Albertoeʼ óoliʼ diez jaʼaboʼob tu beetaj u soldadoil. Bejlaʼeʼ ku yaʼalik: «Le sacerdoteoʼ tu yaʼalajtoʼon: ‹Dioseʼ tiaʼan ta wéeteleʼexeʼ›. Baʼaleʼ joʼopʼ in tuklik beyaʼ: ‹Le Bibliaoʼ ku yaʼalik: «Maʼ a kíimsaj», baʼaleʼ teneʼ táan in bin in kíims in wéet máakiloʼob. ¿Maʼalob wa túun beyaʼ?›.».

Rayeʼ juntúul soldado kaʼach táakpaj teʼ Kaʼapʼéel Nojoch Baʼateltáambaloʼ. Juntéenjeakeʼ tu kʼáataj tiʼ le sacerdoteoʼ: «Techeʼ ka taal teʼ barcoaʼ, ka orar t-oʼolal utiaʼal ka ganarnakoʼon. Baʼaleʼ ¿maʼ wa láayliʼ bey u beetik le máaxoʼob ku baʼateloʼob t-contraoʼ?». Le sacerdoteoʼ tu yaʼaleʼ mix máak u yojel bix u meyaj Dios.

¿Maʼalob wa le baʼax tu núukaj le sacerdoteoʼ?

Jesuseʼ tu yaʼaleʼ yaan junpʼéel mandamiento jach kʼaʼanaʼan u tsʼaamaj Dios: «Kʼaʼabéet a yaabiltik a wéet máakil jeʼex a yaabiltikabaeʼ» (Marcos 12:31). ¿Tu yaʼalaj wa Jesús maʼ k-jach yaabiltik le j-táanxel luʼumiloʼoboʼ? Maʼ. Baʼaxeʼ tu yaʼalaj: «Wa ka yaabiltikabaʼex ta baatsileʼexeʼ tuláakal máak ken u yojéelteʼ teʼexeʼ in disipuloʼex» (Juan 13:34, 35). Yoʼolal le nojoch yaabilajaʼ yaan u páajtal u kʼaj óoltaʼal u disipuloʼob Jesús. Letiʼobeʼ maʼatech u luʼskoʼob u kuxtal mix máak, baʼaxeʼ jeʼel tak u yóotik u tsʼáaʼob u kuxtaloʼob tu yoʼolal wa máaxeʼ.

Le yáax cristianoʼoboʼ kuxlajoʼob jeʼex tu yaʼalil Jesusoʼ. Junpʼéel enciclopediaeʼ ku yaʼalik: «Le máakoʼob káajs le iglesiaoʼ, jeʼex Tertuliano yéetel Orígeneseʼ, tu yaʼaloʼobeʼ le yáax cristianoʼoboʼ maʼ tu yóotaj u kíimsoʼob u yéet máakiloʼobiʼ, le oʼolal maʼ táakpajoʼob ichil u soldadoiloʼob Romaiʼ» (The Encyclopedia of Religion).

U j-jaajkunajoʼob Jéeobaeʼ óoliʼ tuláakal yóokʼol kaab kajaʼanoʼob. Kex beyoʼ ken yanak baʼateltáambal teʼ tuʼux kajaʼanoʼoboʼ ku beetkoʼob tuláakal le ku páajtal utiaʼal u yeʼeskoʼob yaabilaj tiʼ tuláakal máak jeʼex tu kaʼansilak Cristoeʼ.

Bey úuchik tu luʼumil Ruanda tu jaʼabil 1994 le ka anchaj junpʼéel baʼateltáambal ichil le chʼiʼibal hutu yéetel tutsioʼ. U j-jaajkunajoʼob Jéeobaeʼ junpuliʼ maʼ táakpajoʼobiʼ. Le j-Jaajkunajoʼob hutuʼob yéetel tutsiʼoboʼ tu paklan kanáantubaʼob kex anchaj u tsʼáaik u kuxtaloʼob tu chiʼ kíimil. Juntéenjeakeʼ kaʼatúul j-Jaajkunajoʼob hutuʼobeʼ tu kanáantoʼob u yéet j-Jaajkunajiloʼob tutsiʼob. Baʼaleʼ le ka chuʼukoʼob tumen u soldadoiloʼob Interahamweoʼ, aʼalaʼabtiʼob: «Yaan k-kíimskeʼex, tumen ta wáanteʼex púutsʼul le tutsiʼoboʼ». ¡Óotsil le j-Jaajkunajoʼobaʼ, tu kaʼatúulal kíimsaʼaboʼob! (Juan 15:13.)

Techeʼ ¿bix a wilik? U j-jaajkunajoʼob Jéeobaeʼ ¿táan wa u yeʼeskoʼob le yaabilaj tu yaʼalaj Jesús unaj u yeʼesik máakoʼ?