BEZALEL yéetel Oholiabeʼ, yaʼab baʼax u yojloʼob tiʼ construcción. Maʼ xaneʼ anchaj u beetkoʼob yaʼab ladrilloʼob teʼ kʼiinoʼob palitsiltaʼanoʼob Egiptooʼ. Chéen baʼaleʼ tsʼoʼok u yúuchtal u beetoʼob le meyajaʼ. Beoraaʼ tsʼoʼok u yéeyaʼaloʼob utiaʼal u beetkoʼob jatsʼuts meyajoʼob teʼ tabernaculooʼ. Letiʼobeʼ yaan u beetkoʼob junpʼéel jach maʼalob meyaj (Éxo. 31:1-11). Chéen baʼaleʼ maʼ yaʼab máax kun ilik le jatsʼuts meyaj ken u beetoʼoboʼ. ¿Lúub wa u yóoloʼob tu yoʼolal leloʼ? ¿U kʼáatoʼob wa kaʼach ka ilaʼak tumen u maasil le meyaj tu beetoʼoboʼ? Techeʼ, ¿a kʼáat wa xan ka ilaʼak le meyaj ka beetkoʼ?

Le baʼaxoʼob beetaʼaboʼob utiaʼal u meyajoʼob teʼ tabernaculooʼ, jach maʼalob bix úuchik u beetaʼaloʼob yéetel jach jatsʼutstakoʼob, ichil le baʼaloʼobaʼ tiaʼan le querubinoʼob beetaʼab de oro yéetel tsʼaʼaboʼob kaʼach tu yóokʼol u arcail le pactooʼ. Le apóstol Pablooʼ tu yaʼalaj ‹kiʼichkelmoʼob› (Heb. 9:5). ¡Chéen tukult bukaʼaj jatsʼutsil wal le meyajoʼob beetaʼab yéetel orooʼ! (Éxo. 37:7-9.)

Le jatsʼuts meyaj tu beetoʼob Bezalel yéetel Oholiaboʼ, wa ka kaxtaʼak teʼ kʼiinoʼobaʼ, jeʼel tak u bisaʼaloʼob tu maas maʼalobil le museoʼob utiaʼal ka chaʼantaʼak tumen u millonesil máakoʼoboʼ. ¿Jaytúul máakoʼob béeychaj u yilkoʼob le meyajoʼob tu beetoʼob Bezalel yéetel Oholiaboʼ? Jach chéen junpʼíit máakoʼob, tumen le querubinoʼoboʼ tiaʼanoʼob kaʼach ichil le Kiliʼich Kúuchil wa Santisimooʼ. Tsʼoʼoleʼ chéen u maas nojchil le sacerdoteʼob ku béeytal u yookloʼob kaʼach teʼ Santisimo cada añooʼ: tu Kʼiinil saʼatsaj Siʼipil (Heb. 9:6, 7).

Wa ka tsʼaʼabak a beet le jatsʼuts meyaj tu beetaj Bezalel yéetel Oholiaboʼ, ¿bix ken a wuʼuyilaba wa jach ta tsʼáaj a wóol meyaj chéen baʼaleʼ maʼ yaʼab máax kun ilik le baʼax jatsʼuts ta beetoʼ? Bejlaʼeʼ yaʼab máak uts tu tʼaan ka alabartaʼak u meyaj, ka aʼalaʼaktiʼ jach jatsʼuts le baʼax tu beetoʼ. Chéen baʼaleʼ toʼoneʼ maʼ bey k-tuukuliʼ. Jeʼex Bezalel yéetel Oholiabeʼ, u maas kʼaʼanaʼanileʼ letiʼe ka u yil maʼalob Jéeoba le meyaj k-beetkoʼ.

Tu kʼiiniloʼob Jesuseʼ, le fariseoʼoboʼ suuk u oraroʼob tuʼux jeʼel u yilaʼaloʼobeʼ. Chéen baʼaleʼ letiʼeʼ tu yaʼaleʼ maʼ unaj k-orar chéen utiaʼal ka ilaʼak tumen  u maasiliʼ, baʼaxeʼ unaj k-beetik utiaʼal ka uʼuyaʼak tumen Dios. Letiʼeʼ tu yaʼalaj: «A Taata túun ku yilik tuláakal baʼaloʼ yaan u boʼotiktech» (Mat. 6:5, 6). Jeʼex k-ilkoʼ, maas kʼaʼanaʼan le baʼax ku tuklik Jéeoba yoʼolal k-oracionoʼ, ke le baʼax ku tuklik u maasiloʼ. Bey xan unaj k-beetik yéetel le uláakʼ baʼaxoʼob ku kʼáatiktoʼon Jéeobaoʼ. Maʼ u tuʼubultoʼoneʼ letiʼeʼ mantatsʼ táan u yilik le baʼaxoʼob k-beetkoʼ.

Le ka tsʼoʼoksaʼab le meyajoʼob teʼ tabernaculooʼ, le Bibliaoʼ ku yaʼalikeʼ «le múuyaloʼ tu balaj u noj Paselil Muchʼtaloʼ, ka chuʼup túun yéetel u nojbeʼenil Yuumtsil» (Éxo. 40:34). Le baʼax úuchaʼ tu chíikbesaj jach maʼalob kʼaʼamik le meyaj tu beetoʼoboʼ. ¿Bix wal tu yuʼubiluba Bezalel yéetel Oholiab teʼ súutukiloʼ? Kex maʼ tsʼaʼab u kʼaabaʼob teʼ meyaj tu beetoʼoboʼ, jach kiʼimakchaj u yóoloʼob ka tu yiloʼob tsʼoʼok u kʼaʼamal (Pro. 10:22). Jeʼex máanik le tiempooʼ, kiʼimakchaj u yóoloʼob ka tu yiloʼob láayliʼ táan u meyaj le baʼax tu beetoʼoboʼ. Le ken kaʼa kuxkíintaʼakoʼobeʼ maases yaan u kiʼimaktal u yóoloʼob ken u yojéeltoʼob maas tiʼ quinientos años meyajnaj le tabernáculo utiaʼal u adorartaʼal Jéeobaoʼ.

Teʼ kʼiinoʼobaʼ ichil u organización Jéeobaeʼ, yaan sukuʼunoʼob ku dibujaroʼob, ku pintaroʼob, musicoʼob, fotografoʼob, redactoroʼob yéetel traductoroʼob. Tiʼ le bukaʼaj meyaj ku beetkoʼoboʼ, tiʼ mix junpʼéel ku chíikpajal u kʼaabaʼobiʼ. Lelaʼ bey xan u yúuchul yéetel le meyaj ku beetaʼal tiʼ le maas tiʼ 110 mil múuchʼuliloʼob yanoʼob tiʼ tuláakal yóokʼol kaaboʼ. ¿Ku yilaʼal wa le meyaj ku beetik le sukuʼunoʼob tsʼaʼan u yiloʼob le cuentas teʼ congregacionoʼ? ¿Ku yilaʼal wa le bukaʼaj meyaj ku beetik le secretario utiaʼal u túuxtik le informe cada mes tu najil Beteloʼ? ¿Ku yilaʼal wa le meyaj ku beetik juntúul sukuʼun wa juntúul kiik le ken u yutskíintoʼob wa baʼax ku kʼastal tu Najil Reinooʼ?

Bezalel yéetel Oholiabeʼ jach maʼalob meyaj tu beetoʼob, chéen baʼaleʼ mix junpʼéel premio tu kʼamoʼob tu yoʼolal leloʼ. Le baʼax maas maʼalob tu kʼamoʼoboʼ letiʼe u biskubaʼob maʼalob yéetel Jéeoba, le Máax jach tu jaajil tu yilaj le bukaʼaj meyaj tu beetoʼoboʼ. Le óolaleʼ unaj k-eʼesik kabal óolal yéetel unaj k-meyaj jeʼex úuchik u beetik Bezalel yéetel Oholiaboʼ.