Yaan Máaxoʼobeʼ Taak U yojéeltkoʼob

¿Kʼaʼabéet wa a creertik le Trinidad utiaʼal ka a beetaba cristianooʼ?

▪ Upʼéel libro beetaʼan utiaʼal le paalaloʼob ku xookoʼob secundaria jóokʼ tu jaʼabil 2007 tu kaajil Dinamarcaoʼ, ku yaʼalikeʼ u j-jaajkunajoʼob Jéeobaeʼ (testigos de Jehová) upʼéel tiʼ le religionoʼob ku jóoʼskoʼob tiʼ le Biblia le baʼaxoʼob ku kaʼanskoʼoboʼ (Danske Verdensreligioner: Kristendom [Las religiones del mundo en Dinamarca: El cristianismo]). Tu luʼumil Dinamarcaeʼ, u j-jaajkunajoʼob Jéeobaeʼ tiaʼanoʼob ichil le kampʼéel religionoʼob maas ku creertaʼaloʼ.

Le baʼax tu yaʼalaj le máax tsʼíibt le libro tu yoʼolal u j-jaajkunajoʼob Jéeobaoʼ tu beetaj u tsʼíikil u obispoi le Iglesia Nacional tiʼ Dinamarcaoʼ. Letiʼeʼ tu yaʼalaj: «Maʼ in kʼaj óol mix utúul teólogo ka in wuʼuy u yaʼalik wa cristianoiʼ». ¿Baʼaxten tu yaʼalaj lelaʼ? Tumen «maʼatech u creertikoʼob le Trinidadoʼ, upʼéel baʼax unaj u creertik tuláakal le cristianoʼoboʼ».

Le máax tsʼíibt le libroaʼ Annika Hvithamar, letiʼeʼ jach yaʼab baʼaloʼob u yojel tiʼ baʼax yaan yil yéetel religión yéetel tu yaʼaleʼ letiʼeʼ maʼ bey u tuukul jeʼex le obispooʼ. Tu yaʼalajeʼ le ken kʼáataʼak tiʼ le máakoʼob baʼaxten ku yaʼalikoʼob cristianoʼoboʼ, maʼatech u yaʼalikoʼob: «Tumen kin creertik le Trinidadoʼ». Ichil le librooʼ yaan upʼéel jaats ku kʼaabaʼtik: “¿Eres cristiano?”, teʼeloʼ letiʼeʼ ku yaʼalik: «U kaʼansajil le Trinidadoʼ upʼéel tiʼ le baʼaxoʼob maas talam u naʼataʼal ichil le teología cristianaoʼ (wa le baʼaxoʼob yaan yil yéetel Dios ku creertik le cristianoʼoboʼ)». Tu yaʼalaj xaneʼ: «Utúul cristiano maʼ u xok mix baʼal tiʼ teologiaeʼ yaan u talamtal u naʼatik baʼaxten u Dios le jaajil cristianoʼoboʼ maʼ óoxtúul diosoʼobiʼ, chéen utúul».

Le Bibliaoʼ jach tʼáalkab u yaʼalik máax Dios yéetel máax Jesús. Ichil le Bibliaoʼ mix tuʼux ku chíikpajal le tʼaan trinidadoʼ yéetel mix tuʼux xan ku tsʼáaik naʼatbil wa bey Diosoʼ. Le Bibliaoʼ ku yaʼalikeʼ Jesucristoeʼ u yáax Paal Dios (Colosailoʼob 1:15, NM). Ku yaʼalik xaneʼ, Jesuseʼ letiʼe «máax ku páajtal u tsʼáaik maʼalobil tuláakal máak tu táan Yuum Jajal Dios[oʼ]» (1 Timoteo 2:5). Yoʼolal Dioseʼ ku yaʼalik: «Teech, a kʼaabaʼeʼ Jéeoba, chéen teech u Sen Kaʼanlil yóokʼol tuláakal le luʼumaʼ» (Salmo 83:18, NM).

U j-jaajkunajoʼob Jéeobaeʼ ku yilkoʼobeʼ jach kʼaʼabéet u tsʼáaik u fejoʼob tiʼ Jesús (Juan 3:16). Le oʼolal xaneʼ ku beetkoʼob le baʼax tu yaʼalaj Jesusaʼ: «Tumen ku yaʼalik le Kiliʼich Tsʼíiboʼ: [Adorart] Yuumtsil a Jajal Dios, meyajt xan chéen letiʼ» (Mateo 4:10). Bey túunoʼ le jaajil cristianoʼoboʼ letiʼe máaxoʼob beetik le baʼaxoʼob tu yaʼalaj Cristooʼ.

[U tsolajil le oochel teʼ táan juʼun 11]

«U kaʼansajil le Trinidadoʼ upʼéel tiʼ le baʼaxoʼob maas talam u naʼataʼal ichil le teología cristianaoʼ»