʼaan kʼaas tu yoʼolaliʼ, baʼaxeʼ unaj xan a tʼaan tiʼ le utsiloʼob ku taaskoʼ. Utiaʼal a naʼatikeʼ koʼox ketik beyaʼ, tukulteʼ ka bin janal tiʼ junpʼéel restaurante, baʼaleʼ ka wilkeʼ tu listail le jaanloʼob ku koʼonoloʼ ku yaʼalikeʼ wa ka jaantikeʼ jeʼel a kʼojaʼantaleʼ. Wa ka a wil beyoʼ, ¿máasaʼ jeʼel a bin tiʼ yaanal restauranteeʼ? A paalal xaneʼ ken u tsikbaltoʼobtech wa baʼax ku yúuchultiʼob utiaʼal u kʼáatkoʼobtech áantajeʼ, wa chéen ka tʼaan kʼaas tiʼ le baʼax ku tsikbaltikoʼobtechoʼ yaan u kʼuuxiloʼob yéetel yaan  u bin u kʼáatoʼob áantaj yaanal tuʼux (xok Colosasiloʼob 3:21). Jeʼex k-ilkoʼ ken a tsolnuʼukt a paalaleʼ maʼ chéen unaj a waʼaliktiʼob kʼaas baʼax ku beetkoʼobiʼ. Juntúul kiik ku kʼaabaʼtik Emilieʼ ku yaʼalik: «Ken tsikbalnaken yéetel in taataʼob yoʼolal in biskinba yéetel juntúul xiʼipaleʼ, maʼatech u yaʼalikoʼobten wa kʼaas. Baʼaxeʼ ku yaʼalikoʼobeʼ jach jatsʼuts u kaxtik máak máax yéetel jeʼel u tsʼoʼokol u beeleʼ. Le oʼolaleʼ maʼatech in suʼlaktal tsikbal tu yéeteloʼob yoʼolal le baʼaloʼob beyaʼ. Maʼatech in taʼakik tiʼob baʼax kin beetik. Wa kin káajsik in biskinba yéetel wa máaxeʼ kin waʼaliktiʼob».

8, 9. 1) ¿Baʼaxten kʼaʼabéet u chúukpajal a wóol a wuʼuy baʼax ku tsikbaltiktech a paalal? 2) Techeʼ, ¿baʼax utsil tsʼoʼok a jóoʼsik ikil a wuʼuyik baʼax ku tsikbaltiktech a paalal?

⁸ Jeʼex tu yaʼalil Kaylaeʼ, kʼaʼabéet a weʼesik tiʼ a paalal taak a chʼenxikintikoʼob yéetel u chúukpajal a wóol a wuʼuy baʼax ku yaʼalikoʼob (xok Santiago 1:19). Katia, juntúul maamatsil ku líiʼsik tu juunal u hijaeʼ, ku yaʼalik: «Kaʼacheʼ maʼatech u chúukpajal in wóol in wuʼuy baʼax ku tsikbaltikten in hija, séeb u náakal in wóol. Maʼ xaaneʼ tumen kaʼanaʼanen wa tumen maʼ in kʼáat ka u molestarten mix máakiʼ. Bejlaʼeʼ tsʼoʼok u kʼexpajal in modos bey xan in hija. Maas uts tu tʼaan u tsikbal tin wéetel».

⁹ Juntúul taatatsil ku kʼaabaʼtik Ronaldeʼ bey xan úuchiktiʼ yéetel u hija x-lóoʼbayanoʼ. Letiʼeʼ ku yaʼalik: «Ka tu yaʼalajten uts tu yich juntúul xiʼipal u yéet xookeʼ, jach tʼaʼab in kʼiʼikʼel. Baʼaleʼ tin kʼaʼajseʼ Jéeobaeʼ jach chúukaʼan u yóol yéetel ku naʼatik bix u yuʼubikuba máaxoʼob meyajtik. Lelaʼ tu yáanten in naʼateʼ kʼaʼabéet in chaʼik u yaʼalik in hija baʼax ku tuklik, tsʼoʼoleʼ kin tsolik u nuʼuk tiʼ. ¡Hasta ka kʼuchen in naʼat bix u yuʼubikuba! Ka tsʼoʼok lelaʼ maas maʼ talam tin wilaj in tsikbal yéetel in hija yéetel yaabilajiʼ. Jach péeknaj in wóol ka tin wilaj tu kʼamaj le tsolnuʼukoʼob tin tsʼáajtiʼoʼ, tsʼoʼoleʼ tu yaʼaleʼ yaan u kʼexik bix u modos». Wa ku suuktal a tsikbal yéetel a paalaleʼ yaan a wojéeltik baʼax ku tuklikoʼob bey xan baʼax yaan tu puksiʼikʼaloʼob. Wa ka beetik lelaʼ yaan a wáantkoʼob utiaʼal u chʼaʼtuklikoʼob tubeel baʼax ken u beetoʼob. *

10, 11. ¿Bix jeʼel a wáantik a paalal utiaʼal maʼ u náachtaloʼob tiʼ Dioseʼ?

¹⁰ Juntúul maʼalob j-kanan tamaneʼ u yojleʼ yaan horaeʼ jeʼel u saʼatal juntúul tiʼ le tamanoʼoboʼ. Maʼ xaaneʼ le tamanoʼ ku yilik junwóol suʼuk jach jatsʼuts, tsʼoʼoleʼ junpʼíit maas náacheʼ yaan uláakʼiʼ, letiʼ túuneʼ ku bin u jaante, tu tsʼookeʼ ku náachtal tiʼ u maasil. Lelaʼ láayliʼ bey jeʼel u yúuchul yéetel juntúul paaloʼ,  maʼ xaaneʼ tumen jatsʼuts u yilik u biskuba yéetel máaxoʼob maʼatech u meyajtikoʼob Dios yéetel jatsʼuts u yilik u náaysik u yóol yéetel baʼaloʼob maʼ maʼalobtakeʼ, jujunpʼíitil jeʼel u náachtal tiʼ Dioseʼ (Pro. 13:20). ¿Baʼax jeʼel a beetik utiaʼal maʼ u yúuchul tiʼ a paalal beyoʼ?

¹¹ Wa ka tsʼáaik cuenta yaan junpʼéel baʼal jatsʼuts u yilik a paalal jeʼel u beetik u bin kʼaasil tiʼobeʼ, maʼ pʼatik chéen beyoʼ. Ilawil a wáantkoʼob tu séebaʼanil. Áantoʼob utiaʼal ka maas maʼalobchajak le jatsʼuts modos yaantiʼoboʼ (2 Ped. 1:5-8). Lelaʼ jeʼel u páajtal a beetik teʼ adoración ich familiaoʼ. K-meeyjil tiʼ le Reino, tiʼ octubre tiʼ 2008, tu yaʼalaj: «Tiʼ le taatatsiloʼoboʼ táan k-aʼaliktiʼob ka u yil u xokikoʼob le Biblia ich familiail, jeʼex u yaʼalik Jéeoba ka beetaʼakoʼ». ¿Táan wa u meyajtech le adoración ich familiail utiaʼal a kaʼansik a paalaloʼoboʼ? Wa táan a beetkeʼ a paalaleʼ yaan u tsʼáaikoʼobtech u diosboʼotikil ikil a tsʼáaik a wóol a wáantkoʼob u meyajtoʼob Dios (Mat. 5:3; Fili. 1:10).

12. 1) Le adoración ich familiaoʼ, ¿bix jeʼel u yáantik le táankelem paalaloʼoboʼ? (Ilawil xan le cuadro « Ku tsʼáaikoʼob u diosboʼotikil».) 2) ¿Bix tsʼoʼok u yáantkech le adoración ich familiaoʼ?

¹² Koʼox ilik baʼax ku yaʼalik juntúul x-chʼúupal ku kʼaabaʼtik Carissa yoʼolal le Áakʼabil Adoración ich Familiaoʼ. Letiʼeʼ ku yaʼalik: «Jach uts tin tʼaan k-muchʼikba utiaʼal k-tsikbal. Lelaʼ ku beetik k-maas yaabiltikba yéetel le jatsʼuts baʼaloʼob k-beetkoʼ mix bikʼin k-tuʼubsik. In papaeʼ cada semana ku yilik u xook t-éetel. Teneʼ kin wilkeʼ utiaʼal in papaeʼ lelaʼ junpʼéel baʼal jach kʼaʼanaʼan, le oʼolal teen xaneʼ bey in wilkoʼ. Tsʼoʼoleʼ ku yáantken xan utiaʼal in weʼesik tsiikil tiʼ yéetel utiaʼal in wilik bey le máax tsʼaʼan utiaʼal k-maas natsʼikba tiʼ Diosoʼ». Brittney, juntúul x-chʼúupaleʼ, ku yaʼalik: «Le adoración ich familiaoʼ tsʼoʼok u beetik in maas biskinba yéetel in taataʼob. Ku yeʼesikteneʼ utiaʼal in taataʼobeʼ jach kʼaʼanaʼan le baʼaxoʼob ku yúuchultenoʼ yéetel jach u yaabiltmenoʼob. Lelaʼ ku muʼukʼaʼankúuntik le yaabilaj yaan ichiloʼonoʼ». Jeʼex túun k-ilkoʼ u kaʼansaʼal le paalaloʼob u maas natsʼubaʼob tiʼ Diosoʼ junpʼéel baʼax jach unaj u beetik le taatatsiloʼoboʼ, le adoración ich familiaoʼ jeʼel u yáantaj utiaʼal lelaʼ. *

13. ¿Bix jeʼel a wáantik a paalal utiaʼal u taaktal u meyajtikoʼob Dioseʼ?

¹³ Juntúul maʼalob j-kanan tamaneʼ ku meyajtiʼ junxóotʼ cheʼ utiaʼal u nuʼuktik yéetel u kanáantik u tamanoʼob. Letiʼeʼ maases ku nuʼuktik le tamanoʼob teʼ tuʼux yaan u maas «maʼalobil xíiw[oʼ]» (Eze. 34:13, 14). ¿Máasaʼ bey xan a kʼáat a beet yéetel a paalaloʼ? Techeʼ jeʼel u páajtal a nuʼuktikoʼob utiaʼal u meyajtikoʼob Jéeoba yéetel ka u yuʼububaʼob jeʼex le salmista ka tu tsʼíibtaj lelaʼ: «In [Dios], teneʼ uts tin tʼaan in beetik le baʼax a kʼáateʼ; ¡kin bisik tin puksiʼikʼal a kaʼanbesaj!» (Sal. 40:8). Wa ka u yuʼububa a paalal beyaʼ, yaan u taaktal u kʼubkoʼob u kuxtal tiʼ Jéeoba yéetel u yokjaʼob. Baʼaleʼ utiaʼal u beetkoʼobeʼ kʼaʼabéet u naʼatkoʼob tubeel yéetel ka síijik tu puksiʼikʼaloʼob u meyajtikoʼob Jéeoba.

14, 15. 1) Wa maʼ tu jach creertik a paalal de ke tiaʼanoʼob ichil u jaajileʼ, ¿baʼax unaj a beetik? 2) ¿Baʼaxten jujuntúul paalaloʼobeʼ maʼ tu jach creertikoʼob wa tiaʼanoʼob ichil u jaajileʼ?

¹⁴ Baʼaleʼ ¿kux túun wa maʼ tu tsʼáaik u yóol a paal u meyajt Jéeoba, wa hasta maʼ tu creertik wa tiaʼan ichil u jaajileʼ? Beet tuláakal le ku páajtal utiaʼal a wáantik u yaabilt Jéeoba yéetel u tsʼáaik u nib óolalil tiʼ yoʼolal tuláakal le baʼaxoʼob u beetmoʼ (Apo. 4:11). Ken kʼuchuk túun tu puksiʼikʼaleʼ, tu juunal ken u chʼaʼtukult u meyajtik Jéeoba.

¹⁵ Wa ka wilik maʼ tu jach creertik a paal wa tiaʼan ichil u jaajileʼ, chúukpajak a wóol a wáante yéetel nuʼukt tubeel. Áant u naʼateʼ u meyajtik Jéeobaeʼ letiʼe baʼax maas maʼalob jeʼel u beetik ichil u kuxtaloʼ yéetel jeʼel u taasik kiʼimak óolal tiʼeʼ. Yáaxeʼ ilawil a naʼatik baʼaxten bey u tuukuloʼ. Tuukulnen tiʼ lelaʼ: ¿Jach wa tu  jaajil maʼ uts tu tʼaan baʼax ku kaʼansik le Bibliaoʼ? ¿Maʼ wa ta tʼaan chéen suʼlak u yeʼes baʼax ku creertik tiʼ u yéet xookoʼobiʼ? ¿Ku tuklik wa maʼatech u yáantaj le baʼax ku yaʼalik Jéeobaoʼ? ¿Ku yuʼubikuba wa chéen tu juunal wa pʼektaʼan yoʼolal baʼax ku creertik?

16, 17. Le taatatsiloʼoboʼ, ¿bix jeʼel u yáantik u paalaloʼob utiaʼal u biskubaʼob yéetel Jéeobaeʼ?

¹⁶ Kex jeʼel baʼalak ka u beet maʼ u jach creertik a paal baʼax ku yaʼalik Jéeobaeʼ, techeʼ jeʼel u páajtal a wáantik u kʼex u tuukuleʼ. ¿Bix jeʼel a beetkeʼ? Jujuntúul taatatsiloʼobeʼ utiaʼal u yáantik u paalaloʼobeʼ tsʼoʼok u meyajtiʼob le kʼáatchiʼobaʼ: «¿Chéen chʼaʼabil wa a wilik a meyajtik Jéeoba wa ku talamtaltech? ¿Baʼax utsiloʼob ka tuklik ku taasik? ¿Yaan wa talamiloʼob ku taasik? A tuklikeʼ le utsiloʼob ku taasiktech bejlaʼa yéetel le maʼ kun xáantaloʼ, ¿maʼ wa maas yaʼab tiʼ le baʼaxoʼob kun kʼaʼabéettal a beetkoʼ?». Le kʼáatchiʼobaʼ chéen junpʼéel ejemplo, techeʼ jeʼel u páajtal a kʼáatik tiʼ a hijo jeʼex a wilik maʼalobeʼ, baʼaleʼ ilawil a beetik yéetel yaabilaj. Maʼ beetik u yuʼubikuba bey tiaʼan tu táan junpʼéel juzgadoeʼ. Le táan a tsikbaleʼexoʼ maʼ xaaneʼ jeʼel u páajtal a xokikeʼex Marcos 10:29 yéetel 30. Maʼ xaaneʼ jujuntúul paalaloʼobeʼ jeʼel u jóoʼskoʼob u yutsil u tsʼíibtikoʼob bix jeʼel u bintiʼob wa ku meyajtikoʼob Jéeobaeʼ bey xan baʼax jeʼel u yúuchultiʼob wa maʼ tu beetkoʼobeʼ. U beetkoʼob beyaʼ ku yáantaj utiaʼal u tsʼáaikoʼob cuenta baʼax beetik maʼ u jach creertikoʼob wa tiaʼanoʼob ichil u jaajileʼ, tsʼoʼoleʼ ku yáantaj utiaʼal u xuʼulul u tuukuloʼob beyoʼ. Wa kʼaʼanaʼan a wilik a xokik yéetel uláakʼ máakoʼob le libro ¿Baʼax ku kaʼansik le Biblia? yéetel «U yaakunaj Jajal Diosoʼ», ¿maʼ wa túun maas kʼaʼanaʼan a xokik yéetel a paalaliʼ? Wa maʼ a xok tu yéeteloʼobeʼ, ilawil a beetik.

¹⁷ A paalaleʼ yaan u kʼuchul u kʼiinil u chʼaʼtuklikoʼob tu juunaloʼob wa yaan u meyajtikoʼob Jéeoba wa maʼ. Maʼ unaj a tuklik wa tumen táan a meyajtik Jéeobaeʼ bey ken u beet a paalaloʼob xanoʼ. Letiʼob unaj u yilkoʼob u kʼaʼanaʼanil u biskubaʼob yéetel Jéeoba (Pro. 3:1, 2). Baʼaleʼ wa ka wilik ku talamtal tiʼ a paaleʼ maʼalob ka a wáant u kʼaʼajs jujunpʼéel baʼaloʼob tu yáax kanaj teʼ Bibliaoʼ. Aʼaltiʼ ka tuukulnak tiʼ le kʼáatchiʼobaʼ: «¿Bix in wojéeltik yaan Dios? ¿Baʼax beetik in tsʼáaik cuenta u yaabiltmen Dios? ¿Baʼaxten kin creertik jeʼel u yáantken u tsolnuʼukoʼobeʼ?». Eʼes juntúul maʼalob j-kanan tamanech, nuʼukt a paalal yéetel chúukaʼan óolal, beyoʼ tu juunal ken u tsʼáaʼob cuentaeʼ u meyajtaʼal Jéeobaeʼ letiʼe baʼax maas maʼaloboʼ (Rom. 12:2). *

18. ¿Le taatatsiloʼoboʼ bix jeʼel u beetkoʼob jeʼex le Nojoch j-Kanan Tamanoʼ?

¹⁸ Tuláakloʼon k-kʼáat k-beetba maʼalob j-kanan tamanoʼob, jeʼex Jéeoba, le maas Nojoch j-Kanan Tamanoʼ (Efe. 5:1; 1 Ped. 2:25). Le taatatsiloʼoboʼ, maases unaj u kʼaj óoltikoʼob u mejen tamanoʼob wa u paalaloʼob. Taatatsileʼex, kʼaʼabéet a wilkeʼex a beetkeʼex tuláakal le ku páajtal utiaʼal ka u kʼamoʼob le utsiloʼob ken u taas Jéeoba maʼ kun xáantaloʼ. Le oʼolaleʼ kanáant a paalaleʼex: kaʼanseʼextiʼob u yaabiltoʼob Jéeoba.