Líikʼen tu chan kaajil Warialda, Nueva Gales del Sur. Teʼeloʼ ku tséentaʼal taman, wakax; ku meyajtaʼal trigo, sorgo, cebada yéetel uláakʼ mejen paakʼaloʼob. Mimiskil le kaajoʼ yéetel óoliʼ minaʼan kʼasaʼaniliʼ.

Teen u maas nojchil tiʼ le diez paalal anchaj tiʼ in taataʼoboʼ, le oʼolal kex chéen 13 jaʼaboʼob yaanteneʼ joʼopʼ in meyaj utiaʼal in wáantkoʼob. Tumen maʼ jach xooknajaʼaneneʼ chéen tiʼ rancho kin meyaj kaʼachi. Le ka tu tsʼáajten 15 jaʼaboʼobeʼ tsʼokaʼaniliʼ in kanik in suukbes tsíiminoʼob kʼoʼoxtakoʼobeʼ.

Tin meyajeʼ jach maʼalob u binten. Uts tin tʼaan le baʼax kin beetkoʼ yéetel jatsʼuts le tuʼux kin meyajoʼ. Ken kulaken kaʼach de áakʼab yiknal le kʼáakʼoʼ kin paktik le luna, le estrellaʼoboʼ, yéetel kin wuʼuyik bix u taasaʼal u book le cheʼob tumen le iikʼoʼ. Kin tuklik kaʼacheʼ yaniliʼ máax beetmil tuláakal le jatsʼuts baʼaloʼobaʼ. Chéen baʼaleʼ tu kúuchil in meyajeʼ yaan xan baʼaloʼob kʼaastak ku beetaʼaliʼ: yaʼab u yúuchul poochʼil yéetel u tsʼuʼutsʼaʼal chamal. Maʼ xáanchaj ka suukchaj xan in beetik beyoʼ.

Le ka tu tsʼáajten 18 jaʼaboʼobeʼ, binen tu kaajil Sídney. Tin wóotaj okol teʼ ejercitooʼ baʼaleʼ maʼ kʼaʼameniʼ, tumen maʼ jach xooknajaʼaneniʼ. Tin kaxtaj uláakʼ meyajeʼ ka pʼáaten Sídney junpʼéel jaʼab. Tiʼ yáax tsikbalnajen yéetel u j-jaajkunajoʼob Jéeobaoʼ. Tu invitartenoʼob muchʼtáambal, yéetel tu séebaʼanil tin tsʼáaj cuenta jaaj baʼax ku kaʼanskoʼob.

Baʼaleʼ maʼ úuch tiʼ leloʼ suunajen meyaj ich kʼáax: tu kaajil Goondiwindi, Queensland. Tin kaxtaj meyaj, tsʼoʼok in beel, baʼaleʼ káaj xan in sen ukʼik.

Ka tsʼoʼok u yantal kaʼatúul k-paalaleʼ, káaj in tuklik baʼax kin beetik yéetel in kuxtal. Kʼaʼajten baʼax in wuʼuymaj  tiʼ junpʼéel u muchʼtáambal u j-jaajkunajoʼob Jéeoba tu kaajil Sídney, ka tin chʼaʼtuklaj in beetik wa baʼax tu yoʼolal.

Tin kaxtaj junpʼéel úuchben revista U Pʼíich Tulumil Kanan, tuʼux ku chíikpajal u direccionil le sucursal tiʼ u j-jaajkunajoʼob Jéeoba tu luʼumil Australiaoʼ. Tin túuxtaj junpʼéel carta utiaʼal in kʼáatik áantajeʼ ka taal xíimbaltbilen tumen juntúul j-Jaajkunaj jach uts u modos. Maʼ xáanchaj ka káaj in xokik le Biblia tu yéeteloʼ.

Yéetel le Bibliaoʼ tin tsʼáaj cuentaeʼ kʼaʼabéet in beetik nukuch kʼeexoʼob ichil in kuxtal. Junpʼéel teksto jach kʼuch tin puksiʼikʼaleʼ 2 Corintios 7:1. Le tekstoaʼ ku líiʼsik k-óol utiaʼal «[k-]limpiokíintikba tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ».

Tin chʼaʼtuklaj in pʼatik le tsʼuʼutsʼ chamal yéetel le káaltaloʼ. Maʼ chéen chʼaʼabiliʼ, baʼaleʼ tsʼokaʼaniliʼ in chʼaʼtuklik in kuxtal jeʼex uts tu tʼaan Dioseʼ. Le baʼax maas áantenoʼ letiʼe in beetik baʼax ku yaʼalik Romanos 12:2: «Xuʼuluk xan a kuxtaleʼex jeʼex u máakiloʼob le yóokʼol kaabaʼ, baʼaxeʼ kʼex a tuukuleʼex». Kʼuchen in naʼateʼ utiaʼal in kʼexik in kuxtaleʼ kʼaʼabéet in kʼexik xan in tuukul yéetel in wilik in vicioʼob bey baʼaloʼob kʼaastakeʼ, jeʼex u yilaʼaloʼob tumen Diosoʼ. Yéetel u yáantaj Dioseʼ páajchaj in pʼatik le tsʼuʼutsʼ chamal yéetel le káaltaloʼ.

Baʼax maas talamchaj in pʼatkeʼ letiʼe poochʼiloʼ. In wojel kaʼach baʼax ku yaʼalik Efesios 4:29: «Maʼ u jóokʼol mix junpʼéel kʼaakʼas tʼaan ta chiʼex». Kex beyoʼ maʼ páajchaj in séeb pʼatkiʼ. Baʼaleʼ tuukulnajen tiʼ Isaías 40:26, tuʼux ku yaʼalik: «Líiʼs a wicheʼex utiaʼal a paktikeʼex le kaʼanoʼ. ¿Máax beetmil le baʼaloʼoboʼ? Letiʼe Máax nuʼuktikoʼob jeʼex u nuʼuktaʼal junpʼéel ejércitooʼ, letiʼeʼ u yojel bukaʼajoʼob. Letiʼeʼ ku tʼankoʼob tu kʼaabaʼob. Letiʼeʼ jach táaj yaan u poder yéetel jach yaan u muukʼ, le oʼolal mix juntúul tiʼ letiʼob ku bineltikiʼ». Tin tukleʼ wa anchaj páajtalil tiʼ Dios utiaʼal u beetik tuláakal le baʼaloʼoboʼ —jeʼex le estrellaʼob uts tin tʼaan in chaʼantikoʼ— jeʼel xan u tsʼáaikten u páajtalil in kuxtal jeʼex uts tu tʼaanoʼ. Káaj in sen orar yéetel in maas xachkinba in pʼat le poochʼiloʼ; jujunpʼíitileʼ hasta ka tin pʼataj.

Teʼ ranchoʼob tuʼux kin meyaj kaʼachoʼ, maʼ yaʼab máakoʼob yaniʼ, le oʼolal maʼ tin jach kanaj tsikbaliʼ. Kex beyoʼ yéetel le kaʼansaj tsʼaʼabten tu muchʼtáambal u j-jaajkunajoʼob Jéeobaoʼ bejlaʼeʼ ku páajtal in tsikbal maʼalob. Leloʼ tsʼoʼok u yáantken in kʼaʼayt le maʼalob péektsiloʼ bey xan in beet uláakʼ baʼaloʼob (Mateo 6:9, 10; 24:14).

Tsʼoʼok u máan yaʼab jaʼaboʼob táan in meyaj bey anciano teʼ múuchʼuliloʼ. Jach kiʼimak in wóol in wáantik in wéet religioniloʼob. Baʼaleʼ le baʼax maas jatsʼuts in wilkoʼ letiʼe in meyajtik Jéeoba Dios yéetel in x-kiʼichpan atan bey xan yéetel in paalaloʼ.

Kin tsʼáaik nib óolal tiʼ Jéeoba úuchik u kʼamken tu kaajal kex maʼ jach xooknajaʼaneniʼ utiaʼal u kaʼansiken (Isaías 54:13). Jach jaaj baʼax ku yaʼalik Proverbios 10:22: «Le baʼaloʼob ku taal tiʼ Jéeobaoʼ ku ayikʼalkúuntik máak». Teen yéetel in familiaeʼ k-tsʼíiboltik k-kanik u maasil tiʼ Jéeoba yéetel k-meyajtik utiaʼal mantatsʼ.