LE BIBLIAOʼ ku yaʼalikeʼ le luʼum aʼalaʼab u tsʼaʼabal tiʼ le israelitaʼoboʼ yaʼab u nukuch cheʼiloʼob (1 Rey. 10:27; Jos. 17:15, 18). Chéen baʼaleʼ bejlaʼeʼ yaʼab tiʼ le cheʼoboʼ tsʼoʼok u pʼáatal minaʼan, le oʼolal yaʼab máak tuklik wa jach tu jaajil anchaj yaʼab kʼáaxoʼob tu luʼumil Israel jeʼex u yaʼalik le Bibliaoʼ.

Junpʼéel libroeʼ ku yaʼalikeʼ «tu luʼumil Israeleʼ maas yaʼab u kʼáaxil kaʼachi ke bejlaʼeʼ» (Life in Biblical Israel). Teʼ tuʼux yaan le nukuch puʼukoʼoboʼ yaan kaʼach cheʼob ku kʼaabaʼtikoʼob pino de Alepo (Pinus halepensis), coscoja de Palestina (Quercus calliprinos) yéetel terebinto (Pistacia palaestina). Yéetel teʼ Sefelaoʼ yaan kaʼach yaʼab sicomorosiʼ (Ficus sycomorus), le lugaraʼ tiaʼan kaʼach naatsʼ tiʼ le puʼukoʼob maas kaʼanaltak yaan Israeloʼ yéetel naatsʼ tiʼ u Kʼáaʼnáabil le Mediterraneooʼ.

Uláakʼ junpʼéel libro ku tsolik bix le pakʼaloʼob ku chíikpajal teʼ Bibliaoʼ, ku yaʼalikeʼ tu luʼumil Israeleʼ yaan tuʼuxoʼob tsʼoʼok u pʼáatal minaʼan cheʼobiʼ (Plants of the Bible). ¿Baʼaxten? Le librooʼ ku yaʼalikeʼ jujunpʼíitil úuchik u chʼéejel le cheʼoboʼ, tumen le máakoʼoboʼ tsʼoʼok u kolikoʼob le kʼáaxoʼob utiaʼal u maas antal tuʼux u pakʼikoʼob suʼuk, u chʼaʼikoʼob u cheʼiloʼob wa utiaʼal u beetkoʼob uláakʼ baʼaloʼob ku meyajoʼob tiʼ wíinik.