«¡MAʼ TIN naʼatik baʼaxten maʼ a kʼáat a adorart a úuchben láakʼtsiloʼob kimenoʼoboʼ! Maʼ wa ta tsʼáaik cuentaeʼ tu yoʼolaloʼobeʼ kuxaʼanoʼon. Jach minaʼan a suʼtal. ¿Baʼaxten ku xuʼulul a beetik junpʼéel baʼax u kaʼansmajtoʼon k-úuchben láakʼtsiloʼob? Wa ku xuʼulul a adorartikoʼobeʼ, maʼ táan a respetartik k-religioniʼ.» Ka tsʼoʼok u yaʼalikten in maama lelaʼ, túupʼ u yokʼol.

Teneʼ kin xokik kaʼach le Bibliaoʼ tumen jujunpʼéel mesoʼob táanil tiʼ lelaʼ, le j-jaajkunajoʼob tiʼ Jéeobaoʼ tu yaʼaloʼob tiʼ in maama wa jeʼel u xokik le Biblia tu yéeteloʼoboʼ. Letiʼeʼ maʼ tu yóotiʼ, chéen baʼaleʼ utiaʼal maʼ u tuklaʼal wa kʼasaʼaneʼ tu yaʼalajtiʼob ka u tsʼáaʼob xook ten. Chéen baʼaleʼ le ka xuʼul in beetik le baʼaxoʼob suuk u beetik in láakʼtsiloʼoboʼ, kʼuuxilnaj tin wéetel. Talam tin wilil u xuʼulul in beetik baʼax ku yaʼalikten, tumen jach suuk in obedecertik. Pero beoraaʼ in wojel maas kʼaʼabéet in beetik baʼax uts tu tʼaan Jéeoba. U jaajileʼ talamchajten, pero tu yáanten Jéeoba.

Toʼoneʼ budistaʼon kaʼachi, lelaʼ maases letiʼ u religión u kajnáaliloʼob Japonoʼ. Chéen baʼaleʼ ka máan kaʼapʼéel mes káajak in xook yéetel le j-Jaajkunajoʼoboʼ, tin tsʼáaj cuenta jach jaaj baʼax ku kaʼansik le Bibliaoʼ. Tin wojéelteʼ yaan juntúul in Taata teʼ kaʼanoʼ yéetel jach taakchaj in kʼaj óoltik. Teneʼ jach uts tin tʼaan in tsikbaltik kaʼach yéetel in maama baʼax táan in kanik. Maʼ xáanchajeʼ ka káaj in bin teʼ muchʼtáambaloʼob ku beetaʼal utiaʼal domingo teʼ Najil Reinooʼ. Ka tin kanaj uláakʼ baʼaloʼob ku yaʼalik le Bibliaoʼ tin waʼalaj tiʼ in maamaeʼ yaan u xuʼulul in táakpajal tiʼ le baʼaxoʼob ku beetik le budistaʼoboʼ. Desde le kʼiin jeʼeloʼ jelpaj u modos. Letiʼeʼ tu yaʼalajten: «Suʼtsil u yantal ichil k-familia juntúul máax maʼatech u respetartik u úuchben láakʼtsiloʼob». Ka tsʼoʼokeʼ tu yaʼalajten ka xuʼuluk in xokik le Biblia yéetel in bin teʼ muchʼtáambaloʼoboʼ. Mix juntéen tin tuklaj u yaʼalikten leloʼ. Hasta bey maʼ in maamaeʼ.

In papaeʼ láayliʼ bey u tuukul jeʼex in maamaoʼ. Teneʼ tsʼoʼok kaʼach in kanik teʼ capítulo 6 tiʼ Efesoiloʼoboʼ kʼaʼabéet in wuʼuyik u tʼaanoʼob. Ka káajeʼ tin tukleʼ wa kin beetik baʼax ku yaʼalikoʼobeʼ maʼ xaaneʼ yaan u aceptartikoʼob baʼax kin creertik yéetel yaan k-kaʼa bisikba tubeel. Como táan u náatsʼal u kʼiinil in beetik examenoʼob utiaʼal in wokol secundariaeʼ, tin tsʼáajinba de acuerdo tu yéeteloʼobeʼ maʼ tin bin muchʼtáambal ich tres meses yéetel maas yaan in tsʼáaik in wóol xook. Chéen baʼaleʼ tin waʼalaj tiʼ Jéeobaeʼ ken tsʼoʼokok le examenoʼoboʼ yaan in kaʼa bin muchʼtáambal.

Pero maʼ maʼalob le baʼax tin chʼaʼtuklaj in beetkoʼ. Yáaxeʼ tin tukleʼ maʼ tin náachtal tiʼ Dios tumen chéen tres meses kun xuʼulul in bin muchʼtáambal, chéen baʼaleʼ jach séeb úuchik u pʼáatal  minaʼan in fe. Yéetel u kaʼapʼéeleʼ in papá yéetel in maamaeʼ maʼ tu respetartoʼob le acuerdo t-beetoʼ, baʼaxeʼ seguernaj u yaʼalikoʼobten ka xuʼuluk in muchʼkinba yéetel le j-Jaajkunajoʼoboʼ.

Yaʼab tiʼ le j-Jaajkunajoʼob tin kʼaj óoltaj úuchik in bin teʼ Najil Reinooʼ láayliʼ pʼektaʼaboʼob tumen u láakʼtsiloʼobeʼ. Letiʼobeʼ tu yaʼaloʼobteneʼ Jéeobaeʼ jeʼel u yáantken utiaʼal in aktáantik le problemaaʼ (Mat. 10:34-37). Tsʼoʼoleʼ tu yaʼaloʼob xan teneʼ wa ku chúukpajal in wóoleʼ, maʼ xaaneʼ in láakʼtsiloʼobeʼ jeʼel u káajal u meyajtikoʼob Jéeobaeʼ. Le oʼolal tin kʼáat óoltaj tiʼ Jéeoba ka u yáanten confiar tiʼ letiʼ.

In láakʼtsiloʼobeʼ jach ku kaxtikoʼob kaʼach baʼax u beetoʼob utiaʼal u xuʼulul in xokik le Bibliaoʼ. In maamaeʼ jach ku kʼáat óoltik ten kaʼachi, pero le ken u beeteʼ maʼatech in waʼalik mix baʼal tiʼ tumen wa maʼeʼ chéen baʼateltʼaan k-beetik ken tsʼoʼokok. Letiʼeʼ ku defendertik baʼax ku creertik bey xan teen. Bejlaʼeʼ kin tuklikeʼ wa ka in chʼaʼ en cuenta bix u yuʼubikubaeʼ, bejlaʼa maʼ t-sen baʼateltʼaan kaʼacheʼ. In papá yéetel in maamaeʼ ku tsʼáaikoʼobten kaʼach u maasil meyaj in beet tin wotoch utiaʼal maʼ in jóokʼol. Yaan horaeʼ teʼ ku pʼatkenoʼob teʼ calleoʼ wa maʼatech u tsʼáaikoʼob in woʼoch.

In maamaeʼ tu kʼáataj áantaj tiʼ u maasil máakoʼob utiaʼal ka u yaʼaloʼobten ka xuʼuluk in xokik le Bibliaoʼ. Tu yaʼalaj tiʼ in maestro, pero letiʼeʼ maʼ tu tsʼáajuba tin favoriʼ mix tin contra. Tu bisen xan yiknal u patrón utiaʼal ka u tsolten mix baʼal u biilal le religionoʼoboʼ. Tsʼoʼoleʼ tu tʼanaj xan u láakʼtsiloʼob, táan u yokʼol táan u yaʼaliktiʼob ka áantaʼak. Tuláakal le baʼax tu beetaʼ jach ku beetik in kʼuuxil kaʼachi. Chéen baʼaleʼ ken xiʼiken teʼ muchʼtáambaloʼoboʼ le ancianoʼoboʼ ku yaʼalikoʼobten ka tuukulnaken tiʼ tuláakal le  máakoʼob tsʼoʼok u kʼaʼaytaj in maama sin ke u tsʼáaik cuentaoʼ.

Chéen baʼaleʼ kʼuch u kʼiinil in wokol universidad. In papá yéetel in maamaeʼ u kʼáatoʼob ka yanakten tuláakal baʼax kʼaʼabéet utiaʼal u binten utsil. Letiʼobeʼ u kʼáatoʼob kaʼach ka in kaxt junpʼéel maʼalob meyaj, pero teneʼ yaanal baʼax taak in beetik. Como ken tsikbalnakoʼon ku suut baʼateltʼaanileʼ, maas tin tsʼíibtajtiʼob yaʼab cartaʼob utiaʼal in waʼaliktiʼob baʼax taak in beetik. Junpʼéel kʼiineʼ in papaeʼ jach pʼujaʼan ka tu yaʼalajten: «¡Wa ka tuklik jeʼel u páajtal a kaxtik meyajeʼ, kaxt sáamal. Pero wa maʼ ta kaxtikeʼ maʼ ten k-kaʼa kʼamech wayeʼ!». Orarnajen tiʼ Jéeoba utiaʼal in waʼaliktiʼ baʼax ku yúuchulten. Ka sáaschaj tuláakʼ kʼiineʼ, mientras táan in kʼaʼaytajeʼ, kaʼatúul kiikoʼobeʼ tu yaʼaloʼobten wa jeʼel in kaʼansik u paalaloʼob utiaʼal u maas maʼalobtak u xookoʼob escuelaeʼ. In papaeʼ maʼ utschaj tu tʼaan lelaʼ, hasta xuʼul u tʼanken. Pʼáat maʼatech u beetik in cuentail. In maamaeʼ tu yaʼalajteneʼ wa maleanteneʼ maas maʼalob, ke ka in beetinba j-jaajkunaj tiʼ Jéeoba.

Yaan horaeʼ kin kutal in tukult kaʼach wa uts tu tʼaan Jéeoba in tsʼáaikinba tu contra baʼax u kʼáat in papá yéetel in maama. In orar yéetel in tuukul tiʼ baʼax ku yaʼalik le Biblia yoʼolal bix u yaabiltmiloʼon Diosoʼ, tu yáanten utiaʼal in tsʼáaik cuentaeʼ in papá yéetel in maamaeʼ chéen táan kaʼach u kaxtikoʼob in wutsil. Yéetel u yáantaj Jéeobaeʼ tin chʼaʼtuklaj tubeel baʼax ken in beete. Yoʼolal lelaʼ káaj in disfrutartik in jóokʼol kʼaʼaytaj yéetel tin chʼaʼtuklaj in beetik in precursorail.

Jujuntúul kiikoʼob yaan teʼ múuchʼulil u yojloʼob kaʼach taak in beetik in precursorailoʼ, tu yaʼaloʼobten ka in páaʼt u máan junpʼíit tiempo mientras u xuʼulul u jach kʼuuxil in papá yéetel in maama. Tin kʼáataj tiʼ Jéeoba ka u tsʼáaten naʼatil, tin xokaj publicacionoʼob jeʼel u yáantkeneʼ, tin tuklaj jach baʼax taak in beetik, tsʼoʼoleʼ tsikbalnajen yéetel jujuntúul sukuʼunoʼob kʼanchajaʼan u tuukuloʼob. Ka tsʼoʼok in beetik lelaʼ tin tsʼáaj cuentaeʼ maas kʼaʼabéet in beetik baʼax uts tu tʼaan Dios. Tsʼoʼoleʼ tin tsʼáaj cuentaeʼ maʼ xaaneʼ maʼ ken u kʼex u modos in papá yéetel in maama, kex maʼ in séeb beetik in precursorail.

Káaj in beetik in precursorail jach teʼ año jóokʼen escuelaoʼ. Ka máan kʼiineʼ, taakchaj in bin kʼaʼaytaj tuʼux maas kʼaʼabéet áantaj. Como in papá yéetel in maama maʼ u kʼáatoʼob ka xiʼikeneʼ, tin páaʼtaj in cumplirtik 20 años. Utiaʼal maʼ u sen tukliken in maamaeʼ tin kʼáataj tiʼ le sucursal wa jeʼel u páajtal in bin áantaj tu noojol Japón, tuʼux kajakbal jujuntúul tiʼ k-láakʼtsiloʼoboʼ.

Teʼ tuʼux binen áantajoʼ kiʼimakchaj in wóol ka tin wilaj u yokjaʼ yaʼab tiʼ le máakoʼob tin tsʼáaj xook tiʼoboʼ. Utiaʼal in maas meyajtik Jéeobaeʼ káaj in kanik inglés. Teʼ múuchʼulil tuʼux yanenoʼ yaan kaʼach kaʼatúul precursor especialoʼob jach j-meeyjiloʼob yéetel uts tu tʼaan u yáantajoʼob. U ejemploʼobeʼ tu beetoʼob in tsʼíiboltik in beetik in precursora especialil. Teʼ kʼiinoʼob jeʼeloʼ kaʼatéen jach kʼojaʼanchaj in maama, ka suunajen tin wotoch utiaʼal in kanáante. Úuchik in beetik lelaʼ jach jaʼakʼ u yóol yéetel kʼexpaj u modos.

Ka máan siete añoseʼ, Atsushi, juntúul tiʼ le precursoroʼob especialoʼob tsʼoʼok in yáax aʼalikoʼ, tu túuxtajten junpʼéel carta tuʼux ku yaʼalikten taak u tsʼoʼokol u beel yéetel tu kʼáatajten wa jeʼel in biskinba tu yéeteleʼ. Teneʼ mix juntéen in tukult kaʼach le baʼax tu yaʼalajtenoʼ yéetel maʼ in wojel kaʼach wa uts tu yicheniʼ. Junpʼéel mes máan tak ka tin núukajtiʼ, tin waʼalajtiʼeʼ jeʼel u páajtal k-bisikba utiaʼal k-maas kʼaj óoltikbaeʼ. Le táan k-bisikbaoʼ t-tsʼáaj cuentaeʼ tiʼ yaʼab baʼaxoʼob igual k-tuukul, k-kʼáat k-maas meyajt Jéeoba yéetel jeʼel k-óotik k-beet jeʼel baʼaxak meyajil ka u tsʼáatoʼon Jéeobaeʼ. Ka máan kʼiineʼ tsʼoʼok in beel yéetel Atsushi. ¡Jach kiʼimakchaj in wóol ka tin wilaj bin in maama, in papá bey xan u maasil in láakʼtsiloʼob teʼ bodaoʼ!

 Tu kaʼatúulaloʼon seguernaj k-beetik k-precursoril. Maʼ úuch tiʼ leloʼ, Atsushieʼ tsʼaʼab u beet u sustitutoil tiʼ le superintendenteʼob tiʼ circuitooʼ. Ka tsʼoʼokeʼ tsʼaʼab k-beet precursor especialil, tsʼoʼoleʼ invitartaʼaboʼon bey superintendente tiʼ circuitoeʼ. Le yáax juntéen ka tsʼoʼok k-láaj xíimbaltik le múuchʼuliloʼob yaan teʼ circuitooʼ, tʼaʼanoʼon tiʼ teléfono tumen le sucursaloʼ, ka tu kʼáatajtoʼon: «¿Jeʼel wa a bineʼex a xíimbalteʼex junpʼéel circuito tu luʼumil Nepaleʼ?».

Ka aʼalaʼabtoʼon lelaʼ jáan máan tin tuukul bix ken u yuʼubiluba in papá yéetel in maama ken u yojéeltoʼob yaan in bin maas náach. Ka tsʼoʼokeʼ tin tʼanoʼob, in papá núuk le telefonooʼ. Letiʼeʼ tu yaʼalajten: «Jach jatsʼuts le tuʼux kan binoʼ». Jach junpʼéel semana táanil tiʼ lelaʼ juntúul u amigo in papaeʼ tu síiaj tiʼ junpʼéel libro ku tʼaan tiʼ u luʼumil Nepal, le oʼolal hasta tsʼoʼok u tuklikeʼ junpʼéel lugar jach jatsʼuts utiaʼal u bin máak xíimbaliʼ.

U kajnáaliloʼob Nepaleʼ jach utsoʼob, yéetel jach uts t-tʼaan kaʼach k-áantajiʼ. Chéen baʼaleʼ tsʼaʼabtoʼon uláakʼ asignación, beoraaʼ le circuito ken k-xíimbaltoʼ táakaʼan tak u luʼumil Bangladeshiʼ, junpʼéel luʼumil naatsʼ tiʼ Nepal pero jach jelaʼan. Kʼaʼabéetchaj k-kʼaʼaytaj jejeláas bixi. Ka máan cinco añoseʼ, kaʼa suunajoʼon Japón, tuʼux táan k-meyaj tak bejlaʼa bey superintendente tiʼ circuitoeʼ.

Úuchik k-áantaj tu luʼumil Bangladesh, Japón yéetel Nepaleʼ tu yáanten in maas kʼaj óolt Jéeoba. Cada luʼumileʼ yaanal baʼaxoʼob uchaʼaniʼ yéetel jejeláas baʼaxoʼob suukaʼan u beetaʼaliʼ. Pero kex jelaʼan bix u kuxtal le máakoʼob tiʼ cada luʼumiloʼ, tsʼoʼok in wilkeʼ Jéeobaeʼ u yaabiltmaj le máakoʼoboʼ, mix máak u pʼekmaj, ku yáantikoʼob yéetel ku bendecirtikoʼob.

Jéeobaeʼ jach tsʼoʼok u bendecirtiken: tsʼoʼok u chaʼik in kʼaj óoltik, tsʼoʼok u tsʼáaikten u privilegioil in kʼaʼaytaj, tsʼoʼok u tsʼáaikten juntúul íichamtsil jach uts yéetel tsʼoʼok u yáantken in chʼaʼtukult tubeel baʼax ken in beete. Bejlaʼeʼ maʼalob in biskinba yéetel Jéeoba bey xan yéetel in familia. Kin tsʼáaik gracias tiʼ Jéeoba, tumen bejlaʼeʼ teen yéetel in maamaeʼ jach maʼalob amigaʼon. Kiʼimak in wóol tumen kin biskinba tubeel yéetel Dios bey xan yéetel in maama.