¿A kʼáat wa a wojéelt u jaajil yoʼolal Dios: máax letiʼ, baʼax uts tu tʼaan, baʼax u pʼeek yéetel baʼax u kʼáat? Teʼ Bibliaoʼ Jéeobaeʼ ku yeʼesik tuláakal le baʼax kʼaʼabéet k-ojéeltik tu yoʼolaloʼ. Baʼaleʼ maʼ jeʼel máaxak jeʼel u naʼatik tubeeleʼ. ¿Baʼaxten? Tumen maʼ tiʼ tuláakal ku tsʼaʼabal u páajtalil u naʼatikiʼ. Koʼox ilik baʼax tu yaʼalaj Jesús yoʼolal lelaʼ. (Xok Mateo 11:25.)

Le ka tu yaʼalaj Jesús lelaʼ, táant u yaʼalik kʼaas baʼax tu beetaj u kajnáaliloʼob Galilea teʼ óoxpʼéel kaajoʼob tuʼux tu beetaj milagroʼoboʼ, tumen maʼ tu tsʼáaj u fejoʼob tiʼ letiʼiʼ (Mateo 11:20-24). Maʼ xaaneʼ jeʼel a waʼalikeʼ: «¿Bix túun maʼ tu tsʼáaj u fejoʼob tiʼ Jesús kex tu yiloʼob le milagroʼoboʼ?». U jaajileʼ tumen maʼ uts u puksiʼikʼaloʼobiʼ (Mateo 13:10-15).

Jesuseʼ u yojel kʼaʼabéetton kaʼapʼéel baʼal utiaʼal k-naʼatik tubeel le Kiliʼich Tsʼíiboʼoboʼ: u yáantaj Dios bey xan junpʼéel utsil puksiʼikʼal. Jesuseʼ tu yaʼalaj: «Kin kiʼikiʼtʼantkech, in Yuum, u Yuumtsil kaʼan yéetel luʼum, tumen ta weʼesaj tiʼ le máaxoʼob kabal u yóoloʼoboʼ le baʼaxoʼob ta taʼakaj tiʼ le máaxoʼob j-ojéelajoʼoboʼ yéetel yaan u naʼatoʼoboʼ». ¿Ka wilik wa baʼaxten maʼ tiʼ tuláakal máak ku tsʼaʼabal u páajtalil u naʼatik le Bibliaoʼ? Jéeoba «u Yuumtsil kaʼan yéetel luʼum[eʼ]» jeʼel u páajtal u taʼakik wa u yeʼesik u jaajil tiʼ le máaxoʼob u kʼáatoʼ. ¿Baʼax ku chʼaʼik en cuenta Dios utiaʼal u tsʼáaik u yojéelt u jaajil tiʼ wa máax?

Jéeobaeʼ ku yeʼesik u yutsil tiʼ le máaxoʼob kabal u yóoloʼoboʼ maʼ tiʼ le j-kaʼanal ichoʼoboʼ (Santiago 4:6). Ku taʼakik u jaajil tiʼ «le máaxoʼob j-ojéelajoʼoboʼ yéetel yaan u naʼatoʼoboʼ», máakoʼob noj baʼal u taaskubaʼob yéetel ku tuklikoʼob maʼ kʼaʼabéet áantaj tiʼobiʼ (1 Corintoiloʼob 1:19-21). Baʼaleʼ Dioseʼ ku yeʼesik u jaajil tiʼ le «kabal u yóoloʼoboʼ», máaxoʼob ku natsʼkubaʼob tu yiknal yéetel utsil puksiʼikʼal jeʼex mejen paalaleʼ (Mateo 18:1-4; 1 Corintoiloʼob 1:26-28). Jesús u Paal Dioseʼ tu yilaj bey u yúuchloʼ. Le ka taal way Luʼumeʼ yaʼab tiʼ u nuuktakil le judíoʼob kaʼanchajaʼan u xookoʼob yéetel jach nojbaʼal u taaskubaʼoboʼ maʼ tu naʼatoʼob u kaʼansajiʼ, baʼaleʼ le j-chuk kayoʼoboʼ, tumen kabal u yóoloʼobeʼ, tu naʼatoʼob (Mateo 4:18-22; 23:1-5; Beetaʼanoʼob 4:13). Kex beyoʼ jujuntúul ayikʼaloʼob yéetel máakoʼob xooknajaʼanoʼobeʼ tumen jach tu jaajil kabalchaj u yóoloʼobeʼ tu beetubaʼob xan u disipuloʼob Jesús (Lucas 19:1, 2, 8; Beetaʼanoʼob 22:1-3).

Koʼox kʼaʼajsik le kʼáatchiʼ t-beetaj tu káajbal le xookaʼ: «¿A kʼáat wa a wojéelt u jaajil yoʼolal Dios?» Wa beyoʼ, jeʼel u líiʼsik a wóol a wojéeltikeʼ Dioseʼ jach ku yeʼesik u yutsil tiʼ le máaxoʼob ku tuklaʼal minaʼan u naʼatoʼoboʼ, maʼ tiʼ le máaxoʼob ku tuklikoʼob jach táaj yaan u naʼatoʼoboʼ. Wa ka xokik le Biblia yéetel utsil puksiʼikʼal bey xan yéetel maʼalob tuukuleʼ, Jéeobaeʼ yaan u tsʼáaiktech junpʼéel jatsʼuts siibal: a naʼatik tubeel u jaajil yoʼolal letiʼ. Leloʼ yaan u tsʼáaik u biilal a kuxtal yéetel yaan u tsʼáaiktech u páajtalil a «kuxtal minaʼan u xuul» teʼ túumben luʼum tuʼux kun antal justiciaoʼ (1 Timoteo 6:12, 19; 2 Pedro 3:13). *