1, 2. 1) ¿Baʼax kettʼaanil tu yaʼalaj Jesús tiʼ u amigoʼob? (Ilawil le dibujo yaan tu káajbal le xookaʼ.) 2) ¿Baʼaxten kʼaʼabéet k-ojéeltik u kettʼaanil le tamanoʼob yéetel le chivoʼoboʼ?

JUNTÉENJEAKILEʼ Jesuseʼ táan kaʼach u tsikbaltik junpʼéel baʼax jach kʼaʼanaʼan yéetel kantúul u amigoʼob, Pedro, Andrés, Santiago yéetel Juan. Le kaʼa tsʼoʼok u tsikbaltiktiʼob u kettʼaanil le palitsil chúukaʼan u yóol yéetel yaan u naʼatoʼ, le diez x-chʼúupalaloʼob yéetel le talentosoʼ, tu yaʼalajtiʼob uláakʼ junpʼéel kettʼaan. Teʼelaʼ tʼaanaj tiʼ le kʼiin ken taalak «u Paal máak» utiaʼal u juzgart «u máakiloʼob tuláakal kaajoʼob». Tu yaʼalaj xaneʼ «u Paal máak[eʼ]» yaan u jóoʼsik kaʼa jaats tiʼ le máakoʼoboʼ, u jaatseʼ ku keʼetel yéetel tamanoʼob yéetel le uláakʼ jaatsoʼ ku keʼetel yéetel chivoʼob. Jesuseʼ tu chʼaʼchiʼitaj uláakʼ u jaats máakoʼob: u «sukuʼunoʼob» le Reyoʼ (xok Mateo 25:31-46).

² Jeʼex le apostoloʼoboʼ toʼoneʼ jach kʼaʼanaʼan k-ilik baʼax ku yaʼalik le kettʼaanaʼ tumen Jesuseʼ tu yaʼale yaan máax kun antal kuxtal minaʼan u xuul tiʼ yéetel yaan máax kun xuʼulsbil. Bey túunoʼ jach maʼalob ka k-ojéelt baʼax u kʼáat u yaʼal le kettʼaanaʼ yéetel baʼax unaj k-beetik utiaʼal u yantaltoʼon le  kuxtal minaʼan u xuuloʼ. Teʼ xookaʼ yaan k-núukik le kʼáatchiʼobaʼ: ¿Bix tsʼoʼok u yáantkoʼon Jéeoba k-maas naʼat le kettʼaanaʼ? ¿Baʼaxten k-aʼalikeʼ le kettʼaanaʼ táan u tʼaan tiʼ le kʼaʼaytajoʼ? ¿Máaxoʼob unaj u kʼaʼaytajoʼob? ¿Baʼaxten kʼaʼanaʼan k-áantik u sukuʼunoʼob le Reyoʼ?

3, 4. 1) ¿Baʼax unaj k-ojéeltik utiaʼal k-naʼatik u kettʼaanil le tamanoʼob yéetel le chivoʼoboʼ? 2) Tu añoil 1881, ¿bix tsoʼolik u kettʼaanil le tamanoʼob yéetel le chivoʼoboʼ?

³ Utiaʼal k-naʼatik baʼax u kʼáat u yaʼal u kettʼaanil le tamanoʼob yéetel le chivoʼoboʼ yáaxeʼ unaj k-naʼatik le óoxpʼéel baʼaloʼobaʼ: 1) ¿Máax le «u Paal máak» wa «le Reyoʼ», máax le tamanoʼob yéetel le chivoʼoboʼ yéetel máax u «sukuʼunoʼob» le Reyoʼ? 2) ¿Baʼax kʼiin u jaʼatsal wa u beetaʼal juicio tiʼ le tamanoʼob yéetel le chivoʼob tumen le «u Paal máak[oʼ]»? 3) ¿Baʼaxten ku yaʼalaʼaleʼ yanoʼobeʼ beyoʼob tamaneʼ yéetel uláakʼeʼ beyoʼob chivoʼobeʼ?

⁴ Tu añoil 1881, le revista U Pʼíich Tulumil Kanan ich inglesoʼ tu tsoleʼ le «u Paal máak» wa «le Reyoʼ» Jesús. Tu tsolaj xaneʼ u sukuʼunoʼob le Reyoʼ letiʼe máaxoʼob kun gobernar yéetel Jesús teʼ kaʼanoʼ bey xan le máaxoʼob kun pʼáatloʼob kuxtal way Luʼum ken pʼáatak minaʼan u kʼebanoʼoboʼ. Le revistaaʼ tu yaʼalaj xaneʼ le u jaʼatsal le tamanoʼob yéetel le chivoʼoboʼ yaan u beetaʼal ken gobernarnak Jesús ichil le Mil añosoʼ. Utiaʼal u yaʼalaʼal bey taman wa máaxeʼ ku yilaʼal wa tu yeʼesaj u yaabiltmaj Dios ichil u kuxtal.

5. Tu añoil 1923, ¿bix tsoʼolik u kettʼaanil le tamanoʼob yéetel le chivoʼoboʼ?

⁵ Ka máan kʼiineʼ Jéeobaeʼ tu yáantaj u kaajal utiaʼal u maas naʼat le kettʼaanaʼ. Tu añoil 1923, le revista U Pʼíich Tulumil Kanan ich inglés, 15 tiʼ octubreoʼ tu yaʼaleʼ le «u Paal máak[oʼ]» Jesús. Tsʼoʼoleʼ le revistaaʼ tu chʼaʼchiʼitaj uláakʼ tekstoʼob utiaʼal u tsolikeʼ u «sukuʼunoʼob» le Reyoʼ chéen letiʼe yéeyaʼanoʼob kun gobernaroʼob yéetel Jesusoʼ yéetel tsʼokaʼaniliʼ u binoʼob kaʼan ken káajak le Mil añosoʼ. Le revistaaʼ tu yaʼalaj xaneʼ le tamanoʼoboʼ letiʼe máaxoʼob kun kuxtaloʼob way Luʼum yáanal u gobernación Jesús yéetel u sukuʼunoʼoboʼ. Tu yaʼalaj xaneʼ le kettʼaanoʼ ku yaʼalikeʼ le tamanoʼoboʼ yaan u yáantkoʼob u sukuʼunoʼob le Reyoʼ, le oʼolaleʼ le kʼiin ken jaʼatskoʼob wa ken beetaʼak juicio tiʼoboʼ yaan u yúuchul mientras tiaʼan u sukuʼunoʼob Jesús wa le yéeyaʼanoʼob way Luʼumoʼ, táanil tiʼ u káajal u gobernaroʼob ichil le Mil añosoʼ. Teʼ revistaaʼ aʼalaʼab xaneʼ le tamanoʼoboʼ letiʼe máaxoʼob creertik Jesusoʼ yéetel ku creertikoʼob chéen le Reino ken u taas junpʼéel maʼalob kuxtaloʼ.

6. Tu añoil 1995, ¿bix tsoʼolik u kettʼaanil le tamanoʼob yéetel le chivoʼoboʼ?

⁶ Ichil yaʼab añoseʼ k-tuklik kaʼacheʼ le máakoʼoboʼ ku juzgartaʼaloʼob teʼ kʼaʼaytaj ku beetaʼal teʼ tu tsʼook kʼiinoʼobaʼ. Wa ku kʼamkoʼob le kʼaʼaytajoʼ tamanoʼob, wa maʼeʼ chivoʼob. Pero tu añoil 1995, kʼexpaj bix u tsoʼolol le kettʼaanaʼ. Le revista U Pʼíich Tulumil Kanan ich español, 15 tiʼ octubreoʼ tu ketaj Mateo 24:29 tak 31 (xoke) yéetel Mateo 25:31 yéetel 32 (xoke), ka tu tsoleʼ Jesuseʼ yaan u beetik le juicio tu kʼiinil le nojoch muʼyajiloʼ wa le kʼiin «ken nojbeʼenkúuntaʼak u Paal máak[oʼ]». *

7. Teʼ kʼiinoʼobaʼ, ¿bix k-naʼatik u kettʼaanil le tamanoʼob yéetel le chivoʼoboʼ?

 ⁷ Teʼ kʼiinoʼobaʼ tsʼoʼok k-maas naʼatik u kettʼaanil le tamanoʼob yéetel le chivoʼoboʼ. K-ojleʼ le «u Paal máak» wa «le Reyoʼ» Jesús. Tsʼoʼok k-kanik xaneʼ u «sukuʼunoʼob» le Reyoʼ letiʼe máaxoʼob yéeyaʼanoʼob yéetel kiliʼich muukʼ kun binoʼob gobernar teʼ kaʼan yéetel Jesusoʼ (Rom. 8:16, 17). «Le tamanoʼob» yéetel «le chivoʼoboʼ» letiʼe u máakiloʼob tuláakal kaajoʼoboʼ. Letiʼobeʼ yaan u juzgartaʼaloʼob tu tsʼoʼokbal le nojoch muʼyajil jach taʼaytak u káajaloʼ. Tsʼoʼok k-kanik xaneʼ utiaʼal u juzgartik le máakoʼoboʼ Jesuseʼ yaan u yilik wa tu yáantoʼob le máaxoʼob yéeyaʼanoʼob pʼaatloʼob way Luʼumoʼ. Jach k-tsʼáaik gracias tiʼ Jéeoba úuchik u yáantkoʼon k-naʼat u kettʼaanil le tamanoʼob yéetel le chivoʼoboʼ bey xan le uláakʼ kettʼaanoʼob ku chíikpajal tiʼ Mateo 24 yéetel 25.

8, 9. ¿Baʼaxten ku yaʼalaʼal «toj u kuxtal» le máaxoʼob bey tamanoʼoboʼ?

⁸ Ka tu yaʼalaj Jesús u kettʼaanil le tamanoʼob yéetel le chivoʼoboʼ maʼ meyajnajtiʼ le tʼaan «kʼaʼaytajoʼ». ¿Baʼaxten túun k-aʼalikeʼ le kettʼaanaʼ táan u yeʼesik u kʼaʼanaʼanil le kʼaʼaytajoʼ?

⁹ Utiaʼal k-naʼatikeʼ kʼaʼabéet k-chʼaʼik en cuentaeʼ Jesuseʼ tu yaʼalaj le kettʼaan tumen taak u kaʼansik junpʼéel baʼal tiʼ u disipuloʼoboʼ. Maʼ táan kaʼach u tʼaan jach tiʼ tamanoʼob wa chivoʼobiʼ. Maʼ xan táan kaʼach u yaʼalik wa utiaʼal u yaʼalaʼal juntúul taman wa máaxeʼ kʼaʼabéet u tsʼáaik janal yéetel nookʼ tiʼ le yéeyaʼanoʼoboʼ, u kanáantkoʼob ken kʼojaʼanchajkoʼob wa u bin u yiloʼob wa ku yoksaʼaloʼob cárcel. Baʼaxeʼ letiʼeʼ tu yóotaj u yaʼaleʼ le tamanoʼoboʼ ku yilaʼaloʼob tumen «toj u kuxtal[oʼob]» yéetel tumen ku yilkoʼob le yéeyaʼanoʼob bey u sukuʼunoʼob Jesuseʼ, tsʼoʼoleʼ ku chúukpajal xan u yóol u yáantoʼob teʼ tu tsʼook kʼiinoʼob talamtakoʼobaʼ (Mat. 10:40-42; 25:40, 46; 2 Tim. 3:1-5).

10. Le tamanoʼoboʼ, ¿bix jeʼel u yáantkoʼob u sukuʼunoʼob Cristoeʼ?

¹⁰ Táanil tiʼ u yaʼalik Jesús u kettʼaanil le tamanoʼob yéetel le chivoʼoboʼ táan kaʼach u tʼaan tiʼ le baʼaxoʼob kun úuchul teʼ tu tsʼook kʼiinoʼobaʼ (Mat. 24:3). Ichil le baʼaxoʼob táan kaʼach u yaʼalikoʼ, táakaʼan lelaʼ: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab» (Mat. 24:14). Tsʼoʼoleʼ tʼaanaj xan tiʼ u kettʼaanil le talentosoʼ. Le kettʼaanaʼ tu yaʼalaj Jesús utiaʼal u kaʼansik tiʼ le yéeyaʼanoʼob jach kʼaʼabéet u tsʼáaik u yóoloʼob teʼ kʼaʼaytajoʼ. Chéen baʼaleʼ, ¿bix kun kʼaʼaytajoʼob tiʼ tuláakal yóokʼol kaab táanil tiʼ le xuʼulsajil wa chéen junpʼíitoʼoboʼ? Jeʼex t-kanil tu kettʼaanil le tamanoʼob yéetel le chivoʼoboʼ, letiʼe tamanoʼob kun áantik u sukuʼunoʼob Jesusoʼ. Ichil le áantajaʼ, ¿chéen wa ta tʼaan táakaʼan u tsʼaʼabal taakʼin yéetel u líiʼsaʼal u yóol le yéeyaʼanoʼoboʼ?

11. ¿Baʼax jeʼel u tuklik máak yaan horaeʼ, yéetel baʼaxten?

¹¹ Bejlaʼeʼ yaan ocho millones u disipuloʼob Jesús, pero u maas yaʼabileʼ maʼ yéeyaʼanoʼob utiaʼal u binoʼob kaʼaniʼ. Jeʼex tsʼoʼok k-ilkoʼ Jesuseʼ chéen tiʼ le yéeyaʼanoʼob u tsʼaamaj le talentosoʼ (Mat. 25:14-18). Chéen baʼaleʼ yaan máaxeʼ jeʼel u tuklikeʼ: «Wa maʼ tiʼ le máaxoʼob kun kuxtaloʼob way Luʼum tsʼaʼab le talentosoʼ, ¿kʼaʼabéet wa túun u kʼaʼaytajoʼob?». Kʼaʼabéet, koʼox ilik baʼaxten.

12. ¿Baʼax ku kaʼansiktoʼon Mateo 28:19 yéetel 20?

 ¹² Jesuseʼ tiʼ tuláakal u disipuloʼob tu yaʼalaj ka kʼaʼaytajnakoʼob. Ka tsʼoʼok u kaʼa kuxkíintaʼal Jesuseʼ tu yaʼalajtiʼob: «Beeteʼexoʼob disipuloʼob». Tsʼoʼoleʼ tu yaʼalajtiʼob ka u kaʼansoʼob tiʼ u túumben disipuloʼob «tuláakal le baʼaxoʼob» tsʼoʼok u yaʼaliktiʼoboʼ. Bey túunoʼ tuláakal le máaxoʼob kun kaanbaloʼoboʼ unaj kaʼach u kʼaʼaytajoʼob xan (xok Mateo 28:19, 20). Jeʼex k-ilkoʼ kex wa yaan k-bin kaʼan bey xan wa maʼeʼ, tuláakloʼon unaj k-kʼaʼaytaj (Bax. 10:42).

13. ¿Baʼax ku kaʼansiktoʼon le náay tu yilaj apóstol Juanoʼ?

¹³ U libroil Apocalipsiseʼ ku kaʼansiktoʼoneʼ le máaxoʼob kun binoʼob kaʼan bey xan le máaxoʼob ku pʼáatloʼob kuxtal way Luʼumoʼ yaan u múuchʼ kʼaʼaytajoʼob. Tiʼ junpʼéel náayeʼ Jesuseʼ tu tsʼáaj u yil le apóstol Juan juntúul «noviatsil» ku yaʼalik tiʼ uláakʼ máakoʼob ka taalakoʼob u yukʼoʼob le jaʼ ku tsʼáaik kuxtaloʼ. Le noviatsiloʼ letiʼe 144,000 máaxoʼob kun binoʼob kaʼan gobernar yéetel Jesusoʼ (Apo. 14:1, 3; 22:17). Le jaʼoʼ ku chíikbesik u kuxtal Jesús tu kʼubaj utiaʼal u jáalkʼabtik máak tiʼ le kʼeban yéetel tiʼ le kíimiloʼ (Mat. 20:28; Juan 3:16; 1 Juan 4:9, 10). Le sukuʼunoʼob yéeyaʼanoʼoboʼ jach u tsʼaamaj u yóol u kaʼansoʼob baʼaxten tu kʼubaj u kuxtal Jesús yéetel bix jeʼel u jóoʼskoʼob u yutsileʼ (1 Cor. 1:23). Teʼ náay xanoʼ le apóstol Juanoʼ tu yilaj uláakʼ jaats máakoʼob maʼ kun binoʼob kaʼan. Tiʼ letiʼobeʼ aʼalaʼab xan ka u yaʼaloʼob tiʼ uláakʼ máakoʼob ka ‹taalakoʼob› u yukʼoʼob le jaʼ tsʼáaik kuxtaloʼ. Letiʼobeʼ tu beetoʼob le baʼax aʼalaʼabtiʼobaʼ tumen kʼaʼaytajnajoʼob tiʼ u maasil máakoʼob. Jeʼex k-ilkoʼ le náayaʼ ku yeʼesikeʼ tuláakal le máaxoʼob ku beetkubaʼob disipuloiloʼ kʼaʼabéet xan u kaʼanskoʼob uláakʼ máakoʼob.

14. ¿Bix k-eʼesik táan ‹k-tsʼoʼokbesik u ley Cristo›?

 ¹⁴ Tuláakal le máaxoʼob ‹tsʼoʼokbesik u ley Cristooʼ› kʼaʼabéet u kʼaʼaytajoʼob (Gal. 6:2). Jéeobaeʼ u kʼáat ka beetaʼak baʼax ku yaʼalik u leyoʼob tumen tuláakal le máaxoʼob meyajtikoʼ. Úuchjeakileʼ Jéeobaeʼ tu yaʼaleʼ le israelitaʼob bey xan le j-táanxel kajiloʼoboʼ kʼaʼabéet u beetkoʼob baʼax ku yaʼalik u leyoʼob (Éxo. 12:49; Lev. 24:22). Bejlaʼeʼ toʼoneʼ minaʼanoʼon yáanal le leyoʼob tsʼaʼab tiʼ le israelitaʼoboʼ. Chéen baʼaleʼ kex yéeyaʼanoʼon bey xan wa maʼeʼ tuláakloʼon kʼaʼabéet ‹k-tsʼoʼokbesik u ley Cristo›. Junpʼéel tiʼ le baʼaxoʼob tu kaʼansajtoʼon Jesusoʼ letiʼe ka k-eʼes yaabilajoʼ (Juan 13:35; Sant. 2:8). Le oʼolaleʼ unaj k-yaabiltik Jéeoba, Jesús bey xan u maasil máakoʼob. Toʼoneʼ k-eʼesik yaabilaj tiʼ uláakʼ máakoʼob ken k-kaʼanstiʼob baʼaxoʼob ken u beet u Reino Diosoʼ (Juan 15:10; Bax. 1:8).

15. ¿Baʼaxten k-ojel tuláakal u disipuloʼob Jesús unaj u kʼaʼaytajoʼob?

¹⁵ Yaan baʼaxoʼob tu yaʼalaj Jesús tiʼ jujuntúul u disipuloʼobeʼ tuláakal u disipuloʼob unaj u beetik. Jesuseʼ tu beetaj junpʼéel pacto chéen yéetel 11 u túulal u disipuloʼob, tsʼoʼoleʼ tu yaʼalajtiʼobeʼ yaan u gobernaroʼob tu yéetel teʼ kaʼanoʼ. Kex chéen yéetel 11 u túulal u disipuloʼob tu beetaj le pactooʼ, le Bibliaoʼ ku kaʼansikeʼ 144,000 máaxoʼob kun gobernar tu yéetel (Luc. 22:29, 30; Apo. 5:10; 7:4-8). Ka tsʼoʼok xan u kaʼa kuxkíintaʼaleʼ chéen tiʼ tsʼeʼetsʼek u disipuloʼob tu yaʼalaj kʼaʼabéet u kʼaʼaytajoʼob (Bax. 10:40-42; 1 Cor. 15:6). Chéen baʼaleʼ tuláakal le disipuloʼob anchaj teʼ yáax siglo tu beetoʼob le baʼax tu yaʼalaʼ (Bax. 8:4; 1 Ped. 1:8). Toʼoneʼ kex maʼ t-uʼuyaj u yaʼalik Jesús ka kʼaʼaytajnakoʼoneʼ, k-ojleʼ kʼaʼabéet k-kʼaʼaytaj. Bejlaʼeʼ ocho millones máakoʼob táan u kʼaʼaytajoʼob. Ken kʼaʼaytajnakoʼoneʼ k-eʼesik jach tu jaajil yaan k-fe tiʼ Jesús (Sant. 2:18).

16-18. ¿Bix jeʼel k-áantik u sukuʼunoʼob Cristoeʼ, yéetel baʼaxten unaj k-beetik desde bejlaʼeʼ?

¹⁶ Satanaseʼ jach u tsʼaamaj u yóol baʼateʼel tu contra le sukuʼunoʼob yéeyaʼanoʼob pʼaatloʼob way Luʼumoʼ tumen u yojel «chéen junpʼíit kʼiin pʼaataltiʼ» (Apo. 12:9, 12, 17). Kex beyoʼ le sukuʼunoʼob yéeyaʼanoʼoboʼ jach u tsʼaamaj xan u yóoloʼob kʼaʼaytaj yéetel teʼ kʼiinoʼobaʼ yaʼab máakoʼob táan u kankoʼob baʼax ken u beet Dios. Lelaʼ ku yeʼesikeʼ Jesuseʼ táan u nuʼuktik yéetel u yáantik le sukuʼunoʼob yéeyaʼanoʼoboʼ (Mat. 28:20).

¹⁷ Toʼoneʼ jach kiʼimak k-óol ikil k-áantik le sukuʼunoʼob yéeyaʼanoʼob teʼ kʼaʼaytajoʼ. Kiʼimak k-óol xan ikil k-tsʼáaik siibaloʼob yéetel ikil k-meyaj utiaʼal u beetaʼal u Najiloʼob Reino, u Najiloʼob Asamblea yéetel u najiloʼob Betel. Ken k-beet baʼax ku yaʼalik le ancianoʼob bey xan uláakʼ sukuʼunoʼob tsʼaʼan tumen «le palitsil chúukaʼan u yóol yéetel yaan u naʼat[oʼ]» k-eʼesik k-kʼáat áant u sukuʼunoʼob Cristo (Mat. 24:45-47; Heb. 13:17).

¹⁸ Maʼ kun xáantaleʼ le sukuʼunoʼob yéeyaʼanoʼob pʼaatloʼob way Luʼumaʼ yaan u tsʼaʼabal u selloʼob. Ken tsʼoʼokkeʼ le angeloʼoboʼ yaan u xuʼulul u kʼatkoʼob «u beel u kanpʼéel iikʼiloʼob Luʼum», bey kun káajal le nojoch muʼyajiloʼ (Apo. 7:1-3). Táanil tiʼ u káajal Armagedoneʼ, Jesuseʼ yaan u bisik teʼ kaʼan le yéeyaʼanoʼob pʼaatloʼob way Luʼumoʼ (Mat. 13:41-43). Bey túunoʼ wa k-kʼáat ka u yaʼal Jesús beyoʼon tamanoʼob ken taalakeʼ, desde bejlaʼeʼ unaj u chúukpajal k-óol k-áant u sukuʼunoʼob.