Kaanbalnakoʼon tiʼ u Tʼaan Dios

¿Yaan wa u kaʼa kuxkíintaʼal le kimenoʼoboʼ?

Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.

1. ¿Yaan wa u kaʼa kuxkíintaʼal le kimenoʼoboʼ?

Le ka kʼuch Jesús Betania, junpʼéel chan kaaj naatsʼ tiʼ Jerusaleneʼ, cuatro kʼiinoʼob kíimik Lázaro, u amigo. Jesuseʼ bin yéetel Marta bey xan María, u kiikoʼob Lázaro, teʼ tuʼux muʼukoʼ, yéetel maʼ xáanchaj ka kʼuch yaʼab máakoʼobiʼ. ¡Chéen tukult bukaʼaj kiʼimakchajik u yóol Marta yéetel María le ka tu yiloʼob tsʼoʼok u kaʼa kuxkíintaʼal Lázaro tumen Jesusoʼ! (Xok Juan 11:20-24, 38-44.)

Martaeʼ ku creertik kaʼach yaan u kaʼa kuxtal le kimenoʼoboʼ. Tsʼoʼoleʼ le máaxoʼob meyajtik Jéeobaoʼ desde úuch káajak u creertikoʼobeʼ, ichil junpʼíit kʼiineʼ yaan u kuxkíintaʼal le kimenoʼob way Luʼum tumen Diosoʼ. (Xok Job 14:14, 15.)

2. ¿Bix yanil le kimenoʼoboʼ?

Mix baʼal ku pʼáatal kuxaʼanil tiʼ máak ken kíimik (Ezequiel 18:4). Tuláakal wíinikeʼ beetaʼan yéetel polvo (Génesis 2:7; 3:19). Le ken kíimik máakeʼ ku xuʼulul u tuukul. Le oʼolaleʼ le ka tsʼoʼok u kaʼa kuxtal Lazaroeʼ maʼ tu tsikbaltaj baʼax tu beetaj teʼ kʼiinoʼob kimenoʼ, tumen le kimenoʼoboʼ maʼ tu muʼyajoʼob mix tu yuʼubikoʼob mix baʼal. (Xok Salmo 146:4; Eclesiastés 9:5, 10.)

Jeʼex túun k-ilkoʼ le kimenoʼoboʼ maʼatech u muʼyajtikoʼob mix baʼal. Le oʼolaleʼ le baʼaxoʼob ku creertaʼal tu yoʼolal u muʼyaj le máaxoʼob kʼasaʼanoʼob ken kíimikoʼoboʼ, maʼ jaajiʼ. Le kaʼansajaʼ ku beetik u yúuchul tʼaan tu contra Dios, tumen letiʼeʼ maʼatech u tóokik máak tiʼ junpʼéel infierno jeʼex u yaʼalaʼaloʼ. (Xok Jeremías 7:31.)

 3. ¿Jeʼel wa u páajtal u tʼaan máak yéetel le kimenoʼoboʼ?

Le kimenoʼoboʼ maʼ tu páajtal u tʼaanoʼob (Salmo 115:17). Baʼaleʼ le demonioʼoboʼ jeʼel u páajtal u tʼaanoʼob yéetel máakeʼ, tsʼoʼoleʼ jeʼel u beetkoʼob xan u tuklaʼal letiʼe kimen ku tʼaanoʼ (2 Pedro 2:4). Le oʼolal Jéeobaeʼ ku yaʼalik maʼ maʼalob ka tʼaanakoʼon yéetel le kimenoʼoboʼ. (Xok Deuteronomio 18:10, 11.)

4. ¿Máaxoʼob kun kaʼa kuxkíintbil?

Teʼ túumben luʼumoʼ u millonesil máakoʼob kun kaʼa kuxkíintbil, ichileʼ táakaʼan jujuntúul máaxoʼob tu beetoʼob baʼaloʼob kʼaastak tumen maʼ u yojloʼob baʼax ku yaʼalik u tʼaan Diosiʼ. (Xok Lucas 23:43; Beetaʼanoʼob [Hechos] 24:15.)

Le máaxoʼob kun kaʼa kuxkíintbiloʼ yaan u páajtal u kankoʼob u jaajil yoʼolal Dios yéetel yaan u páajtal u beetkoʼob baʼax ku yaʼalik utiaʼal u yeʼeskoʼob yaan u fejoʼob tiʼ Jesús (Apocalipsis 20:11-13). Le máaxoʼob kun beetik baʼax maʼalobeʼ mix bikʼin kun kaʼa kíimloʼob. Baʼaleʼ le máaxoʼob maʼ tu pʼatik u beetkoʼob baʼax kʼaasoʼ yaan u kaʼa kíimloʼob tumen jeʼex tu yaʼalil Jesuseʼ «bíin kaʼa púutkuxlakoʼob utiaʼal ka xotʼkíintaʼakoʼob». (Xok Juan 5:28, 29.)

5. ¿Baʼax ku kaʼansik toʼon yoʼolal Dios u kaʼa kuxkíintaʼal le kimenoʼoboʼ?

U kaʼa kuxkíintaʼal le kimenoʼoboʼ chéen ku béeytal úuchik u túuxtik Dios u Hijo kíimil t-oʼolaloʼ. Junpʼéel bix u yeʼesik Jéeoba u yaabilaj yéetel u chʼaʼ óotsilil. (Xok Juan 3:16; Romailoʼob 6:23.)

Wa a kʼáat a wojéelt u maasileʼ, ilawil u xookil seis yéetel siete tiʼ le libroaʼ, beetaʼan tumen u j-jaajkunajoʼob Jéeoba.

¿Baʼax jach tu jaajil Ku Kaʼansik Le Bibliaoʼ?

[U tsolajil le oochel teʼ táan juʼun 16]

Adaneʼ beetaʼab yéetel polvo