¿Baʼax kʼiin ken káajak u baʼatelil Armagedón?

«Paakatnajeneʼ ka tin wilaj yaʼabkach máakoʼob taaljaʼanoʼob tiʼ tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob, [...] máanjaʼanoʼob tiʼ nojoch yaayaj óolal.» (APOCALIPSIS 7:9, 14)

LE BAʼAXOʼOB ku yúuchul bejlaʼaʼ ku yeʼesik chéen táan u páaʼtaʼal u kʼuchul le Armagedonoʼ. ¿Bix k-ojéeltik lelaʼ?

Teʼ kʼiinoʼobaʼ u millonesil máakoʼob ku meyajtikoʼob Jéeoba yéetel ku beetkoʼob le baʼax ku yaʼalik le Bibliaoʼ. Le máakoʼobaʼ, kex jejeláas kaajoʼob tuʼux u taaloʼob yéetel jejeláas u idiomaʼobeʼ, u yaabiltmubaʼob tu baatsiloʼob tumen táan u meyajtikoʼob Dios. Le yaabilaj beyaʼ letiʼe ku yilaʼal ichil u j-jaajkunajoʼob Jéeobaoʼ (testigos de Jehová) (Juan 13:35).

Maʼ kun xáantaleʼ, Satanás yéetel le máaxoʼob tsaypachtikoʼ yaan u baʼateloʼob tu contra u utsul kaajal Dios tumen yaan u tuklikoʼobeʼ mix máak kanáantkoʼob (Ezequiel 38:8-12; Apocalipsis 16:13, 14, 16). ¿Bix k-ojéeltik bey kun úuchloʼ? Le Bibliaoʼ ku yaʼalik baʼaxoʼob kun úuchul táanil tiʼ u taal le Armagedonoʼ yéetel yaʼab tiʼ le baʼaloʼobaʼ táan u béeychajloʼob teʼ kʼiinoʼobaʼ.

Profecíaʼob táan k-ilik u béeychajal

Le disipuloʼoboʼ tu kʼáatoʼob tiʼ Jesús baʼax kʼiin ken xuʼulsaʼak le kʼasaʼan máakoʼoboʼ (Mateo 24:3). Utiaʼal u yeʼesiktiʼob le baʼaxoʼob kun taal u kʼiin u yúuchloʼ, Jesuseʼ tu yaʼalaj: «Junpʼéel kaajeʼ yaan u bin [...] baʼateʼel tiʼ uláakʼ kaaj, yéetel junpʼéel luʼumeʼ yaan u baʼateʼel tiʼ uláakʼ luʼum; yéetel yaan u yantal wiʼijil, kʼojaʼanil yéetel kíilbal luʼum jejeláas tuʼuxoʼob». Tsʼoʼoleʼ tu yaʼalaj xan: «Tuláakal lelaʼ chéen u káajbalil le baʼax kun muʼyajtbiloʼ» (Mateo 24:7, 8). Le apóstol Pablooʼ tu yaʼaleʼ lelaʼ «u tsʼook jaʼaboʼob», yéetel tu yaʼaleʼ leloʼobaʼ «talam kʼiinoʼob» (2 Timoteo 3:1). Le baʼaxoʼob ku yúuchloʼobaʼ, ¿ku chíikbesik wa táan u béeychajal le profecíaʼoboʼ?

¿Baʼaxten yaan u jach talamtal le kuxtal teʼ tu tsʼook kʼiinoʼobaʼ? Le apóstol Juanoʼ tu yaʼaleʼ Satanás yéetel u kʼasaʼan angeloʼobeʼ «chéen junpʼíit kʼiin pʼaatal[tiʼob]» way Luʼumeʼ.  Tu yaʼalaj xaneʼ Satanaseʼ «pʼujaʼan» (Apocalipsis 12:7-12). ¿Máasaʼ tuláakal tuʼux yaan kʼasaʼan máakoʼob yéetel séeb u pʼuʼujuloʼob?

Jesuseʼ tu yaʼaleʼ teʼ kʼiinoʼob jach talamtakoʼ yaan u beetaʼal junpʼéel nojoch meyaj: «U maʼalob péektsil le [reinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14). U j-jaajkunajoʼob Jéeobaeʼ táan u kʼaʼaytikoʼob u maʼalob péektsilil le Reino ich maas tiʼ 235 luʼumoʼoboʼ yéetel yaan folletoʼob yéetel uláakʼ jóoʼsaʼanil tiʼob ich maas tiʼ quinientos idiomaʼob. Ku jóoʼskoʼob kaʼapʼéel revistaʼob, U Pʼíich Tulumil Kanan yéetel ¡Despertad! Lelaʼ letiʼe revistaʼob maas yaʼab u tʼoʼoxol tuláakal yóokʼol kaaboʼ. Tsʼoʼok xan u sutkoʼob le Biblia kex ich cien jejeláas idiomaʼoboʼ. Tuláakal le meyajaʼ ku béeytal yéetel taakʼin siibil u beetaʼal. Le meyaj ku beetkoʼobaʼ, ¿maʼ wa ta tʼaan letiʼe u profecía Jesús táan u béeytaloʼ?

Le Bibliaoʼ ku yaʼalik baʼax kun káajsik le baʼateʼel ichil Jéeoba Dios yéetel u enemigoʼoboʼ. Koʼox ilik óoxpʼéel profecíaʼob yaan k-ilik u béeychajloʼob.

Profecíaʼob kun béeychajloʼob maʼ kun xáantal

Yáax profecía. Le Bibliaoʼ ku yaʼalikeʼ u gobiernoiloʼob le yóokʼol kaabaʼ yaan u yaʼalikoʼob «tuláakal jejetsʼkil yéetel maʼalob yanil», tumen maʼ xaaneʼ yaan u tuklikoʼobeʼ jach nukaʼaj u xuʼulsoʼob le nukuch talamiloʼob yaan teʼ yóokʼol kaabaʼ. Baʼaleʼ le baʼaxoʼob kun úuchul le ken tsʼoʼokok u yaʼalaʼal lelaʼ maʼ letiʼe jeetsʼeliloʼ (1 Tesalonicailoʼob 5:1-3).

U kaʼapʼéel profecía. Tsʼoʼoleʼ jujuntúul gobiernoʼobeʼ yaan u líikʼloʼob tu contra le religionoʼob yaan tuláakal yóokʼol kaaboʼ. Teʼ Bibliaoʼ le gobiernoʼoboʼ ku chíikbesaʼaloʼob bey juntúul nojoch baʼalcheʼeʼ, yéetel le religionoʼob minaʼan u jaajil tiʼoboʼ bey juntúul koʼolel u natʼmaj le nojoch baʼalcheʼoʼ (Apocalipsis 17:3, 15-18). Ken xuʼulsaʼak le religionoʼob minaʼan u jaajil tiʼob tumen le gobiernoʼoboʼ, wa le nojoch baʼalcheʼoʼ, kex maʼ u tsʼáaikoʼob cuentaeʼ yaan u beetkoʼob baʼax u kʼáat Dios.

Le apóstol Pablooʼ ku yaʼalik bix kun úuchul lelaʼ: «Le diez u tsʼíitil baakoʼob ta wilaj tiʼ le nojoch baʼalcheʼoʼ yaan u pʼektikoʼob le x-núupkʼeban koʼoleloʼ, yaan xan u xúumpʼattikoʼob tu juunal yéetel chaknuul; yaan u jaantkoʼob u bakʼel u wíinklil yéetel yaan u tóokikoʼob tiʼ kʼáakʼ. Jajal Dios tsʼáa tu puksiʼikʼaloʼob ka u beetoʼob le baʼax u kʼáat letiʼeʼ» (Apocalipsis 17:16, 17).

U yóoxpʼéel profecía. Le ken tsʼoʼokok u xuʼulsik le religionoʼob minaʼan u jaajil tiʼoboʼ, le Kʼaasilbaʼaloʼ yaan u péeksik le gobiernoʼob utiaʼal u tsʼáaikubaʼob tu contra u kaajal Jéeobaoʼ (Apocalipsis 7:14; Mateo 24:21).

¿Baʼax yaan yil yéetel a kuxtal?

Wa maʼ páajchajak a xakʼaltik le baʼax ku yaʼalik le Bibliaoʼ, maʼ xaaneʼ ku talamtaltech a creertik jach tu jaajil yaan u béeytal tuláakal le baʼaloʼobaʼ. Baʼaleʼ k-ojel yaan u láaj béeychajloʼob maʼ kun xáantal. Tumen yaʼab profecíaʼob tiʼ le Biblia tsʼoʼok u béeychajloʼoboʼ, jeʼel u páajtal k-creertik yaan xan u béeychajal u maasiloʼ. *

¿Baʼaxten u j-jaajkunajoʼob Jéeobaeʼ ku creertikoʼob jach naatsʼ yanil «u baʼatelil u nojoch kʼiinil [...] Jajal Dios, tiʼ máax yaan tuláakal páajtalil»? ¿Baʼaxten ku yaʼalikoʼob minaʼan baʼax oʼolal k-chʼaʼik saajkil tiʼ le kʼiin jeʼeloʼ? ¿Jeʼel wa u páajtal a jóoʼsik u súutukil utiaʼal a wojéeltik le baʼaloʼobaʼ? Wa beyoʼ, aʼaltiʼob ka u yeʼesoʼobtech teʼ Biblia le baʼax unaj a beetik utiaʼal a wantal ichil le máaxoʼob kun salvartbil tumen Jéeobaoʼ (Apocalipsis 16:14). Le baʼax ken a kanoʼ jeʼel u yáantkech a wil yaan baʼaloʼob maas maʼalobtak ku taal u kʼiineʼ.

[Tsolajil]

[Uláakʼ baʼax ku tsoʼolol teʼ táan juʼun 8]

Le meyaj ku beetik u j-jaajkunajoʼob Jéeobaoʼ, ¿maʼ wa ta tʼaan letiʼe u profecía Jesús táan u béeytaloʼ?